BIMBINGAN PA MAMRE TANGGAL, 20 SEPTEMBER -26 SEPTEMBER 2026

Ndungi Persoalen

Ogen : Matius 18:15-17

15 "Adi ersalah seninandu man bandu, katakenlah man bana salahna e, asum kam dua-dua. Adi erkadiola ia, nggo kap idatndu ia mulihi.

16 Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: 'Tep-tep pengadun nggo sah adi lit dua ntah telu kalak saksi.'

15 Tapi adi teman-temanndu e pe la ibegikenna, sehkenlah persoalen e man perpulungen. Adi perpulungen e pe la ibegikenna anggap sajalah ia bali ras kalak perbegu ntah pe kalak si muat cuke.

Matius 18:15-17

15 "Apabila saudaramu berbuat dosa, tegorlah dia di bawah empat mata. Jika ia mendengarkan nasihatmu engkau telah mendapatnya kembali.

16 Jika ia tidak mendengarkan engkau, bawalah seorang atau dua orang lagi, supaya atas keterangan dua atau tiga orang saksi, perkara itu tidak disangsikan.

17 Jika ia tidak mau mendengarkan mereka, sampaikanlah soalnya kepada jemaat. Dan jika ia tidak mau juga mendengarkan jemaat, pandanglah dia sebagai seorang yang tidak mengenal Allah atau seorang pemungut cukai.

Tujun : Gelah Mamre:

1. Meteh pentingna ndungi persoalen/konflik alu cara-cara sipayo.
2. Meteh pentingna ndalanken kekelengen ras kiniteruken rukur ibas ndungi konflik/perjengilen

I. Kata Penaruh Adi isuruh kita mpersingeti salah kalak si deban, mawen banci mekapes siakap. Salah sada tugas si rusur sisilahken bas pelayanan eme mpersingeti ntah pe “menegor” kesalahen kalak. Dahin enda la mesukah; sabab banci jadi nembeh atena nandangi kalak si mpersingetisa. Jenari lit ka kalak si la nggit ngaloken kata persinget kerna kesalahen si ibahanna (isuriangi) amin gia situhuna si e kari jadi kiniulin man bana. Bagi siikataken nabi Esekiel ija isingetken maka adi la sipersingeti seninata si erbahan dosa, kita pe pagi ituntut Dibata. Tapi adi enggo si persingeti ia, kita enggo pulah ibas pengadilen Dibata nari. Tanggung jawab kita terhadap saudara yang berdosa, tidak dibangun melalui fakta bahwa ia telah bersalah kepada kita, tetapi oleh kenyataan bahwa ia telah berbuat dosa dan merugikan dirinya sendiri.

II. Uraian Teks

Kitab Injil Matius 18:15-17 nuriken kerna Jesus mereken perentah kerna kai si arusna ilakoken adi kune lit anggota ni perpulungen erbahan dosa. Kata “kam” si tersurat ibas teks enda bentukna tunggal, si nuduhken maka ayat 15-17 nuriken kerna tanggung-jawab pribadi sekalak anak Tuhan nandangi seninana si sada kiniteken. Enda labo kerna perbahanen/tindakan pemimpin gereja nandangi anggota perpulungenna. Ibas teks enda, la lit ituriken keterangan kerna jenis dosa si ilakoken. Tapi, isuratken maka kalak e erbahan dosa janah arus ipersingeti kerna dosana e.

Makna kata “seninandu” enda itujuken nandangi kerina jelma tanpa pengecualian: subuk nguda ntah pe metua, subuk dilaki ntah pe diberu, subuk kalak banyak ntah pe kalak musil, subuk kalak si meganjang sekolahna ntah pe si la erpemeteh, subuk peminpin ntah pe anggota, kerina ia arus ipersingeti tupung ia erbahan dosa.

Lit 3 tahap ibasa mpersingeti si isingetken, eme:

• Sipemena eme “pedempak”, ertina secara pribadi. Ibas ayat 15 isingetken “sanga kam dua-dua ertina la lit kalak sideban si hadir ije. Katakenlah man bana salahna e “tegurlah” lit kata “pergilah” (hypage, semua versi Inggris). Kata enda nuduhken sada bentuk sikap berinisiatif. Kita la banci ertima dingen natap-natap saja tupung si idah seninanta sada kiniteken erbahan dosa. Tahap enda ilakoken erkiteken si idilona la lit ije sura-sura guna mpermelaken kalak si man suriangen e. Tujunna eme ndatken mulihi seninanta e desken biri-biri si enggo papak (ayat 12, 15b). Ibas tahap enda idahi secara pribadi kalak si enggo “erbahan kesalahen”, adi si enda enggo ilakoken janah la tudu/la teralokenna emaka iterusken ku tahap si peduaken.
• Sipeduaken eme ngelakoken perjumpa janah ije lit ka tambahna ibahan si jadi saksi. Ibas ayat 16 ikataken “Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: 'Tep-tep pengadun enggo sah adi lit dua ntah telu kalak saksi'”. Ibas tahap enda, persinget ntah penuriangi ilakoken ilebe-lebe saksi. Tujunna, gelah persinget e reh megegehna asangken persinget si nggo ibelasken ope si enda. Tambah si e, percakapen si enggo ilakoken nggo reh mbagesna. Arapenta maka, adi banci min ibas tahap enda kalak si ipersingeti baci min ngejabken kesalahenna dingen nggit mperobahisa. Tapi adi kune bas tahap enda pe baci teralokenna, emaka iterusken ku bas langkah selanjutnya.
• Sipeteluken eme isehken/iendesken man perpulungen: ertina perpulungen secara lembaga/persekutuan ikut muat bagin guna ncakapken persoalen enda. Jenari, adi ibas tahap enda pe la terdungi/ lanai tersuriangi emaka isehken me “siasat gereja”. Ibas ayat 17b isingetken maka kalak si bage bali ras kalak perbegu ntah pe kalak si muat cuke. Ertina lanai bagin perpulungen/jemaat.

