Bahan PJJ 15 – 21 Februari 2026

NGIKUTKEN PEDAH RAS PERENTAH

Imamat 18:1-5

Kudusnya perkawinan

18:1 TUHAN berfirman kepada Musa:

Persadan kula si ilarang

18:1 Ikataken TUHAN man Musa,

18:4 Ikutken lah pedah-pedahKu, dalanken lah perentah-perentahKu. Aku kap TUHAN Dibatandu.

(Tata Gereja)

MODEL PJJ: CERAMAH

KATA PERLEBE

Kita nggeluh i bas kemajuan jaman ija terjadi krisis etika ras moral, ijah ije melala terjadi perbahanen-perbahanen si nggesuh. Janah melala kalak enggo mentoleransi dosa alu ngataken e “pilihen pribadi” ntah pe “gaya hidup alternatif”. Kondisi enda tentu jadi tantangan man gereja selaku lembaga bage pe kalak Kristen secara umum. Sabab adi gereja siigelari kula ni Kristus pe enggo mentoleransi perbahanen-perbahanen si nggesuh (misalna: nipu, erlua-lua, sirang jabu, rsdna) e ertina gereja lanai njaga kebadian Tuhan sekaligus iperlemahna kesaksinna man doni enda. Gereja ntah pe kalak Kristen iutus ku doni labo gelah seri ras sienterem/doni enda. Sabab nggeluh labo sekedar ngikuti arus sienterem. Sabab ngena ate Tuhan ndauh pentingen asangken pengalon doni enda. Ibaratna, sanga perahu idatas lau, perahu e ngasup erlayar alu sempurna, tapi adi enggo bengket lau ku bas perahu, perahu e la banci la gedap nari nge.

ISI

Ogenta enda ngerana kerna pasu-pasu/keselamaten banci

ialoken bangsa Israel arah nggeluh ngikutken pedah ras perentah Tuhan. Secara khusus ogenta enda ngajuk bangsa Israel gelah nggeluh badia i tengah-tengah lingkungenna, khususna adi si oge kerina Imamat bindu 18 enda ngerana kerna njaga kebadian arah nilahi kebiasan persadan kula si ilarang bage pe sekaligus njagai orat nggeluh perjabun.

Ay. 1, 2: Ikataken Tuhan man Musa, gelah ipesehna man bangsa Israel bagenda, “Aku kap Tuhan Dibatandu.” Kalimat Aku kap Tuhan Dibatandu, e pe itulisken ndungi bindu enda eme ibas Im. 18:30, janah i bas seluruh kitab Im. ijumpai 21 kali. Aku kap Tuhan Dibatandu enda mempertegas identitas ras otoritas Tuhan i bas hubungenna secara khusus ras Israel. Tuhan nge sinjadiken Israel jadi bangsa pilihen, labo erkiteken gegehna tapi perkuah ateNa (anugerah). Adi si oge Im.11:44 isuratken, Aku kap Tuhan, Dibatandu, arus ijagandu kebadianndu erkiteken Aku badia. Kebadian Tuhan e jadi pengajaren si utama i bas kitab Imamat bage pe banci sibandingken i bas 1 Pet. 1:16, ikataken Dibata, “kam arus badia, sabab Aku pe badia.” Tentu sebagai bangsa pilihen, Israel idilo guna nembah man Tuhan saja si jadi ulu kegeluhenna. Tuhan ndilo bangsaNa guna mpraktekken kegeluhen si badia erkiteken bangsa Israel Tuhan empuna, labo doni empuna. Penandai kerna Tuhan alu payo erbahanca peturah biak si erkemalangen man Tuhan, nggeluh ertanggung jabab jadi saksiNa.

