Erkiteken Kristus, aku enggo rembak ras Dibata

BIMBINGAN PA SAITUN GBKP TAHUN 2026

TANGGAL, 01-07 Maret 2026

Ogen : Epesus 2 : 1-6

I bas kematen nari ku kegeluhen

Indonesia:

[1]  Kamu dahulu sudah mati karena pelanggaran-pelanggaran dan dosa-dosamu.

[2] Kamu hidup di dalamnya, karena kamu mengikuti jalan dunia ini, karena kamu mentaati penguasa kerajaan angkasa, yaitu roh yang sekarang sedang bekerja di antara orang-orang durhaka.

[3] Sebenarnya dahulu kami semua juga terhitung di antara mereka, ketika kami hidup di dalam hawa nafsu daging dan menuruti kehendak daging dan pikiran kami yang jahat. Pada dasarnya kami adalah orang-orang yang harus dimurkai, sama seperti mereka yang lain.

[4] Tetapi Allah yang kaya dengan rahmat, oleh karena kasih-Nya yang besar, yang dilimpahkan-Nya kepada kita,

[5] telah menghidupkan kita bersama-sama dengan Kristus, sekalipun kita telah mati oleh kesalahan-kesalahan kita – oleh kasih karunia kamu diselamatkan –

[6] dan di dalam Kristus Yesus Ia telah membangkitkan kita juga dan memberikan tempat bersama-sama dengan Dia di sorga,

Karo:

[1] I bas paksa si lewat, erkiteken salahndu ras dosa-dosandu, mate pertendinndu.

[2] Paksa si e nai iikutkenndu kebiasan doni si jahat. Iikutkenndu peminpin penguasa-penguasa si lit i bas awang-awang, e me kesah si genduari erdahin i bas kalak si la nggit erkemalangen man Dibata.

[3] Si tuhuna kita pe nai bali nge ras kalak enda. Kita nai nggeluh rikutken sura-suranta saja janah sidalanken si sentudu ras sura-sura kulanta ras ukurta. Sue ras biakta, kita pe bali ras kalak si deban, patut ngenanami pernembeh ate Dibata.

[4] Tapi perkuah ate Dibata la ersibar, janah mbelin kal keleng ateNa man banta.

[5] Seh maka asum kita mate i bas pertendin erkiteken salahta, ipegeluhNa kita mulihi radu ras Kristus. Erkiteken lias ate Dibata nge maka kam enggo terkelin.

[6] I bas persadanta ras Kristus Jesus, ipekeke Dibata kita ras Kristus, janah ipekundulNa kita ras IA i bas ingan si meganjang.

Thema : Erkiteken Kristus, aku enggo rembak ras Dibata

Tujunna:

Gelah Saitun:

1. Meteh dalan ngerembakken diri man Dibata eme alu ngusih kegeluhen Jesus

2. Nadingken biak-biak si ndekah si la encidahken biak kiniteken man Dibata

Metode : Diskusi ras Aksi

I. BENA KATA

Sola Gracia eme salah sada slogan reformasi gereja si ngingetken kita maka keselamaten eme bentuk perkuah ate Dibata. Perkuah ateNa e i cidahkenNa arah kerehen Jesus si maba berita keselamaten man banta. Arah Jesus me kita ngaloken perkuah ate dingen keleng ateNa nandangi kita. Jesus jadi pendamai antara kita ras Dibata. Emaka penandaita si payo kerna Jesus penting kal gelah alu bage banci kita rembak ras Dibata.

II. MPEGESI OGEN

Kitab Epesus enda itulisken Paulus asum ia i penjara. Tulisen enda i suratken man kalak Epesus si tading i daerah Asia. Kota enda galang dingen pusat perdagangen e maka melala tantangen si inanami kalak Kristen paksa si e. Penembahen nandangi berhala, pengajaren si papak dingen tekanen bas bangsa Romawi nari jadi tantangen kerina perpulungen paksa si e.

