BIMBINGAN PA MAMRE TANGGAL, 27 SEPTEMBER - 03 OKTOBER 2026

Tutus Ersembah Man Dibata

Ogen : Masmur 100 : 1-5

1 Masmur pengataken bujur. Ersuraklah man TUHAN, o pertibi kerina.

2 Nembahlah man TUHAN alu ukur meriah, dahilah ku adep-AdepenNa janah rende meriah.

3 Ula lupa maka TUHAN kap Dibata, Ia si nepa kita, emaka SikerajangenNa nge kita, kita kap BangsaNa, kita kap RarasenNa.

4 Bengketlah ku bas pintu GerbangNa alu ende-enden pengataken bujur, ku bas KesainNa alu puji-pujin. Katakenlah bujur man BaNa dingen pujilah Ia!

5 Sabap TUHAN mehuli kap dingen tetap Ia erkeleng ate, Ia setia, tetap rasa lalap.

Masmur 100 : 1-5

1 Mazmur untuk korban syukur. Bersorak-soraklah bagi TUHAN, hai seluruh bumi!

2 Beribadahlah kepada TUHAN dengan sukacita, datanglah ke hadapan-Nya dengan sorak-sorai!

3 Ketahuilah, bahwa Tuhanlah Allah; Dialah yang menjadikan kita dan punya Dialah kita, umat-Nya dan kawanan domba gembalaan-Nya. 

4 Masuklah melalui pintu gerbang-Nya dengan nyanyian syukur, ke dalam pelataran-Nya dengan puji-pujian, bersyukurlah kepada-Nya dan pujilah nama-Nya!

5 Sebab TUHAN itu baik, kasih setia-Nya untuk selama-lamanya, dan kesetiaan-Nya tetap turun-temurun.

Tujun : Gelah mamre:

1. Meteh pentingna kebaktin ras kebadian kebaktin ibas gerejanta
2. Tutus ibas ngikuti kebaktin-kebaktin menaken awal seh ku pendungi kebaktin.

I. KATA PENARUH

Pedah Dibata sipempatken emekap “Inget wari sabat janah pebadiakenlah wari e” (Keluaren 20:8). Tenah enda ipeseh Dibata gelah silakoken alu tutus, enda me tandana kita sikerajangen Dibata, enda me tandana kita enggo iserapken jadi anak-anakNa. Selaku Mamre, uga dage sedekah enda kwalitasta ersembah man Tuhan? Enggo nge sigejapken penting kal kebaktin wari minggu? Uga sedekah enda kita njaga kebadian tupung kebaktin? Uga ka pengidahta kerna alur ibadah meinggunta pemenana seh pendungi kebaktin, enggo nge payo pengangkanta? Ibas paksa enda mari ras kita mpelajaran tanah Tuhan kerna Ibadah, gelah kulebe enda banci reh ulina caranta Ersembah man Dibata siteridah ibas geluh si tep-tep warina.

II. URAIAN TEKS

Kitab Masmur eme Kitab si nggedangna erkiteken beliganna lit 150 bindu. Isi Masmur eme ende-enden pujin, pertoton mindo penampat, bagepe syair kerna kiniteken nandangi Dibata (spiritualitas terhadap Allah). Kitab Masmur melala itulis raja Daud (73 Masmur). Penulis Masmur sideban eme Musa, Salomo, Asaf, Atan, Heman, ras anak-anak Korah. Kata Masmur ibas Septuaginta eme “Psalmoi” rehna ibas kata kerja “Psallo” si ertina “memetik atau mendetingkan” si berhubungan ras alat musik. Jenari kata enda ndai erkawiten ras ende-enden eme “Psalmos” ntah pe kumpulan nyanyian (Psalterion).

Bahan PA-nta (Masmur 100:1-5) judulna Ende-enden Pujin, ibas cakap Heber itulisken לתוֹדָה מִזְמוֹר (Mizmor Letodah). Mizmor ertina Masmur, Letodah ertina untuk ucapan syukur ntah pe untuk persembahan syukur (Le = untuk/kepada; Todah = Ucapan Syukur). Emaka Mazmur 100 ikataken pe “Mazmur untuk persembahan syukur”. Janah inti Masmur 100:1-5 emekap תּוֹדָה “todah” ucapan syukur. Alu bage ibas ayat 1-5 tangkas si idah belinna pengataken bujur, janah Masmur enda rusur iendeken jadi enden pembukan ibadah ntah pe ende-enden tupung barisen perpulungen bengket atena ku rumah pertoton (bait suci).

