Bahan PJJ 05 – 11 Juli 2026

JADI BANGSA SI MBELIN

Kejadian 12: 1 – 3
Abram dipanggil Allah

12:1 Berfirmanlah TUHAN kepada Abram: “Pergilah dari negerimu dan dari sanak saudaramu dan dari rumah bapamu ini ke negeri yang akan Kutunjukkan kepadamu;
12:2 Aku akan membuat engkau menjadi bangsa yang besar, dan memberkati engkau serta membuat namamu masyhur; dan engkau akan menjadi berkat.
12:3 Aku akan memberkati orang-orang yang memberkati engkau, dan mengutuk orang-orang yang mengutuk engkau, dan olehmu semua kaum di muka bumi akan mendapat berkat.”

Kejadin 12: 1 - 3
Dibata ndilo Abram

12:1 Nina TUHAN man Abram, “Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi. 
12:2 Nterem Kubahan sinursurndu, janah e me pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu.

12:3 Kupasu-pasu kalak si masu-masu kam, tapi Kusumpahi kalak si numpahi kam.

Janah erkiteken kam Kupasu-pasu kerina bangsa-bangsa.” 

(Konfesi GBKP Perkawinan sebagai Media Wadah Karya Keselamatan Allah)

MODEL PJJ: PUJIAN KATA PERLEBE

Abram idilo Dibata umur 75 tahun nadingken kutana i Ur- Kasdim nari ku taneh perjanjin. Gelar Abram jadi Abraham tupung umurna 99 tahun (Kej.17:1-5). Perubahen gelar Abram jadi Abraham e jadi i bas sada proses si cukup nggedang, eme:

• Tadingken kutandu
• Tadingken kade-kadendu
• Tadingken nande-bapandu

Sienda ngatakenca maka Abram si kedungenna igelari Abraham arus nggit nadingken zona nyamanna nehi pendilo Dibata guna jadi bangsa si mbelin alu kata si deban jadi bangsa si mbelin lit proses si arus i dalani, rikutken pengorbanen gelah seh ije. I bas proses e Dibata erjanji maka kesusuren Abraham jadi bangsa si mbelin.

Kejadin 12:1-3 si jadi bahan PJJnta, nuriken kerna perintah Dibata man Abram guna nadingken kutana, kade-kadena bage pe nadingken nande – bapana guna bengket ku bas negeri siituduhken Dibata, tentu enda labo menukah ija Abram si ndube nggo ndekah tading bas kutana, enggo lit erta-ertana arus nadingken sie kerina berkat ku ingan silabo ietehna. Patuh, setia ia aminna pe ingan e lenga bo pernah idahna. I bas Kepatuhen ras kesetianna Dibata erpadan jadiken kesusurenna jadi bangsa si mbelin, terberita bage pe jadi pasu-pasu man enteren jelma. Abraham berkat nadingken kutana ku taneh perjanjin e raduken ras jabuna. Kesetian i bas nehken sura-sura Dibata labo terjeng i bas kegeluhen Abraham, i kut pe i je ndeharana Sara. Payo la lit isuratken dukungen Sara i bas kejadin e, tapi tek kita maka Sara pe ndukung pendilo Dibata man perbulangenna.

ISI

Pendilo Dibata kempak Abraham mahan bana maka arah kesusurenna bangsa-bangsa ndatken pasu-pasu, kesusurenna jadi bangsa si mbelin. Bangsa si mbelin rehna i bas jabu nari eme perjabun kalak sitek si erkemalangen man Dibata. Perjabun e eme sura-sura Dibata kap, Demi isi doni enda, jagai ras kuasai guna kemulian Dibata. Arah pengogenta teridah man banta maka biak bangsa pilihen/mbelin eme jadi pasu-pasu man bangsa si deban.

