Aktualisasasi Diri

SI MAN OGEN        : 1 Petrus 4:10-11

4:10 Layanilah seorang akan yang lain, sesuai dengan karunia yang telah diperoleh tiap-tiap orang sebagai pengurus yang baik dari kasih karunia Allah. 4:11 Jika ada orang yang berbicara, baiklah ia berbicara sebagai orang yang menyampaikan firman Allah; jika ada orang yang melayani, baiklah ia melakukannya dengan kekuatan yang dianugerahkan Allah, supaya Allah dimuliakan dalam segala sesuatu karena Yesus Kristus. Ialah yang empunya kemuliaan dan kuasa sampai selama-lamanya! Amin.

4:10 Sekalak-sekalak, selaku pengurus si mehuli i bas pemere Dibata si pelain-lain e, si IberekenNa erpalasken lias AteNa, arus nggunaken pemere e guna kiniulin kalak si deban. 4:11 Kalak si ngerana, ngeranalah alu kata-kata si tempa-tempa rehna i bas Dibata nari. Kalak si nampati, isampatinalah kalak alu gegeh si ibereken Dibata man bana, gelah i bas kai pe ipuji kalak Dibata arah Jesus Kristus. Ia me si mada kemulian kuasa seh rasa lalap. Amin!

TEMA                     : Make Pemere Guna Kiniulin

TUJUN                    : Gelah Moria:

·       Meteh biak selaku pengurus si mehuli.

·       Nggargari ras makeken talenta guna pelayanen, peningkaten ekonomi, pendidiken ras sidebanna.

METODE PA           : Sharing Talenta

Kata Penaruh

Surat Petrus si pemena enda isehken Petrus selaku Rasul Kristus, si ialamatken man anak-anak Dibata si enggo ipilih, e me kalak perlajang si merap i belang-belang propinsi Pontus, Galati, Kapadokia, Asia ras Bitinia (1:1-2). Tujun surat enda e me guna mpegegehi ukur si ngogesa, si sangana iayak-ayak dingen ngenanami kiniseran erkiteken kinitekenna man Jesus. Arah surat enda perpulungen e ipersingeti gelah tetap megenggeng i bas kiniseran, sabap kiniseran enda e me sada pengujin nandangi kiniteken si payo ntah pe kiniteken si paguh (iman yang sejati), janah la banci lang kerina ia ngaloken pemere asum warina Jesus Kristus ipetangkas.

Mpebagesi Pengangkan Kerna Ogen

Kerina si nasa lit enggo ndeher kedungenna. Petrus ngajuk gelah kerina ia bengket ku bas doni enda guna makeken kerina pemere Dibata si enggo ialokenna guna dahin si mehuli si ngena ate Dibata. Pengurus si mehuli i bas pemere Dibata e me kalak si enggo itentuken Dibata guna ndahiken dahin si mehuli. Pengurus si ipetunggung Dibata guna ngelai keperlun kalak si deban. Dibata ersura-sura erbahan si mehuli man kerina manusia. Guna nehi sura-sura enda, manusia ipake Dibata jadi perkakasNa guna erbahan si mehuli man kalak sideban, alu pemere-pemere si enggo ibereken Dibata man bana sekalak-sekalak. Pemere i bas Bahasa Junani e me Charisma si ertina karunia/ anugrah atau pemberian yang tidak layak diterima. Karunia Rohani adalah pemberian dari Allah yang diberikan kepada orang percaya bukan karena jasa atau usaha mereka, tetapi karena anugerahNya, yang bertujuan untuk melayani sesama dan membangun Gereja sedagai tubuh Kristus. Pemere ntah pe Karunia e ibereken Kesah man kalak si ipilihNa, man sekalak-sekalak iberekenNa pemere si pelain-lain rikutken sura-sura Kesah e (1 Kor. 12:11). Kita selaku anak-anak Dibata si ngaloken pemere e, arus nandai pemere-pemere si lit i bas kita, dingen si kembangken guna dahin-dahin si mehull e alu tepat guna. Ipakekennalah kesempaten ras pemere si lit guna ngelai sada ras sidebanna. Ngelai alu ranan si mbaba kemalemen ate (memotivasi), nampati kalak si deban alu perbahanen, nampati keperlun kegeluhen kalak si deban bage pe ngelai alu mereken pengajaren si mehuli. Sekalak pengurus itehna maka si man urusen e, labo sada pe sikerajangenna, e maka arus ia ertanggungjabap man tuanna.

Kalak si ngaloken pemere Dibata guna ngerana, ngeranalah ia alu kata-kata si tempa-tempa rehna i bas Dibata nari. Teptep ranan si ndarat arah babahna encidahken kebenaren ras Kuasa Dibata (otoritas Allah). Arus nehken kata Dibata alu dem kesetian i bas kerina paksa segelah kalak simegisa robah dingen jera, bage pe reh sikapna kinitekenna man Dibata, bagi si tersurat i bas 2 Timotius 4:2 "Pembarkenlah Berita e, subuk tengteng ras la tengteng paksana terusken gelah beritaken. Cidahken salah kalak, persingeti dingen pegegehi ia sanga iajarkenndu ia alu dem kesabaren." Kalak si nampati, isampatinalah kalak alu gegeh si ibereken Dibata man bana. Dahin nampati banci ilakoken alu erbage-bage bentuk ras pengorbanen, subuk alu materi, gegeh, waktu, pemikiren ras sidebanna.

Pengkenaina

Selaku Moria, kita pe arus nandai dirinta selaku pengurus si mehuli, si ipilih Dibata. E maka arus si pakeken kerina pemere Dibata si lit i bas kita guna dahin-dahin si mehuli si ngena ate Dibata. Pemere Dibata si enggo sialoken sipakekenlah guna ngelai sada ras si debanna bage pe mpeteguhi kiniersadanta, subuk i bas jabu, gereja ras masyarakat inganta tading.

Selaku pengurus siipercayaken Dibata maka kita pe arus ngasup mengaktualisasiken dirinta. Aktualisasi diri adalah proses untuk menjadi diri sendiri secara penuh, menggunakan potensi yang ada untuk mencapai tujuan hidup. Erkiteken labo seri pemere si ibereken Dibata man banta, maka kita arus siergan sada ras si debanna. Sitatang-tatangen dingen sisampat-sampaten bas kegeluhenta, gelah reh sikapna kerinana. Adi lit Moria si ertalenta guna erbahan kuning tah minak, pakeken lah pemeteh e guna nampati kalak si deban, nambahi perbeliten jabu, bage pe ermeriah ukur mbagiken pemeteh si lit e guna kemajun kalak sideban. Sipakekennah keriina talentata alu tepat guna, dingen jadi pasu-pasu nandangi sekelewetta.

Sharing

1. Moria ibagi ku bas kelompok, 3 kalak teptep kelompok.

2. Teptep Moria, nuriken penandaina kerna talentana sekalak-sekalak. Terjeng i ja nge ia enggo mpergunaken talenta enda guna pelayanen, peningkaten ekonomi, nampati kalak si deban, pendidiken ras dampar si debanna.

Pdt. Linawati br Ginting