BIMBINGEN PA MAMRE Tanggal, 5 APRIL - 11 APRIL 2026

Seh Kal Ulina Kalak Si Maba Berita Simeriah

Ogen : Roma 10:14-17

14 Tetapi bagaimana mereka dapat berseru kepada-Nya, jika mereka tidak percaya kepada Dia? Bagaimana mereka dapat percaya kepada Dia, jika mereka tidak mendengar tentang Dia. Bagaimana mereka mendengar tentang Dia, jika tidak ada yang memberitakan-Nya?

15 Dan bagaimana mereka dapat memberitakan-Nya, jika mereka tidak diutus? Seperti ada tertulis: "Betapa indahnya kedatangan mereka yang membawa kabar baik!"Ketidakpercayaan Israel

16 Tetapi tidak semua orang telah menerima kabar baik itu. Yesaya sendiri berkata: "Tuhan, siapakah yang percaya kepada pemberitaan kami?"

17 Jadi, iman timbul dari pendengaran, dan pendengaran oleh firman Kristus.

Roma 10:14-17

14 Tapi kuga banci kalak erlebuh mindo penampat man Tuhan adi langa ia tek man BaNa? Kuga banci ia tek man BaNa adi langa pernah ibegina pe kerna Ia? Kuga banci ibegina adi la lit si meritakenca?

15 Kuga banci kalak meritaken berita e adi la ia isuruh? I bas Pustaka Si Badia lit tersurat, "Seh kal tuhu ulina kerehen kalak si maba Berita Si Mehuli e."

16 Tapi labo kerina kalak mehuli pengalo-ngalona nandangi Berita Si Mehuli e. Nina Nabi Jesaya, "O Tuhan, ise nge tek nandangi berita si ipeseh kami?"

17 Dage kiniteken rehna arah megi Berita e, janah isi Berita e, eme Kata kerna Kristus.

Tujun : Gelah Mamre:

1. Ngasup nuriken kiniulin erkiteken sehna Berita si Meriah sue ras teks
2. Nuriken pentingna dahin erberita simeriah

Metode : Aksi

I. KATA PENARUH

Sikataken bujur man Dibata, si enggo nemani, nampati ras naruhken gerejaNa GBKP seh ku bas tahun enda. I bas tahun enda, GBKP mperingeti 136 tahun sehna Berita Si Meriah man kalak Karo (18 April 1890-18 April 2026). Arah PA Mamre sekali enda nuate gelah Mamre Ngasup nuriken kiniulin erkiteken sehna Berita si Meriah ras nuriken pentingna dahin erberita simeriah. Alu bage anggota Mamre GBKP tetap encidahken kesetian muat bagin i bas dahin-dahin pebelangken Berita Si Meriah. Mamre GBKP nggit maba Berita Si Meriah ku ja pa pe ia lawes, sue ras tema”Seh Kal Ulina Kalak Si Maba Berita Simeriah”.

II. URAIAN TEKS

Surat Rasul Paulus man perpulungen Roma nuriken kerna kuga kin pentingna ras belinna kuasa Berita Si Meriah. Nina Paulus “La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi. Sabap arah Berita Si Meriah tangkas uga Dibata ngerambakken manusia kempak DiriNa. Si enda ibenaken i bas kiniteken janah erkedungen i bas kiniteken. Bagi lit tersurat i bas Pustaka Si Badia, "Kalak si nggo iperembakken Dibata kempak DiriNa erdandanken kinitekenna nggeluh me ia" (Rm. 1:16-17). Alu bage maka seh kel Ulina Kalak Si Maba Berita Simeriah. Piga-piga palas penungkunen isehken Paulus arah suratna, guna mabai perpulungen segelah rukur, sedar ras ergiah-giah guna muat bagin meritaken Berita Si Meriah. Paulus pe ngajuk perpulungen segelah ndahiken meritaken Berita Si Meriah e ola menggo, merose dingen mekarus:

1. Kuga banci kalak erlebuh mindo penampat man Tuhan adi langa ia tek man BaNa? Ertina, enterem denga kalak si lenga tek man Dibata, man Jesus Kristus si enggo mate i kayu persilang guna nebusi dosa-dosa manusia, keke i bas si mate nari ras nangkih ku Surga.
2. Kuga banci ia tek man BaNa adi langa pernah ibegina pe kerna Ia? Sehkel perluna meritaken Berita Si Meriah man kalak si lenga pernah megisa.
3. Kuga banci ibegina adi la lit si meritakenca? Pengajuk segelah kalak si erkiniteken berkat ras muat bagin guna meritaken Berita Si Meriah.
4. Kuga banci kalak meritaken berita e adi la ia isuruh? Rasul Paulus nehken pengajuk man perpulungen segelah nuruh anggota perpulungen e lawes meritaken Berita Si Meriah. Kalak si tek situhuna kerina enggo isuruh Jesus guna meritaken Berita Si Meriah, segelah dahin e terus idahiken. Guna si e maka i bas perpulungen pe arus ngutus persuruhenna guna ndahiken dahin meritaken Berita Si Meriah.

