Erberita

BIMBINGAN PA SAITUN GBKP TAHUN 2026

TANGGAL, 27 September-03 Oktober 2026

Ogen : Keluaren 17:14-15

Perang ras bangsa Amalek

Indonesia:

[14] “ Kemudian berfirmanlah Tuhan kepada Musa: ”Tuliskanlah semuanya ini dalam sebuah kitab sebagai tanda peringatan, dan ingatkanlah ke telinga Yosua, bahwa Aku akan menghapuskan sama sekali ingatan kepada Amalek dari kolong langit.”

[15] Lalu Musa mendirikan sebuah mezbah dan menamainya: ”Tuhanlah panji-panjiku!” ”

Karo:

[14] “Kenca bage nina TUHAN man Musa, “Suratken lah turi-turin kemenangen enda gelah jadi peringet-ingeten. Kataken man Josua maka ateKu ngkeriken kerina bangsa Amalek.”  

[15] Ipajekken Musa sada batar-batar ingan persembahen janah ibahanna gelarna, “TUHAN kap Panji-panjingku.” ”

Tema: Tuhan Kap Panji-Panjingku

Tujunna:

Gelah Saitun:

·       Meteh maka kemenangen si enggo ibereken Dibata man Israel

·       Naksiken tanda kemenangen si enggo ibereken Dibata alu er -PI

Metode: Aksi PI

I. BENA KATA

Ibas Kamus Karo Indonesia siisuratken Darwin Prinst, Panji-panji e ertina eme bendera tanda kesatuan. Bendera eme sarana, lambang identitas Negara sierbahanca ia terhormat, medaulat ras eme bentuk eksistensi (keberadaan) Negara si enggo Merdeka. Bendera eme si empersadaken kerina warga Negara ija pa pe tading. Bendera tanda kemenangen si memerdekaken masyarakat si medolat. Pajekna bendera ibas peristiwa peperangen ras ibas upacara-upacara kenegaraan e nuduhkenca maka kemenangen ras pengergaan si ilakoken man pahlawan singgit ngasamken kesahNa guna negarana gelah jadi kalak si Merdeka.

 II. MPEGESI OGEN

Peperangen bangsa Israel ras bangsa Amalek i Rapidim nuduhken piga-piga hal sipenting guna jadi pelajaren kiniteken ibas ngelawan musuh eme:

1. Lit pendelegasian tugas si ipeseh Musa man Josua guna milih kalak si handal ibas erperang dingen lit teridah saling mpercayai ibas dahin siman dahinken. Kerina ngaloken tugasna ras ndahiken dahin sue ras perentah pemimpinna.

2. Musa selaku pemimpin pe endahiken dahinna ras Harun bagepe Hur guna tetap mindo penampat kuasa Dibata gelah banci bangsa Israel menang. Ibas ndahiken tugasna pe arus nge tetap lit kerjasama simehuli guna numpak-numpak pemimpin si kote. Gegeh pemimpin eme ibas kerjasamana. 

3. Kuasa Dibata tangkas teridah ibas pengendesen pemimpin ras pasukan si erperang man Dibata bagepe ibas kerja samana simehuli makeken strategi perang ngelawan musuh. Alu bage ialoken me kemenangen

4. Kenca ialoken kemenangen ilakoken hal sicukup penting guna sejarah man kerina sinursur Israel eme alu nuratken kemenangen e guna jadi tanda peringet-ingeten. Ras majekken batar-batar persembahen man Tuhan siigelari Tuhan kap panji-panjiku.

Alu bage tangkas kal teridah maka kemenangen bangsa Israel ibas naluken kerina musuh-musuhna eme persadanna ras Dibata bagepe lit kerja sama tim simehuli ibas ia kerina guna saling mperlengkapi. Kemenangen e meherga sabab tangkas kal ije peran Dibata. Tuhan kap kap Panji-panjiku e nuduhkenca maka bendera kemenangen siempersadaken bangsa pilihen Tuhan ibas persadan sinteguh.

III. PENGKENAINA

Kita eme bangsa pilihen Tuhan si enggo bebas ras merdeka alu bage kita pe labo banci ijajah kuasa dosa. Panji-panji Tuhan arus pajek ibas semangat juangta guna berkat naksiken, mberitaken kerna perbahanen Dibata simbelin sabab kita enggo ngaloken keselamaten. Kalak sienggo merdeka/selamat la banci kem/sinik entah mbuniken kai sienggo ialokenna ibas Dibata nari. Tapi ia berkat, lawes guna erberita simeriah guna mberitaken kai keriahen sienggo lalokenna ibas geluhna. Bageme pe Saitun pe berkatlah erberita simeriah naksiken perbahanen Tuhan ibas geluhndu, ula kataken kam enggo metua, lanai ngasup, lanai lit gegehndu. Kai silit ibas kam guna erberita simeriah e lah ipakekenndu. Banci ka ikut ibas program PI Runggun, sektor, mpersada buaten lit guna ngelitken belanja. Detaser ibas daerah PI gelah banci reh teremna kalak i merdekaken ras iselamatken arah Kata Dibata. Kata Dibata eme jadi senjata simulahi kalak ibas iketen dosa.

IV. PERTOTON

Kami ngataken bujur Tuhan, nggo idah kami melala kemenangen si iberekenNdu man kami. Maka ibas umur kami si nggo metua, jadiken e jadi kesempaten kami ersaksi, nuriken berita keriahen si nggo ialoken kami, Amin.

V. DISKUSI

1. Turiken kuga Tuhan jadi Panji-panji ibas kegeluhenndu erpalasken teks enda ?

2. Kai aksi banci ilakokenndu guna erberita Simeriah maka enterem kalak lanai ijajah kuasa dosa tapi jadi kalak merdeka? Bahan Aksi PI si banci ilakoken Saitun arah ndukung pelayanan PI baik i Runggun ntah pe bas klasista.

VI . USULEN LAGU

1. KEE GBKP No.108:1-2

2. KEE GBKP No. 234:1-2

3. KEE GBKP No. 254:1-2

Pdt. S.Magdala Munte.MTh.