BIMBINGAN PA MAMRE TANGGAL, 30 AGUSTUS – 05 SEPTEMBER 2026

Ngkawali Hak Manusia

Ogen : Kuan-kuanen 31:8-9

8 Kapitilah kalak si la ngasup nampati dirina. Kawalilah kerina hak kalak si musil-musil.

9 Sampatilah ia jenari jadilah kam hakim si bujur. Kawalilah hak kalak musil dingen kalak si itindih."

Amsal 31 : 8-9

8 Bukalah mulutmu untuk orang yang bisu, untuk hak semua orang yang merana.

9 Bukalah mulutmu, ambillah keputusan secara adil dan berikanlah kepada yang tertindas dan yang miskin hak mereka.

Tujun : Gelah Mamre :

1. Meteh hak-hak manusia
2. Ngelumbaken, ngkapiti ras ngkawali hak manusia Metode : Nuri-nuri kerna contoh Kasus HAM ras cara ndungisa

I. KATA PENARUH

 Menurut data si lit i Komnas HAM, i bas tahun 2024 terjadi piga-piga pelanggaren HAM erkawiten ras pelanggaren kebebasan beragama 24 kasus i piga-piga propinsi, alu kasus si melalana e me i Jawa Barat ras Banten; kekerasen i Papua, lit 13 peristiwa nandangi masyarakat, termasuk 22 peristiwa penembaken, 12 penangkapen sewenang-wenang, ras 7 kasus penyiksan, si erbahanca 21 kalak mate ras 36 kalak luka-luka. Kasus si deban, Komnas HAM ncatat lit 10 kasus si jadi perhatin kusus i bas tahun 2024. Jumlah kasus enda erpalasken laporen resmi ngenca arah piga-piga organisasi, ras lenga termasuk kerina kasus pelanggaren HAM si mungkin la ilaporken tapi terjadi. Arah piga-piga laporen si isehken ku publik mereken man banta kasus pelanggaren HAM tuhu-tuhu perlu si tengeti selaku anak-anak Tuhan. Data tahun 2025 banci si nen i bas data Komnas HAM. I je tole banci si idah maka kasus ras peristiwa pelanggaren HAM enda terus nge lit, terutama nandangi aktivis ras pembela HAM. Endam risiko si jadi man kalak si ersura ngelakoken advokasi ntah pembelan HAM. Tapi selaku gereja, Mamre la banci sinik ngidah kerina pelanggaren HAM enda, termasuk nandangi pekerja migran. Gereja arus ngerana ras erbahan sada tindaken si nguraki kasus pelanggaren HAM ras Mamre la lit jadi pelaku pelanggaren HAM.

II. URAIAN TEKS

Kitab Kuan-Kuanen e me bagin sastra hikmat i bas Pustaka Si Badia, radu ras Jop bage pe Pengerana. Penulis kitab enda lalan i suratken Raja Salomo (Kuan. 1-29), lit tambahen arah kalak bijak (pentar) si deban bagi Agur anak Jake (Kuan. 30), Lemuel (Kuan. 31). Tujun kitab enda itulis mereken pedoman nggeluh si pentar ras erpemeteh, palasna erkemalangen man Tuhan (Kuan. 1:7), bage pe ngajarken nilai moral ras orat nggeluh. Kitab enda risiken kerna kecibal kegeluhen, pertenget man jabu, pemerentah, ras hubungen sosial (perkade-kaden). Kepentaren si ikataken i bas kitab enda labo erkiteken melala pemeteh ngenca, tapi ngasup encibalken pemeteh guna ndalani kegeluhen alu payo i adep-adepen Dibata ras teman manusia. Tema Utama kitab enda e me “Erkemalangen man Tuhan, Keadilen, kebujuren, erbintuas, penguasan diri ras kepate nandangi kalak si lemah”.

