Aku Lit Guna Kam

Evaluasi 3

BIMBINGAN PA SAITUN GBKP TAHUN 2026

TANGGAL, 15-21 Februari 2026

Ogen : Pilipi 2:1-6

Jesus Kristus jadi usihen

Indonesia:

[1] Jadi karena dalam Kristus ada nasihat, ada penghiburan kasih, ada persekutuan Roh, ada kasih mesra dan belas kasihan,

[2] karena itu sempurnakanlah sukacitaku dengan ini: hendaklah kamu sehati sepikir, dalam satu kasih, satu jiwa, satu tujuan,

[3] dengan tidak mencari kepentingan sendiri atau puji-pujian yang sia-sia. Sebaliknya hendaklah dengan rendah hati yang seorang menganggap yang lain lebih utama dari pada dirinya sendiri;

[4] dan janganlah tiap-tiap orang hanya memperhatikan kepentingannya sendiri, tetapi kepentingan orang lain juga.

[5] Hendaklah kamu dalam hidupmu bersama, menaruh pikiran dan perasaan yang terdapat juga dalam Kristus Yesus,

[6] yang walaupun dalam rupa Allah, tidak menganggap kesetaraan dengan Allah itu sebagai milik yang harus dipertahankan,.

Karo:

[1] Kegeluhenndu i bas Kristus erbahanca kam megegeh. Ma kin keleng ateNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna?

[2] Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu.

[3] Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban.

[4] Ola keperlunndu saja ngenca iperdiatekenndu tapi perdiateken pe keperlun kalak si deban.

[5] Perukurenndu bali min ras perukuren Kristus Jesus:

[6] Aminna gia tetap lit i bas IA biak Dibata, erkuasa dingen ermulia IA bali ras Dibata, tapi si enda la ipertahankenNa.

Thema : Aku Lit Guna Kam

Tujunna:

Gelah Saitun:

1. Njadiken Jesus usihen bas pusuh ras ukur.

2. Nggeluhken geluhna ibas kiniersadan, meteruk ukur ras mehuli.

Metode : Dialog

I. BENA KATA

I bas kegeluhen enda lit ngatakenca maka adi kita sehat, lit nakan si man pangan, anak-anak pe meteh mehuli ras pencarin pe lancar, maka dat me kemalemen ate. Tapi adi situlihken ku perdalanen geluh si enggo sibentasi, labo kepe bage jadina. Lit keluarga rubati rusur pada hal la lit si sakit, tiap wari lit nakan man pangan tapi la ersada arih ku gereja, anak-anak meteh mehuli tapi lit akap rusur sikurangna. Ibas sie teridah maka kerina enda labo jadi jaminen ndatken kemalemen ate bicara seh pe bagi nisura. E maka mari kita erlajar arah pengajaren Rasul Paulus erpalasken suratna man perpulungen i Pilipi.

II. MPEGESI OGEN

Perpulungen Pilipi eme perpulungen si pemenana kal ipanteki Rasul Paulus i propinsi Roma. Surat enda isehken guna ngataken bujur man perpulungen sabab penampat si iberekenna tupung ia lit ibas kiniseran. Rikut ras si e pe Rasul Paulus ngingetken kerna piga-piga hal sehubungen ras kearusen geluh selaku perpulungen ni Tuhan:

- Nggeluh ibas Kristus erbahan megegeh, janah gegeh e lit i bas kegeluhen si nggejapken keleng ate Kristus, rembak ras Kesah Dibata, sikeleng-kelengen ras erkuah ate sada ras sidebanna.

- Kemalemen ate Rasul Paulus e me adi i bas perpulungen e nggeluh ersada arih, sikeleng-kelengen, ersada geluh, ersada ukur, meteruk ukur, perdiateken keperlun kalak sideban.

- Siman pedauhen i bas geluh perpulungen e me rangap, ukur meganjang, ula iakap ulin kita asa kalak sideban, ola kepentingenta ngenca si ukuri.

Ibabo sie kerina Rasul Paulus ngajuk gelah perukuren perpulungen bali min ras perukuren Kristus, lit biak Dibata ibas IA, erkuasa, ermulia bali ras Dibata, tapi kerina e la ipertahankenNa. Ibas sienda teridah maka seh kal pentingna nggeluh mpersilahang bana ibas ngusih Jesus.

III. PENGKEΝΑΙΝΑ

Nggeluh ibas kegeluhen situhu-tuhu banci dat arah kiniteken, kerembaken ras Dibata. Sie la banci terjeng ibas ukur ntah biber saja tapi arus teridah buahna arah pengerana, perbahanen rikut perukuren ibas kegeluhen sitep-tep wari.

Temanta ngataken aku lit guna kam. Tema enda ngajuk kita gelah nggejabken maka geluhta labo guna kita ras mpesenangken dirinta ngenca, tapi pe kita lit guna kerina temanta manusia, la erndobahen metua ntah nguda, bayak ntah musil, erjabaten ntah rakyat biasa, kalak Kristen ntah lang, kalak Karo ntah suku sideban, anak jabunta ntah lang, mbiring ntah mbentar kulitna. Mari sicidahken cara nggeluh sinisuraken Dibata bagi siikataken ibas Sasaran Pelayanan GBKP tahun 2025 "Dewasa Menerima Perbedaan". Sura-sura gerejanta, maka dewasa menerima perbedaan enda labo terjeng ibas tahun 2025 ngenca tapi terus sikembangken ibas pusuh dingen sicidahken ibas cara geluhta sitep-tep wari.

I bas si e enggo si cidahken kepatuhen, ketaaten ras kesetianta man Dibata. Ingetlah man kalak sipatuh nandangi sura-sura Dibata kemalemen ate situhu-tuhu me jadi ulihna. Erguna kita, tercidahken kiniulinta, emaka tetap kita ngasup ngataken bujur i bas kerina dampar kegeluhenta.

IV. PERTOTON

O Tuhan, pengasup kami guna ngangkai ras nggejapken maka kami lit ibas doni enda guna ngelakoken singena ate Tuhan ras guna teman kami manusia, ibas kecibal siugapana pe. Ibas Jesus kami ertoto. Amin.

V. Dialog

Tentuken sekalak jadi moderator simimpin dialog, sekalak jadi notulis, sinulisken kerina percakapen. Sijadi percakapen

1. Kuga nge pengidahta kidekah enda kerna perbedaan si lit ibas kita, sie e jadi kebayaken ntah jadi pertentangen.

2. Uga caranta ku lebe enda maka perbedaan jadi perkakasta guna ncidahken kekelengen ras kiniulin si lit ibas dirinta. Catat usulenta guna ilakoken.

VI. ENDE-ENDEN

1. KEE No. 71:1,2

2. KEE No. 286:1-3

3. KEE No. 424:1-2

4. KEE No. 194:1-3

Pdt. Jennie E. Keliat