HUT PERMATA

BIMBINGAN PA SAITUN GBKP TAHUN 2026

TANGGAL, 13-19 September 2026

Ogen : Kuan-kuanen 3:5; 4:23

Perukurenndu Si Nampati Kam Ngantusi PERMATA GBKP

Indonesia:

Amsal 3:5

[5] Percayalah kepada Tuhan dengan segenap hatimu, dan janganlah bersandar kepada pengertianmu sendiri.

Amsal 4:23

[23] Jagalah hatimu dengan segala kewaspadaan, karena dari situlah terpancar kehidupan.

Karo:

KUAN-KUANEN 3:5

[5] Ernalemlah man Dibata alu bulat ukurndu. Ndigan pe ola ernalem man pemetehndu jine.

KUAN-KUANEN 4:23

[23] Manjar-anjar kam rukur, sabap perukurenndu kap si mabai dalan kegeluhenndu.

Tema: Erta E Me Alat Labo Tujun.

Tujunna:

Gelah Saitun:

·       Ngangkai antusen kata enda: "perukurenndu si mabai dalan kegeluhenndu"

·       Ngangkai kegeluhen PERMATA GBKP si genduari ras mereken dirina jadi teman sue ras tata nilai GBKP.

Metode: Diskusi ras Sharing

I. BENA KATA

Adi isungkun kai nge erta si mehergana i bas kegeluhenta, melala kita njababsa maka anak rikut ras kempu. Kai pe banci si usahaken lit guna mendukung keperlun anak ras kempunta guna masa depanna. Sebab anak ras kempu-kempunta e me harapen masa depan i bas jabu, gereja ras bangsa. Anak ras kempu si enggo ingawanken igelari PERMATA (Persadan Man Anak Gerejanta). La gejap reh belinna ras reh beluhna anak ras kempunta e. Seh maka megati lanai siangka kegeluhen PERMATA GBKP nta si genduari, sebab ia terus erlajar arah perkembangen jaman. Kita enggo ketadingen, janah mekatep anak ras kempu e la bagi ukurta. I bas PA nta sekali enda erlajar kita arah kata Dibata gelah banci janah ngasup kita mereken pedah, pengajaren si mehuli rikut jadi usihen man anak ras kempunta si igelari PERMATA GBKP.

 II. MPEGESI OGEN

Inti i bas kerina kitab Kuan-kuanen e me: "Erkemalangen man Tuhan" jadi ulu kerina kepentaren ras pemeteh (Kuan-kuanen 1:7). Adi erkemalangen man Tuhan, mahan bana reh pentarna ras reh payona i bas ndalani kegeluhen i bas kerina dampar, seh maka meriah nggeluh ras bijak ngalaken erbage situasi kegeluhen. Ras teridah arah perbahanen, pengerana ras cara rukur si mehuli.

Kuan-kuanen bindu 4 enda nuriken kerna pengajaren "guru hikmat", e me kerna dalin kalak si bujur ibandingken ras dalan kalak si la bujur.. Pengajaren e ibenaken alu nehken pengajaren kerna kuga pentingna kata-kata guru hikmat ( ay, 10-13), persinget gelah ula erteman ras kalak jahat (ay. 14-19) jenari itutup alu pengajuk gelah "murid" megiken ras mbuniken pengajaren e i bas pusuh (ay.20-27). Lit 4 hal si man jagan tandana mkalak megiken ras muniken pengajaren, e me :

·       "Jati" (Jaga hati). "Manjar-anjar kam rukur" Ukurkenlah mbages-mbages ope denga idalankenndu (ay. 23, 26).

·       "Jamu" (Jaga Mulut ). "Ula ndigan pe belaskenndu kata la tuhu, "pedauhlah i bas kam nari kata guak" (ay. 24)

·       "Jama" (Jaga mata). Teridah min arah matandu sinalsal kinibujuren ukurndu" (ay. 25)

·       "Jaka"( Jaga kaki )."Sada jingkang pe ola kam nilah i bas si benar nari" (ay. 27).

