Bahan PJJ 02 – 08 Agustus 2026

ERBAGESNA NANDAI DIBATA

Kolose 1 : 9 - 10

1:9 Sebab itu sejak waktu kami mendengarnya, kami tiada berhenti-henti berdoa untuk kamu. Kami meminta, supaya kamu menerima segala hikmat dan pengertian yang benar, untuk mengetahui kehendak Tuhan dengan sempurna,

1:10 sehingga hidupmu layak di hadapan-Nya serta berkenan kepada-Nya dalam segala hal, dan kamu memberi buah dalam segala pekerjaan yang baik dan bertumbuh dalam pengetahuan yang benar tentang Allah,

Kolose 1 : 9 – 10

1:9 Erkiteken si e me, maka mulai kin ibegi kami kerna kam, rusur kam itotoken kami man Dibata. Ipindoken kami man baNa gelah banci ietehndu kerina sura-suraNa, alu pemeteh ras kepentaren si ibereken KesahNa.

1:10 Alu bage ngasup kam nggeluh bagi si ngena ate Tuhan dingen erbahan meriah ukurNa. Seh maka kegeluhenndu erbuahken perbahanen si mehuli, janah erbagesna pe penandaindu Dibata.

(Pengertian Spiritualitas)

MODEL PJJ: KESAKSIN

KATA PERLEBE

Mekatep kal si idah lit temanta ngalaken persoalen si bali tapi la seri dampak persoalen e bas geluhna. Radu-radu ndatken persoalen si seri kelekna tapi sembelah megenggeng sembelah nari mbulak erkiteken mberat iakapna, kai nge ndia erbanca maka deba temanta si dem persoalen e megegeh tapi deba lang? pengalamen ngatakenca kuncina i bas ija bagesna penandaina nandangi Dibata, ntah pe terjeng ija bagesna spritualitasna. I bas bahan PJJ nta sendah mbue kita erlajar kerna sie i bas pengajaren Paulus man perpulungen Kolose.