Ay. 3: Ola ikut-ikut perbahanen bangsa Mesir ingan tadingndu ndube ntah pe perbahanen bangsa Kanaan kuja kam Kubaba gundari. Lebih kurang 400 tahun bangsa Israel tading i Mesir tentu enggo itandaina (bahkan banci saja bangsa Israel enggo terpapar) budaya, agama ras kebiasan-kebiasan kalak Mesir si bertentangen ras penembahen man Tuhan. Mesir terberita kerna kiniteken politeistik (penembahen man berhala- berhala). Bangsa Israel i ingetken guna nadingken pengaruh- pengaruh e. Bage pe taneh Kanaan, si i iani erbage suku si terberita i bas perbahanen-perbahanen si nggesuh: penembahen man berhala, ngkurbanken anak alu nggeleh anak- anakna jadi persembahen i bas api ibabo batar-batarna ras erlua-lua. Musa iperintahken Tuhan guna mpeseh pedahNa eme bangsa Israel la banci ngusih-ngusih kebiasan bangsa-bangsa e. Sabab lit kecenderungen bangsa e (manusia) ngusih kai si idahna. Tuhan nehken perentah gelah bangsa Israel njaga kebadianna sebagai bangsa sinandai Tuhan, ula bagi bangsa Mesir ras Kanaan si la nandai Tuhan. Bangsa si la nandai Tuhan ijurukenna dirina/ipemelketna dirina si erbahanca ia la bersih.

Tuhan ngajarken etika ras moral man bangsa Israel alu la ngusih-ngusih perbahanen si bertentangen ras perentah Tuhan. Perentah enda ngingetken bangsa Israel guna mempertahanken identitasna selaku bangsa pilihen si badia. Tole adi si oge i bas Ul. 12:29-32, Tuhan labo terjeng mpersingeti gelah ula nembah man berhala, tapi pe mpersingeti bangsa Israel gelah ula ncubaken mpelajari kuga cara kalak e ersembah man dibatana alu tujun guna ngusih-ngusih ia. Tuhan ngelarang bangsa Israel ngikut-ngikut kebiasan bangsa Mesir (masa lalu) ras bangsa Kanaan (masa depan), erkiteken bangsa Israel harus jadi saksi Tuhan si Badia i lingkungen masyarakat ija ia tading.

Ay. 4, 5: “Ikutkenlah pedah-pedahKu, dalankenlah perentah-perentahKu. Aku kap Tuhan Dibatandu. Ikutkenlah pedah-pedah ras perentah-perentah si Kubereken man bandu: adi bage perbahanenndu, tentu selamat geluhndu.” Tuhan e dem kekelengen, Tuhan ersura-sura gelah bangsaNa ndatken kegeluhen. Bandingken perumpaman Jesus i bas Joh. 10:10b, tapi Aku reh gelah simegiken sorangKu ngaloken kegeluhen si cukup. Hubungen ras Tuhan jadi palas i bas kerina dampar kegeluhen Israel, Tuhan si njamini kalak si patuh man baNa. Alu kata si deban kepatuhen nandangi pedah ras perentah Tuhan maba kegeluhen man bangsa e.

PENGKENAINA

Kita nggeluh i bas lingkungen ija melala terjadi tindakan- tindakan amoral, ijah-ije melala kel perbahanen-perbahanen si jahat. Arah perbahanenna teridah lanai ijagana kebadian Tuhan mahan bana pe lanai icidahkenna keistimewan dirina selaku bangsa Dibata. Kegeluhen kalak Kristen pe erkawiten mulai arah cara rukurna, cara erdahinna, peruisna megati lanai bo terbedaken ras peruis kalak silanandai Tuhan. Adi kalak erkemalangen man Tuhan maka sura-sura Tuhan me seharusna si jadi palas pertama i bas rukur ras ndalani kegeluhen. Labo menurut kebiasan kalak si nterem. Kalak si tek idilo guna waspada nandangi pengaruh kebiasan-kebiasan di sekelewetta ras tetap memastiken maka perukurenta ras perbahanenta sembaba ras pedah ras perentah Tuhan. Identitasta selaku anak-anak Tuhan me si arus membentuk tindaken guna menolak praktek-praktek duniawi ntah pe menolak si sifatna la badia (tidak saleh).