Kuan-Kuanen 31:8-9, “Kapitilah kalak si la ngasup nampati dirina. Kawalilah kerina hak kalak si musil-musil. Sampatilah ia jenari jadilah kam hakim si bujur. Kawalilah hak kalak musil dingen kalak si itindih”. Kapitilah ertina tindaken si aktif, la sinik saja. Enda encidahken pendilo profetik (suara kenabian) guna ngerana nampati kalak si la ngasup nampati dirina. Kawali kalak si musil enda ertina man kalak si la ndatken dalan, gegeh, ntah pe kengasupen nuntut hakna (marginalized). Enda pe tole ngerana kerna masalah-masalah (kasus-kasus) si erkawiten ras kiniseran erkiteken situasi si la adil ntah pe “struktur” si erbahanca musil (kemiskinan struktural). “Jadilah kam hakim si bujur”, enda encidahken standar moral ras hukum si seimbang, ndauh arah diskriminasi (pembeda-bedan). “Kawalilah hak kalak si musil dingen kalak si itindih”, ertina penjemba guna ngelakoken pembelan (advokasi) hak-hak dasar jelma (hak-hak asasi manusia). Sura-sura Dibata gelah kerina perpulungenNa jadi pembela kebenaren ras keadilen. Adi sinik i bas situasi si la adil ertina la ndalanken sura-sura Dibata. Gereja idilo gelah ersora kerna kebenaren (suara kenabian) si ngkapiti sora kalak si lemah tanda keleng ate ras keadilen i bas Kinirajan Dibata. Kata Dibata enda sendalanen ras prinsip HAM internasional si ningetken maka teptep jelma lit hakna ilindungi hukum, keadilen, ras kesempaten si seri, alu la mbeda-bedaken.

HAM (Hak Asasi Manusia) e me hak dasar yang melekat pada setiap individu, seperti hak hidup, kebebasan, dan keamanan. HAM e me hak-hak dasar si lit i bas teptep jelma paksa tubuhna nari, alu la mbedaken ras, agama, gender, status sosial, ntah pe kewarganegaran. Hak enda iakui secara internasional (umpamana i bas Universal Declaration of Human Rights PBB) i je ituriken kerna hak enda e me : hak nggeluh, hak kebebasen mereken pendapat ras ekspresi, hak ndatken pendahin, hak ndatken perlindungen hukum si adil, hak terlindungi arah kekerasen (perlakuan kejam) la manusiawi, ntah pe diskriminatif (mbeda-bedaken) ras si debanna.

Pelanggaren HAM banci saja terjadi umpama i bas Pekerja Migran. Tantangen Pekerja Migran tuhu melala. Pekerja Migran kalak si erdahin i darat negara asalna, umpama kalak Indonesia erdahin i Malaysia, Filipin ntah pe i Arab Saudi. Lit pekerja Migran enda resmi lit ka jalur ilegal (la lengkap dokumenna) ntah pe la resmi. Si rusur ihadapi pekerja Migran enda e me:

1. Eksploitasi upah, ertina upah la sue ras pendahin ntah la ibereken upah sama sekali (itokohi).
2. Situasi pendahin si la manusiawi, umpama jam kerja si gedang ras la lit waktu istirahat si layak.
3. Isiksa ntah pe ilakoken tindaken kekerasen, termasuk pe pelecehen fisik ras seksual.
4. Diskriminasi, enda biasa ilakoken erpalasken kewarganegaran ntah pe bahasa.
5. La lit jaminen hukum, kesuliten guna ndatken perlindungen erkiteken status si la resmi bage pe keterbatasen ngangkai bahasa.
6. Ndauh i bas keluarga nari, si erbahanca rentan kejiwan (dampak psikologis).

Pekerja Migran enda rusur ngenanami eksploitasi, kekerasen, penyalahgunan kontrak, ntah pe gaji si la igalari. Lit ka pe jadi korban perdagangan manusia, janah rusur kebenen sora guna mbela dirina erkiteken tekanan ekonomi, bahasa, ntah pe status si la resmi. I bas konteks Kuan-Kuanen 31:8–9, Pekerja Migran enda termasuk si ikataken "la ngasup nampati dirina" secara sosial, janah perlu kal ia isampati pihak si nggit mbela ras ngkapiti hak-hakna. Pernah si begi informasi i bas berita maka lit piga-piga kalak Indonesia erdahin ku piga-piga negara i Timur Tengah ras Asia ilaporken la ndatken upah (gaji) piga-piga bulan. Lit ka kasus Pekerja Migran enda lanai banci mulih erkiteken la lit pasporna, ntah pe pasporna itahan tuanna. Janah lit ka Pekerja Migran pernah ngenanami kekerasen fisik bage pe seksual tapi la pang erbahan laporen erkiteken mbiar ia ipelawes ras melala denga rusur si begi kasus-kasus HAM si jadi nandangi Pekerja Migran.