Pemungut cuke eme sada profesi mpepulung pajak guna pemerintah Roma, alu upah si meganjang. Biasana, pemungut cuke enda eme kalak Yahudi. Tapi, ia la segan guna meras dingen erbahan mesera akap bangsana jine erkiteken ia ilindungi pemerintah Roma. Pemungut cuke la merasa bersalah. Perbahanen sibagenda rupa me si erbahanca para pemungut cuke dingen icakapken kalak Yahudi. Adi sekalak kalak Kristen enggo ipersingeti rulih-ulih alu ngikutken perentah Tuhan Yesus tapi tetap ipemersikna ukurna, maka ia perlu ipersingeti alu tegas. Disiplin gereja isehken man bana alu ipedauh (Tager: ikepkep khusus) ibas persadan perpulungen nari segelah ia erkadiola nandangi perbahanenna jenari tedeh atena guna mulihken ku persadan perpulungen Kristus.

Secara etimologi, konflik rehna ibas Bahasa latin nari; configure, asal kata “con” si ertina “bersama” ras “fligere” si ertina “benturan dan tabrakan”. Jadi, “konflik” ibas kegeluhen sosial eme benturan kepentingan, keinginan, pendapat yang melibatkan dua pihak atau lebih.

Konflik/perjengilen eme sada konsekuensi ibas interaksi kegeluhen bergereja ntah pe ermasyarakat. Matius 18:15-17 eme sada bentuk pengajaren Tuhan Yesus si mereken tahapan/langkah-langkah ibas ndungi konflik/perjengilen itengah kegeluhen perpulungen. Alkitab ngajarken kita guna ngenehen konflik/perjengilen labo jadi sada bentuk ketidaknyamanan ntah pe guna maksaken sura-sura nandangi kalak sideban, tapi jadi sada kesempaten guna nuduhken keleng ate ras kuasa Tuhan.

Ogenta enda nuriken kerna kai si arus ilakoken/petunjuk si ibereken Tuhan Yesus nandangi ajar-ajarNa. Enda me sijadi dasar ibas proses ndungi konflik/ perjengilen alu mpersingeti/ngajarken/nuriangi kalak si erbahan dosa ras kalak si paksana lit ibas kondisi konflik/perjengilen.

III. PENGKENAINA

John Calvin ibas bukuna si erjudul “Institutes of the Christian Religion.” Gereja tidak hanya memiliki kuasa untuk pengajaran dan membuat peraturan gereja, tetapi juga memiliki kuasa untuk menjalankan disiplin. Kuasa itu berdasarkan atas kuasa Kristus yang diberikan kepada gereja yaitu kuasa untuk menegur seseorang yang berdosa dengan prosedur yang tepat.

Tuhan ersura-sura njadiken anak-anakNa jadi kalak si nehken alat perdamen i tengah konflik/perjengilen si lit itengah perpulungenNa. Kata Dibata mpersingeti kita kerna tugas panggilan ras tanggung jawab selaku suruh-suruhen Tuhan eme guna njaga ras mabai seninanta si nggeluh ibas dosa gelah ia mulihken ku bas dalan si benar dingen payo, ipepalem dingen iperdameken ras Dibata. Tugas enda labo terjeng jadi tugas ras tanggung jawab pendeta bagepe pertua ras diaken saja, tapi tugas enda jadi tanggung jawab kerina perpulungen. Palasta nuriangi/mpersingeti kalak si deban ibas ia nggo erbahan dosa eme kekelengen. Labo menghakimi, tapi mabai ia gelah mulihken jadi rarasen Dibata.

IV. DISKUSI

1. Ogeken mulih ayat 17b. Turiken penggejapenndu kerna teks enda!
2. Turiken pengalamenndu, ibas kam mpersingeti kesalahen si ni bahan temanndu subuk ras sangkep nggeluhta, subuk teman ibas gereja, subuk ibas keluarga

USULEN ENDE-ENDEN:

1. KEE GBKP No. 424:1, 3
2. KEE GBKP No. 499:1
3. KEE GBKP No. 350:1, 2
4. KEE GBKP No. 302:1 (Persembahen)