I tengah-tengah doni si terus berubah (Mesir-Kanaan) ras dem alu tantangan, perubahen si banci saja peturah melala kinilaraturen. Kiniraturen e penting kel janah Tuhan ersura-sura gelah kalak si erkiniteken pe ratur ngikutken pedah ras perentah Tuhan. Adi sibandingken ras 1 Kor. 14:40 ikataken: “Lakokenlah kerina alu metunggung dingen ratur.” Kepatuhen nandangi pedah ras perentah Tuhan peturah hal si mehuli ku bas kegeluhenta ras mabai kita i bas ndalani kegeluhen si benar. Nina i bas Mas. 119:105, “KataNdu kap tendang man nahengku, nerangi dalan si kudalani.”

Bas GBKP, kita nandai kerna sada dokumen penting eme Tata Gereja GBKP si enggo isahken i bas persidangen Sinode (Peserta Sinode eme utusen-utusen bas runggun se-GBKP). Tata Gereja GBKP eme norma/pedoman prilaku anggota jemaat ras serayan GBKP ija i bas setiap pasal khususna Tata Dasar si terdiri i bas 10 Bab, 20 pasal erkawiten ras pedah ras perentah Tuhan (lit dasar teologisna). Arah matuhi Tata Gerejanta turah ije cara ergereja (menggereja) si ratur maba ciri khas tersendiri jemaat GBKP si tentuna berbeda ras gereja si deban bage pe berbeda ras lingkungen umumna. Tata Gereja enda jadi palas simpersada guna nentuken palas dingen arah pelayanen GBKP i Tengah- tengah doni. Erkiteken Tata Gereja eme keputusen si tertulis i GBKP si isahken i bas Sidang Majelis Sinode, e maka lit otoritasna i bas Tuhan guna ihamati arah idalanken kerina Bab ras pasal- pasal si lit. Labo banci ate-ate pihak-pihak tertentu ngelanggarsa apaika adi iboncengi kepentingen-kepentingen tertentu. Alu bage ratur GBKP enda, teridah kiniersadan sada ras si debanna. La terpecah belah erkiteken kepentingen tertentu. Kerina meteruk ukur ngalokensa ras ndalankenca. Tata Gereja enda jadi palasta guna berelasi secara pribadi ntah pe secara lembaga GBKP ras masyarakat ija kita ringan. Arah ndalanken Tata Gereja pe jadi salah sada indikator maka kita jadi kalak sipatuh, si erkemalangen man Tuhan.

DISKUSI :

1. Turiken uga pengertinndu kerna kalimat: “Aku kap Tuhan, ”
2. Kai ngge harusna ilakoken gelah kerina perpulungen dingen serayan banci ndalanken tata gereja alu mehuli?

USULEN ENDE-ENDEN:

1. KEE GBKP 163: 1,2,4
2. KEE GBKP No. 6:1-3
3. KEE GBKP 165:1,2
4. KEE GBKP 323:1,2,3
5. KEE GBKP 463:1,5

DAFTAR BACAAN :

Alkitab LAI (Lembaga Alkitab Indonesia). (2002). Alkitab Terjemahan Baru. Jakarta: LAI.

Guthrie, Donald, (1983). Tafsiran Alkitab Masa Kini 1: Kejadian- Ester, 1983). Jakarta: Yayasan Bina Kasih/ OFM, BPK Gunung Mulia.

Lutzer, E. W. (1998). Serangan Iblis Terhadap Gereja. Literatur SAAT.

Paterson, Robert M. (1994). Tafsiran Alkitab: Kitab Imamat. Jakarta: BPK Gunung Mulia.

Pustaka Si Badia LAI (Lembaga Alkitab Indonesia). (2009). Jakarta. LAI

White, E. G. (1911). The Great Controversy Between Christ and Satan. Pacific Press.