Erberita

BIMBINGAN PA SAITUN GBKP TAHUN 2026

TANGGAL, 04-10 Oktober 2026

Ogen : Lukas 2: 36-38

Indonesia:

[36] “Lagipula di situ ada Hana, seorang nabi perempuan, anak Fanuel dari suku Asyer. Ia sudah sangat lanjut umurnya. Sesudah kawin ia hidup tujuh tahun lamanya bersama suaminya,

[37] dan sekarang ia janda dan berumur delapan puluh empat tahun. Ia tidak pernah meninggalkan Bait Allah dan siang malam beribadah dengan berpuasa dan berdoa.

[38] Dan pada ketika itu juga datanglah ia ke situ dan mengucap syukur kepada Allah dan berbicara tentang Anak itu kepada semua orang yang menantikan kelepasan untuk Yerusalem.”

Karo:

[36] “Lit sekalak nabi diberu si enggo metua kal. Gelarna Hanna, anak si Panuel i bas suku Aser nari. Pitu tahun dekahna ia erjabu.

[37] Anna enggo mbalu, umurna genduari 84 tahun, la pernah nadingken Rumah Tuhan. Suari berngi ia muji Tuhan, alu ertoto ras erpuasa.

[38] Asum Simeon masu-masu Anak e reh Anna ndeheri Jesus ikatakenna bujur man Dibata, janah iturikenna kerna Anak e, man kerina kalak si nimai-nimai warina Jerusalem ibebasken Dibata.”

Tema: Nuriken Kerna Dibata

Tujunna:

Gelah Saitun:

·       Meteh uga Hanna si seh asa metua tetap erberita kerna Dibata

·       Naksiken Dibata i bas geluhna i bas umurna si nggo metua

Metode: Studi Kasus

I. BENA KATA

Kalak Karo semal nuriken isi pusuhna ras mpeseh berita man kalak si deban. Umpamana: orang tua nuri-nuri man anak ras kempu kerna pengalamen geluh si nuria ras paksa gundari, kecibal geluh paksa senang ras susah, orat geluh mehuli ras la mehuli. Nuriken kerna Dibata i bas kinulin ras keleng ateNa ku dirinna, jabuna, keluargana, gerejana ras bangsana. PA-nta wari enda mabai kita meteh kerna Hanna si erberita kerna Dibata i bas umurna si enggo metua.

 II. MPEGESI OGEN

Hanna e me sekalak nabi diberu si enggo metua. Gelar bapana Panuel i bas suku Aser nari. Hanna sekalak si erkiniteken, ngelai i rumah pertoton. Kentisik ngenca ia erjabu, pitu tahun ngenca dekahna, lanai ia erperbulangen. Secara manusia tentu tergejab man bana melungun lanai lit teman geluh. Si e kerina banci tambur erkiteken Hanna mereken dirina ringan i rumah Tuhan. I bas umurna enggo waluh puluh empat tahun, ia la pernah nadingken rumah Tuhan. Ringan i rumah Tuhan mahan bana rembak ku Tuhan dingen megati jumpa ras kalak si deban si bengket ku rumah Tuhan. Hanna pe jumpa ras Jesus tupung Jesus ipersembahken ku rumah pertoton. Hanna ndeheri Jesus ikatakenna bujur man Dibata, janah iturikenna kerna Anak e, man kerina kalak si nimai-nimai warina Jerusalem ibebasken Dibata. Iturikenna kerna Jesus man nterem jelma. Jesus e me Tuhan ras Juruselamat. Suari berngi ia muji Tuhan, alu ertoto ras erpuasa. Muji Tuhan ertina nghamati Tuhan, nggejabken ras naksiken kiniulinNa, keleng ateNa ras kuasaNa. Ilakoken alu ertoto, ersembah, rende ras perbahanen si ngena ateNa.

La terjeng ertoto, Hanna pe ngelakoken puasa, e me ngkuasai diri nandangi pangan tertentu i bas waktu tertentu. Ngkuasai diri, janah nggeluh i bas perbahanen si mabai diri gelah reh rembakna ras Tuhan. Ijenda teridah maka Hanna makeken masa tuana ngerembakken diri ku Tuhan. Nuriken kerna Tuhan arah kecibal geluhna, pelayanenna ras kesetiaanna ringan i rumah Tuhan. Bali ras Daud tupung nehken pertoton muji Tuhan: "Sada ngenca pemindonku man Tuhan, sada ngenca sura-surangku e me ringan i bas rumah Tuhan kidekah geluhku guna nggejabken kiniulin Tuhan dingen mindo gelah itegu-teguNa". (Mas.27:4).

III. PENGKENAINA

Adi si urri perdalanen geluhta, melala kal si banci si turiken kerna Dibata i bas Jesus Kristus. Mulai kin kita tubuh ku doni enda seh umurta nggo gedang bagenda. Erbage-bage penggejaben kerna kekelengen ras kiniulinNa si banci ituriken man anak-anakta, kemputa, bage pe man kalak si deban. Wari-wari banci ibentasi seh metua daging ni baba, kerina erkiteken pemereNa. Tuhan ingan penalemen ras pengendesen geluhta, tetap rembak erkemalangen man baNa. Muji Tuhan segedang geluh alu ras Tuhan, rende ras ertoto. Rendelah guna muji Tuhan, ula endeken ende-enden si biakna numpah padan, sierbahnca kita tangis teriluh, megogo ate.

Mehuli kal ulihna adi Saitun tetap rende muji Tuhan. Rende mbue gunana nandangi kesehaten kula, perukuren, sosial ras kiniteken. Rende banci nguraki stres ras nguraki penggejaben kelungunen. Saitun nuriken perbahanen Dibata alu rende tupung i rumah, i gereja. Alu rende tambah keriahen turah ate malem emaka tambah kesehaten. Lebih asa si e nggo muat bagin i bas erberita kerna Dibata man nterem jelma. Ende-enden pujin i ayuken alu pemuliaken Tuhan. Kegeluhen sibage labo terjeng guna kita ngenca tapi jadi usihen man ank ras kempunta. perbahanen si tetap.

IV. PERTOTON

O Tuhan, igejabken kami kiniulinNdu. Gia umur kami nggo metua la pernah itadingkenNdu kami. Lalap Kam nemani kami. Bahanlah kami tetap rembak ras Kam kidekeh umur geluh kami. Pengasup kami nuriken kerna Kam man kalak si deban. Gelah Kam tetap iberitaken kami. Amin.

V. DISKUSI & AKSI

1. Turiken kerna kecibal geluh Hanna rikutken bahan PA nta

2. Turiken kai saja si banci ilakoken Saitun nuriken kerna Dibata, lakokenlah!

Rende i gereja

VI . USULEN LAGU

1. KEE 399: 1-2

2. KEE 227: 1-2

3. KEE 343: 1- (Persembahen)

4. ΚΕΕ 334: 1-2