Tanggal 26 Juli - 1 Agustus 2026

IALOKEN KAMI I BAS TUHAN NARI

1Tawarikh 29 : 14 - 16

29:14 Sebab siapakah aku ini dan siapakah bangsaku, sehingga kami mampu memberikan persembahan sukarela seperti ini? Sebab dari pada-Mulah segala-galanya dan dari tangan-Mu sendirilah persembahan yang kami berikan kepada-Mu.

29:15 Sebab kami adalah orang asing di hadapan-Mu dan orang pendatang sama seperti semua nenek moyang kami; sebagai bayang-bayang hari-hari kami di atas bumi dan tidak ada harapan.

29:16 Ya Tuhan , Allah kami, segala kelimpahan bahan-bahan yang kami sediakan ini untuk mendirikan bagi-Mu rumah bagi nama-Mu yang kudus adalah dari tangan-Mu sendiri dan punya-Mulah segala-galanya.

1 Kronika 29:14-16

29:14 Sabap bangsangku ras aku tuhu-tuhu la ngasup mere man BaNdu, sabap kerina ialoken kami i bas Kam nari nge, janah kami ngulihkenca ngenca man BaNdu kai si nggo IberekenNdu man kami.

29:15 IetehNdu maka ibentasi kami geluh kami, bagi kalak perlajang ras pertandang bali ras nini-nini kami. Wari-wari kami lepas bagi awih, dingen la lit pengarapen kami.

29:16 O TUHAN Dibata kami, nggo ipepulung kami erta enda kerina guna mbangun Rumah Pertoton guna kemulian GelarNdu si badia, tapi kerina e reh i bas Kam nari dingen Kam nge empuna kerina.

(Tata Nilai Keugaharian)

MODEL PJJ: KESAKSIN

KATA PERLEBE

Kata keugaharian megati kal iertiken sebage kata kesederhanaan. Kesederhanaan enda ecidahken biak kegeluhen si labo merangap tapi biak kegeluhen si ngasup ngataken bujur dingen encukupken kerina siniperlukenna. Biak si bagenda tentu jadi perayaken kempak kalak si erkiniteken. Ngidah kinata kegeluhen si erkembang genduari enda, megati jelma lanai ngasup nggeluh sederhana. Konsumeris si enggo rurat bas kegeluhen jelma si nterem, sabab enggo melala manusia si kegeluhenna erlagak, deba enggo ka bagi kalak hedonis, si lanai akapna senang kegeluhenna adina la kin ngeriah-riahi saja katawari pe. Si enda kerina enggo ngelangketi jelma si nterem termasuk pe kalak si erkiniteken. E maka perlu kal biak keugaharian (kesederhanaan) ipeturah mulihi gelahna jelma si nterem ngidah kai si terpenting bas geluhna.

ISI

Bahan oraten PJJ enda ngerana kerna sura-sura Daud lako mbangun Rumah Pertoton. Aminna i bas perentah Dibata maka Daud la banci mbangun Rumah Pertoton e. Sabab enggo itetapken Dibata maka anak Daud eme Salomo me kari si mbangun Rumah Pertoton e (Bnd. 1 Kro. 28:6). Guna mendukung rancangen Dibata e me maka Daud nampati alu mpersiapken kerina perkakas siniperluken i bas mbangun Rumah Pertoton e. Adi ioge menaken ayat 1 nari, ituriken kuga teremna kalak si ermeriah ukur nehken penampatna guna mpepajek Rumah Pertoton e. Ituriken pe ije maka kerina perkakas si iberekenna eme perkakas si mehulina kal. Sabab bage kin arusna pemere kalak si ersura-sura mbangun Rumah Pertoton. Erkiteken sie me maka Daud muji dingen ngataken bujur man Dibata alu ngataken: "Kam si mbelin, Kam kap si terberita, Kam kap si mulia, Kam kap si mehulina dingen Kam kap si mada kuasa" (1 Kro. 29:10-11). Pengakun enda nuduhken maka Daud ngidah kuasa ras kemulian Dibata si mbelin e kap si erdahin bas kegeluhenna.

Kuasa ras kemulian Dibata e tentu petembil ras kegeluhen manusia. Daud nuriken pengangkan kerna diri manusia alu ngataken: "kerina ialoken kami i bas Kam nari nge..." (ay. 14). Kalimat enda nuriken maka kai si lit i bas geluh manusia, labo reh arah perbahanen dingen kinibeluhen manusia. Tapi sie kerina ialokenna erkiteken pemere Dibata man manusia. Erkiteken sie me maka Daud alu tangkas ngataken maka kerina si lit i bas dirina ialokenna i bas Dibata nari. Daud encidahken peran Dibata si sehkal belinna i bas engkuhi kegeluhen manusia. Manusia banci ersura-sura i bas kegeluhenna, tapi Dibata kap si netapkensa kerinana. Erpalasken sie, teptep manusia arus meteh maka labo lit kai pe i bas dirina si banci ipakekenna lako mpehaga dirina jine. Sabab kerinana si lit i bas ia, reh i bas Dibata nari kap. Prinsip si enda arus nggeluh i bas pusuh perukuren teptep jelma gelah la ipehagana dirina, tapi Dibata si termulia.

