La Ateku Mengga Sikerajangen Kalak

BIMBINGAN PA SAITUN GBKP TAHUN 2026

TANGGAL, 22-28 Maret 2026

Ogen : Keluaren 20:17

Sepuluh Pedah Dibata

Indonesia:

[17]  Jangan mengingini rumah sesamamu; jangan mengingini isterinya, atau hambanya laki-laki, atau hambanya perempuan, atau lembunya atau keledainya, atau apa pun yang dipunyai sesamamu.”

Karo:

[17] Ola mengga atendu rumah kalak; ola mengga atendu ndeharana, budakna, lembuna, keledena, ntah kai gia sikerajangenna.”

Tujunna:

Gelah Saitun:

1. Ngangakai sura-sura Dibata ras mpedauh geluhna bas larangenNa nari.

2. Ngasup ngataken bujur ibas kerina pemere Dibata.

Metode : Diskusi

I. BENA KATA

Dibata erkuasa bas kerina tinepaNa, IA dem alu kepentaren, kerina sinijadikenNa lit gunana, kegeluhen tinepaNa e, sada ras sidebanna erkawiten, lit gunana nandangi tinepa sideban.

Arah bahan PA nta sekalenda sipepayo sura-sura Dibata kerna kegeluhen manusia ibas netapken ras ngayaki sura-sura bagepe ngantusi baleng-baleng sipayo man dalanenken.

Pengajaren Tuhan me jadi palas situhu-tuhu sinerangi pusuhta gelah terkuasai kita dirina janah ngasup penimpet sura-sura simabai ku kebenen, gelah teneng geluhta terkelin ibas mentasi kerina paksa.

II. MPEGESI OGEN

Keluaren 20:17 enda me pedah sipesepuluhken bas 10 Pedah Dibata janah lit 3 kata siman pepayonta.

1. "OLA", Kata enda mpersingeti kerna larangen ntah pe nogan, la banci ilakoken adi ilakoken lit ukumenna.

2. "MENGGA", Kata enda menam seri ras morah ntah keinginan / mengingini (bhs. Indonesia) ertina lit sada penggejapen bas manusia sipeturah semangat ntah sura-sura guna ndatken sada perayaken jadi sikerajangenna, tempasna banci berupa, erta-erta, (emas, duit, taneh, rumah), usaha, jabaten, gelar persekolahen ras sidebanna.

3. "Sikerajangen kalak sideban". Kata enda ningetken la banci isura erkiteken enggo lit empuna.

Kesikelen ibas mengga ate singutkut bas pusuhta adi la sinimpeti banci mabai kita ngelakoken kejahaten sipeturah kiniseran ras ukumen.

Sipepayo ibas Kejadin 3:6 siidah uga Hawa mesikel seri ras Dibata, iikutkenna sura-surana, ibegikenna ras idalankenna pengajuk iblis / setan e maka ipanna buah batang kayu sinilarang Tuhan. Erdosa me ia ras kesusurenna, kematen me ukumenna.

2 Samuel 11:2-4. Daud ngelakoken perbahanen si lat-lat ras meluat ilebe-lebe Dibata, ibahanna pertakin gelah seh sura-surana la ia mbiar erdosa kedungenna turah kiniseran. Roma 7:7 ayat enda jadi persinget man banta, undang-undang Tuhan tujunna mehuli eme gelah teneng geluhta rembak ras Tuhan. Saja arah lit na undang-undang e banci turah bas pusuhta mengga ate nandangi dalan kukebenen la tujun undang-undang e jadi perayakenta tapi Lawanna kesikelta.

III. PENGKEΝΑΙΝΑ

Mengga ate ntah morah ate tetap ngerim-rim bas pusuhta, bas kerina paksa ntah kecibal sura-suranta tetap lit, bas paksa nggo Saitun pe lit sura-suranta si perlu si perdiateken uga ngelayasisa. Arah bahan PA nta sendah mpersingeti kita gelah metenget ngantusi mengga ate gelah ola jajat mengga ateta ku perbahanen sijahat. Emaka perlu kita megegeh, pusuh peratenta, perukurenta sijaga gelah ola ijolah joleken perayaken doni simabai kukebenen. Sipeciho pusuhta gelah jadi ingan kata Dibata ras gegeh Kesah Si Badia lako mpersingeti ras ngajari kita nepet perayaken simehuli bagi ngena ate Dibata.

Arah pedah sipesepuluhken enda ate Dibata gelah ieteh manusia maka IA nge simada geluhta, IA me singaturkensa sinibahanNa kerina mehuli, emaka sialoken sinijujurkenNa, sialoken bagi litna pemereNa man banta jenari ngasup ngkuasai diri alu la mengga ate nandangi sikerajangen kalak. Dibata ngaturken geluhta alu kengasupen si lit bas kita, pemereNa sipelain lain man kerina tinepaNa gelah teridah dolat Dibata ras kinibayakenNa, ibas sie me peturah lit kengasupen ras kesempatenta ipake Tuhan jadi pasu-pasu nandangi tinepa sideban.

IV. PERTOTON

Bujur Tuhan pendiloNdu njadiken kami jadi kalak sitek man baNdu, Kam mpebadiaken kami, kami jadi anak anakNdu, ibreNdu kesangapen ras kepentaren, gegeh KesahNdu sibadia tetap ngembari kami gelah tetap ngasup nepet kegeluhen sini sikapkendu enda me toto kami ibas Tuhan Jesus kami ngadap man banNdu. Amin...

V. Diskusi

1. Suratken kai kin deba simengga ateta? Siksiki sada sadai, kai perulihenta adi sipejangjang mengga ate e naluken kita?

2. Uga arusna kita ndalani geluhta, bandingken Ogen Pilipi 4:4-7.

VI. ENDE-ENDEN

1. KEE No. 92:1,2

2. KEE No. 323: 1,2,3

3. KEE No. 471: -

4. KEE no. 425:1-3

5. KEE No. 273: 1,2,3

Pdt. Satria Sembiring