I bas Kuan-kuanen 4: 23 si ujadi bahan ogenta ngataken:"perukurenndu kap si mabai dalan kegeluhenndu". Ertina maka kerina si ilakoken manusia i bas geluhna igerakken perukurenna. Pusuh e me salah sada organ si penting man manusia si nentuken perbahanen geluh. I bas pusuh e lit perukuren "intelektual" ras "emosional" manusia. I bas pusuh e me pengajaren e ijaga dingen iukuri. I bas ogenta Kuan-kuanen 3:5 pe tangkas man banta, maka kalak si erkemalangen man Tuhan tentu ernalem ia man Tuhan alu bulat ukur dingen la ia ernalem man pemeteh dingen man ksalak si deban, seakatan Dibata ngenca isembah dingen inganna ernalem.

III. PENGKENAINA

Temanta nina: Perukurenndu Si Nampati Kam Ngantusi PERMATA GBKP. Tema enda ngajuk Saitun gelah tetap banci jadi pendoa bage pe jadi teman man anak kempunta e me PERMATA GBKP. Kalak si perukurtenna ikuasai Kata Dibata, tentu kerina perbahanen si ilakokenna pe pasti ka nge rikutken Kata Dibata. Ije me pembentuken kiniteken (spiritualitas) kalak Kristen. Ulih kalak si pusuhna ikuasai Kata Dibata teridah arah biak geluhna, umpamana: lanai ia melasken kata si la payo, la ibelaskenna kata guak bage pe ranan si erbahanca kalak papak. Ertina tanda kalak si erkiniteken e teridah arah pengeranana si dem alu kiniulin ras kebujuren. Janah ngasup pe ia ertimbang kerna si mehuli i bas geluhna. Amin pe enggo beda zaman ras anak kempunta, tapi banci kita ngangkai kegeluhen PERMATA GBKP si genduari ras mereken dirinta jadi teman sue ras tata nilai GBKP, e me lit i bas kekelengen, kejujuren, kesetiaan, kekerabaten ras kesederhanaan.

E maka sue ras Hari Ulang Tahun PERMATA si pe 78 ken tahun enda, selaku Saitun (nini ras bulang) kadonta sekali enda man PERMATA GBKP, e me ngangkai kegeluhen PERMATA GBKP si genduari ras mereken dirinta jadi -temanna, notoken dingen mendukung ia gelah tetap nggeluh erkemalangen man Tuhan.

IV. PERTOTON

Tuhan Dibata simada kegeluhen kami, bujur ras ermengkah ate isehken kami man baNdu erkiteken keleng ateNdu si enggo mereken kesempaten man kami lako pulung ngorati kataNdu. Bahanlah o Tuhan gelah arah kataNdu si enggo iorati kami nampati perukuren kami gelah iangka kami kegeluhen anak kempu kami e me PERMATA GBKP jenari mereken diri kami jadi temanna gelah ia pe tetap erkemalangen man baNdu saja. Erkiteken Tuhan Jesus reh kami ngataken bujur baNdu. Amin

V. DISKUSI/SHARING (Undang PERMATA GBKP)

I bas PA saitunta sekali enda ras PERMATA GBKP kita er PA guna diskusi ras sharing

1. Kai nge ndia tandana sekalak jelma erkemalangen man Tuhan ?

2. Saitun nuriken pengalamenna si banci mereken motivasi ras usihen man PERMATA GBKP!

3. PERMATA GBKP nuriken kerna kegeluhenna, kai tantangen si nihadapina i bas persekolahen, perkuliahen, pendahin bage pe pergaulenna! Gelah ertambahna kemeriahen ukur, banci ka ibahan perayan HUT man PERMATA GBKP nta enda.

VI . USULEN LAGU

1. KEE No. 192:1-3

2. KEE No. 75:1-3

3. KEE No. 182:1-3

Tetaplah bersyukur dalam segala hal,

karena dalam bersyukur kita akan menemukan berkat dan kebahagiaan.

Sesuai sabda-Nya: Mengucap syukur dalam segala hal, sebab itulah yang dikehendaki Allah dalam Krsitus bagi kamu.

SELAMAT HUT PERMATA GBKP SI PE 78 KEN