Jumpa Ras Dibata, Mpelimbarui Kegeluhen

BIMBINGAN PA SAITUN GBKP TAHUN 2026

TANGGAL, 08-14 Maret 2026

Ogen : Perb. Rasul-Rasul 9:1-6

Saul ngaku maka Jesus Tuhan kap

Indonesia:

[1]  Sementara itu berkobar-kobar hati Saulus untuk mengancam dan membunuh murid-murid Tuhan. Ia menghadap Imam Besar,

[2] dan meminta surat kuasa dari padanya untuk dibawa kepada majelis-majelis Yahudi di Damsyik, supaya, jika ia menemukan laki-laki atau perempuan yang mengikuti Jalan Tuhan, ia menangkap mereka dan membawa mereka ke Yerusalem.

[3] Dalam perjalanannya ke Damsyik, ketika ia sudah dekat kota itu, tiba-tiba cahaya memancar dari langit mengelilingi dia.

[4] Ia rebah ke tanah dan kedengaranlah olehnya suatu suara yang berkata kepadanya: ”Saulus, Saulus, mengapakah engkau menganiaya Aku?”

[5] Jawab Saulus: ”Siapakah Engkau, Tuhan?” Kata-Nya: ”Akulah Yesus yang kauaniaya itu.

[6] Tetapi bangunlah dan pergilah ke dalam kota, di sana akan dikatakan kepadamu, apa yang harus kauperbuat.”

Karo:

[1] Tapi Saul tetap niksai dingen munuhi ajar-ajar Tuhan. Idahina Imam si Mbelin,

[2] janah ipindona surat kuasa guna ibabana man pengulu rumah pertoton i Damaskus. Gelah adi jumpa ia ras kalak si ngikutken Tuhan i Damaskus, subuk dilaki bage pe diberu banci itangkapna janah ibabana ku Jerusalem.

[3] I bas perdalanen ku Damaskus, asum ia enggo ndeher ku kuta e, rempet terang i langit nari ersinalsal engkeleweti ia.

[4] Perbahan si e ndabuh ia ku taneh janah ibegina sora erlebuh, “O Saul, Saul, ngkai maka iayakindu Aku?”

[5] Ngaloi Saul, “Ise kin Kam Tuhan?” Erjabap Tuhan, “Aku kap Jesus si iayakindu.

[6] Bage gia, kekekenlah janah teruskenlah ku bas kuta. I jah kari lit si ngatakenca man bandu kai si arus ibahanndu.”

Thema : Jumpa Ras Dibata, Mpelimbarui Kegeluhen

Tujunna:

Gelah Saitun:

1. Ngasup ngidah cara Dibata ibas mabai manusia nandai Ia

2. Tetap nggeluh ibas kegeluhen siipelimbarui tep-tep paksa

Metode : Diskusi

I. BENA KATA

Sope kita ngorati Kata Dibata, perlebe mari ras kita ngendeken ende-enden rohani alu judul, "Senang Ukurku Jumpa ras Jesus." Senang ukurku jumpa ras Jesus Senang ukurku halleluya..... rst.

Payo kal bagi kata-kata bas ende-enden enda maka jumpa ras Tuhan Jesus erbahanca senang ukurta, meriah pusuhta janah siangka sura-sura Tuhan ras si ngena ateNa.

II. MPEGESI OGEN

Sope jadi rasul gelar Paulus e me Saul, nembeh kal atena man kalak Kristen. Kerina kalak Kristen iayak-ayakna, itangkap ras isiksana, janah ibunuhna pe. Ipindona pe Surat Kuasa man Imam si Mbelin, guna isehken man pengulu rumah pertoton i Damaskus (genduari eme Suriah). Alu surat kuasa e, kerina kalak Kristen i Damaskus banci itangkap janah ibabana ku Jerusalem gelah ipenjarakenna. Bageme nembehna atena man kalak Kristen.

Tapi la bagi si irencanakenna sijadi. Bas perdalanenna si nggo ndeher ku Damaskus e, rempet terang i langit nari ersinalsal ngkeleweti ia, ndabuh Saul ku taneh janah ibegina sora Tuhan erlebuh man bana tapi la iidahna tempas si ngerana e. Jenari me maka nggo tangkas man Saul maka si njumpai ras ngerana ku ia eme Tuhan Jesus. Bage me cara Dibata mpetandaken diriNa man Saul si niksa kalak Kristen e.