Arah bahanta enda ibenai Paulus alu encidahken biak ntahpe cara nggeluh kalak Kristen ope ngaloken keleng ate Dibata. Manusia si la nandai Dibata erdosa dingen mate pertendinna (ayat 1). Kata mate pertendin eme sada kematen kiniteken. Enda jadi erkiteken manusia sirang ibas Dibata dingen ngikuti sura-sura doni si tentu lain kal ras sura-sura Dibata. Ibas ayat 3 Paulus ngingetken maka perpulungen Epesus pe nai seri ras kalak si enterem. Kalak Kristen pe ope nandai Jesus nggeluh bagi sura-sura kula ras ukurna saja. Erkiteken dosa manusia lanai nandai sura-sura Dibata. Kerincuhen daging erbahanca manusia lanai meteh dingen ngangkai apai si payo dingen si benar. Emaka erkiteken si e patut kal manusia ngaloken pernembeh ate Dibata. Teologi si biasa iangka perpulungen adi jahat kita tentu si jahat ka me sialoken.

Tapi Dibatanta la bage biakna, Ia perkuah ras perkuah ateNa e la ersibar, janah keleng ateNa mbelin kal man kerina manusia. Enda me biak Dibata si ituriken Paulus. Tentu la seri ras biak dewa Artemis si biasa isembah kalak Epesus. Adi Artemis dem alu rawa tapi Dibatanta dem alu keleng ate. Jesus me jadi dalanna kita ngaloken kekelengen dingen perkuah ate Dibata si tuhu tuhu. Jesus reh ku doni enda guna mereken keselamaten. IA mate i kayu persilang si enda kerina tentu guna mereken keselamaten. Arah persadanta ras Kristus me kita banci ngaloken keleng ate Dibata dingen kedungenna ipekeke ras ipekundul ibas ingan si meganjangna. Emaka Paulus ngingetken man perpulungen Epesus maka ulih kerina perbahenen Jesus eme keselamaten. Kalak si nggo selamatken tentu iperobahina lagu langkahna. Lanai mate pertendinna, lanai i dalankenna sura-sura doni tapi nggo sura-sura Dibata si ilakokenna.

III. PENGKEΝΑΙΝΑ

Jesus me dalan keselamaten. Kata enda encidahken makna si mbages. Sabab dosa erbahansa kita labo ngasup datken keselamaten, dalanna pe la siangka. Maka bahan PA-nta wari enda iingetken kita gelah tetap erlajar arah kerina pengajaren Kristus gelah ngasup kita ngaloken kerina kiniulin Dibata si nggo ipadankenNa banta eme keselamaten. Kalak si nggo erlajar ibas pengajaren Jesus Kristus tentu i perobahina lagu langkahna. Jera ka ia bas salah dosa dingen ilakokenna si ngena ate Dibata ibas perdalanen kegeluhenna.

Saitun tentu nggo metua tapi bas kerembakenta ras Dibata lit ije keriahen si erbahansa kita tetap megegeh. Persadan ras Jesus mereken kemalemen ate man banta enda me keriahen si tuhu-tuhu. Maka bas kerembakenta ras Dibata arah Jesus Kristus me banci jadi nambahi pengarapenta nggeluh. Sebab adi ras Jesus si datken me pagi kegeluhen si rasa lalap erkiteken kerembakenta ras Dibata.

IV. PERTOTON

Bujur o Tuhan, kami enggo rembak ras kam arah kerehen Jesus. Bahanlah kami ngergaken kerina keleng ateNdu e alu tutus ngikutken Jesus bas kegeluhen kami. Bahanlah kami Saitun ermalem ate erkiteken persadan kami ras Kam, ibas Jesus kami reh man banNdu, Amin.

V. Diskusi

1. Adi si oge ulihi teks Epesus 2:4, kai ngge maknana ibas kegeluhenta? Turiken.

2. Rikutken tema-ta, kai ngge tekatta?

VI. ENDE-ENDEN

1. KEE GBKP 183:1-2

2. KEE GBKP 374:1-2

3. KEE GBKP 181:1-2

Pdt. Jefri Alexander Keliat M.Fil