Bahan PJJ 18 – 24 Oktober 2026

PUSUH SI MERINCUH NANDAI DIBATA

Yeremia 24: 4 – 7

24:4 Kemudian datanglah firman TUHAN kepadaku, bunyinya:
24:5 “Beginilah firman TUHAN, Allah Israel: Sama seperti buah ara yang baik ini, demikianlah Aku akan memperhatikan untuk kebaikannya orang-orang Yehuda yang Kubawa dari tempat ini ke dalam pembuangan, ke negeri orang-orang Kasdim.
24:6 Maka Aku akan mengarahkan mata-Ku kepada mereka untuk kebaikan mereka, dan Aku akan membawa mereka kembali ke negeri ini. Aku akan membangun mereka, bukan meruntuhkannya; Aku akan menanam, bukan mencabutnya.
24:7 Aku akan memberi mereka suatu hati untuk mengenal Aku, yaitu bahwa Akulah TUHAN. Mereka akan menjadi umat-Ku dan Aku ini akan menjadi Allah mereka, sebab mereka akan bertobat kepada-Ku dengan segenap hatinya.

Jeremia 24: 4 – 7

24:4 Kenca bage nina TUHAN man bangku,
24:5 “Aku kap TUHAN Dibata Israel, kalak si enggo iangkut ku Babilon Kupeseri ras buah ras si mejilena janah Kuperdiateken ia alu kiniulin.
24:6 Kujagai ia janah Kubaba ia mulih ku negeri enda. Kupanteki me ia dingen la Kuruntuhken. Kusuan me ia, la Kuruah.
24:7 Kupeturah i bas pusuhna maka merincuh ia nandai Aku, maka Aku kap TUHAN. E maka ia kap jadi bangsangKu dingen Aku jadi Dibatana, sabap mulihken ia man bangKu alu bulat ukurna.

(Evaluasi Sasaran Alu Fokus Engkelengi Dibata)

MODEL PJJ: KESAKSIN

I. KATA PERLEBE

Adi siperdiateken rikuken pengalamen kegeluhenta, kai nge ndia si perlu ras pentingna? Banci saja ninta ngerana, keperlun geluh subuk pangan, inemen ras siman paken si bengket ku bas keperlun pokok (primer). Rikutken perkembangen jaman enda ‘eksis’ kita i bas kegeluhen sosial dingen ternanami kita ulih perkembangen jaman enda si bengket ku bas golongen kebutuhen primer eme pengetahuan, teknologi, elektronik, informasi, ras si debanna. Dikune tersehi sie kerina, reh ulina nge dage kegeluhen manusia? Langa bo tentu sabab la bias terjeng sie kerina sidatken e maka enggo kuh dingen nggeluh kita ermalem ate.

Bahan PJJta enda ngajuk kita ngidah ras ngevaluasi kuga penandaita kerna Dibata rikutken perayaken gerejanta i bas fokus tahun 2026 enda. Arah oratenta tep-tep minggu arusna min enggo reh bagesna penandaita kerna Dibata sisembah kita dingen reh ngasupna kita mpetandakenca man kalak si deban arah kerina dampar geluhta. Erlajar arah kegeluhen kalak Juda arah siisutaken i bas kitab Jeremia si kin iakui Dibata sebage bangsaNa.

II. ISI

I bas sejarah perdalinen bangsa Juda ituriken lit 3 kali italuken raja Babel eme i bas tahun 605sM, 579sM, 586sM, janah bagin oraten PJJ nta enda nuriken kekalahen ras masa pembuangen sipeduaken (579sM). Paksa e raja Nebukadnesar maba raja Joyakin anak Joyakim rikut ras pemimpin-pemimpin agama, pande besi ras kerina kalak sibeluh ku Babel. Masa enda me Jeremia ngidah pengenehen kerna dua keranjang buah Ara (Jer 24:1).

Keranjang sipemena raga si isina buah ara si seh kal jilena (ayat 2), nuriken kerna kalak Juda si enggo ibaba Nebukadnesar ku Babel, eme kalak si nggit ipelimbarui (2 Raja-raja 24:8-17). Man bana Dibata pe erpadan dingen mbuktiken keleng ate alu naruhken mulihi bangsa e ku Jerusalem. Perpadanen enda ncidahken maka Dibata tetap setia ras nepati kerina perpadannenNa (ayat 5-6).

Keranjang sipeduaken raga si isina buah ara si macik lanai terpan, encidahken kegeluhen kalak Juda sitading i Jerusalem si la nggit ikut ku Babel termasuk i bassa raja Sedekia, pengikutna ras kerina kalak si miser ku Mesir. Man bana isingetken ukumen eme, iuru-uru, iguro-guroken, igombangi, kelihen ras ebage- bage penakit. Raja Sedekia la mperdiateken persinget Jeremia enda (Jer 24:8-10; 29:16-17).

Situhuna duana keranjang buah Ara e labo mehuli, sabab duana nge keranjang e nulak kata Dibata. Bangsa e enggo gagal nehi perpadanenna, tapi amin bage gia Dibata tetap nehken rencanaNa si mehuli guna memulihken kegeluhen bangsa e, si teridah i bas perpadanenNa i bas ayat 6-7; Kujagai ia janah Kubaba ia mulih ku negeri enda. Kupanteki me ia dingen la Kuruntuhken. Kusuan me ia, la Kuruah. Kupeturah i bas pusuhna maka merincuh ia nandai Aku, maka Aku kap Tuhan. E maka ia kap jadi bangsangKu dingen Aku jadi Dibatana, sabap mulihken ia man bangKu alu bulat ukurna.

