Bahan PJJ 22 – 28 Maret 2026

LALAP REH TERANGNA

Kuan-kuanen 4: 10 – 19

Amsal 4: 10 – 19

4:10 Hai anakku, dengarkanlah dan terimalah perkataanku, supaya tahun hidupmu menjadi banyak.
4:11 Aku mengajarkan jalan hikmat kepadamu, aku memimpin engkau di jalan yang lurus.
4:12 Bila engkau berjalan langkahmu tidak akan terhambat, bila engkau berlari engkau tidak akan tersandung.
4:13 Berpeganglah pada didikan, janganlah melepaskannya, peliharalah dia, karena dialah hidupmu.
4:14 Janganlah menempuh jalan orang fasik, dan janganlah mengikuti jalan orang jahat.
4:15 Jauhilah jalan itu, janganlah melaluinya, menyimpanglah dari padanya dan jalanlah terus.
4:16 Karena mereka tidak dapat tidur, bila tidak berbuat jahat; kantuk mereka lenyap, bila mereka tidak membuat orang tersandung;
4:17 karena mereka makan roti kefasikan, dan minum anggur kelaliman.
4:18 Tetapi jalan orang benar itu seperti cahaya fajar, yang kian bertambah terang sampai rembang tengah hari.
4:19 Jalan orang fasik itu seperti kegelapan; mereka tidak tahu apa yang menyebabkan mereka tersandung.

4:10 Begikenlah aku o anakku. Tutuslah atendu megiken kai si ku kataken man bandu maka gedang umurndu.
4:11 Enggo kuajarken man bandu kepentaren dingen dalan kegeluhen si payo.
4:12 Adi nggeluh i bas kepentaren, la kam dat alangen adi kam erdalan; la kam tertuktuk adi kam kiam.
4:13 Ingetlah lalap kai si enggo ipelajarindu. Jagai lalap, sabap e kap kegeluhenndu.
4:14 Ola kam lawes kempak perlawes kalak jahat. Perbahanenna pe ola kal usih.
4:15 Tulak janah sirangilah si jahat; ola nilah, tapi pinterkenlah perdalanndu.
4:16 Kalak jahat la tertunduh adi langa erbahan jahat. Langa madat matana adi langa ncilakaken kalak.
4:17 Kejahaten ras kekejamen desken pangan ras inemen kap man kalak enda.

4:18 Dalan si idalani kalak bujur seumpama matawari pultak erpagi-pagi, lalap reh terangna seh pantek ciger.
4:19 Tapi dalan si nidalani kalak jahat bali kap ras berngi si gelap, jongkang ia tapi la ietehna kai si mahanca.

(HUT Persekutuan Kategorial)

MODEL PJJ: PUJIAN KATA PERLEBE

Bas kegeluhenta i doni enda, megati kita ibabai ku bas pilihen-pilihen si sulit. Ku kawes tah kemuhen, terus ntah ngadi, nangkeng ntah ngincuah ras si debanna. Tiap pilihen i bas geluhta tentuna lit ulihna man banta. Salah pilih ntah salah muat keputusen, tentuna sidatken ulih si la mehuli bage pe sebalikna adi pas pilihenta, rulih mehuli ka kita. Jhon Maxwell ngataken : “Hidup adalah soal pilihan, dan setiap pilihan yang kamu buat membentuk dirimu sendiri”. Ertina kai si pilihndu e nentuken uga jadina kam. E maka ula salah pilih gelah ula bene kita erkiteken pilihenta. Sik-sik lebe maka tindes, pergermetken lebe, pelajari, ukuri e maka ban keputusen gelah ula sempat erkadiola. Selaku kalak Kristen pe kita iperhadapken ku bas pilihen-pilihen i bas nggeluh erkiniteken. Ngikut Tuhan ntah nilah i bas IA nari, erbahan si mehuli ntah erbahan si jahat, nggeluh bas terang ntah meriah ukurta i bas gelap. I bas erbage-bage pilihen si lit e, mari erlajar kita erpalasken ogenta gelah erpentarna kita i bas muat keputusen si mehuli bas geluhta.

ISI

Kuan-kuanen eme kitab kerna Kepentaren Dibata si ipesehNa man manusia alu nuriken kerna uga orat nggeluh si mehuli, kata pedah ras pengajaren moral gelah si ngalokensa banci nggeluh erpemeteh, pentar, bujur adil dingen benar. E maka kitab enda perlu kel ioge kerina kalak subuk metua ntah nguda, si erpemeteh ntah la erpemeteh, guna nambahi pengangkan ras ndatken kepentaren. Kitab enda secara umum itulisken raja Salomo. Amin bage gia lit ka nge bagin-bagin si itulisken penulis si deban si la isingetken gelarna.