Arah perjumpan e, nina Jesus maka Jesus kap si iayak-ayakna e. La sibar itandaina Jesus tapi pe idatna ras ietehna kai ate Tuhan Jesus ibahanNa bas geluhna (ayat 3-6).

Erkiteken peristiwa enda Saul lanai erpengidah emaka itegu temanna ia erdalan nerusken perdalanenna ku Damaskus. Lit telu wari dekahna Saul la erpengidah, janah bas si telu wari e la ia man dingen minem.

Tapi la ate Tuhan maka Saul lalap la erpengidah. Tuhan nuruh si Ananias, sekalak kalak si tek dingen tutus i Damaskus lako njumpai Saul. Jenari ituriken Ananias man Saul maka Jesus si njumpai Saul i tengah dalan me si nuruh ia ndahi Saul gelah mata Saul erpengidah mulihi janah gelah Saul idemi Kesah Si Badia. Itamaken Ananias tanna ku babo takal Saul jenari erpengidah mulihi Saul. Tek Saul man Tuhan Jesus iberena dirina iperidiken. Kenca Saul man, mulihken ka ia megegeh.

III. PENGKEΝΑΙΝΑ

Arah perjumpan Saul ras Jesus e, erbahansa Saul berubah total. La itaktaki Jesus kesalahenna, tapi tole ibereken Jesus dahin siterbelinen man Saul lako petandaken Jesus man kalak Jahudi terus ku belang doni enda. Perjumpan e erbahansa turah kegeluhen si mbaru bas Saul.

Erbage cara ipakai Dibata lako mpetandaken diriNa man banta, janah perjumpanta ras Tuhan pasti mpeturah kegeluhen si mbaru, perubahan total bas dirinta. Perjumpanta ras Dibata banci secara pribadi, banci ka tupung ersada ras temanta si deban arah Kebaktian, PA, Retreat, Perayaan Gereja, bage pe jumpa ras teman meriah, jumpa rejeki, jumpa tuah, jumpa teman sekolah ntah teman erdahin nai, jumpa jodoh anak/ kemputa rsd. Kehadiren Dibata teridah alu litna perubahen total bas kerina si hadir, sihamaten pekepar, sikeleng-kelengen, sisampaten ibas maba baban simberat. Kerina perjumpan si mehuli enda e me tanda kehadiren Dibata. Bagi nina tema: "Jumpa Ras Dibata, Mpelimbarui Kegeluhen."

Nina Tuhan Jesus, "Sabab ija dua ntah telu kalak pulung i bas gelarku, Aku lit i tengah-tengahna" (Matius 18:20). Emaka mejingkatlah kita reh ku kebaktin Minggu, PA Saitun, tetap ras tutus ertoto dingen ngoge Pustaka Si Badia. Nina Kata Dibata, "Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabab sieteh maka wari Tuhan, eme wari kerehenNa, reh me" (Heber 10:25). Arah jumpa ras Dibata me maka kita ngasup nggeluh ibas kebenaren. Alu nggeluh bas kebenaren me maka kita nggeluh bas kedamen ras keselamaten.

IV. PERTOTON

Bujur Tuhan sabab alu perkuah ateNdu me maka banci kami jumpa ras Kam si mpelimbarui kegeluhen kami, labo ban gegeh ras kengasupen kami. Pengasup dage kami Tuhan gelah tetap metedeh ate kami jumpa ras Kam janah ije me ialoken kami pengajaren, gegeh, pemeteh ras kebenarenNdu. Ibas gelar Tuhan Jesus kami ertoto, Amin.

V. Diskusi

1. Turikenlah engkai maka kita perlu jumpa ras Dibata ?

2. Turiken pengalamenta sekalak-sekalak kuga cara Dibata mpetandaken diriNa man banta?

VI. ENDE-ENDEN

1. KEE no. 192:1, 2.

2. KEE no. 96:1, 2.

3. KEE no. 61:1, 3.

4. KEE no. 425:1-3

5. KEE no. 309:1, 3.

Pdt. Juris Tarigan, M.Th