Dibata Si Telusada

SI MAN OGEN        : Matius 3:13-17

Yesus dibaptis Yohanes

3:13 Maka datanglah Yesus dari Galilea ke Yordan kepada Yohanes untuk dibaptis olehnya. 3:14 Tetapi Yohanes mencegah Dia, katanya: "Akulah yang perlu dibaptis oleh-Mu, dan Engkau yang datang kepadaku?" 3:15 Lalu Yesus menjawab, kata-Nya kepadanya: "Biarlah hal itu terjadi, karena demikianlah sepatutnya kita menggenapkan seluruh kehendak Allah." Dan Yohanespun menuruti-Nya. 3:16 Sesudah dibaptis, Yesus segera keluar dari air dan pada waktu itu juga langit terbuka dan Ia melihat Roh Allah seperti burung merpati turun ke atas-Nya, 3:17 lalu terdengarlah suara dari sorga yang mengatakan: "Inilah Anak-Ku yang Kukasihi, kepada-Nyalah Aku berkenan."

Jesus iperidiken

3:13 Paksa e reh Jesus i Galilea nari ku Lau Jordan. Idahina Johanes Peridiken, jenari ipindona gelah Johanes mperidiken Ia. 3:14 Tapi Johanes Peridiken la nggit mperidikenca nina, "Aku nge aturenna IperidikenNdu; enda Kam ka ngadap man bangku!" 3:15 Ngaloi Jesus nina, "Labo dalih. Sabap alu bage sidalanken kai si ngena ate Dibata!" 3:16 Emaka Johanes pe setuju meridiken Jesus. Kenca Jesus iperidikenna, ndarat Ia i bas lau nari. Rempet talang langit janah idahna Kesah Dibata nusur bagi nderapati ku BaboNa. 3:17 Jenari terbegi sora i surga nari ngatakenca nina, "Enda me Anakku si Kukelengi. Ia me si ngena ateKu."

TEMA                     : Dibata Si Telusada

TUJUN                    : Gelah Moria:

·       Nandai Dibata Si Telusada.

·       Nulisken pengangkanna kerna Dibata Si Telusada kenca dung ceramah.

METODE PA           : Ceramah

Kata Penaruh.

Berita Si Meriah si isuratken Matius e me turi-turin kerna kegeluhen ras pengajaren Jesus. Isi pokok kitab enda nuriken kerna Jesus e me Mesis si ipadanken Dibata. Bahanta wari enda ngerana kerna Dibata nuruh Jesus, Mesias si enggo inubuatken nabi-nabi reh ras menai pendahinNa i doni enda. Johanes Peridiken ipilih Dibata guna nikapken dalan man baNa. Sorana me si erlebuh i gurun pasir Judea nari kenca 400 tahun masa diam. Ibenaken sekitar tahun 450 SM (kenca kitab Maleaki) seh ku tahun 6 SM (sekitar tahun ketubuhen Jesus). Enda erbahanca nterem jelma reh ndahi Johanes Peridiken janah i tepi Lau Jordan, ia mperidiken jelma si enterem tandana nggo jera. I bas situasi e me Jesus reh guna iperidiken Johanes janah teridah kemulian Dibata tupung IA iperidiken. Enda me siperlu sipebagesi i bas bahan PA-nta wari enda gelah jadi sada pengangkan kerna palas kiniteken si penting e me Trinitas (Allah Tritunggal).

Mpebagesi Pengangkan Kerna Ogen

Johanes Peridiken e me anak Imam Sakaria ras Elisabet. Ia tubuh tupung bapa ras nandena nggo metua. Sakaria ngaloken berita arah malaikat Gabriel nari maka Dibata mereken sada anak dilaki man bana janah nggo itetapken Dibata maka anakna e ibereken dahin kusus e me nikapken dalan man Mesias, Raja Penampat si ipadanken Dibata. I bas nubuaten nabi Jesaya, Johanes Peridiken enda me siigelari kalak si erlebuh i taneh mesawang: "sikapkenlah dalan Tuhan, pepinter dalan man baNa." Johanes Peridiken menai pendahinna i gurun pasir Judea. I bas pengajarenna, Johanes Peridiken mindo gelah manusia jera i bas dosa-dosana nari sabap Kinirajan Surga nggo ndeher. Kinijeran e me perbahanen si sifatna mendesak sabap Dibata si reh i bas kemulianNa la banci ngaloken kalak si tetap i bas cara nggeluh si ndekah. Tanda kinijeran e e me peridin. I bas tradisi Padan Sindekah peridin e me tanda keriahen ukur (kesedian) guna imurniken ras patuh nandangi sura-sura Dibata (Jes. 1:16-17). Peridin Johanes e me tanda kinijeran ras ngajuk guna mulih kempak Dibata dingen ngaloken pengalemi dosa (Luk.3:3).

