Ngalemi

BIMBINGAN PA SAITUN GBKP TAHUN 2026

TANGGAL, 25-31 Oktober 2026

Ogen : Matius 18:21-22

Indonesia:

[21] Kemudian datanglah Petrus dan berkata kepada Yesus: ”Tuhan, sampai berapa kali aku harus mengampuni saudaraku jika ia berbuat dosa terhadap aku? Sampai tujuh kali?”

[22] Yesus berkata kepadanya: ”Bukan! Aku berkata kepadamu: Bukan sampai tujuh kali, melainkan sampai tujuh puluh kali tujuh kali.

Karo:

[21] Jenari reh Petrus ndeheri Jesus nina, “O Tuhan, piga kali banci kualemi seninangku si ersalah man bangku? Cukup pitu kali?”

[22] Erjabap Jesus, “Lang, labo cukup pitu kali, tapi pitu puluh kali pitu kali. ”

Tema: Piga Kali Kam Ngalemi?

Tujunna:

Gelah Saitun:

·       Meteh kerna pengajaren Jesus maka ngalemi e la lit sibarna

·       Ibas ngalemi salah kalak lit perjuangen, pengorbanen ras kekelengen

Metode: Diskusi

I. BENA KATA

Enterem jelma nggejapken hal si paling mesera i lakoken e me kap ngalemi. Apai ka adi kesalahen si i ban kalak e menyangkut 'harga diri', istilah ` la termaafken' rassada matawari pe ras ia, aku la nggit..' enda bahasa si lanai bo luar biasa, enggo bahasa biasa. Bage kin adi enggo seh kal suina pusuh erkiteken perbahanen turang/senina, ndehara/perbulangen, anak, kempu,rsd.

I bas pudi metua enda kita tetap ipersingeti gelah si angka min kai sura-sura Dibata mpegedang umurta, guna jadi saksi uga kita ndalanken perentahNa. Sekali enda kita iajari uga - seharusna ngalemi salah turang ntah pe seninanta. Mari sipebagesi pengangkan kerna bahan PA nta sekali enda.

II. MPEGESI OGEN

I bas ajar-ajar Jesus turah sada pergumulen kerna piga kali kin situhuna kita ngalemi salah seninanta.

Ay 21: Nungkun Petrus man Jesus: O Tuhan, piga kali banci kualemi seninangku si ersalah man bangku? Cukup pitu kali? Angka sibelasken Petrus eme angka sempurna bas kalak Yahudi, angka 7 enda angka si serta: ija Dibata masu-masu wari sipepituken sanga IA erdahin njadiken doni enda ras isina kerina. Wari si pepituken igelari wari Sabat, wari Si Badia, Bas ukur Petrus asal enggo seh ku angka si serta e, enggo bias, enggo seh pitu kali lalap la robah, enggo me, enggo banci tadingken. Tapi ternyata jababan Jesus labo bagi si iperhitungken ajar-ajarNa.

Ay 22: Erjabab Jesus: Lang, labo cukup pitu kali, tapi pitu puluh kali pitu. Enda labo ngerana kerna asakai pitu puluh kali pitu tapi perdiateken pengajaran si ibereken Jesus man ajar-ajarna maka ngalemi salah kalak la perlu i kira piga kali, tapi harus rusur, la banci ngadi. Iterusken Jesus alu anding-andingen uga sekalak Raja nasapken kerina utang juak-juakna sierjuta-juta e perban mekuah atena. Tapi temanna sirutang man bana piga-piga ribu e ipaksakenna harus galar, icekakna ras ipenjarakenna seh ngayak bali utang temanna ndai. Megi si e merawa kal Raja, e maka ipenjarakenna juak-juak ndai seh i galarina kerina utangna. Bage ka nge ibahan Bapangku si i Surga man bandu kerina adi la kin ialemindu seninandu terus ku bas pusuh ndu.

III. PENGKENAINA

Jelma nggeluh labo guna dirina jine tapi arus rukur guna kiniulin kalak sideban. Carana, kita arus terus ngalemi, la ersibar beliganna. Hal enda me si mesera sidalanken alu gegeh ta selaku manusia, adi biasana musuh ta entah pe kalak sierbahan salah man banta enggo pe ia mindo gelah sialami tapi la teralemi kita. Malahan adi banci min ulanai kita jumpa, ulanai min lit hubungen ta ras ia. Adi bage perukurenta maka wari enda kam ipersingeti ulanai bage, sebab selaku kalak singikut Kristus kita wajib ngalemi ise pe siersalah man banta, la mperdiateken mbelin ntah kitik salahna, ndekah entah baru denga, kerina harus ialemi. Adi iusur-usurna erbahan salah alemi ka, perban Tuhan Jesus enggo ngalemi kerina salah lepakta simbue e, la iperdiatekenNa uga pe melketna dosanta kerina ialemiNa, piga kali kita ngelakoken kesalahen asalken kita reh mindo ampun pasti alemiNa. Adi bage perbahanen Dibata man turangta ras kalak sideban? Adi ateta ndalanken perentah banta, ma harusna bage ka perbahanenta man seninanta, meriah ukur Dibata jadi tujun geluhta. Saitun arus jadi contoh Dibata maka enda silakoken, ola erahan-ahan, erbahan man anak ras kempu, ulanai lit elem-elem bas kita. Wari si sendah enggo ngasup kita erdame ras musuhta, enggo banci kita ngalemi salah kalak empak kita. Sebalikna adi lalap kita la nggit ngalemi salah kalak empak kita maka perdiateken anding-andingen si iban Jesus sanga ngajarken ajar-ajarNa, Dibata pe la nggit ngalemi kita.

IV. PERTOTON

Tuhan Dibata si dem alu keleng ate, alemiNdulah kami si enggo berekenNdu umur sigedang tapi lalap kami la nggit ndalanken perentahNdu, ngalemi si... (belas ken gelarna) mesera kal kuakap, tapi wari enda pengasupNdu lah kami gelah ndalanken kataNdu sienggo begi kami, I bas gelar Tuhan Jesus kami ertoto, Amin.

V. DISKUSI

1. Turiken pengalamen ndu sanga kam erdame ras musuh ndu (turang.senina entah orangtuandu, entah anakndu)

2. Adi lit denga musuh ndu entah teman ndu rubat, pindolah pandita entah serayan notoken kam gelah ngasup ngalemi.

VI . USULEN LAGU

1. KEE 377:1,2

2. ΚΕΕ 211:1.3

3. KEE 110:1,2

4. KEE 71:1,2

Pdt. Jean P. br Meliala