Jenari ituriken Daud pe kerna kecibal manusia i bas geluhna. Kata si ipake Daud nggambarken kecibal manusia i bas kegeluhenna e me kap: "bagi kalak perlajang ras pertandang..." (ay. 15). i bas bukuna Darwin Prinst ngertiken kata perlajang eme kalak si berkat sisada ku kuta kalak si deban (merantau), ras pertandang eme kalak asing (ndauh i bas asalna nari). Duana pengertin enda nuriken maka kalak perlajang ras pertandang eme kalak si reh i bas ingan kalak si deban nari. Semalna kalak si erlajang ntah pe tandang reh labo erkiteken kiniliten i bas kegeluhenna. Tapi erkiteken lanai litna kegeluhen i bas kutana, e maka idaramina kegeluhen si deban si banci mereken kiniulin man bana. Kalak perlajang ntah pe pertandang semalna biak si lit i bas ia eme ngasup encukupi keperlun geluhna asa si lit i bas ia, makeken kiniliten guna hal-hal si penting dingen erguna bage pe ngasup njagai diri arah sura-sura doni. Adi ikawitken ras GBP GBKP 2021-2025, tentu sendalanen kal ras biak kesederhanan (keugaharian) si arus nggeluh i bas kalak si erkiniteken. Kalak perlajang ras pertandang, arus encikep sada prinsip si nteguh i bas dirina maka Dibata kap si engkuhi kerina siniperlukenna. Janah teridah i bas kegeluhenna pe maka pemere Dibata e ipakekenna sue ras sura-sura Dibata man bana.

Biak si bagenda me si gejapken Daud i bas kegeluhenna. I bas ayat 16 ituriken Daud maka kerina kinilitenna e tujunna labo guna dirina, tapi guna majekken Rumah Pertoton bage pe guna kemulian Dibata. Daud nuduhken maka kai pe si ialokenna i bas Dibata nari labo kerina guna kpentingen geluhna ntah pe guna kinihaganna. Tapi ituduhkenna tujun si utamana kal eme kemulian gelar Dibata. E maka kinilitenna e pe ipakekenna nge lako encidahken kemulian Dibata si mbelin alu mbangun Rumah Pertoton Tuhan. Aminna pe Dibata la mengijinken Daud lako mbangunsa, tapi kesusurenna eme Salomo. Tapi nilai si penting si ituriken ije eme cara rukur si arus icikep kalak si erkiniteken maka kerina kiniliten e rehna i bas Dibata nari dingen ipakeken pe guna kemulian Dibata. Tujun si jelas, mabai kita makeken pemere Dibata e pe alu mehuli bas kegeluhenta.

PENGKENAINA

Dibata nehken pasu-pasu ntah pe pemereNa arah kerina pendahin sinilakoken manusia. Lit memang upaya manusia lako ndatken pemere Dibata e. Tapi ulih pendahin (upaya) manusia e merupaken pemere Dibata kap. Adi bekas pemere Dibata, tentu manusia ertanggung jabab kal makekensa alu mehuli. Pemere Dibata e la banci ipakeken guna mpesenangken dirina saja ngenca. Tapi arus guna tujun si payo, eme kap: mpermuliaken gelar Dibata. Erpalasken tujun si enda, lanai banci lang maka kalak si nggejapken kinilitenna e bekas pemere Dibata arus makeken pemere e guna hal si mehuli dingen erguna. Tentu bage me ulih biak kalak si nggeluh i bas kesederhanan, maka kerina si lit bas kegeluhenna ipakekenna guna hal-hal si erguna la terjeng man dirina, tapi man kalak si deban pe khususna guna kemulian Dibata. Ngasup ngataken bujur man Dibata dingen biak si pentingna man bana eme ngasup "mengendalikan diri" i bas

kerina tawaren ras sura-sura doni. Biak si bagenda me si arus ilumbaken kalak si erkiniteken lako makeken pemere Dibata sinialokenna i bas geluhna.

DISKUSI:

1. Turikenlah kai erti pengakun Daud i bas bahan ogenta 1 Kronika 29:14, nina: "sabap kerina ialoken kami bas Kam nari nge".

2. Siakuken kal maka kinilitenta e bekas pemere Dibata kap. Erpalasken sie, biak kesederhanaan (keugaharian) si kuga nge arus silakoken subuk i bas dirinta, jabunta ras gerejanta gelah pemere Dibata e erguna man jelma si nterem bage pe termulia gelar Dibata?

USULEN ENDE-ENDEN:

1. KEE GBKP No. 16:1-3

2. KEE GBKP No. 262:1-3

3. KEE GBKP No. 366:1-3

4. KEE GBKP No. 272:1-3