Jesus Anak Dibata

Ogen : Johanes 1:14-18

14 Kata e nggo jadi manusia, janah Ia ringan i tengah-tengahta. Nggo idah kami KemulianNa si mbelin, e me kemulian si ibereken Dibata man BaNa erkiteken Ia Anak Dibata si Tonggal. Anak e encidahken lias ate ras kai si benar kerna Bapa e.

15 Kerna Ia me si iberitaken Johanes, asum nina, "Ia me katangku asum ningku, 'Pudin Ia reh asangken aku, tapi belinen Ia asa aku, sabap ope denga aku tubuh pe Ia nggo lit.'"

16 Erdandanken Ia dem perkuah ate, ipasu-PasuNa kita kerina, IberekenNa man banta lias ate si la erkeri-kerin.

17 Dibata mereken undang-undang arah Musa tapi lias ate ras kebenaren kerna Dibata reh arah Jesus Kristus.

18 Ise pe labo pernah ngidah Dibata. Tapi Anak si Tonggal, si bali ras Dibata, dingen si rembak ras Bapa, Ia me si nggo mpetandaken Dibata.

Yohanes 1 : 14 – 18

14 Firman itu telah menjadi manusia, dan diam di antara kita, dan kita telah melihat kemuliaan-Nya, yaitu kemuliaan yang diberikan kepada-Nya sebagai Anak Tunggal Bapa, penuh kasih karunia dan kebenaran.

15 Yohanes memberi kesaksian tentang Dia dan berseru, katanya: "Inilah Dia, yang kumaksudkan ketika aku berkata: Kemudian dari padaku akan datang Dia yang telah mendahului aku, sebab Dia telah ada sebelum aku."

16 Karena dari kepenuhan-Nya kita semua telah menerima kasih karunia demi kasih karunia; 

17 sebab hukum Taurat diberikan oleh Musa, tetapi kasih karunia dan kebenaran datang oleh Yesus Kristus.

18 Tidak seorangpun yang pernah melihat Allah; tetapi Anak Tunggal Allah, yang ada di pangkuan Bapa, Dialah yang menyatakan-Nya.

Tujun : Gelah Mamre

    1). meteh maka Jesus Anak Dibata.

    2). Gelah Mamre meritaken lias ate Jesus man kalak sideban.

I. KATA PENARUH

Ikataken ‘Jesus Anak Dibata,’ banci mpeturah erbage pemahamen. Lit si erpengakap maka Jesus e manusia biasa saja, sabab IA ‘diperanakkan.’ Banci ka kalak erpengakap, Jesus e terpisah arah Bapa, Jesus e lebih meteruk asa Bapa ras seterusnya. E maka lit si erpengakap Dibata kalak Kristen lit telu. Ibas sejarah gereja, enda enggo jadi. Misalna Arius (idilo Dibata 336 M), ngataken maka Bapa e ngenca tuhu-tuhu Dibata, kekal, mutlak ras benar. Kerna Anak (Tuhan Jesus) iakuina enggo lit nai nari ras Bapa, tapi Dibata Anak e labo terpeseri kedibatanna ras Bapa. Kadar kinidibataan Bapa ganjangen asa kinidibataan Anak ras Kesah si Badia. Pemahamen enda igelari Dogma Trinitas Subordinasi. Lit tingkaten ‘keilahian’. Ras mbue denga pendapat sideban. Arah bahan PA sendah, ateta memahami alu payo ‘Jesus Anak Dibata’ erpalas Pustaka si Badia ras pe dokumen pengakun kiniteken (konfesi) gerejanta.

II. URAIAN TEKS

1. Kitab Johanes itulis rasul Johanes sekitar tahun 85-95 M. Kitab enda itulis alu tujun, “... gelah kam tek maka Jesus kap Anak Dibata; IA kap Raja Penampat si ipadanken Dibata. Bage pe gelah arah kinitekenndu nggeluh kam i bas gelarNa” (Joh.21:30-31). Kitab enda pe itulis guna ngelawan ajaren Gnostik, si la ngaloken maka Jesus tuhu-tuhu jadi manusia.
2. Misteri Dibata. Dibata jadi manusia, eme salah sada misteri si labo terukuri kita kal alu serta, seakatan alukaca mata kiniteken. Tapi adi sipahami alu kacamata kiniteken, labo lit si metahat man Dibata. E maka, adi Dibata jadi manusia, e banci jadi (keniscayaan). Si labo mungkin jadi eme manusia jadi Dibata.
3.  “Kata e jadi manusia” (ay.14a). Kata (Junani, logos) eme pikiren, ntah pe akal budi. Kata e e jadi manusia. Kata e labo ciptaan, tapi Dibata jine si reh njumpai kita ibas Jesus Kristus. IA labo reh selaku penguasa si erbahansa manusia mbiar, tapi jadi manusia si banci ijemak, ibegiken ras ialami.
4. “Ringan i tengah-tengahta” (ay.14a). Dibata e ibas bahasa Junani ikataken ‘eskenosen’, ertina, ‘erkemah,’ ntah pe ‘tading bas kemah.’ Enda ngingetken kita ku bas kehadiren Dibata i tengah-tengah manusia. Bandingken ras kehadiren Tuhan ibas bangsa Israel bas Kemah si Badia (Kel.25:8). Dibata lanai hadir ibas Kemah si Badia, tapi enggo hadir bas Manusia Jesus Kristus. Ia nggeluh, erdalin ras ersada ras rarasenNa.
5. “Idah kami kemulianNa” (ay.14b). Kemulian Dibata e labo ibas bentuk sinalsal si erbahan mesilo, tapi ibas kegeluhen ras kebenaren si lit ibas Jesus Kristus, ija Ia ngalemi dosa, mpepalem si sakit, mere man si melihe, mate ras isalib. Kemulian Dibata ibas Jesus labo guna ndarami kekuasaan, tapi pengorbanen si erpalas kekelengen. Labo ndarami kemegahen doni, tapi kiniteruken ukur si maba keterkelinen (keselamaten).
6. “Ncidahken lias ate ras kai si benar kerna Dibata” (ay.14c). Lias ate Dibata (Junani, charis) eme pemere si labo metunggung kita ngalokensa (cuma-cuma). Kebenaren Dibata (Jun. aletheia) eme kesetian Dibata man padanNa ras kebenaren orat geluh (moral) si sempurna. Ibas Jesus me lias ate (kasih) ras kebenaran jumpa alu kuh. Sabab, adi kebenaren la erpalasken kekelengen, terjadi kekerasen. Bage ka pe, adi kebenaren si la erpalasken lias ate, lemah. Ibas Kristus Jesus, lias ate ras kebenaren seimbang: Lias ate e mereken keterkelinen, kebenaren e mereken pergegeh (peneguhan).
7. Musa ras Jesus (ay.17). Musa maba undang-undang si ngajarken kai si benar, tapi la mereken pergegeh gunandalankensa. Tapi Jesus Kristus maba lias ate si mereken pengampunen, gegeh ras kegeluhen si mbaru. “Ise pe labo pernah ngidah Dibata. Tapi anakNa si Tonggal, si bali ras Dibata, dingen si rembak ras Bapa, Ia me si enggo mpetandaken Dibata” (ay.18). Jesus me gambar Dibata si la terdah (Heb. 1:3). Adi ateta nandangi ise Dibata, banci sitandai ibas Jesus Kristus.