Tupung paksa si e, reh me Jesus i Galilea nari ku Lau Jordan guna iperidiken Johanes. I bas perjumpan e, Johanes la nggit guna mperidiken Jesus. Alasen si peseh Johanes erkiteken la ia metunggung guna mperidiken Jesus. letehna maka belinen kuasa Jesus asangken dirina janah ngosari tinali sepatuna pe ia la metunggung (Mat. 3:11). Dahin ngosari tinali sepatu biasana ilakoken sekalak hamba ntah pe budak. Alu kata enda, Johanes nuriken maka la ia patut guna ngelai Jesus apai ka guna mperidiken Ia. Tapi i bas pandangen Jesus, peridin e tuhu-tuhu penting. Enda teridah i bas kerehenNa i Galilea nari ku Lau Jordan. Iperkiraken jarak sindeherna si idalani Jesus Galilea nari ku Lau Jordan e me 47 Km. Enda nuduhken maka peridin e tuhu-tuhu penting. Ikataken Jesus maka peridin e me singena ate Dibata. Adi si pepayo keterangen si nggo isingetken i datas, peridin Johanes e me tanda kinijeran. Ngkai dage maka Jesus ngataken maka peridin si kentisik nari ialokenna e me singena ate Dibata? Perlu kin la nuduhken tanda kinijeran? Lit piga-piga alasen engkai maka Jesus iperidiken. Sipemena, guna ndalanken singena ate Dibata. Enda nuduhken maka peridin e me singena ate Dibata guna ilakoken manusia. Sura-sura Dibata gelah kerina manusia iperidiken. Sipeduaken, ncidahken tanda solidaritas ras kiniteruken ukur Jesus. Jesus nggit mpeteruk diriNa jadi seri ras manusia si erdosa gelah arah kematenNa, manusia banci ngaloken keselamaten si nggo ipadanken Dibata (bdk. Pil. 2:5-7).

Kenca Jesus dung iperidiken, talang langit janah idah Johanes Kesah Dibata nusur bagi nderapati ku babo Jesus. Terbegi sora i Surga nari nina: "Enda me AnakKu si Kukelengi, IA me singena ateKu." Kerina kejadin e me kesaksin maka Jesus e Anak Dibata si ikelengiNa sekaligus Mesias si nggo ipadanken nabi-nabi. Bapa, Anak ras Kesah Si Badia ras-ras ncidahken kiniersadan ilahi guna mpetangkas tujun misi Jesus i doni. Jesus e Anak Dibata si enggo lit ope kerina si nasa lit enda itepa Dibata. Peridin Jesus jadi tanda la menai dahinNa ku jelma si enterem janah sora si terbegi i Surga nari jadi sada gema nubuat-nubuat Padan Si Ndekah kerna Mesias si nandangi reh (bok. Jes. 42:1). Jesus e penggenapen nubuat Mesias si nggo ndekah itimai manusia. Terdauhen, kata Anak i bas sora e nuduhken sada hubungen si unik antara Bapa ras Jesus. Jesus la seri ras manusia sideban i bas hubungenna ras Bapa. Kerina kalak si tek man Jesus jadi anak-anak Dibata i bas proses adopsi arah kematen Anak Dibata si sada e (bdk. Rm.8:15). Jesus e me Anak Dibata si tangtangna nari nggo ersada ras Bapa, la lit i bas esensi si seri ras Bapa labo itepa. Alu kata sideban, enda nuduhken maka Jesus e Dibata janah em sebabna maka ikataken Jesus Dibata e BapaNa janah ise si nandai Ia nggo nandai Dibata sebab Jesus ersada ras Bapa dingen Bapa ersada ras la (Joh.14:7,10). Jesus ikelengi Dibata erkiteken misiNa si jelas i babo doni enda. Jesus alu kepatuhen total ndalanken sura-sura Dibata. Jesus meteh ise si nuruh la dingen kai misiNa i doni enda. I bas Johanes 6:38-39 terdauhen ituriken maka Bapa nge singutus Ia ku doni alu sura-sura gelan ola lit si bene si nggo iendesken Dibata man baNa tapi gelah ipekeke i bas si mate nari i bas wari pendungi.

