Keseharian

SI MAN OGEN        : Masmur 34:1-4

Dalam perlindungan TUHAN

34:1 Dari Daud, pada waktu ia pura-pura tidak waras pikirannya di depan Abimelekh, sehingga ia diusir, lalu pergi. (34-2) Aku hendak memuji TUHAN pada segala waktu; puji-pujian kepada-Nya tetap di dalam mulutku. 34:2 (34-3) Karena TUHAN jiwaku bermegah; biarlah orang-orang yang rendah hati mendengarnya dan bersukacita. 34:3 (34-4) Muliakanlah TUHAN bersama-sama dengan aku, marilah kita bersama-sama memasyhurkan nama-Nya! 34:4 (34-5) Aku telah mencari TUHAN, lalu Ia menjawab aku, dan melepaskan aku dari segala kegentaranku.

Pujin-pujin kerna kiniulin TUHAN

34:1 Masmur Daud, tupung ia tading i adep-adepen Abimelek, ipekulah-kulahna la demsa ukurna, jenari ipelawes Abimelek ia. 34:2 Lalap aku ngataken bujur man TUHAN kupuji Ia la erngadi-ngadi. 34:3 Kupuji Ia sabap PerbahanenNa, kerina kalak si itindih begikenlah janah meriahlah. 34:4 Marilah siberitaken kemulian TUHAN, mari radu ras kita muji GelarNa.

TEMA                     : Muji Tuhan La Erngadi-ngadi

TUJUN                    : Gelah Moria:

·       Meteh cara Daud muji Tuhan i bas kerina kecibal geluhna.

·       Nehken persembahen puji-pujin ibas kebaktin Minggu.

METODE PA           : Aksi

Kata Penaruh

Lit sekalak pernanden si geluhna ngenanami erbage-bage kesuliten, perbulangenna kebenen pendahinna, anakna sakit, e maka nande e erbinaga alu mbuka kede si kitik guna ncukupi keperlun jabuna. Amin pe latih kel akapna, lit sada kebiasan i bas dirina e me ngendeken ende-enden pujin tiap erpagi-pagi tupung ia erdahin mpesikap kedena. Kerina kalak isekelwetna ngidah kecibal nande enda ndai. Magati jadi kecibal nande enda jadi i bas kegeluhenta, perbeben reh alu pegancihen. Uga nge sikap ta selaku Moria, ngasup denga nge kita muji Tuhan amin pe jadi si la bagi ukurta? Muji Tuhan la terjeng ilakoken paksa geluhta aman-aman saja, tapi pe paksa kita ngalaken perbeben, tantangen ras penderitaan.

Mpebagesi Pengangkan Kerna Ogen

Masmur enda itulis Daud paksa ia lolos arah bahaya i istana raja Akhis (Abimelekh) і Gat (1 Sam. 21:10-15). Paksa e Daud kiam i bas Saul nari, janah bengket ia ku negeri kalak Pilistin, janah kedungenna tereteh ras menam itangkap. Guna nelamatken diri, ipekulah-kulahna la demsa, "langkahna bagi kalak mahado isurat-suratina pintun gerbang janah tehtehna nehtehen ku janggutna" rusur iakap bali ras kalak si iganggu roh jahat ntah pe kena sumpah dewa dewa. Erkiteken si e ipelawes Abimelek ia. I bas budaya masyarakat Kuno Timur Tengah, termasuk bangsa Kanaan i willayah Gat, kalak si ncidahken perbahanen si la biasa bagi Daud si pekulah-kulahna jajat ukurna, ipedauh i bas masyarakat nari guna njaga keselamatan ras ketertiban sosial. Daud tek maka Tuhan si nelamatken ia amin pe ia pekulah-kulah mereng. Tuhan erdahin arah keputusen manusia guna nggenepi rencanaNa.

Perbeben si mberat e peturah kiniteken Daud reh gegehna man Dibata. Ertina i bas kiniseranna e pe lit pengarapenna maka Tuhan pasti mulahi ia, ntah pe arah perbeben e Daud tetap ngidah lit rencana Tuhan si terulin guna ialokenna. E maka angkatna puji-pujinna man Tuhan, nina Daud "lalap aku ngataken bujur man Tuhan, ku puji Ia la erngadi-ngadi (ayat 2). Kata "lalap aku"... ras "la erngadi-ngadi" (bekhot-et ertina i bas kerina situasi subuk meriah entah ceda ate, sehat entah pe sakit). Kata e nuduhken la lit waktu la ngataken bujur ras muji Tuhan, lit tetap hubungen si mehuli antara Daud ras Dibata. Pengakun enda turah erkiteken igejap Daud maka kiniulin ras perbahanen Tuhan si mbelin la erngadi-ngadi i bas geluhna. Daud ersaksi ras pe ngajuk kalak sideban, si lit perbeben, kerina kalak si itindih gelah megiken kesaksinna guna jadi keriahen ukur, ngajuk gelah kalak sideban pe meritaken kemuliaan Tuhan ras muji gelar Tuhan.

Pengkenaina

Muji Tuhan la erngadi-ngadi, e min jadi orat geluh kalak Kristen.

Sigejapken pengkawali Tuhan i bas kerina dampar kegeluhenta, maka muji Tuhan la terjeng ilakoken i bas paksa si kusus ntah paksa kebaktin saja, tapi muji Tuhan e jadi sikap ras kebiasan la erngadi-ngadi i bas kegeluhenta si teptep wari. Muji Tuhan la erngadi-ngadi ertina i bas kerina paksa siakui kerna kiniulin, kekelengen, kesetian ras kuasa Tuhan i bas kegeluhenta. Muji Tuhan alu konsisten, kita mbangun sikap ngataken bujur ras. kiniteken si paguh man baNa. Enda labo menukah, selaku Moria rusur kel kita ngalaken erbage-bage tuntuten i bas kegeluhen, baik e secara fisik (bagi ngurus rumah tangga, njaga kesehaten diri ras keluarga, ngalaken kekoten/ latih erkiteken dahin rutinitas ras rulin-ulih), emosional (Moria megiken perbeben isi jabu, mereken pusuh si teneng dingen mpegegehi keluarga), sosial (Moria njaga hubungen si mehuli ras keluarga besar, tetangga, komunitas, ikut aktif i bas lingkungen social bage pe gereja), spiritual (jadi teladan i bas kiniteken man keluarga ras sekelewet).

Charles Spurgeon, pendeta kharismatik abad ke-19, ngataken maka "Berdoa tanpa nyanyian adalah seperti burung yang terbang tanpa sayap." Ertina rende muji Tuhan e mereken gegeh ras keriahen, sinampati pusuhta terbuka man Tuhan. Rende labo sekedar mpedarat kata-kata si lit nadana, tapi nuriken isi pusuh si dem pengertinna. Paksa kita rende, siukuri erti tiap lirik ras melodi si iendeken kita, seh maka pujinta e jadi toto si nggeluh i bas pusuh pertendinta. Rende e sarana guna ngataken bujur, muji Tuhan ras mpegegehi kinitekenta man Tuhan. Alu bage ende-endenta e la terjeng mereken keriahen man cuping, tapi pe ngubah pusuh perukuren ras mpegegehi hubungenta ras Tuhan Dibata.

Latihen Rende

Moria nuriken pengalamenna kerna ngalaken erbage kecibal kegeluhen, ngasup denga nge kita rende muji Tuhan. Kenca si e Moria erbahan aksi guna latihen rende (tentuken wari ras inganna) guna persembahen pujin i bas kebaktin minggu Moria, janah laguna iaturken Moria Runggun.

Pdt. Anova Talenta Br. Milala