III. PENGKENAINA

Arah penjelasen bahan PA-nta, enggo banci sipahami tema-nta, ‘Jesus Anak Dibata’:

1. Ikataken Jesus Anak Dibata, banci sipahami arah jabab malekat Gabriel man Maria, “Kesah si Badia pagi nusur ku babondu janah kuasa Dibata ringan i bas kam. Perbahan sie me maka anak si ipupusndu e pagi Badia janah igelari Anak Dibata” (Luk.1:35; Mat.1:20). Jesus ikataken Anak Dibata erkiteken IA me kata Dibata si enggo jadi manusia arah bertin Maria, alu pendahin Kesah si Badia. Labo ibas benih manusia nari.

2. Jesus Kristus jadi manusia, labo berarti IA tinepa (ciptaan), sabab Jesus eme kata Dibata si ras Dibata nai-nai nari (kekal, alpa-omega, tidak berawal dan tidak berakhir). Hanya IA make bentuk kula manusia si banci mate. Tapi tupung Jesus mate, la lit sisa mayatna, labo jadi taneh, sabab IA labo iban ibas taneh nari, tapi arah kuasa Kesah si Badia.

3. Jesus jadi manusia enggo inubuatken (Jes.7:14; Mika 1:5), alu tujun, gelah sintandai Dibata: kuasaNa, kemulianNa, keleng/ lias ateNa, si ngena ateNa, sura-suraNa, perayakenNa ras sidebanna. Adi enggo si eteh ras sitandai IA, si ikutken ras si usih IA (Mat.5:48; Pil.2:5). Kenca enggo sialami ras sinanami kuasaNa, siberitaken ka man kalak sideban (band. Mat.20:19-20; 1 Perb.1:8). Meritaken lias ate Dibata eme tanggung jawab ras keriahen man kerina kalak si tek man Tuhan Jesus (Mat. 28:19-20; Perb.1:8). Ise si ngikutken Jesus, iberekenNa rudang-rudang kegeluhen tanda kemenangen (kegeluhen si rasa lalap) eme Surga.

4. Ibas pemahaman GBKP (Konfesi: Allah, hal.10), Dibata e eme Dibata si Telu Sada (Tri Tunggal): “... Allah Bapa, Allah Anak dan Allah Roh Kudus” ( 1 Yoh.5:7; Yoh. 10:30; Kor.13:14; Mat.3:16-17). Hubungen (korelasi) Dibata si Telu Sada (Trinitatis) e, ituriken bas bahan katekisasi GBKP, “Ketiganya berbeda satu sama lain, tetapi bukan dalam substansi (keberadaan), melainkan dalam bentuk. Bukan dalam kuasa, melainkan aspek (menyangkut tugas-tugasNya)... Tiga pribadi ilahi selalu ada bersama-sama dan secara serentak, tidak berdiri sendiri, tidak bekerja sendiri-sendiri dan rentang waktu yang susul-menyusul. Sang Bapa, sang Anak dan Roh Kudus selalu hadir bersama-sama dan mengerjakan pekerjaan yang sama (penciptaan, penyelamatan, penebusan), masing-masing dengan peran dan tugas untuk membuat karya itu jadi nyata” (Katekisasi GBKP, hal. 55). Alu bage, Jesus ikataken Anak Dibata, erkiteken Kata Dibata enggo jadi manusia ibas diriNa, gelah sitandai Dibata ras sura-suraNa. Si tek man baNa, iperidiken, ngikutkenca ras naksikenca, kalak si bage pasti terkelin ras jadi pasu-pasu man doni enda (Mrk.16:16; Joh.11:25-26).

IV. DISKUSI

1. Uga nge pengangkanta adi ikataken Jesus Anak Dibata?
2. Kai nge lias ate Dibata si idah ibas Jesus selaku Anak Dibata?

USULEN ENDE-ENDEN :

1. KEE GBKP No 94:1,5
2. KEE GBKP No. 204:1-2
3. KEE GBKP No. 303:1-2
4. KEE GBKP No. 445:1 (Persembahen)

Pdt. Arapen Perangin-Angin, M.Th.