Bahan PJJ 25 – 31 Oktober 2026

ERJAGA DINGEN ERSIKAP

Matius 24: 36 – 44

24:36 Tetapi tentang hari dan saat itu tidak seorangpun yang tahu, malaikat-malaikat di sorga tidak, dan Anakpun tidak, hanya Bapa sendiri.”

Nasihat supaya berjaga-jaga

24:37 “Sebab sebagaimana halnya pada zaman Nuh, demikian pula halnya kelak pada kedatangan Anak Manusia.
24:38 Sebab sebagaimana mereka pada zaman sebelum air bah itu makan dan minum, kawin dan mengawinkan, sampai kepada hari Nuh masuk ke dalam bahtera,
24:39 dan mereka tidak tahu akan sesuatu, sebelum air bah itu datang dan melenyapkan mereka semua, demikian pulalah halnya kelak pada kedatangan Anak Manusia.
24:40 Pada waktu itu kalau ada dua orang di ladang, yang seorang akan dibawa dan yang lain akan ditinggalkan;
24:41 kalau ada dua orang perempuan sedang memutar batu kilangan, yang seorang akan dibawa dan yang lain akan ditinggalkan.
24:42 Karena itu berjaga-jagalah, sebab kamu tidak tahu pada hari mana Tuhanmu datang.
24:43 Tetapi ketahuilah ini: Jika tuan rumah tahu pada waktu mana pada malam hari pencuri akan datang, sudahlah pasti ia berjaga-jaga, dan tidak akan membiarkan rumahnya dibongkar.
24:44 Sebab itu, hendaklah kamu juga siap sedia, karena Anak Manusia datang pada saat yang tidak kamu duga.”

Ise pe la meteh warina ntah jamna

Matius 24: 36 – 44

24:36 “Kerna warina ntah jamna kejadin e la lit kalak si metehsa. Malekat-malekat si i Surga pe lang, janah Anak e pe lang; Bapa ngenca metehsa.
24:37 Kerehen Anak Manusia si isuruh e pagi bali kap ras kai si jadi i bas paksa Nuah nai.
24:38 Bagi nai ope denga reh lau mbelin kerina kalak si nggeluh paksa si e man dingen minem, sereh dingen empo seh ku warina Nuah bengket ku bas perahu;
24:39 sitik pe la ietehna kai nandangi jadi man bana ope denga reh lau mbelin si erbahanca ia mombak kerina. Bage ka me pagi jadi asum reh Anak Manusia si isuruh Dibata e.
24:40 Paksa si e pagi lit dua kalak dilaki erdahin i juma: sekalak pagi ibuat, janah si sekalak nari itadingken.
24:41 Dua kalak diberu sangana nutu: sekalak pagi ibuat, sekalak nari itadingken.
24:42 E maka erjaga dingen ersikaplah, sabap la ietehndu ndigan Tuhanndu reh.
24:43 Ingetlah! Adi ieteh tuan rumah katawari reh pinangko, tentu erjaga-jaga ia dingen la ipelepasna rumahna e ibongkar pinangko.
24:44 E maka kam pe erjaga-jagalah, sabap Anak Manusia si isuruh Dibata e reh i bas paksa si la iarapndu.”

(Konfesi Kerehen Jesus Mulihken “Advent”)

MODEL PJJ: SHARING PARTISIPATIF

KATA PERLEBE

Guna ndahiken sada dahin iperluken persikapen simabai kita seh ku bas tujun si mehuli e. Umpamana:negara Jepang si itunjuk sebagai tuan rumah i bas Olimpiade i bas tahun 2021 si lepas. I bas kegiaten si mbelin enda negara Jepang encidahken persikapen si luar biasa. Mulai i bas pembangunen sarana ras prasarana guna ndukung pertandingen si bakal ilakoken bage pe terus seh ku acara si irancang alu spektakuler. La saja kepe persikapen i bas fasilitas tapi lit persikapen si lebih e me kap mpersikapken mental masyarakat i Jepang segelah sedekah kegiaten enda kerina temue si reh bas acara banci terlelai aman ras mehuli. Budaya si ikembangken e igelari budaya Omotenashi entah pe budaya keramah- tamahan si icidahken masyakarat lokal man kerina temue si reh ku kegiaten e ndai. Omotenashi ertina budaya ramah tamah si rehna bas pusuh nari si itujuken guna ngelai temue- temue si ijumpai, mediate man temue labo ngarapken balasen tapi alu tujun gelahna kerina temue ndatken pengalamen si luar biasa sedekah ringan ije ras ngikuti kegiaten. I bas persikapen mental sibagenda rupana amin pe mungkin lit alangen si turah tapi banci ikataken pelaksanaan olimpiade e erdalan alu luar biasa ras ermeriahken ukur kerina jelma si reh ku je. Teridah kal uga pentingna ersikap alu mehuli i bas kerina hal silakoken kita. Termasuk pe sue ras tema PJJ nta sekalenda, kita iajuk guna ersikap bage pe erjaga i bas kita ertima nandangi kerehen Tuhan Jesus si peduakaliken, arah masa adven segelah geluhta tetap ipelimbarui bage pe atan kita i bas ngalo-ngalo kerehenNa.