Adi ngerana kita erpalasken UU perlindungen HAM ras kiniteken selaku kalak Kristen, perlu kal ilakoken man ise pe piga-piga hal si bagenda rupana :

1. Perlakuan setara, Pekerja Migran arus iperlakuken adil subuk kerna gaji, jam kerja, bage pe perlindungen hukum seri ras warga negara tuan rumah.
2. Kebebasen berpendapat ras berkumpul, Pekerja Migran enda erhak nuriken ras nehken keluhen arah mekanisme si resmi.
3. Akses layanan kesehaten, pendidiken, ras bantuan hukum pe iperluken secara adil merata.
4. Perlindungan arah eksploitasi ras kekerasen negara si mereken pendahin.

Erpalasken kitab Kuan-Kuanen 31:8–9 kita idilo gelah ngelakoken advokasi (pembelan) man kalak si lemah. Kalak Kristen idilo gelah ersora man kalak si lanai ngasup ersora. Keadilen ras kekelengen labo icidahken terjeng mereken penampat man perbaiken fisik/ materi saja tapi pe mastiken kalak ndatken keadilen i bas kegeluhenna. Pekerja Migran pe tinepa Dibata si patut ihamati selaku tempas Dibata. Pekerja Migran la banci iperlakuken bagi barang ntah pe memanfaatkan semata tenagana bagi rubia. HAM man Pekerja Migran labo terjeng mereken perlindungen fisik, tapi pe erga diri selaku manusia, keadilen, ras lias ate. Gereja ras kerina mamre tek maka ia idilo Tuhan guna mastiken Pekerja Migran labo “kalak si la ersora” si la idiate, tapi iperjuangken hakna arah mereken sora ras tindaken nyata.

III. PENGKENAINA

Kai-kai saja si banci ilakoken Mamre GBKP nandangi kalak si jadi korban pelanggaren HAM bage pe mastiken kerina Mamre GBKP jadi si engkawali Hak Manusia ?

1. Advokasi Publik (Kuan 31:8-9), enda banci ilakoken alu hadir i bas forum ntah pe perjumpan guna ngelakoken pembelan Pekerja Migran alu mereken sora keadilen, banci ilakoken Mamre alu ngirimken surat ku pihak-pihak terkait (pernyataan sikap).
2. Mamre pe banci mereken pendampingen hukum alu makeken kapasitas Mamre si berlatarbelakang hukum, kerja sama ras LSM ntah gereja (unit si bergerak i bas advokasi, bagi YAK GBKP ntah Moria) si lit tim ntah

rekanen bantuan hukumna guna ndampingi korban HAM i pengadilen. 3. Erbahan kegiatan pendidiken HAM i gereja ntah masyarakat ntah Sadar hukum mbuka pengangkan masyarakat kerna HAM ras Hukum. Alu bage ulih kegiatan enda banci jadi sada “bekal” si meherga man Anggota Runggun ngangkai ras mperjuangken hak-hak dasarna bage pe ngasup ngelakoken pembelan kerna hakna (ersora). 4. Mamre jadi usihen si banci icontoh i bas praktek keadilen ras encidahken komitmenna selaku perbapan si tek man Tuhan Jesus mereken pengergan kemanusian si layak man si erdahinna. 5. Mamre pe banci mbangun relasi ras para korban HAM. Mereken dukungen secara emosional, rohani ras materi man Pekerja Migran ntah pe kelompok “terpinggirken” si lit i lingkungenna. 6. Mamre pe banci menginisiasi Doa ras Aksi Nyata guna nggabungken dukungen secara rohani alu perbahanen si nyata sue ras si ajarken Tuhan Jesus Kristus.

Selamat ngkawali Hak Asasi Manusia man Mamre GBKP. Tuhan simasu-masu.

IV. DISKUSI

1. Ngkai maka kasus pelanggaren HAM lalap terjadi i bas kegeluhen enda ?
2. Erpalasken Kuan-kuanen 31:8-9, aksi nyata kai si banci ilakoken Mamre GBKP ? (Asa bancina langsung praktekken)

USULEN ENDE-ENDEN :

1. KEE GBKP No. 254: 1-3
2. KEE GBKP No. 350: 1-2
3. KEE GBKP No. 71: 1-3
4. KEE GBKP No. 471: 1 (Persembahen)

Pdt. Yusuf Tarigan, S,Si. (Teol,)., MADM., MM.