I persingeti Paulus mulihi perpulungen Roma alu nehken sitersurat i bas Jesaya 52:7 “Seh kal riahna ukur ngidahsa; persuruhen reh ngepari deleng-deleng, maba berita si mehuli, berita perdamen. Imomokenna kemenangen, janah nina man Sion, "Dibatandu raja kap."” Paulus ngidah maka nai-nai nari pe lit kap persuruhen Dibata guna maba berita si mehuli eme nabi-nabi. Kenca Tuhan Jesus nangkih ku Surga pe dahin maba berita si mehuli e pe iterusken rasul-rasul. Emaka ipetetap Paulus ukur perpulungen nina "Seh kal tuhu ulina kerehen kalak si maba Berita Si Mehuli e." Paulus ningetken maka labo kerina kalak mehuli pengalo-ngalona nandangi Berita Si Mehuli e. Bagi si inanami nabi-nabi pe maka lit ka nge sinimbak. Tapi i babo si e kerina si pentingna eme kuga gelah isehken Berita Si Meriah e. Sabab kiniteken rehna arah megi Berita e, janah isi Berita e, eme Kata kerna Kristus. Mpeturah kiniteken teptep kalak simegi Berita Simeriah e eme bagin Dibata. Dibata si masu-masu dahin perberita si meriah, segelah kalak si megisa tek dingen ngaloken keselamaten idur Dibata nari.

III. PENGKENAINA

Tahun enda siperingeti me 136 tahun sehna Berita Si Meriah man kalak Karo. I bas peringeten kerna belinna pengarak-ngarak ras pemasu-masun Dibata man GBKP. Dibata enggo njadiken GBKP jadi aronNa guna jadi pasu-pasu man doni enda eme maba Berita Si Meriah ku ja pa pe. GBKP ngusih kempak Jesus, mpertemani ras engkelengi kerina kalak. GBKP pe arus jadi teman man kerina kalak, ija pa pe lit anggota GBKP tading, jadilah maba keriahen ras kemalemen ate man sekelewetna. Alu bage teridah tuhu-tuhu GBKP (subuk persadanna ras teptep anggota) enggo jadi ‘pancur’ Dibata nehken pasu-pasuNa. Nulih kita kempak dahin-dahin pebelangken Berita Si Meriah paksa si nuria, Zending i negeri Belanda nari (NZG), si reh ras ringan i tengah-tengah kalak Karo (18 April 1890). Tuhu enggo mbue kel ulih pendahin Zending, enggo rurat, turah ras erbuah seh paksa enda. Seh kel ulina pendahin zending NZG, pantek gedung-gedung gereja, pantek sekolah-sekolah, pantek rumah sakit ras ertambah-tambah pemeteh ras kepentaren kalak Karo i bas erbinaga ras nuan-nuan. Marilah buat baginta guna dahin meritaken Berita Si Meriah, mbelang denga ingan si lenga seh iberitaken Berita Si Meriah ras enterem denga kalak lenga megi Berita Si Meriah, tentuna kita rutang guna meritaken Berita Si Meriah. I bas GBKP lit tenaga-tenaga khusus siipeberkat khusus guna dahin Injil (Misionaris) ras Tenaga e igelari Tenaga Pekabar tenaga PI enda, iperluken dana. Guna mendukung program sipersada gegehta, tentuna reh teremna banci siutus arah belangna berita e isehken Berita Si Meriah. Alu bage. Reh Si Meriah. Pengarapenta, reh teremna kalak si megi Berita iselamatken. reh teremna kalak si tek dingen

IV. DISKUSI

1. Rikutken bahan oratenta, maka i bas meritaken Berita Si Meriah la banci meros dingen mekarus. Kai-kai saja dage siarus silakoken ras si litken i bas ndahiken dahin meritaken Berita Si Meriah?
2. Arihken ras dalanken i bas mamre sektor erbahan aksi pepulung dana, gunana eme mendukung dana tenaga detaser GBKP. Kenca ipepulung isehken man BPMR, BPMR nehkenca man BPMK, BPMK nehkenca man detaser si lit iwilayah klasista tah pe idarat klasista.

USULEN ENDE-ENDEN :

1. KEE GBKP No. 108:1, 2, 4
2. KEE GBKP No. 396:1-3
3. KEE GBKP No. 102:1, 4
4. KEE GBKP No. 257:5 (Persembahen)

Pdt. DR. Kalvinsius Jawak, M.Si.