ISI

Penafsir sepakat maka Epafras eme simajekken Perpulungen Kolose, janah pajekna Perpulungen Kolose enda eme buah arah pelayanen Paulus si hebat ku Efesus. Amin gia kemungkinen Paulus labo pernah ku Kolose tapi ia njagai hubungen si mejile ras Epafras si enggo bertobat erkiteken pelayanen Paulus ras temanna sada dahin arah Kolose (1:7, 4:12). Alasen utama penulisen surat Kolose eme turahna ajaren palsu sibanci mengancam masa depan pelayanen i Kolose. Informasi kerna kondisi Kolose idat Paulus langsung arah Epafras si reh njumpai ia, e maka surat Kolose enda eme surat balasan Paulus si langsung itaruhken Tikhikus ku Kolose asum Paulus ipenjaraken i Roma.
Tujun Paulus nulis surat enda lit 2 eme : guna mbeneken ajaren palsu si berbahaya i Kolose si atena nggantiken keunggulen Kristus ras kedudukenNa si inti i bas ciptaan, i bas pernyataan, penebusen ras gereja. Sipeduaken Paulus nekanken sipat situhuna arah hidup baru i bas Kristus ras tuntutenna nandangi kalak si tek. Paulus nekanken sifat sejati ras kemulian Tuhan Jesus Kristus, Ia eme gambar Dibata si teridah (1:5), Dibata i bas bentuk daging/jasmaniah (2:9), pencipta segala sesuatu (1:16-17), kepada gereja (1:18) ras sumber si cukup guna keselamatenta (1:14, 20-22). Pengajaren si papak e justru sumber si labo cukup guna keselamaten, hampa, palsu ras la erkuasa, la mbages secara rohani, bage pe angkuh (2:18).
Janah khusus i bas nats ta sendah menaken ayat 9-11 isina eme Paulus ertoto man Tuhan guna kalak Kolose, ija isi pertotonta e eme mindo gelah min kalak Kolose lit i bas ia pemeteh kerna sura-sura Dibata si erpalasken pemahamen Rohani si sejati, sabab nandai Dibata janah meteh kai sura-suraNa guna silakoken eme tanggung jababta si utama. Adi megermet kita ngoge surat Kolose enda asa dung siidah maka mekatep kel Paulus nuriken kerna pemeteh ras kepentaren, misalna asum idahna gereja kurang payona perdalanenna mis isinggungna kerna pentingna pertoton, sabab menurut Paulus “ketidaktahuan” Rohani eme sumber kesalahen gereja, sierbanca gereja la stabil perdalanenna bage pe ketidaktahuan Rohani ndai kang erbanca jemaat gereja terus menerus nggeluh i bas kecedan ate.
Sipeduaken Paulus ertoto gelah perpulungen e nggeluh sue ras pemeteh si enggo ialokenna ras ndalani kegeluhen bagi singena ate Tuhan, alu cara sibage nge maka kegeluhen kalak Kristen banci erbuah ras bertumbuh, perkatan Paulus enda terinspirasi arah Joh 15:7-8 ija nina :”Adi kam tetap i bas Aku janah KatangKu tetap nggeluh i bas kam, banci ipindondu kai pe atendu, janah ialokenndu me kai si ipindondu e. Adi melala buahndu, kam me ajar-ajarKu, janah i bas sie ermulia me BapangKu” i bas Bahasa Indonesia ayat 8 enda nina : “Dalam hal inilah BapaKu dipermuliakan, yaitu jika kamu berbuah banyak dan dengan demikian kamu adalah murid-muridKu” i bas pelaksananna tep-tep wari adi lit kengasupenta meritaken Injil, beritakenlah! Adi lit bas kam erta pakeken e nampati kalak si mesera Baban geluhna, adi lit talentandu ngapuli, apulilah kalak si kelsehen, labo bas hal-hal si mbelin saja ngenca kita banci berkarya tapi muliakenlah Tuhan i bas hal-hal si sederhana, erbuahlah i bas tep-tep dahin simehuli. I bas kita nggeluh bagi singena ate Tuhan ipegegehiNa kita guna ngalaken kerina tantangen kegeluhen ras ertahan i bas kesabaren, janah kalak si panjang sabar malem kap atena ndalani kegeluhenna.

PENGKENAINA

Nandai Tuhan alu mbages nampati kita ngalaken kerina dampar persoalen geluhta. Kalak si mbages penandaina nandangi Dibata (spritualis) ngasup ia tetap tenang gia senembas adi siperdiateken kita labo ngasup ngalaken persoalen bagi si ialakenna e. Engkai maka ia tenang sabab sinasa geluhna enggo iendeskenna man Dibata. Janah kai maka ia megenggeng ngalaken kiniseran geluh, sabab igejapna Tuhan ulu gegehna. Tek ia rencana Tuhan nandangi geluhna eme rencana damai Sejahtera.

Jenari, buah perbahanen kalak simbages spiritualitasna arus tergejap nandangi sekelewetna. Kegeluhenna jadi pasu- pasu man isi jadu ras kalak si deban, mehuli perbahanenna. Bage me kepe sura-sura Dibata nandangi kalak si enggo mbages nandai Dibata.

DISKUSI :

Engkai maka lit kalak si ngalaken perbeben si bali mberatna, tapi lit si megenggeng ngalakenca lit si lang?

Turiken pengalamenndu jadi kesaksin man teman perpulungen si deban, asum kam megenggeng ngalaken kiniseran geluh seh maka kam jine pe la iarapndu maka kam bage genggengna adi ibandingken ras beratna baban geluhndu!

USULEN ENDE-ENDEN:

KEE GBKP 335: 1-3 Tuhanku si ngaturkenca

KEE GBKP 444: 2 Lit paksana merdang

KEE GBKP 372: 1-3 Pujilah Tuhan si Badia

KEE GBKP 199: 2 Senang Gundari Geluhku