Secara khusus i bas ogenta Salomo nuriken maka manusia i bas geluhna ngalaken dua dalan si man pilihen eme dalan kegeluhen (nggeluh i bas kepentaren) ras dalan kalak jahat (nggeluh erbahan kejahaten) janah tiap dalan lit ulih/konsekwensina. Adi nggeluh ia i bas kepentaren, la idatna alangen dikune erdalan; la tertuktuk dikune kiam (ay.12). Janah pe kegeluhenna desken matawari pultak erpagi-pagi, lalap reh terangna seh pantek ciger (ay.18). Situasi enda tentuna labo ngatakenca maka la lit turah kiniseran man kalak si nggeluh i bas kepentaren, tapi i bas kerina situasi si alakenna lit ije pengarak- ngarak Dibata bagi nina Pemasmur “Guling pe ia la mekelek, sabap TUHAN kap si negu tanna” (Msm 37:14). Tapi adi erdalan i bas dalan kalak jahat, perbahanen si jahat lalap si bas ukurna ras i bas perbahanenna. La ia tertunduh adi lenga erbahan jahat ras lenga madat matana adi lenga ncilakaken kalak. Kejahaten me pangan ras inemen man bana. (ay. 16) janah dalan kalak jahat e bali ras berngi si gelap, jongkang ia tapi la ietehna kai si mahanca (ay. 19). Pemasmur pe nuriken kerna kegeluhen kalak si jahat “Dungna kenca aku bengket ku Rumah Dibata, i je maka kueteh kedungen kalak jahat. ItamakenNdu ia i bas dalan medalit, ibahanNdu guling, bene me ia. Perper me ia sekali engkumirep saja, keri radas kena mara. Desken nipi si bene erpagi-pagi, o Tuhan bage me perlesap kalak jahat tupung Kam keke (Msm 73 : 17-20).

Guna ndatken kegeluhen si dem keriahen tentuna labo mesunah perlu terus erjuang ras erproses. Ogenta ningetken maka kalak si atena gedang geluhna arus terus erlajar ras ertutus ate ngayaki kepentaren Dibata. Biak nggit terus erlajar e eme bagin si penting sabab kepentaren e labo rempet sidatken, tapi arus arah proses si terus menerus. Ibenaken arah mehamat dingen erkemalangen man Tuhan (Kuan 1:7), bage pe nggit megiken pengajaren kerna kata Dibata i bas orang tua, guru, Serayan/Kemahen Tuhan ras si debanna dingen kerina ajaren e arus terus ipelajari/iulih-ulihi ras ijagai (Ay 10 – 13). Kalak si tetap ertutus ate ialokenna me kepentaren i bas Dibata nari si mereken keriahen ras ngasup ia nulak kerina pengajuk si jahat si megati erkusik guna meneken ia.

PENGKENAINA

Kegeluhenta lalap iperhadapken ku bas pilihen antara erdalan i bas dalan kegeluhen ntah i bas dalan kalak jahat. Arah oratenta iajari kita maka kedungen kalak si erdalan i bas kejahaten eme kiniseran, keguluten ras kematen. E maka arus terus erpala-pala kita nggeluh erkemalangen man Dibata dingen erlajar kerna kataNa seh maka sialoken kepentaren Dibata si mabai kita pentar ncibalken geluhta ras sialoken pengarak- ngarak Dibata.

Selaku anggota GBKP, kita pe iajuk guna terus erlajar kerna kata Dibata. Guna banci ngaloken pengajaren kata Dibata si sesuai ras kecibalta subuk selaku anak, orang tua, ndehara bage pe perbulangen maka GBKP enggo erbahan lembaga Kategorial (KAKR, Permata, Moria, Mamre ras Saitun) alu tujun gelah pengajaren kata Dibata e banci lebih mesunah ialoken sue ras kebutuhen perpulungen. Erkiteken sie, iajuk kerina kita gelah ertutus ate bengket ku bas kegiaten si ibahan Kategorial masing-masing. Janah i bas ngikuti kegiaten Kategorial enda, tetaplah erdalan i bas kepentaren si maba keriahen, si berguna, si melayani. Ula ka sibahan dalan kejahaten i bas persadan kategorialta misalna erkelompok-kelompok, ncikuraki, ntah pe mandangi kai si ibahan pengurus Kategorial.

Pengurus Kategorial pe arus tetap nggeluh i bas dalan kepentaren labo dalan si jahat. Ertina, selaku pengurus, teruslah ngukuri kai si mehuli man kerina anggota, ula lit biak ncidahken bana, gelah ipujiken, mpekitik ukur kalak, apaika ndarami keuntungen materi arah pelayanenna.

I bas mperingeti HUT Kategorial GBKP (Kategorial KAKR tanggal 18 April, Kategorial Permata tanggal 12 September, Kategorial Moria tanggal 16 Oktober, kategorial Mamre tanggal 26 Agustus ras Kategorial Saitun tanggal 15 April) arusna lit evaluasi kerna uga nge ulih pelayanen kategorial sedekah enda? Enggo nge lit peningkaten kehadiren anggota ku bas acara-acara kategorial? Enggo ka nge lit pengangkan kerna kata Dibata si tangkas teridah i bas kegeluhen si tep-tep wari? Enggo nge lit persadan si nteguh sapih-sapih anggota? Janah enggo nge Kategorial e ernanam man anggotana bage pe man jelma si enterem? Adi enggo lit peningkaten, pertahanken. Tapi adi lenga teridah ntah lambat peningkatenna, alu kepentaren si ibereken Dibata si pegegehi anggota kategorialta gelah tetap ngasup ngelakokensa.

DISKUSI :

1.   Turiken kai saja “dalan kejahaten” si megati turah i bas kegeluhenndu janah uga kam ngalakensa ras kai ulihna?

2.   Kai tekadndu subuk man dirindu bage pe nandangi kategorialndu gelah banci tetap tutus ate erkemalangen man Dibata dingen erdalan i bas dalam Kegeluhen (nggeluh i bas kepentaren)?

USULEN ENDE-ENDEN:

1.   KEE GBKP 313 : 1, 2 Pulung M’riah Kal Kami Kerina

2.   KEE GBKP 381 : 1, 2 Sura-Sura Yesus Bangku

3.   KEE GBKP 75 : 1,3 Tetapkenlah Ukurta

4.   KEE GBKP 315 : 1, 3 Simpar Tuhu PemereNdu