Cara Manusia Mengasihi Allah

SI MAN OGEN        : 1 Petrus 1:13-16

Kekudusan dan kasih persaudaraan

1:13 Sebab itu siapkanlah akal budimu, waspadalah dan letakkanlah pengharapanmu seluruhnya atas kasih karunia yang dianugerahkan kepadamu pada waktu penyataan Yesus Kristus. 1:14 Hiduplah sebagai anak-anak yang taat dan jangan turuti hawa nafsu yang menguasai kamu pada waktu kebodohanmu, 1:15 tetapi hendaklah kamu menjadi kudus di dalam seluruh hidupmu sama seperti Dia yang kudus, yang telah memanggil kamu, 1:16 sebab ada tertulis: Kuduslah kamu, sebab Aku kudus.

Kegeluhen si mbaru man anak-anak Dibata

1:13 Emaka sikapkenlah ukurndu katawari pe. Metengetlah dingen tuhu-tuhu lah erpengarapen nandangi pasu-pasu si pagin ibereken Dibata man bandu, sanga kerehen Jesus Kristus ku doni enda. 1:14 Patuhlah man Dibata, janah ula pelepas geluhndu ibabai sura-surandu si ndekah, e me sura-sura paksa kam langa erpemeteh kerna Dibata. 1:15 Tapi badia min kam i bas kerina perbahanenndu, bagi Dibata si ndilo kam pe badia kap. 1:16 I bas Pustaka Si Badia ikataken Dibata, "Kam arus badia, sabap Aku pe badia."

TEMA                     : Badia I Bas Kerina Perbahanen

TUJUN                    : Gelah Moria:

·       Meteh cara nggeluh badia selaku anak-anak Dibata.

·       Nuratken kata pengajuk gelah nggeluh metenget nandangi sura-sura doni.

METODE PA           : Puzzle

Kata Penaruh.

Surat Petrus si pemena itujuken man kerina kalak Kristen si marpar merap i belang-belang Utara Asia Kitik. Tujunna segelah tetap megegeh i bas erbage-bage kiniseran erkiteken mpertahanken kinitekenna man Jesus. Ipersingeti Petrus maka kiniseran si inanami kalak Kristen enda jadi sada pengujin nandangi kiniteken si tuhu-tuhu, janah ulih kesetian enda ialoken pemere si tuhu-tuhu la erkeri-kerin e me keselamaten (kegeluhen si rasa lalap). Petrus nuriken maka kalak Kristen selaku bangsa pilihen arus njaga kebadian geluhna.

Oraten PA enda mabai Moria GBKP meteh maka i bas kerina perbahanen nuduhken kebadian Kristus. La terjeng erminggu, er PA, tapi i bas kerina dampar pendahin min iarapken Moria GBKP ngasup ras nggit nuduhken maka ia bersih i bas perbahanenna.

Mpebagesi Pengangkan Kerna Ogen

Surat I Petrus 1:13-16 enda ngerana kerna kegeluhen si mbaru man anak-anak Dibata. Tentuna lit piga-piga si man jagan perpulungen kalak Kristen gelah kegeluhenna tuhu badia selaku anak Dibata e me:

·       Sikapkenlah ukur dingen metenget (ayat 13).

Petrus ngingetken perpulungen gelah nikapken ukur katawan pe erkiteken buena kiniseran si man alanken. Aminna mbue kiniseran la mobah ukurna ras nadingken kinitekenna. I bas Markus 7:21 Jesus mpersingeti maka i bas ukur manusia nari reh sura-sura si jahat, si banci erbahan ia ndalanken si la mehuli, si mabai manusia erbahan dosa. E maka nina Petrus metenget dingen tuhu-tuhu erpengarapen nandangi pasu-pasu si ibereken Dibata sanga kerehen Jesus ku doni enda. Pasu-pasu e ula sempat pulah erkiteken kinilangasupen njaga kebadian geluh. Pasu-pasu e ibuniken Dibata i Surga, la banci ceda, macik, luntur, janah e ipetangkas i bas wari pendungi pagi.

·       Ola pelepas geluhndu ibabai sura-surandu si ndekah (ayat 14).

Petrus mpersingeti gelah erkemalangen man Dibata. Bukti erkemalangen e me nggeluh la ikuasai sura-sura si ndekah bali bagi kalak si lenga erpemeteh kerna Dibata. Sura-sura si ndekah e me biak doni si nggit erbual, pekulah-kulah, si cian-cianen, percekurak (1 Pet 2:1).

·       Badia min kam bagi Dibata pe badia (ayat 15-16).

Selaku bangsa pilihen Dibata, Petrus mpersingeti kalak Kristen enda nggeluh badia erkiteken sindilosa e me Dibata Si Badia.

Badia banci iertiken bersih la tercemar, la najis, tapi murni.

Badia e iserapken erkiteken kalak si bage me kalak si ndalanken pedah Dibata. Nggeluh sendalanen ras kata Dibata.

Pengkenaina

1. Ngerana kerna kebadian la mesunah ndalankenca, erkiteken eterem mbenarken kesalahen alu make kata Dibata i bas ngutip Roma 3:10 "la lit ise pe bujur i lebe-lebe Dibata." Tentu adi si sedari maka payo kita kerina manusia enda e me kalak perdosa, janah enggo iselamatken arah dareh Kristus. E maka biakna kita njaga kebadian geluhta tuhu-tuhu kususna i bas perbahanenta.

2. I bas ngayaki keperlun nggeluh i bas jaman genduari enda, enggo melala lupa si mbelinna si man ayaken e me pasu-pasu Dibata i bas keselamaten siniberekenNa. Mbue denga ergan siakap barang-barangta secara doni misalna: emas, tas branded, rsd. E maka payo bagi nina Matius 6:21 "i ja ertandu i je pe ukurndu." I ja kin ertata? Kai kin simehergana? Simehergana e me njaga diri gelah ula salah pergaulen, salah pertemanen, salah pendahin, si la ngena ate Tuhan, alu bage si aloken erta simehergana e me keselamaten i bas Dibata nari. Ku ja pe kita, i ja pe kita, adi payo geluhta tentu la nai bene i bas kita nari.

3. Sijaga dirinta gelah nggeluh i bas biak si ngena ate Dibata: tadingken biak si erbual sabap adi ibenaken erbual maka tubuh me bual-bual sidebanna, piah dungna erbuena bual sinibelasken. Ola semalken ngisak-ngisak entah cakap kemali, lain pedempak lain petundal, nuratken status si la payo, ras sidebanna. Janah marilah sipebue nggeluh i bas biak Kristus si ngena ate Dibata alu tutus ertoto: kerna jabunta, teman sada perpulungen, kalak si deban. Ikut nampati mpenahangi perbeben arah erdiakoni. Njaga segelah la rate-ate ngambekken sampah. La nggit nokoh adi rusaha, barang kede entah barang hasil juma, ras sidebanna.

Puzzle

Sikapken kertas karton. I bas kertas e bahan gambar pusuh (love) galang. Teptep moria nulisken kata-kata si perlu itengeti; Diak doni ras biak geluh badia. Kerina kata-kata e ipotong, tamaken ku bas sada ingan. E maka ipilih siapai si man tamanken ku bas gambar berbentuk pusuh (love) galang ras siapai i bas darat gambar.

Pdt. Dian Sari br Girsang, St. Th