Bahan PJJ 12 – 18 Juli 2026

DONI KALAK MATE

Ayub 14 : 13

14:13 Ah, kiranya Engkau menyembunyikan aku di dalam dunia orang mati, melindungi aku, sampai murka-Mu surut; dan menetapkan waktu bagiku, kemudian mengingat aku pula!

Jop 14 : 13

14:13 I bas doni kalak matelah buniken aku, bunikenlah, seh enggo lepas rawaNdu. Jenari tetapkenlah sada paksa si tertentu, i ja iingetNdu ka mulihi aku.

(Konfesi Kematian)

MODEL PJJ: CERAMAH

KATA PERLEBE

Perdalinen geluh si ibenaken mulai kin sekalak jelma tubuh ku doni enda I ku bas kematenna sada misteri illahi (rahasia Allah). Engkai? Erkiteken seh asa genduari kinitekennta selaku kalak Kristen ngakukenca, maka kegeluhen si lit i bas doni enda lit i bas pengaturen ni Dibata si erdolat. Payo i bas litna kemajun teknologi (medis; kedokteran) genduari enda, subuk ketubuhen ras kematen enggo mulai banci i prediksiken. Tapi tetap saja katawari sekalak jelma tubuh ras mate, la banci i pastiken alu benar ras pe tepat.

Kematen eme sada kenyatan (realitas) si lit i tengah- tengah kegeluhen manusia ras tinepa si deban. Kematen banci jadi katawari paksa pe ras la terduga i bas kegeluhen sekalak jelma. Salah sada penungkunen iman si usur turah asum lit si mate, eme ija ngge ngenduari kalak si nggo mate? Nggo ngge ia seh ku Surga atau lenga? Penungkunen enda tentu jadi sada penungkunen si perlu ijawab arah sudut pandang teologis, gelah alu bage sada pengidahta kerna kecibal kalak si nggo mate.

ISI

I bas konfesi GBKP isuratken maka GBKP ngidah lit piga- piga hal kerna kematen eme:

• Kematian adalah realitas kehidupan manusia. Melalui kematian tubuh kembali menjadi tanah dan roh kembai kepada Allah (Peng 12:7; Job 14:5; Kej 19:3). Arah kematen petangkas man manusia maka kematen ras kegeluhen eme sada kesatuan.
• Kematen jadi erkiteken dosa si ngo bengket ku doni ras engkenai kerina manusia (Roma 5:12; 1 Kor 15:22).
• Kematen kalak si erkiniteken la nirangken ia arah Jesus Kristus, sabab Jesus Kristus eme Dibata man kalak si ngeluh dingen si mate (roma 14:9)

I bas teologi Kristen, kematen i angkai jadi dalan guna banci bengket ku bas kegeluhen si rasa lalap ras Dibata i bas kinirajanNa. Jesus Kristus jine ngerana kerna litna kegeluhen kenca kematen. Ia jine keke i bas si mate nari jadi sada pengarapen kerna kekeken ras kegeluhen si rasa lalap (kekal). Si enda ngertikenca maka kematen ras kegeluhen la terpisahken sada ras si debanna (Bnd. 1 Tes. 4:13-18; Joh. 11:25). Erkawiten ras si e i bas teks PJJ ta sendah ngerana kerna Jop si mindo man Dibata gelah ia ibuniken ku bas doni kematen. Adi sioge sepintas kerna pemindon Jop enda: Sipemena tentu ipalasi perbeben ras kiniseranna si mesangat seh maka ia erpengakap pangen nggeluh i bas doni kalak mate. Si peduaken i bas pengangkan enda si idah maka i bas perukuren Jop tempa-tempa kematen e jadi dalan guna ndungi erbage-bage perbeben, ras kematen e jadi pendungi i bas perdalinen geluh.

Tapi si tuhuna adi sioge ras si renungken terbagesen isi pusuh Jop enda, situhuna jadi sada pengarapen si ncidahken maka tuhu lit kegeluhen kenca kematen. Hal enda sue ras si enggo ipadanken Jesus Kristus i bas Padan si Mbaru.

Perlu sieteh maka pengangkan Jop kerna kematen enda berbeda ras pengertin i bas Padan si Ndekah umumna si erkawiten ras kematen. I bas Padan si Ndekah arus si akui maka lenga jelas (kabur) denga pengertin kerna litna kegeluhen si rasa lalap kenca kematen (Bnd. Mas. 6:6; Yes. 38:18). Tapi Jop 14:13 mereken sada pengangkan teologi si mbaru i bas Padan si Ndekah, kerna pengarapen ras ingan kalak si enggo mate. Erkelangken kematen daging kulanta mulihken jadi taneh, ras kesahta (roh manusia) mulihken ku Dibata sinepa kita ndube. Pengangkan kerna kematen e banci i bagi ku bas telu pengertian. Eme si pemena sirang ras Dibata (hubungan), si peduaken kesirangen antara kula ras kesah, ras si peteluken kesirangen jelma ras keleng ate ni Dibata (neraka). Si jadi penungkunen genduari ija nge ingan kesah kalak si enggo mate e? Apakah mulihken “secara langsung” ku Dibata, entah lit i bas sada ingan si ibahan Dibata ija kerina kesah kalak si enggo mate i pepulungNa guna ertima ras nimai kerehen Jesus Kristus si peduakaliken, sope lit penghakimen man doni ras isina kerina termasuk pe man kerina jelma?