Pengkenaina

I bas abad-abad pemena, gereja Tuhan iarusken erbahan rumusen sada konsep pengakun kiniteken sabap gereja ihadapken ku bas persoalen penting. Sada sisi gereja muat pengakun kiniteken kalak Jahudi singataken maka Dibata e esa (Ul. 4). I bas sisi si deban, gereja pe ngaku maka Jesus e me Dibata. Adi bage, Dibata si sembah kalak Kristen sada ntah lebih sada? Enda me si jadi cikal bakal perumusen konsep Dibata Si Telusada (Allah Tritunggal) i bas kalak si erkiniteken. I bas situasi enda, gereja rusaha guna njagai gelah ketritunggalen Dibata e tetap ijaga sekaligus keesanNa pe banci tetap i pertahanken.

I bas perdalanen sejarah, gereja pernah ndabuh ku bas sada sisi ngasup njagai keesan Dibata tapi la ngasup njagai ketritunggalenNa. Lit piga-piga pandangen bapa-bapa gereja e me: 1. Praxeas i Roma nari. Ngajarken maka Dibata e me Kesah janah e me si igelari Bapa. Dibata e ka me si jadi daging jadi seri ras manusia si igelari Anak. I bas diri Jesus, Bapa ras Anak jadi sada. Bapa e me Kesah janah Anak e me Jesus si jadi daging. Anak e me si ipakuken dingen mate i kayu persilang sabap Kesah la mungkin ipakuken dingen mate. Alu penjelasen si deban, Praxeas ngataken maka Bapa ras Anak (kesah ras daging), situhuna sada pribadi si seri e me Dibata. 2. Sabelius; ia ngataken maka Dibata e sada. Bapa, Anak ras Kesah e me modalitas ntah pe cara Dibata guna ncidahken diriNa. 3. Paulus Samosata mereken pandangen arah dampar si lain. la rusaha guna njagai ketritunggalen Dibata tapi la ngasup njagai keesanNa. Ia ngajarken maka Dibata e sada ngenca tapi i bas diri Dibata e banci ibedaken antara logos (firman) si igelari Anak ras hikmat si igelari Kesah. Logos e me sada gegeh si sifatna labo pribadi janah e me si erdahin i bas diri Jesus anak Maria. Alu bage ikataken maka Jesus e situhuna manusia seri ras kita tapi i bas diriNa erdahin logos si rena i bas Dibata nari. Paulus nuriken maka Bapa ras Jesus Kristus e la seri janah la lit hubungen kai pe i bas la duana. 4. Origenes, sekalak bapa gereja pe mereken pandangen si hampir seri. Ia ngataken maka Dibata e esa janah Ia me sinjadiken kerina sinasa lit. Alu perantaran logos/firman Dibata e erhubungen ras doni. Logos e me gambaren Dibata si sempurna tapi teruken asa Bapa. Ia terjeng jadi singelakoken sura-sura Bapa. Kesah Si Badia itempatkenna teruhen asa logos erkiteken Ia lit erkiteken logos e. Dahin Kesah e ianggap lebih sempit, fokusna e me ku pengudsen sinasa lit. Ajaren sitawarken Origenes enda megati igelari subordinasianisme si ncidahken maka Bapa, Anak ras Kesah e la ersada tapi kiniersadanna ibeneken erkiteken sifatna ertingkat-tingkat.

Guna ndungi persoalen enda, gereja erbahan konsili dua kali i Nicea (325 M) ras i Konstantinopel (381 M). Konsili Nicea netapken maka Bapa ras Anak seri substansina/ hakekatna (homoousios). Anak labo ijadiken tapi ilahirken. Kata ilahirken enda tujunna guna meneken ide maka Anak e ijadiken arah si la lit. Pemikiren enda pe sekaligus guna meneken pandangen maka lit masana Bapa sekalak janah lenga ndatken keduduken selaku Bapa. Konsili Konstantinopel netapken maka Kesah Si Badia isembah ras imuliaken raduken ras Bapa bage pe Anak. Bapa, Anak ras Kesah Si Badia seri substansina/ hakekatna (homoousios). Kesah Si Badia enda ndarat arah Bapa ras Anak nari janah isembah ras ipermuliaken raduken ras Bapa bege pe Anak. Rumusen konsili enda ngataken maka Bapa, Anak ras Kesah Si Badia seri martabat ras kemulianNa selaku Dibata i bas telu esensi ras pribadi si sempurna. Konsili enda ngutip pandangen sekalak bapa gereja si tergelar Tertulianus i bas ngerumusken pandangen kerna Trinitas. Dibata e sada i bas substansina tapi telu i bas persona, pribadi ntah pe oknumna (una substantia tres personae). Alu konsep enda ipahami maka Bapa e Dibata, Jesus e Dibata janah Kesah Si Badia e Dibata. Tapi i bas dampar sideban itegasken maka Bapa e la seri ras Anak bage pe Kesah Si Badia, Anak la seri ras Bapa bege pe Kesah Si Badia, Kesah Si Badia la seri ras Bapa bage pe Anak.

