Konfesi Tentang Allah

SI MAN OGEN        : Jesaya 45 : 5-8

45:5 Akulah TUHAN dan tidak ada yang lain; kecuali Aku tidak ada Allah. Aku telah mempersenjatai engkau, sekalipun engkau tidak mengenal Aku, 45:6 supaya orang tahu dari terbitnya matahari sampai terbenamnya, bahwa tidak ada yang lain di luar Aku. Akulah TUHAN dan tidak ada yang lain, 45:7 yang menjadikan terang dan menciptakan gelap, yang menjadikan nasib mujur dan menciptakan nasib malang; Akulah TUHAN yang membuat semuanya ini. 45:8 Hai langit, teteskanlah keadilan dari atas, dan baiklah awan-awan mencurahkannya! Baiklah bumi membukakan diri dan bertunaskan keselamatan, dan baiklah ditumbuhkannya keadilan! Akulah TUHAN yang menciptakan semuanya ini."

45:5 Aku kap TUHAN; la lit si debanna, seakatan Aku la lit Dibata. Kubereken gegeh man bandu, aminna la gia itandaindu Aku. 45:6 Kulakoken me si enda gelah kerina kalak si belang-belang doni metehsa, maka Aku kap TUHAN janah la kap lit dibata si deban. 45:7 Terang ras gelap, Aku nepasa, Aku mereken pasu-pasu bage pe cilaka. Aku, TUHAN, ngelakoken si enda kerina. 45:8 Kupesusur kemenangen i langit nari desken udan, janah doni sikap ngalo-ngalosa. Jenari turah ia radu ras kebebasen dingen keadilen; Aku, TUHAN, si mahanca jadi si enda kerina."

TEMA                     : Tuhan Ulu Kerinana

TUJUN                    : Gelah Moria:

·       Meteh ise kin Tuhan erpalasken pengogen.

·       Naksiken pengalamen pribadina ras Tuhan I bas PA Moria.

METODE PA           : Sharing

Kata Penaruh.

Penulis kitab Jesaya e me Jesaya anak Amos. Ia erdahin selaku nabi tupung kepemimpinen empat (4) raja Juda e me Usia, Jotam, Ahas ras Hiskia. Jesaya lit i bas keluarga si kiniliten ekonomi si mehuli, kalak erpendidiken, lit bakatna menggubah syair bage pe lit pemere Dibata selaku nabi, nandai alu payo keluarga raja Juda dingen mereken pedah secara nubuat kempak raja-raja kerna politik luar negeri Juda.

Jesaya 45:5-8 enda nuriken situasi bangsa Juda si paksa e ringan i pembuangen Babil. Bangsa Juda tuhu-tuhu erkadiola, iakuina maka perbahanen Dibata ngenca banci mulahi ia i bas tabanen e nari.

Mpebagesi Pengangken Kerna Ogen.

Isi Jesaya 45:1-8 e me nubuaten Dibata si make Kores, sekalak raja Persia, lako mbebasken bangsa Israel arah pembuangen i Babil nari. Dibata melasken maka IA erdolat nandangi kerinana ras ngaturken perdalinen kegeluhen manusia ras doni enda, seh pe ngasup make kalak si la nandai IA lako ndalanken rencana keselamatenNa. Isi Jesaya 45:5-8 e me:

·       Ayat 5. Dibata erdolat/erkuasa nandangi kerina bangsa-bangsa ras perdalinen kegeluhenna. IA makeken kalak pilihenNa bage pe kalak si la nandai IA lako ndalanken rencana keselamaten si enggo irancangNa.

·       Ayat. 6. Dibata mbebasken bangsa Israel arah pembuangen i Babil nari e me Raja Kores, Raja Persia si la nandai Dibata guna encidahken keleng ateNa kempak bangsa pilihenNa. IA ngenca sada-sadana Dibata si mada kuasa, la lit sideban selain IA (bdk. Kel. 20:1-5). Alu ikataken Dibata maka IA ngenca Dibata maka sekaligus ikatakenNa maka IA me si mbelinna kuasaNa.

·       Ayat 7. Dibata erdahin secara misterius (la terukuri manusia) I bas Sejarah perdalinen doni enda ras kegeluhen manusia lako nehi tujunNa.

·       Ayat 8. Dibata nepa terang ras gelap, pasu-pasu ras cilaka, dingen IA me ulu keadilan ras kebebasen.