Alu bage ukumen si isehken labo guna engkernepken tapi guna “mentransformasi” bage pe pertanggung jababen nandangi kerina dosa si enggo ilakokenna. Ukumen e tetap lit i bas bagin “berkat dari perjanjian yang berkelanjutan”. Bage me bangsa Juda arus ngidah arah pusuhna ras itandaina Dibata si isembahna e me Dibata si perkeleng ras tetap setia nehken kerina padanNa (Jer 24:7).

III. PENGKENAINA

Pusuh eme pemere Dibata simeherga kel man manusia, alu pusuh simeciho banci  itandai Dibata alu payo. Bagi isingetken I bas Matius 5:8 “Malem ate tuhu-tuhu iakap kalak si meciho pusuh peratenna; sabap itandaina me tuhu-tuhu Dibata”. Erbage-bage pengalamen kegeluhenna mahan reh ngasupna kita nandai Dibata alu pusuhna sebage sada penggejapen dirina tetap lit i bas keleng ate Dibata.

Ngerana-ngerana kerna pusuh, lit piga-piga hal siperlu sieteh kerna pentingna pusuh si memiliki peran sentral i bas geluhta, terlebih guna mpeteguhi persadanta ras Dibata, bage pe i bas mempengaruhi kegeluhenta guna ngelakoken perbahanen simehuli ras hubungenta ras Dibata eme:

1. “Alu pusuh me kita erkiniteken man Dibata” (Rom. 10:10) dingen i bas pusuh me kata Dibata rurat dingen erbuah. Pusuh igambarken sebage taneh si mehumur singasup peturahken benih alu mehuli (bdk. Mat 13:19).
2. Pusuh eme penggerak sikap ras tindaken, sie teridah i bas pengajaran Jesus si erkawiten kerna pusuh, umpamana i bassa Matius 5:19 Jesus nuriken perbahanen dosa pe rehna i bas pusuh nari, Matius 6:21 ija ertandu, ije pe ukurndu, tentu bage me ka me pe pusuh si ingani Kesah Sibadia, maka sikap ras tindaken si ihasilkenna pe eme kerina simehuli eme buah Kesah Si Badia (bdk. Gal 5:22).
3. Pusuh pe mbelin ulihna i bas mpengaruhi hubungen kegeluhen. Keadaan pusuh banci lit i bas situasi merawa, terluka, cemburu, curiga, sombong, rsd. Tentu pusuh sibage erbahanca hubungenta ras kalak si deban la mehuli, e maka pusuh pe perlu ijaga ras ibersihken dingen iiani Kesah Si Badia (bdk. Roma 12:16).
4. Pusuh pe erpengaruh ku bas kesehatan. Pusuh si sehat mahan bana kula pe sehat (Kuan-kuan 17:22), pusuh si dem alu kedamen, ketenengen, dem alu keriahen, mereken ulih ku bas Kesehatan.
5. Pusuh nambahi gegeh. Pusuh si ermeriah ukur nambahi gegeh ntah pe semangat (Kuan-kuanen 15:13). Adi sehat pusuh perukurenta, aminna mbue gia dahin dingen bicara latih pe dagingkula tetap ergiah-giah i bas simehuli.
6. Pusuh simehuli njemba kita erbahan simehuli terlebih-lebih i bas nehken keleng ate, sabab pusuh njemba kita guna ngelakoken perbahanen-perbahen simehuli (Bdk, 1 Yoh 3:17).

Bage me kecibal pusuh i bas geluhta sue ras tema PJJ nta, Pusuh Si Merincuh Nandai Dibata, si idah uga Dibata mpekena pusuh kalak Juda dingen arah arah pusuhna itandaina Dibata siperkuah dingen perkeleng dingen njemba ia nandai Dibata. Arah pusuhta lah sitandai Dibata, la terjeng arah pemeteh, sabab pusuh simerincuh nandai Dibata ietehna tujun geluhna eme mpermuliaken Dibata i bas kerina dampar.

I bas pengalamen kegeluhenta, banci jadi ka pe melala kita rusur ngerana ras pusuhta kerna erbage dampar. I bas sie arus si inget, Kesah Si Badia ringan kap i bas pusuhta e maka tupung kita ngerana ras pusuhta Kesah Si Badia pe ngerana man banta si nerangi perukurenta gelah kai pe siputusken i bas pusuhta tetap sue ras peraten Dibata.

IV. DISKUSI :

1. Rikutken pengalamen kalak Juda i bas ogenta enda, bengket ku kelompok siapai nge kita , rikutken kerincuhen pusuhta?
2. Sedekah sada tahun enda, enggo nge tersehi perayaken gerejanta? Kuga nge penandai ta kerna Dibatata?

V. USULEN ENDE-ENDEN:

1. KEE GBKP No. 1: 1-2 O, Dibata Si Mulia
2. KEE GBKP 185: 1, 2 Dibata Bapanta
3. KEE GBKP 263: 1, 2 Adi Kuidah Ampar Bintang
4. KEE GBKP 354: 1, 3 Kam si mbelin