I bas pengangkan teologi Padan si Ndekah ijelasken maka ingan kesah sekalak jelma si enggo mate eme i sheol (Ibrani). Ras i bas Padan si Mbaru eme hades (Yunani). Sheol ras hades eme ingan sementara man kesah jelma. I bas ingan eme kerina kesah jelma si enggo mate i pepulung guna nimai kerehen Jesus Kristus si peduakaliken guna mpekeke kalak si enggo mate. Subuk sheol ras hades igelari intermediate state. Intermediate state eme sada istilah si ibahan piga-piga teolog guna njelasken alu tepat kerna ruang ras waktu si sifatna eme “antara” ras “sementara”. Kata intermediate sendiri (kata sifat) singertikenca sada kondisi waktu tertentu, sedangken state (kata benda) ertina sada kondisi jelma i teruh (di bawah) keadaan tertentu. E maka intermidate state eme sada keadaan si ncidahken kondisi kalak si enggo mate i bas masa antara kematen ras kekekenna.

Selanjutna hal penting i bas teks enda eme kerna litna sada sura-sura ras pemindon Jop man Dibata, guna banci netapken waktu ras tetap nginget Jop dikune tuhu-tuhu ia i bas doni kematen. Pengarapen Jop enda adi siperdiateken sembaba ras pengajaren Jesus Kristus kerna litna kekeken kula man kalak si enggo mate. Sue ras teologi Kristen tujun kerehen Jesus Kristus si peduakaliken eme guna ngeranaken kalak si nggeluh ras si enggo mate. Kerina kalak si enggo mate ipekeke Jesus alu makeken kula si mbaru ras ras nggeluh rasa lalap. Paulus i bas 1 Korinti 15:42-44 ngerana kerna kinikekeken kula sebage sada “transformasi” arah kula si ermasap-masap (fana) ku bas kula si rasa lalap (kekal). Pengangkan enda mereken pengarapen maka kematen jadi dalan ku kegeluhen si mbaru si la erkeri-kerin ija kalak si mate si enggo ipekeke Jesus nggeluh ras IA i bas kemulianNa i Surga.

PENGKENAINA

Pengangkan kerna kematen i bas kekristenan tentuna mereken erbage-bage pengertin man banta i bas ersikap ngalo- ngalo (menghadapi) kematen e sendiri. Kematen kalak si erkiniteken man Jesus Kristus labo nirangken kita ras keleng ateNa, sabab tangkas si eteh maka IA me Dibata nandangi kalak si nggeluh ras si enggo mate (Rm. 14:9). Erdandanken si e i bas paksa genduari enda, enterem kalak Kristen ngidah ras ngaloken kematen e i bas pengarapen ras kiniteken. Kiniteken nandangi litna kekeken ras kegeluhen si rasa lalap tentu banci mereken ketenengen i bas ngalo-ngalo kematenta ras pe kematen kalak si ikelengi kita.

I bas pengakun kinitekenta tiap minggu sibelasken maka Jesus nusur ku doni kematen. Ras reh denga ka IA pagi guna kalak si ngeluh ras si mate. Arah pengakun enda maka tek kita kalak si mate genduari lit bas doni kematen. Lenga ia bengket ku Surga. E maka bicara megati ninta bas ngapuli maka temanta si nggo leben i dilo Dibata ngo masuk Surga maka situhuna adi rikutken teologinta maka kerina temanta e sangana bas doni kematen.

Kesadaren kerna litna kematen situhuna mereken pengajaren kerna pentingna mpegeluhken nilai-nilai kebujuren, kesetian man Dibata si erpalasken keleng ate man baNa. Si sedari maka kegeluhen i doni enda kentisik ngenca, maka tep- tep kalak si erkiniteken i jemba guna ndalani kegeluhen alu bujur si ertujun guna kemuliaan Dibata. Sue ras si e, ungkapen “memento mori (Ind: ingatlah akan [hari] kematian; Karo: ingetlah kerna [wari] kematen)” ngingetken kita guna nggeluh alu dem kesadaren kerna kematen, seh maka tupung kita nggeluh denga i doni enda si pebagesi ras si peteguhi kinitekenta man Jesus Kristus.

DISKUSI :

1. Kai nge kebiarenta i bas kita ercakap kerna kematen?
2. I bas kita nginget wari kematen, kai saja sibanci silakoken i bas ndalani (mengisi) kegeluhen sibereken Dibata man banta?

USULEN ENDE-ENDEN: :

1. KEE GBKP 201: 1, 3 Malem Ate Tuhu-tuhu
2. KEE GBKP 80: 1, 2, 6 Yesus Geluh Ni Tendingku
3. KEE GBKP 165: 1- (persembahen) Bas Ia Ngenca Lit Kepe
4. KEE GBKP 190: 1, 3, 4 Ola Kal Lupaken Aku

DAFTAR BACAAN :

• Moderamen GBKP. Pokok-pokok Pengakuan Iman GBKP (Konfesi). Kabanjahe: Abdi Karya, 2016.
• Adiprasetya, Joas. Berteologi Dalam Iman. Jakarta: BPK Gunung Mulia, 2023.
• Erickson, Millard. Introducing Christian Doctrine, Grand Rapids: Baker, 2001.
• Guthrie, Donald. Teologi Perjanjian Baru 3. Terjemahan Lisda Tirtapradja Gamadi, dkk. Jakarta: BPK Gunung Mulia, 2015.