ISI

Lit dua pokok berita si ipeseh i bas pengogenta e me kap soal erjaga-jaga alu tutus ras setia nimai kerehen Jesus si la banci lang pasti igenepi aminna la si eteh kerna waktuna (ay. 36). KerehenNa jadi i bas waktu si la iarap bali bagi pinangko sireh tupung berngi (bdk. 1 Tes. 5;4; Luk. 21: 34; II Pet. 3: 20). Kerehen Tuhan Jesus e pasti sebage penggenapen janji si isehkenNa ope IA terangkat ku Surga.

I bas pengogenta siidah percakapen Jesus ras ajar-ajarna ija i bas pengajarenna Jesus nuriken kai si jadi paksa jaman Nuah ija manusia nggeluh dingen ndahiken ras ndalani geluhna bagi arusna: pejabuken anak, man bage pe minem, erpesta, erdahin. Situasi kegeluhen sibagenda jadi rutinitas berulang si erbanca manusia e lanai nggeluh alu erjaga-jaga. I bas dampar si deban Nuah ras keluargana sibuk erdahin guna mbangun kapal erkiteken ia ersikap bagi siiperentahken Dibata guna wari pepagi (ay.38-39). Arah sienda siidah maka Jesus mpeseri ajar- ajar bagi manusia si nggeluh bas Jaman Nuah si la meteh waktu kerehen Jesus, e maka seh paksana sengget me ia. I bas keadaan si la ersikap reh me paksa wari Tuhan, ija isehken penghakimen nandangi kalak si nggeluh bage pe si mate. Terlebih bas paksa sie tep-tep kita musti mpertanggungjawabken kerina perbahanen si lakoken kita (bdk. Ay.40-41). I bas ay.42-44 isingetken Jesus mulihi kerna pentingna erjaga-jaga ras ersikap i bas ndalani kegeluhen. Labo perlu kel sidarami kerna kepastin waktuna tapi sipenting kalak si erkiniteken tetaplah erjaga-jaga ras ersikap i bas nimai kerehen Tuhan. Alu bage banci turah i bas kita “kewaspadaan iman” sierbahanca kegeluhenta tetap mehuli ras ertanggungjawab bagi si ngena ate Tuhan.

PENGKENAINA

Kita kerina sangana i bas masa ertima kerna kerehen Tuhan. I bas ertima tentu mbue tantangen, tekanen entah pe godaan. Kecibal sienda labo man kebiarenken, si perlu silakoken eme ertima alu erpengarapen ras ngataken bujur man Tuhan i bas kerina dampar kegeluhenta. Kerehen Jesus si la sieteh paksana mpersingeti kita gelah i bas kegeluhenta si genduari Tuhanlah tetap si jadi pusat geluhta, subuk bas cara rukur, ngerana ras perbahanen; termasuk pe i bas pelayanenta. Arah minggu-minggu Adven enda kita ipersingeti maka Tuhan tetap hadir bas kegeluhen si idalani kita. Mungkin mbue hal si paksa enda sitimai ras siarapken kita, umpamana kehadiren anak bas jabu, hasil ujian/usaha, pemulihen bas pinakit nari ras si debanna. Sipindo arah pertotonta maka Dibata si masu-masu ras mpeteguhi ukurta i bas ngalo-ngalo kerina si itimai kita e. La sieteh kuga nari dekahna ertima tapi asa si ibereken Tuhan waktu ras kesempaten nggeluh i doni enda maka mari terus kita berkarya guna kemulian Tuhan. Si persikapi kegeluhenta gelah alu bage bas wari Tuhan si bakal reh e banci kita sikap ngalo- ngalosa.

DISKUSI :

1. Kenca ngoge ras ngerenungken ogenta paksa enda, kai nge genduari si igejapkenndu kerna masa Adven enda? Turikenlah!
2. Kita iajuk guna mpesikapi kegeluhenta guna ngalo-ngalo kerehen Kai-kai saja banci sibahan gelah reh sikapna kegeluhenta dingen ngasup kita nadingken biak- biak si la mehuli janah ngasup ngelakoken si ngena ate Tuhan i bas kita nimai kerehenNA?

USULEN ENDE-ENDEN:

1. KEE GBKP 213 : 1, 3 Si Puji
2. KEE GBKP 221: 1, 2 Pesikaplah Ukurta
3. KEE GBKP 294: 1, 3 Meriah kal ukurta
4. KEE GBKP 282: 1, 2 Kukataken bujur baNdu