Mari si nehen piga-piga cataten kerna teks PA Mamre-nta enda :

• Ayat 1-2 : ... Pemasmur ngajuk kerina pertibi enda gelah ersurak, nembah, ras nggit ndahi Tuhan Dibata. Ilakoken erpalasken ukur ras perbahanen si dem keriahen (sukacita). Ibas ayat 2 lit itulisken kata kerja עָבַד (ivdu) ertina “layani” atau “sembahlah”. Kata enda rehna ibas kata עָבַד (avad) si ertina “melayani,” “bekerja,” ntah pe “menyembah.” Ertina, beribadah nggo jadi sada kearusen man bangsa Tuhan, sada tanggung jabab, kesetian lako mbangun hubungen si terus-menerus, nggeluh ersembah alu payo man Dibata si mada kegeluhen bangsa e.
• Ayat 3 : ... Pemasmur mpeseh pengangkan ise Dibata ras kai ndube perbahanenNa man bangsaNa. Nina Pemasmur, Ingetlah maka Tuhan emekap Dibata si nggo nepa manusia, sikerajangenNa kap manusia e, bangsaNa, rarasenNa. Ijenda erbahanca la pernah terputus relasi Dibata ras manusia. Lit telu alasen kepemiliken Dibata nandangi bangsaNa : Pemena, erkiteken Dibata si nepa manusia; Peduaken, erkiteken Dibata si pilih manusia (bdk. Epesus 1:11,18); Peteluken, erkiteken Dibata si mpermakani bangsaNa e desken sekalak Permakan ngkelengi biri-biriNa (Bnd Mazmur 95:7).
• Ayat 4 : ... ibas ayat 4, ipersingeti alu tegas pengajuk lako beribadah man Tuhan. Ipake kata בּוֹא (bo’u) rehna ibas kata kerja בּוֹא (bo) ertina “datanglah” atau “masuklah” (perintah untuk banyak orang). Kata בּוֹא (bo) itulis ibas kitab Padan Sindekah buena lit 2.750 kali. Pemaken kata enda igunakan man kalak si erlajang (perantau) si mulih ku kuta kemulihenna, tentu ije sampur ketedehen ate kempak kuta kemulihenna. Tole pe, kata enda iertiken pengajuk Dibata nandangi perpulungenNa gelah mulihken ku perpadanen (berit- בְּרִית) si nggo irakut Dibata ras bangsaNa.
• Ayat 5 : ... Enda me palas engkai maka bangsa-bangsa ersembah man Tuhan, emekap : Sabap TUHAN mehuli dingen tetap Ia erkeleng ate, Ia setia, tetap rasa lalap. Ibas ayat enda lit itulisken חַסְדּוֹ (chasdo) si ertina “kasih setia-Nya” atau “anugerah-Nya.” Kata enda rehna arah kata חֶסֶד (chesed : kasih setia, anugerah, atau belas kasih yang teguh). Ibas teologi kalak Heber, chesed emekap kasih yang teguh dan tidak berubah, kwalitas kekelengen ras kesetian si bagenda eme kwalitas keleng ate si rehna ibas Dibata. Palasna erkiteken perpadanen si nggo pernah padanken Dibata man bangsaNa. Tole kerna kata חֶסֶD (chesed) kitab Masmur eme kitab si mbuena make kata enda. Buena lit 127 kali. Salah sada masmur si melala make kata חֶסֶד (chesed) emekap Masmur 136.

III. PENGKENAINA

Ersembah man Dibata (beribadah) emekap pendilo Dibata man banta manusia, la banci lang tanggung jababta selaku Mamre eme ersembah alu tutus (beribadah). Terlebih kita Mamre emekap Imam tengah Jabu, pemimpin spiritualitas, simabai anak jabunta rembak ras Dibata. Ibadah harus jadi gaya hidup sekalak perbaban GBKP ibas geluhna sitep-tep wari.

Jenari, ersembah eme tanda pengataken bujurta man Tuhan erkiteken perbahanenNa simbelin. Enggo leben ikelengi Dibata kita, berinisiatif Dibata ndahi kita arah anakNa Jesus Kristus (Joh. 3:16), perkuah ateNa mbelin, la ersibar, la erkeri-kerin man banta, janah pe la tersipati kita (amazing grace). Enda me palas engkai maka kita arus ersembah man Dibata (beribadah).