Persoalen seterusna siturah e me, duana konsili enda la niksiki terdauhen kerna bagesna rahasia kedibatan bage pe esensi kerna Dibata. Konsili-konsili enda terjeng mereken pemahamen maka Dibata reh njumpai kita i bas Jesus janah i bas Kesah Si Badia, Dibata lit i tengah-tengah gerejana. Erkiteken si e, perlu terdauhen sigargari kai kin erti substansi (ousia) ras persona (hypostasis) i bas ngangkai konsep Trinitas. I bas bahasa Junani, ousia e me ciri-ciri si membedaken sada rumpun ras rumpun si deban. Hypostasis e me ciri-ciri si membedakan sada individu ras individu si deban i bas sada rumpun. Amin bage gia, pemahamen kerna ousia enda arus ijelasken i bas konsep esensi sabap tabiat kedibatan e melekat labo itambahken i bas diri Dibata, la bagi tinepa si deban i ja ia terjeng pemikul ntah pe si mbaba tabiat e. Enda me si jadi alasen maka ikataken sada Dibata labo telu Dibata. La pernah lit sada kegiaten i ja Bapa, Anak ntah Kesah Si Badia saja sierdahin. Dibata (Bapa, Anak ras Kesah Si Badia), i bas hubungenna ras doni enda ncindahken sada prinsip (unum principum). Teluna pribadi trinitas la banci ipisah-pisahken sada ras sidebanna i bas hubungen pendahinNa man doni enda. Telu pribadi e labo pelain-lain i bas diriNa tapi pelain-lain i bas hubungenNa sada ras sidebanna ras man doni enda. Bapa igelari Bapa i bas hubungenNa ras Anak bage pe Anak igelari i bas hubungenNa ras Bapa. Kesah Si Badia i gelari Kesah Si Badia i bas hubungenNa ras Bapa bage pe Anak. Dibata e la pernah Bapa saja ntah Anak saja ntah Kesah Si Badia saja. Dibata e me Dibata Si Telusada, Bapa, Anak ras Kesah Si Badia.

I bas bahan renungenta isingetken maka Dibata e mpetandaken diriNa man doni enda selaku Dibata Si Telusada, Bapa, Anak ras Kesah Si Badia. Lit piga-piga erti pengangkan ras pengakun kiniteken e man banta. Pemena, pengakun kerna Dibata Si Telusada mpetandaken Dibata si jadi sekutu man anak-anakNa. Ia si mihak, mbela ras nikapken dalan keselamaten man manusia arah Jesus Kristus janah isempurnaken i bas Kesah Si Badia. Peduaken, pengangkan ras pengakun kerna Dibata Si Telusada nampati kita guna ngangkai pendahin Dibata. Enda jadi sada jaminen maka Dibata erdahin guna kiniulin kalak si nggo ipilihNa arah Jesus Kristus. Alu bage tek kita maka keselamaten si enggo sialoken labo keselamaten si kosong tapi keselamaten si lit jaminenna. Jaminen enda pe ipepaguh arah pimpinen Kesah Si Badia si erdahin i bas kegeluhen kalak si erkiniteken. Peteluken, pengangkan ras pengakun kerna Dibata Si Telusada mabai kita ku bas pengalamen kiniteken si penting kerna Dibata. I bas sada dampar, Dibata e me Dibata si badia si ndauh erkiteken dosa-dosa manusia, i bas dampar si deban, IA me Dibata si jadi penampat si nampati manusia i bas perbeben kegeluhenna nari dingen ngasup mersan kerina ukumen siarusna ipersan manusia, janah IA ka me Dibata si ringan i bas diri manusia e jadi penasehat gelah manusia tetap ngasup nggeluh mpermuliaken Dibata.

Kenca kam ngikuti PA enda, cuba turiken pengangkanndu kerna Dibata Si Telusada e.

Pdt. Wesly Pinem