Pernyataan Khusus Pemilihan Israel

SI MAN OGEN        : Kejadin 12:1-3

Abram dipanggil Allah

12:1 Berfirmanlah TUHAN kepada Abram: "Pergilah dari negerimu dan dari sanak saudaramu dan dari rumah bapamu ini ke negeri yang akan Kutunjukkan kepadamu; 12:2 Aku akan membuat engkau menjadi bangsa yang besar, dan memberkati engkau serta membuat namamu masyhur; dan engkau akan menjadi berkat. 12:3 Aku akan memberkati orang-orang yang memberkati engkau, dan mengutuk orang-orang yang mengutuk engkau, dan olehmu semua kaum di muka bumi akan mendapat berkat."

Dibata ndilo Abram

12:1 Nina TUHAN man Abram, "Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi. 12:2 Nterem Kubahan sinursurndu, janah eme pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu. 12:3 Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa."

TEMA                     : Bangsa Si Mbelin

TUJUN                    : Gelah Moria:

·       Meteh tujun Dibata milih Abraham ras kesusurenna.

·       Nandai dirina selaku bangsa pilihen guna jadi pasu-pasu.

METODE PA           : Aksi Sosial

Kata Penaruh.

Abram sekalak kesusuren Terah, janah ia ngempoi Sarai. Sarai la banci mupus (Kej. 11:29-30). Terah Berkat i kuta Ur, i Babilon nari ku negeri Kanaan. I Haran me Terah raduken anakna Abram, kempuna Lut ras permainna Sarai erkuta. Terah mate i bas usia 205 tahun i Haran. Paksa si e me kata TUHAN reh man Abram guna ndilo ras nuruh Abram lawes ku ingan si ituduhken TUHAN pagin man bana. I bas paksa si e, umur Abram 75 tahun (ay. 4) ras umur Sarai 65 tahun (bnd. Kej. 17:17).

Mpebagesi Pengangken Kerna Ogen.

Teks enda nuriken kerna proses pemilihen ras pendilo Dibata nandangi Abram. Nina TUHAN, "Tadingkenlah kutandu, kade-kadendu ras rumah bapandu..." Perentah enda biakna 'segera.' Abram iperentahken Tuhan guna nadingken zona nyamanna, kebiasan-kebiasan erpalasken adat/budayana bage pe kiniteken si ndekah guna bengket ku bas kegeluhen si erpalasken kiniteken man si milih ras si ndilo ia, e me TUHAN. Tuhan nuruh Abram nadingken kerina keluargana, erta bapana ras kiniteken bapana sabap sura-sura TUHAN guna mbersihken Abram i bas pengaruh praktek ersembah man berhala si lit i bas keluargana.

"Jenari laweslah ku ingan si kutuduhken man bandu pagi" nuriken maka lit ingan si pagin ituduhken Tuhan si mada perentah, tapi lenga jelas alamatna. Tentu perentah Tuhan enda banci teraloken adi si megisa tek nandangi sinuruhsa. Abram patuh ngikutken perentah Tuhan, si nuduhken maka Abram tek nandangi Tuhan si mereken perentah e. Alu bage berkat me ia ras ndeharana bage pe suruh-suruhenna sue ras perentah TUHAN.

Lit 3 padan si ibereken TUHAN man Abram, e me: 1. TUHAN mereken kesusuren si enterem jadi bangsa si Mbelin. Amin kinata paksa si e, Sarai la banci mupus. Tapi Abram alu setia ngaloken padan TUHAN e man bana. Sabap TUHAN la pernah nilah i bas padan si isehkenNa man anak-anakNa. Amin pe umur Abram ras Sarai enggo metua, tapi i bas pemasu-masun TUHAN ipupusna sekalak anak dilaki (bnd. Kej. 21:1-8). 2. TUHAN erbahan gelar Abram terberita/termurmur; e me kinihagan si ialoken Abram si kedungennna iubah Dibata gelarna jadi Abraham si ertina Bapa kalak si erkiniteken. 3. Jadi pasu-pasu man enterem jelma. I bas perdalanen Abram ibereken TUHAN pasu-pasu si simpar, janah ingan si ibentasina pe ngaloken pasu-pasu si simpar i bas TUHAN nari.

La terjeng perentah ngenca iberekenNa, tapi atan pe padan ras jaminen i bas perdalinen kegeluhenna. Jaminen keamanen ibereken Tuhan man bana, sabap nina TUHAN: "Ku pasu-pasu kalak si masu-masu kam, Ku sumpahi kalak si numpahi kam, janah erkiteken kam Ku pasu-pasu kerina bangsa-bangsa." Jaminen si ibereken TUHAN enda teridah pe i bas kegeluhen Abram, maka ia tetap i bas pengarak-ngarak TUHAN, sekaligus TUHAN njagai ia alu mereken ukumen man kalak si erbahan si la mehuli man bana (12:16). Dibata milih dingen ndilo Abram guna njadiken ia ras kesusurenna jadi bangsa si mbelin, bangsa pilihenNa, sada bangsa si patuh dingen setia man baNa. Ku japa pe ia tetap ndatken pasu-pasu dingen jadi pasu-pasu man kalak si deban sue ras padan Dibata.

Pengkenaina.

I bas paksa genduari enda, kita kap kesusuren Abraham e. E maka pendilo TUHAN e pe atan man banta. Kita ipilih labo erkiteken kiniulinta, tapi erkiteken TUHAN si erkeleng ate, si njadiken kita sikerajangenNa. E maka, selaku anak-anak TUHAN, si enggo ipilih ras idiloNa, melala denga kal dahin si man dahinenken. IdiloNa dingen ipakeNa kita jadi perkakasNa, guna mberitaken sura-suraNa, subuk arah perukuren, pengerana bage pe perbahanenta. Uga nge pengalamenta kidekah enda i bas ndahiken pendilo TUHAN e, ergiah-giah nge kita ndahiken dahin Tuhan e? Enggo nge kita jadi pasu-pasu man sekelewetta? Atan pe er-mediate nandangi daerah PI GBKP. Sabap daerah PI e pe bagin bangsa TUHAN si mbelin kap. Kita rutang guna notoken bage pe natang-natang daerah PI GBKP segelah reh majuna dingen mandiri i bas sumber daya, dana, rikut ras teologi si erkembang, segelah la lalar pemahamenna kerna sura-sura Dibata. Tetaplah moria encidahken jati dirina selaku pasu-pasu man doni enda.

Aksi sosial ku daerah PI bas Klasis (sister church)

Rencanaken aksi sosial ku daerah PI si lit i klasista, umpamana, pepulung dana guna ngelitken keperlun daerah PI (kursi, sound sistem, ras sidebanna) entah erbahan pelatihen kerna pertanin, peternaken entah UMKM.

Pdt. John Terkelin Ginting