Bahan PJJ 19 – 25 Juli 2026

KALAK SI TEK REMBAK RAS DIBATA

Roma 10: 1 – 4

10:1 Saudara-saudara, keinginan hatiku dan doaku kepada Tuhan ialah, supaya mereka diselamatkan.
10:2 Sebab aku dapat memberi kesaksian tentang mereka, bahwa mereka sungguh-sungguh giat untuk Allah, tetapi tanpa pengertian yang benar.
10:3 Sebab, oleh karena mereka tidak mengenal kebenaran Allah dan oleh karena mereka berusaha untuk mendirikan kebenaran mereka sendiri, maka mereka tidak takluk kepada kebenaran Allah.

Kebenaran karena iman

10:4 Sebab Kristus adalah kegenapan hukum Taurat, sehingga kebenaran diperoleh tiap-tiap orang yang percaya.

Roma 10: 1 – 4

10:1 O senina-seninangku, i bas pusuh peratenku ngarap kal aku gelah ikelini Dibata min bangsangku kalak Israel. Ertoto pe aku man Dibata guna si e.
10:2 Pang aku ngatakenca maka kalak Israel e tuhu-tuhu tutus er-Dibata, tapi ketutusenna e la erpalasken pemeteh si payo.
10:3 La ia nggit mperdiateken kuga Dibata ngerembakken manusia kempak diriNa. Iusahakenna erbahan kebenaren jine, seh maka la ia nggit takluk man kebenaren Dibata.
10:4 Sabap Kristus e me penggenepen Undang-undang seh maka kerina kalak si tek man baNa rembak ras Dibata.

(Konfesi Keselamatan : Trias Sola)

MODEL PJJ: KESAKSIN

KATA PERLEBE

Enterem kita enggo pe ndekah jadi kalak si erkiniteken tapi lenga bo payo pengertinta kerna kinitekenta ras penandaita kerna Tuhanta. Tole, enggo ka pe kita ndekah jadi kalak si erkiniteken lenga bulat ukurta kerna keterkelinen, si erbanca maka bali siakap caranta ngaloken keterkelinen ras kiniteken si deban. Melala ka kita erpengakap maka mbue dalan ngaloken keterkelinen, labo arah Jesus Kristus ngenca. Sebalikna, lit ka kita erpengakap maka adi enggo kita terkelin lanai ka perlu erbahan si mehuli. Istilah si genduari nina hypergrace si ertina adi enggo kita itebusi-Na maka lanai perlu pertobaten, kebadian nggeluh, ras pe disiplin rohani. E maka sipepayo gelah pengertin ras kinitekenta arah PJJ-nta enda.

ISI

Salah sada ulih reformasi gereja eme trias sola. Sipemena, Sola Gratia (hanya anugerah) ertina keterkelinen sialoken pelin- pelin erkiteken perkuah ate Tuhan, labo erkiteken usaha- perbahanenta. Sipeduaken, Sola Fide (hanya iman) ertina kita ibenarken arah erkiniteken man Kristus, janah Kristus ngenca dalanta terkelin (sola Christus). Sipeteluken, Sola Scriptura (hanya Alkitab) ertina Alkitab ngenca (otoritas tertinggi) jadi standar kebenaren ras pengajaren. Arah Pustaka Si Badia, Tuhan mpetandaken diri-Na ras sura-sura-Na man banta. I bas keterkelinen si enggo sialoken i bas IA nari maka kerina kegeluhenta guna kemuliaan-Na (Soli Deo Gloria).

I bas nats enda, Paulus tole nari nuriken kearun atena (kinogogon atena; 9:2) kerna bangsana Israel (bdk. 9:1-5). Ketedehen atena eme gelah bangsa Israel pe tek min man Kristus. Ketedehen atena enda teridah i bas pertotonna (ertoto pe aku… ay. 1). I bas si enda, kita pe iajari gelah kita pe tetap notoken kalak si deban amin pe itulakna denga Berita Si Meriah. I bas ay. 2 enda ituriken Paulus kai alasen ketedehen atena kerna bangsa Israel, eme erkiteken itandaina uga kin bangsa Israel enda situhuna (bdk. Perb. 8-9). I bas kesaksinna, Paulus ngataken maka kalak enda “tuhu-tuhu tutus er-Dibata” (ay. 2). Tapi, “ketutusenna e la erpalasken pemeteh si payo” (ay. 2). “Pemeteh si payo” enda labo “pengetahuan otak” tapi ngerana kerna dalan si payo. Ketutusen kalak Israel enda patut nge ipuji, tapi dalanna ngaloken kebenaren (kerembaken ras Dibata) enda la tepat. Bagi siituriken i bas pasal 9:31-32 “Tapi kalak Israel si ndarami gelah ia rembak ras Dibata arah Undang-undang, la ndatca. Engkai maka lang? Sabap idaramina kerembaken e ras Dibata    labo     erpalasken    kiniteken     man     Dibata, tapi erpalasken perbahanenna…”

Ay. 3 nuriken maka kalak enda la nandai kebenaren Dibata si payo. Kebenaren Dibata eme perkuah ate-Na guna ngalemi dosa, erkiteken si e me maka kita ibenarken. Jadi, kita ibenarken pelin-pelin erkiteken perkuah ate-Na (bdk. Roma 3:24; Ef. 2:8- 9; KEE GBKP No. 212, sola gratia), labo erkiteken ndalanken undang-undang (usaha/ perbahanenta). Bangsa Israel la nandai kebenaren, ertina ia la ngantusi perjanjin Dibata ras ia. Status bangsa Israel sebagai bangsa pilihen labo erkiteken sunat, ndalanken Sabat, bage pe undang-undang, tapi tuhu-tuhu erkiteken perkuah ate Dibata (bdk. Ul. 7:7-8).