Nubuaten i bas Jesaya 45 : 1-8 igenapi I bas Jesaya 55 : 12 bandingken Esra 1:1-11. I bas Esra 11:1-11 ituriken kerna Raja Kores mbebasken kalak Jahudi arah pembuangen i Babil nari ras mereken ijin man bana kerina mullh ku Jerusalem dingen mbangun mulihi Rumah Pertoton. Perbahanen Raja Kores enda e me bagin arah dekrit si ipedaratna, si igelari Dekrit Kores. Dekrit enda ipedaratna i bas tahun pemena pemerintahenna. I bas dekrit enda ia mereken ijin kempak kalak Jahudi si enggo ndube ibuang ku Babil segelah mulih ku Jerusalem dingen mbangun mulihi Rumah Pertoton. Perbahanen Kores enda e me bagin arah rencana Dibata lako mbebasken bangsaNa i bas pembuangen nari ras mpelimbarui ia i taneh perpadanen. Amin gia Raja Kores labo kalak Jahudi, tapi ia ipilih Dibata jadi perkakasNa i bas pembebasen.

Pengkenaina.

Tema PA enda e me: Tuhan Ulu Kerinana. Arah tema enda isingetken maka IA ngenca Dibata dingen IA bebas ndalanken rencanaNa termasuk perbahanenNa make kalak si la nandai IA (Raja Kores) mbebasken bangsa Israel i perbudaken Babil nari mulih ku Jerusalem. IA nepa terang ras gelap. IA ulu pasu-pasu ras cilaka. IA ulu kebebasen ras keadilen. Tangkas maka TUHAN ulu kerinana i bas doni enda erkiteken IA me si nepasa. Dingen tentuna i bas perdalinen geluhta melala pengalamen kiniteken sincidahken maka tuhu-tuhu Dibata si iteki kita e me Dibata si mbelin kuasa.
I bas Konfesi (pengakun kiniteken) GBKP BAB II isingetken kerna Dibata. Kami tek maka:

·       Dibata e me si perlebe ras si pendungina. IA nge si erkuasa (bdk. Ket. 1:8). IA me si erdolat: kebenarenNa la terjului ras keputusenNa adil i bas ngukum dosa ras ngkelengi kalak perdosa (bdk. Joh. 3:17-18).

·       Dibata Si Telu Sada: Dibata Bapa, Dibata Anak, ras Dibata Kesah Si Badia (Mat. 3:16-17; Joh. 10:30; 2 Kor. 13:14; 1 Joh 5:7).

·       Dibata Bapa e me Dibata si nepa langit ras doni ras kerina isina si njagaisa seh kedungen jaman (bdk. Kej. 1:1-31).

·    Dibata Anak e me Jesus Kristus; Anak Dibata Si Tonggal (Joh. 1:14) si encidahken pendahin ras peraten Dibata i bas doni enda (Joh. 4:34). IA me Penebus dosanta (Mat.1:21) arah ketubuhen, kematen, kekeken, kenangkihenNa ku Surga bage pe kerehenNa mulihi ku doni enda.

·    Kesah Si Badia e me pribadi Dibata; Kesah Dibata ras Kesah Kristus (Rom. 8: 15 - 17). IA me penampat ras pengapul si ibereken guna gajar, mpersingeti kalak si tek nandangi peraten Dibata ras ajaren Jesus Kristus, bage pe nuanken ras njagai kiniteken seh kerehen Jesus Kristus mulihi (bdk. Joh 14:26; 2 Kor. 3:17).

Tangkas i bas Konfesi GBKP ituriken maka Dibata erkuasa dingen erdolat. IA si nepa langit ras doni. IA ulu keselamatan dingen IA penampat kempak manusia.
Rikutken bahan PA Moria ras si ibelasken i bas Konfesi GBKP, kita arus melasken ras naksiken maka kuasa Dibata me si mbelinna. Alu bage olanai kita erdua ukur nembah IA. Tutus, fokus dingen tetaplah kita nembah Dibata gelah melala pengalamen geluhta ras IA si banci sisaksiken segedang-gedang geluhta.

Sharing:

Moria i bagi ku bas piga-piga kelompok. Si mehulina 3 kalak teptep kelompok. Dingen i bas teptep kelompok Moria ngelakoken sharing (nuriken pengalamen geluhna) nggeluh ras Dibata. Perbahanen Dibata si enggo inanami i bas kegeluhen. Pengalamen geluh kerna perbahanen Dibata enda si ituriken banci kerna pasu-pasu Dibata tapi pe banci ka kerna ukumen Dibata.

Pdt. Christopher Sinulingga