Jabu kalak sitek erpalasken Pustaka Si Badia eme jabu sinjadiken Dibata jadi palas ras usihen i bas kegeluhen jabuna i bas perbahanen , orat nggeluh bage pe carana rukur. Jabu kalak Kristen labo terjeng perkumpulen individu tapi lebih asa sie jabu kalak Kristen eme ingan guna nandai Dibata, jabu selaku gereja si kitik si dem alu kekelengen, setia, sihamaten, siergan, I bas jabu me bena-benana seisi jabu nandai Dibata. Enda ngatakenca maka tuhu mbelin tugas ras tanggung jabab selaku jabu kalak sitek gelah jabu e ngasup jadi saksi, erberita kerna Dibata i bas jabuna.

Selaku bangsa Dibata tugas ras panggilenta eme ersaksi enda sada bagin Tri Tugas Gereja si igelari Marturia. Ersaksi itengah doni enda ertina kita selaku bangsa Dibata idilo gelah jadi pasu-pasu man jelma si enterem. Alu orat geluhta teridah uga Dibata erdahin arah jabunta. La pedah ndauh lebe si ukuri guna niari doni enda, mari sinehen “doninta” lebe eme jabunta. I bas jabunta me inganta sipemena naksiken Dibata simada kuasa. Banci saja lit penungkunen uga caranta ersaksi i doni enda arah jabunta?

I bas ersaksi i tengah-tengah jabunta si mbaba pengaruh man isi doni enda, arus si eteh kai kin makna perjabun i bas kalak Kristen. I bas Pustaka si Badia isuratken me ndehara jadi penampat man perbulangenna (Kej. 2:18), sekalak ndehara arus patuh man perbulangenna bage pe perbulangen arus engkelengi ndehara (Ep. 5:21-22). Enda kerina ngatakenca maka i bas jabu tentu arus lit kesetiaan bage pe sisampat-sampaten, tep-tep bagin ngelakoken tugasna sue ras porsi si enggo itentuken Dibata.

PENGKENAINA

Jadi bangsa si mbelin tentu labo gampang, melala proses siman dalenen, bangsa si mbelin tentu reh i bas jabu-jabu nari. Jabu kalak Kristen eme bangsa simbelin si arus teridah i bas kiniteken ras perbahanenna. Enda sue ras temanta “ Jadi Bangsa Si Mbelin”, guna seh ku je kita arus :

1. Jadi Usihen i bas erkiniteken (Teladan Iman)

Jabu kalak sitek eme gereja si kitik i tengah-tengah doni enda, uga i bas jabu kita encidahken teladan iman, nerapken nilai-nilai kekristenan alu encidahken kekelengen, kinibujuren, nggit ngalemi ras pe berintegritas. Nande ras Bapa harus ngasup jadi usihen man kerina seisi jabu.

2. Jabunta jadi saksi Kristus

Jabu kalak sitek idilo jadi saksi Kristus arah kata ras perbahanen subuk i bas jabu bagepe man kalak si i sekelewetna. Jabu arus ngasup mereken dampak ntah pe perubahan si positif i bas masyarakat arah kerina dampar kegeluhenna, i bas pelayanen, pendahin ras tindaken- tindaken si ilakokenna.

3. Njagai Kiniersadan ras encidahken kekelengen

Jabu kalak si tek arus jadi ingan kehadiren Kristus si nyata. Hubungen nande ras bapa, anak-anak bage pe seisi jabu si harmonis eme buktina. Jabu kalak si tek arus nggit elajar saling mengampuni. Arah jabu-jabunta teridah uga Dibata erdahin, arah jabunta teridah kita jadi bangsa si mbelin bangsa si ngasup ngaloken perbedan, ngasup nehken kekelengen ngasup jadi usihen arah ngasup kita ndalanken sie maka banci kita igelari “Jadi Bangsa Simbelin”.

DISKUSI :

1. Arah ogenta sendah turiken dage kai kin si arus silakoken gelah banci jadi bangsa simbelin bagi tema si seh man banta?
2. Jadi Bangsa Si Mbelin tentu lit kawitenna arah jabu, kai dage tekadndu man jabundu gelah banci jabundu e jadi bangsa si mbelin?

USULEN ENDE-ENDEN:

1. KEE GBKP 299: 1-2 Ngikut Tuhan kin atendu
2. KEE GBKP 354: 1-2 Kam si mbelin
3. KEE GBKP 480: 1 O bangsa-bangsa pujilah Tuhan