Bimbingan PA Mamre 06 September – 12 September 2026

Bapa Singajari Anak

Ogen: Kuan-kuanen 20:7; 22:6

20:7 Untung kap anak si erbapaken kalak bujur, dingen si ndalanken perbahanen si bujur.

22:6 Ajarkenlah man anak uga kearusen nggeluh, maka ikutkenna asa umurna nggeluh.

Amsal 20:7; 22:6

20:7 Orang benar yang bersih kelakuannya – berbahagialah keturunannya.

22:6 Didiklah orang muda menurut jalan yang patut baginya, maka pada masa tuanyapun ia tidak akan menyimpang dari pada jalan itu

Tujuan: Gelah Mamre:

1. Mamre memahami peran seorang bapa sesuai teks Alkitab.
2. Mamre menceritakan pengalaman mendidik anak.

Metode: Refleksi (Sangap nge Anakta er-Bapa ken Kita?) dan Aksi HUT.

I. KATA PENARUH

Adi isungkun kai nge erta si mehergana i bas kegeluhenta, melala kita njababsa maka anak me erta si mehergana. Kai pe banci si usahaken lit guna mendukung keperlun anak adina e untuk kemajun. Sebab anak e me tumpuan harapn masa depan i bas jabu, gereja, ras bangsa. Adina ateta jabu, gereja ras bangsa megegeh ras berkembang, anak-anak arus meteh mehuli dingen lagu langkahna pe nuduhken kebujuren. Tentu saja si berperan penting i bas ngajarken anak gelah meteh mehuli dingen ngelakoken kebujuren, eme Bapa. Erlajar kita arah Salomo si ngidah keuntungan anak si erbapaken kalak bujur dingen mehuli.

II. URAIAN

Kitab Kuan-kuanen ntah pe Kitab Amsal (Masyal): eme Kitab si isina eme kumpulan hikmat (kepentaren) ras pengajaren si mabai gelah si ngogesa ndatken pemahamen geluh si payo dingen ngasup ndalani kegeluhen alu pentar (bijak). Inti ibas keseluruahan Kitab Kuan-kuanen eme: "Erkemalangen man Tuhan" jadi ulu kerina kepentaren ras pemeteh. Adi erkemalangen kita man Tuhan, mahan bana reh pentarna ras reh payona kita ndalani kegeluhen i bas kerina dampar, seh maka meriah si akap nggeluh ras bijak ngalaken erbage situasi kegeluhen. Nggeluh erkemalangen man Tuhan tentu teridah arah perbahanen, pengerana ras cara rukur si mehuli. Ngena ate Dibata ngidah lagu langkahta. Cara rukurta pe erbahansa kita sehat ras terpuji gelar Tuhan. Teks oratenta sendah, Kuan-kuanen 20:7 nuriken kerna mbelin kel tuhu peran Bapa i bas ngajarken anak. "Untung kap anak si erbapaken kalak bujur, dingen si ndalanken perbahanen si bujur. Kalak bujur (Ind: orang benar yang bersih kelakuannya). Kata 'bersih kelakuannya' i bas Alkitab versi English Amplified itulisken eme integrity entahpe integritas (sue kata ras perbahanen). Antusen integritas eme mutu, sipat, entahpe situasi si nuduhken keniersadan si utuh, seh maka lit potensi ras kinibeluhen si mbincarken dolat/wibawa; kinibujuren. Teks i datas labo ngataken, "kalak si tuhu-tuhu bayak - untung kap anak-anakna, entah pe "kalak si populer, terkenal - untung kap anak-anakna" Tapi ikataken i bas teks eme: si erbapaken kalak bujur dingen si ndalanken perbahanen si bujur. Kalak si bage enggo pasti ngeluh i bas Kata Dibata, ndalanken kata Dibata. Si patuh janah mbiar man Tuhan pasti lit bas ia sipat si mehuli, dingen idalankenna perbahanen si bujur. Maka tuhu untung kap anak si erbapaken ia. Si peduaken Kuan-kuanen 22:6 "ajarkenlah man anak uga kearusen nggeluh, maka ikutkenna asa umurna nggeluh". Engkai maka anak perlu iajarken kerna kearusen nggeluh? I bas ayat 15 ikataken: "biasa kap adi anak ngelakoken perbahanen si la payo"... (Indo: kebodohan melekat pada hati orang muda). Emaka kitab Kuan-Kuanen mereken pedah man orangtua, maka anak perlu iajarken kerna kearusen nggeluh, gelah ia meteh mehuli. Jabu eme ingan si pertama i bas mereken pengajaren man anak. Peran orangtua mbelin kel tuhu i bas pembentukan karakter anak. Tentu saja i je Bapa selaku imam sangat berperan penting i bas mereken pengajaren man anak. Raja Salomo si nulisken kitab Kuan-kuanen enda ngidah maka kepeken pendidiken utama si idat anak eme arah Bapa. Pendidiken si idatkenna arah pengajaren Bapana Daud, em maba ia meteh kerna kai si mehuli dingen kai si la mehuli. Janah Raja Salomo pe ngidah ras nggejapken, maka untung kel anak si erbapaken kalak bujur.