Erkiteken la ia ngantusi kebenaren Dibata alu payo e maka iusahakenna erbahan kebenaren jine (ay. 3). Kalak si la ngantusi perkuah ate Dibata, erbanca ia ngusahaken alu carana sendiri uga maka ibenarken Dibata. Padahal usaha manusia pasti gagal erkiteken kita kerina erdosa (Roma 3:23; Kej. 6:5). Sekalak teolog si tergelar Murray ngataken “pembenaran adalah hal yang tidak bisa dilakukan atau diefektifkan oleh diri kita sendiri. Pembenaran bukan suatu praktik religius yang membuat kita bisa mencapai hal itu, tidak peduli betapa hebat dan baiknya praktik religius yang kita lakukan.” Tapi ngaloken kebenaren i bas Dibata nari alu kiniteken, labo erkiteken perbahanen (Rom. 1:16-17). I bas Katekismus Westminster itulisken “pembenaran adalah suatu tindakan anugerah Allah secara Cuma-Cuma, yang dengannya IA mengampuni semua dosa kita, dan menerima kita sebagai orang-orang yang benar dalam pandangan-Nya, semata- mata karena kebenaran Kristus yang diperhitungkan atas kita, dan yang diterima hanya melalui iman (sola fide).”

Eme dalanna bangsa Israel “la nggit takluk man kebenaren Dibata” (ay. 3). Kinilanggiten ngaloken perkuah ate Dibata enda ianggap perbahanen si la meteh ngataken bujur, bahkan pemberontaken. Bayangken, kune sekalak raja mereken hadiah man banta si kin labo situhuna kita pantas ngalokenca pe, tapi si tulak. Uga nge kira-kira perasaan raja enda? E maka bali bagi kata Dibata i bas Heber 3:15 “…, Adi ibegindu sora Dibata sendah, ola pemersik ukurndu bagi nini-ninindu nai asum ia berontak ngelawan Dibata.” Alokenlah perkuah ate-Na, ulanai timai wari pepagi! Endesken dirindu ku IA, ialokenndu me keterkelinen si tuhu-tuhu e.

Jadi inti kesalahen kalak Jahudi: “la ia nggit takluk man kebenaren Dibata.” Alasenna erkiteken dua hal, sipertama, “la nggit mperdiateken kuga Dibata ngerembakken manusia kempak diriNa.” Sipeduaken, “iusahakenna erbahan kebenaren jine.” Kinilanggiten takluk man Dibata erkiteken pikiren si la nggit takluk nandangi kata Dibata.

Ay. 4 “sabab Kristus e me penggenepen Undang-undang..” Bagin enda cukup penting. Kristus reh labo guna “mengakhiri” undang-undang tapi guna nggenepisa (Bdk. Mat. 5:17), janah mkerehen-Na labo ngataken maka lanai berlaku man kita kalak sierkiniteken. Tapi motivasi ngelakoken undang-undang labo gelah kita terkelin, tapi erkiteken keleng ate man baNa i bas IA enggo mereken perkuah ateNa simbelin man banta.

PENGKENAINA

Ndalanken kebenaren labo gelah terkelin, tapi erkiteken kita enggo ikelini. Perbuatan baik adalah ciri orang yang telah diselamatkan, bukan cara agar diselamatkan. Penebusen si enggo ilakoken Kristus enggo sempurna, lanai perlu itambah- tambahi. Tapi responta i bas kita enggo ngaloken keleng ate-Na e, beluh ka min kita ngataken bujur man IA arah kerina dampar kegeluhenta jadi persembahenta man baNa (Roma 12:1). Kalak si enggo ibenarken maka ulihna pe perbahanen si benar.

Kebenaren-kebenaren si sedekah enda lit i bas kita perlu ievaluasi. Ula kari siakap enggo payo tapi lang! Paulus pe nai enggo iakapna benar kel man bana, tapi kenca rembak ras Dibata berubah cara pandangna (Pil. 3:7-8). Nggeluhlah kita alu ngerembakken diri man Dibata arah kinitekenta. Enda me buah perbahanen kalak si tek, e me kap nggeluken kinitekenna.

E maka perlu nge si kalibrasi (mengukur nilai) kinitekenta! Alat ukur kalibrasina eme Kata Dibata (Sola Scriptura). Tep-tep wari tutuslah ateta mpelajari kata Dibata e, tedehlah ateta kata Dibata e, sipakeken kata Dibata e jadi ciken i bas geluh si tep-tep wari.

Save by grace alone through faith alone in Christ alone according to scripture alone for the glory of God alone.

DISKUSI :

1. Enggo nge kam tek dingen igejapkenndu maka kam enggo ngaloken keterkelinen I bas Tuhanta Jesus Kristus? Lit nge ketedehen atendu bagi Paulus, gelah min kalak si deban pe ngaloken keterkelinen?
2. Perubahen kai saja nge lit enggo jadi I bas dirindu I bas kam enggo ngaloken keterkelinen e? Turiken!

USULEN ENDE-ENDEN:

1. KEE GBKP 212: 1, 2, 5 Perkuah Ate Si Mbelin
2. KEE GBKP 61: 1-2 Nggo Jumpa Ras Perkuah Ate
3. KEE GBKP 374: 1, 3 Yesus ulu kegeluhenku
4. KEE GBKP 402: 1-3 Perban kekelengenNdu