Sue ras pengertin “Ibadah” (ivdu, avad) si nggo isingetken idatas ndai, mari silakoken peribadahenta alu dem kebadian ras kinitutusen, dem alu penghayaten. Ibadah eme dalanta ngelai Dibata, bekerja, menyembah alu totalitas. Ibadah eme tanggung jababta, kesetianta mbangun relasi terus-menerus ras Dibata. Ibas dampar sideban, payo tuhu lit tantangen ibas kita ersura-sura ersembah (beribadah) umpamana : Sura-sura daging mbelin denga (mekisat, lit perukuren negative : mbiar ipandang kalak sok bujur, sok suci, pebujur-bujurken); mengutamaken dahin pribadi asangken kebaktin, Jarak ku gereja ndauh (faktor geografis, cuaca, alam, rsd); Lit konflik internal ras Serayan ntah Pengurus gereja; Lit perukuren negatife (pikiren sempit) kerna model ibadah ibas GBKP kurang menarik; Terpengaruh pengajaren papak arah sekte/aliren si la sue ras teologi GBKP, ras mbue denga hal sidebanna jadi tantangenta.

Ibas konteks Peribadaten Wari Minggu (Erkawiten ras Liturgi GBKP), meherga ras mehagalah siakap wari sibadia e (Keluaren 20:8), erkiteken ije me Dibata nenahken kita pulung beribadah secara komunitasta kalak Kristen (persadan, kelompok, kebersamaan). Secara ilmu Liturgi, Ibadah ertina “ruang perjumpan” Manusia ras Dibata. Manusia mereken dirina, melayankan diri, ngelai, berbakti/kebaktin. Jadi liturgi eme kalak si ertanggungjawab nehken pelayanan, si mereken diri ngelai alu meteruk ukur. Liturgi e bali ertina ras Ibadah eme nggeluh ibas biak-biak Dibata/Jesus Kristus si teridah arah geluh si tep-tep wari.

Jenari, sue ras konsep Liturgi, keseluruhen Ibadahta eme satu kesatuan yang utuh ertina kerina alur liturgi e penting ras bermakna teologis. Menaken kata pengalo-ngalo, momo, kata penaruh, votum-salam, ras seterusnya, seh ku kotbah, pertoton Tuhan ras Pemasu-masun, kerinana bernilai teologis ras berkesinambungan. Emaka tep-tep point Liturgi e si ikutilah alu payo, tutus, nggejapken kehadiren Dibata. Ula lit pengangkan maka Kotbah me si jadi “menu utama”, seh maka alur liturgi sideban nggo lanai siakap seri ergana. Lampas kita reh ku gereja gelah sidat kerina alur ibadahta secara utuh, ula nandangi khotbah kita reh apaika kita reh nandangi kolekte ras pemasu-masun. Tutus ateta ngikuti kerina alur ibadahta, ula tupung Momo ibas gereja nggit ka kita ercakap-cakap kudarat gereja, sebab banci nge kita ercakap-cakap kenca dung Ibadah. Ibas mekuasen gereja pe sijagalah ketenengen peribadahenta (Hp. silent), focus nandangi kehadiren Dibata ibas peribadahenta.

Bagepe hal sidebanna si nggo iaturken gerejanta masing-masing (khususna kenca dung ibadah) si ikutilah alu mehuli, umpamana sisalamen ras si ertugas ibas pintun, asa bancina silakoken; bagepe ntah lit denga tambahen momo kenca kebaktin, ras sidebanna tetaplah siikuti alu mehuli. Terpujilah gelar Tuhan arah Ibadah si ilakoken kita, Solideo Gloria !

IV. DISKUSI

1. Erpalasken Masmur 100:1-5, engkai maka kita perlu Ersembah man Tuhan, ras uga kin oratna perbahanen kalak si reh ku rumah pertoton?
2. Lit piga-piga Perbapan, enggo jadi biak/kebiasanna (tradisi) tupung wari minggu terlambat rusur ia seh ku gereja, enggo hampir seh bagin Kotbah. Tupung kebaktin pe ersora rusur hp-na, sibuk, kuskas, sekali-sekali aloina ka si nelpon ia. La lit ketenengenna beribadah. Ibas penggejapenna, ku gereja e seri ras mengisi waktu kosong saja. Penungkunenna : Uga nge siakap cara ersembah Perbapan enda? Kuga kin arusna erpalasken pelajarenta wari enda? Mari si diskusiken

USULEN ENDE-ENDEN

1. KEE GBKP No. 205:1-2
2. KEE GBKP No. 278:1-2
3. KEE GBKP No. 348:1-2
4. KEE GBKP No. 420:1 (Persembahen)

Pdt. Mika Ginting, S.Th.