III. PENGKENAINA

Bagi raja Salomo nggejapken maka tuhu mbelin peran sekalak Bapa nandangi anak, bage min penggejapen Mamre selaku Bapa i tengah-tengah jabu. Bagi lit kuan-kuan ngatakenca like father, like son. Entahpe "Buah jatuh tidak jauh dari pohonnya." Ertina: kuga Bapana bagem anak-anakna. Ngatakenca maka sekalak anak ngusih bapana labo saja secara rupa tapi pe sipat ras kebiasanna. Emaka kuga atenta jadi man anak-anakta, sangat berpengaruh erkiteken pengajarenta. Adi atenta anak e meteh mehuli dingen jadi kalak bujur, Bapa me arus leben jadi usihen. Bagi kalak si nuan i bas juma, maka kalak si nuan tentu ngarap ia gelah si isuankenna e turah mejile ras erbuah. Labo ise pe si nura gelah si isuanna e la erbuah. La terjeng erbuah saja, tapi meramis ka dingen entebu ka. Bagi sinuan-sinuan e, bage me pe arapen Dibata ras arapenta kerna anak-anak. Pengarapenta, erbuah min kata, pedah, persinget, pergegeh si nibelas Bapa. Erbuah ertina ibegiken, itinggelken, ipegejapken dingen idalanken i bas geluhna si tep-tep wari. Megiken kata dingen ndalankenca enda me si imaksud erbuah. Enda kerina banci jadi perban pengajaren Bapa man anak sue kata ras perbahanen. I bas tahun enda enggo genep umur kategorial anak singuda si enggo ngawan i bas Gerejanta si igelari PERMATA (Persadan Man Anak Gerejanta), eme pe-78 tahun ken (12 September). Amin pe secara kategorial tuan me anak singuda enda, tapi secara pemeteh, pengalamen ras pengajaren buen me lit i bas Mamre. Emaka selaku Bapa i tengah jabu dingen selaku Mamre (Persekutuan kaum Bapa) i tengah-tengah Gerejanta GBKP, enggo me si bereken pengajaren si mehuli man anak singuda enda? Sangap nge anak-anak er-Bapa ken Mamre? Enda jadi refleksi man Mamre selaku Bapa i tengah jabu dingen i Gereja. Segelah erpaguhna dingen reh majuna kategorial PERMATA GBKP, mbelin ije pengaruh peran Mamre. Bagi motto Mamre: Mamre Erdiate, Mamre Erpemere, bagem tuhu enggo igejapken anak-anak PERMATA perbahanen Mamre e. Tapi lebih asa si e, i bas 78 tahun ken umur kategorial PERMATA GBKP tahun enda, mbelin pengarapen kerina anak singuda enda gelah lebih igejapkenna maka sangap kel anak er-Bapa ken Mamre. Mamre tetap jadi idola man kerina anak-anak PERMATA GBKP.

REFLEKSI (Sangap nge Anakta er-Bapa ken Kita?) ras AKSI HUT I bas PA Mamre sekali enda, iajuk Mamre gelah berefleksi arah piga-piga penungkunen enda:

1. Enggo nge kira-kira i gejapken anakta kehadiren Bapa i tengah jabu? Tupung anak e picet ukurna i bas ia ndalani masa sekolah/kuliahna, pendahinna, apakah igejapkenna kehadiren Bapa? Tupung igejapkenna kekecewaan i bas pertemanenna, apakah igejapkenna kehadiren Bapa? Tupung perlu ia ingan guna nuri-nuri ras tangis perban mbelin perbebenna, apakah igejapkenna kehadiren Bapa?
2. Enggo nge kira-kira Mamre ngajarken hal si mehuli kempak anak-anak gelah anak e meteh mehuli dingen ngelakoken kebujuren?
3. I bas refleksi enda pe, mari si renungken sangap nge anakta er-Bapa ken kita?
4. Bahanlah aksi (si banci idalanken/ ibereken) man PERMATA GBKP i bas perayaan HUT PERMATA GBKP si pe-78 tahunken i bas tahun enda!

USULAN ENDE-ENDEN :

1. KEE GBKP No. 124: 3
2. KEE GBKP No. 201: 1,3,4
3. KEE GBKP No. 309:1,3
4. KEE GBKP No. 385: 1 (Persembahen)

Pdt. Mira Mutianta Br. Sinulingga, S.Th.