Belasken Kata Si Mehuli

BIMBINGAN PA SAITUN GBKP TAHUN 2026

TANGGAL, 15-21 Maret 2026

Ogen : Masmur 34:12-15

Puji-pujiin kerna kiniulin Tuhan

Indonesia:

[12] Marilah anak-anak, dengarkanlah aku, takut akan Tuhan akan kuajarkan kepadamu!

[13]  Siapakah orang yang menyukai hidup, yang mengingini umur panjang untuk menikmati yang baik?

[14] Jagalah lidahmu terhadap yang jahat dan bibirmu terhadap ucapan-ucapan yang menipu;

[15] jauhilah yang jahat dan lakukanlah yang baik, carilah perdamaian dan berusahalah mendapatkannya!

Karo:

[12] O teman-temanku, marilah begiken aku, gelah kuajari kam uga pemuliaken TUHAN.

[13] Merincuh kam gedang umurndu, dingen ngenanami keriahen ras kesangapen?

[14] Ola belasken kata-kata jahat, ola erbual.

[15] Tadingkenlah kejahaten, lakokenlah kai si mehuli, bulatkenlah ukurndu erbahan perdamen.Thema : Jumpa Ras Dibata, Mpelimbarui Kegeluhen

Tujunna:

Gelah Saitun:

1. Ngasup ngataken kata tuhu.

2. Kegeluhen Saitun mpermuliaken Tuhan.

Metode : Diskusi

I. BENA KATA

Kata siibelasken banci dua gendangna; banci erbahan kalak sideban megegeh, terapul, semangat, ermeriah ukur, erdame ras sidebanna. Tapi banci ka erbahanca kalak sideban menek ate, susah, merawa, gendek rukur, rubati, ras sidebanna. Si enda kerina tergantung ku bas ranan siibelasken kita, bageme pentingna milih ranan bagi siibelasken orangtuanta si adi nina: "sik-sik lebe maka tindes, ukuri lebe maka belasken". Sabab ranan si enggo ibelasken lanai banci itarik mulihi aminna gia kita enggo erkadiola melaskenca. Ranan sienggo ibelasken lanai banci ikurangi, tambah nari ngenca banci. Erkiteken sie Saitun iarapken banci dingen nggit melasken kata simehuli saja, ula mbelasken kata si banci nakiti kalak sideban.

II. MPEGESI OGEN

Arah bahan PA-nta enda pemasmur ngajari kalak si tek gelah nggeluh mpermuliaken Dibata, gedang umur dingen ngenanami keriahen ras kesangapen. Keadaan sibagenda me si tuhu-tuhu jadi perayaken nggeluh kalak Jahudi tupung sie; nggeluh erkemalangen man Tuhan dingen ngenanami kesangapen ibas kegeluhen. Gambaren geluh sibagenda rupana tuhu-tuhu kegeluhen si kuh simereken kemalemen ate. Guna bengket ku bas kegeluhen sibage rupana, lit piga-piga si man dalanenken eme:

1. Ola belasken kata-kata jahat; adi jahat ranan siibelasken kita berarti pusuhta pe dem ibas kejahaten.

2. Ola erbual; adi jelma perbual, tentu labo terteki. Adi enggo i cap la terteki tentu kai pe idena ras rananna lanai bo lit ertina man kalak sideban. Adi kita erbual kita pe labo tenang, mbiar kita ieteh kalak bualta emaka siperjuangken me nutup-nutupisa seh maka lanai bo kita mperjuangken dingen ngataken kebenaren.

3. Tadingken kejahaten; Tuhan e la nggit singgur ras kejahaten, emaka adi kita nggit ersada ras sijahat tentu Tuhan ndauh kap ras kita. La ngena ate Tuhan ngidah kalak si tek ngelakoken kejahaten. Kalak jahat labo mungkin sangap, erkiteken Tuhan ngukum kejahaten; adi kita ngelakoken kejahaten kita pe ikut iukum.

4. Lakoken kai simehuli; tapi kalak si tek arus ngelakoken simehuli sebagai tanda kita erkemalangen man Tuhan dingen nggeluh tama pujin man Tuhan.

5. Bulatken ukur erbahan perdamen; sada nari perbahanen kalak si tek siarusna eme erbahan perdamen sabab Dibata e eme Dibata si maba dame. Kalak si tek ijapa pe ringan arus banci jadi pelaku perdamen sabab eme biak anak Tuhan. Enda me siikataken Jesus ibas Matius 5:9 "Ketuahen kalak si erbahan perdamen; sabab iakui Dibata me ia anakNa.".

III. PENGKEΝΑΙΝΑ

Uga nge sedekah enda kata-kata siibelasken kita? Enggo nge banci ikataken mehuli? Adi enggo, puji Tuhan, tapi adi langa enda me siman perjuangenta. Apai ka kita kerina enggo Saitun, si iarapken banci jadi usihen, jadi guru, jadi penundalen nandangi anak kempunta. Uga e jadi adi kita la mehuli melasken kata! Erkiteken sie, selaku orangtua kita arus ngikutken kai siiajarken pemasmur; la kita banci melasken kata-kata sijahat, la jadi kalak si perbual, ngasup ras nggit nadingken kejahaten aminna gia rulih, ndalanken kerina dahin simehuli dingen bulat ukur guna ngelakoken perdamen.

Adi kerina biak si idatas silakoken alu payo; Dibata erngena ate man banta, anak kempunta ngenanami kesangapen arah kegeluhenta. Alu bage, labo terjeng kesusurenta ngenca sangap, kita pe ngenanami kemalemen ate raduken ras kesangapen nggeluh. Sendalanen ras tema, melasken kata si mehuli, enda me jadi perayaken nggeluh man banta Saitun. Memang gegehta enggo nge urak, rananta nari nge reh buena, ibas sie perlu kal kita memilih kata-kata sibanci maba kiniulin man banta, man anak kempunta bagepe man kalak sideban.

IV. PERTOTON

O... Tuhan, sampati kal kami gelah ngasup melasken ranan simehuli ibas geluh kami; subuk man teman kami bagepe man kalak sideban. Aminna pe perbahanen kalak sideban la bagi ukur kami, ngasup kami melasken kata si mehuli. Bahanlah maka ranan kami banci erbahanca kalak sideban seh semangatna, reh bagesna kinitekenna, reh bagesna pengarapenna ibas ndalani kegeluhen. Pakeken babah kami jadi pasu-pasu man kalak sideban, Amin.

V. Diskusi

1. Sue ras bahan PA-nta; kai saja siarus ilakoken guna mpermuliaken Tuhan dingen mereken umur sigedang, keriahen ras kesangapen man banta?

2. Kai tekadta guna encidahken maka kita tetap melasken ranan si mehuli?

Pdt. Liza Selvina Tarigan