Bahan PJJ 25 – 31 Januari 2026

SADA I BAS KRISTUS

Galatia 3: 26 – 29

3:26 Sebab kamu semua adalah anak-anak Allah karena iman di dalam Yesus Kristus.
3:27 Karena kamu semua, yang dibaptis dalam Kristus, telah mengenakan Kristus.
3:28 Dalam hal ini tidak ada orang Yahudi atau orang Yunani, tidak ada hamba atau orang merdeka, tidak ada laki-laki atau perempuan, karena kamu semua adalah satu di dalam Kristus Yesus.
3:29 Dan jikalau kamu adalah milik Kristus, maka kamu juga adalah keturunan Abraham dan berhak menerima janji Allah.

Galati 3: 26 – 29

3:26 Arah kiniteken me maka kam kerina jadi anak-anak Dibata i bas persadanndu ras Kristus Jesus.
3:27 Kam enggo ipersada ras Kristus arah lakon peridin, e maka enggo lit i bas kam biak-biak Kristus e.
3:28 Dage lanai bo erndobah kalak Jahudi tah kalak Junani, budak tah kalak bebas, dilaki ras diberu. Sabap kerina nge kam sada i bas Kristus Jesus.
3:29 Adi kam sikerajangen Kristus, kesusuren Abraham me kam, janah ialokenndu me kai si enggo ipadanken Dibata.

(Evaluasi Sasaran Pelayanan Tahun 2025)

MODEL PJJ: PARTISIPATIF KATA PERLEBE

Cara natap i bas kegeluhen manusia banci kepe salih. Enda banci si idah arah kegeluhen Rasul Paulus. Ndube sope Paulus nandai Tuhan Jesus Kristus maka ia me iakapna si payona dingen si bujurna. Adi la bagi ia, la iakapna teman. Ia kalak Jahudi, suku Benyamin, kalak si erpendidiken agama Jahudi janah ia kalak Parisi. E maka ajaren agama Jahudi me niakapna ngenca kebenaren i bas doni enda. Janah adi lit kalak si la bage labo iakapna sikerajangen Dibata. Janah erdandanken si e me ndube ia pe ngayak-ngayak ras pesega-sega kalak Kristen dingen erusaha banci ngkernepkenca i babo doni enda nari.

Kenca Paulus nandai Jesus maka enggo salih carana natap kalak si deban. Si enda banci kari si pelajari i bas bagin bahan PJJ sendah. Enda suratna man Perpulungen Galati. Tujunna nuratkenca eme guna nampati perpulungen ngelawan ajaren papak Judaisme. Eme sada pengajaren si ngataken keselamaten e reh arah ndalanken Undang-Undang (Taurat Jahudi). Si enda i lawan Paulus arah suratna enda, maka situhuna i bas Kristus dalan keselamaten. Janah arah Kristus Jesus kerinana ipersadaken.

ISI

I bas bagin bahan PJJ sendah, ngerana Paulus maka arah kiniteken man Jesus me dalanna kita ersada ras Jesus. Tek man Jesus ertina maka ngaloken kerina perbahanen Jesus i bas IA nelamatken kegeluhen manusia i bas dosa nari, jenari radu ras si e, ngikutken IA i bas kerina perukuren, pengerana ras

perbahanen. Jenari i bas persadanta ras Jesus mbabai kerina kalak si tek ersada ras kerina kalak si tek man bana. Jadi lit dua i je persadan (ay. 26) eme persadan ras Kristus ras persadan sapih-sapih kalak si tek man Jesus (Gereja).

Tanda bengket ku bas persadan e eme arah Lakon Peridin Si Badia (ay.27). Peridin e tandana kita enggo bengket ku bas Kristus. Nggeluh i bas kebenaren erkiteken penebusen Kristus enggo ialoken. Janah tandana enggo nggeluh i bas Kristus teridah arah biak-biak Kristus teridah i bas kalak si tek. Biak-biak Kristus eme ngkelengi kalak si deban. Erdandanken si e maka salah sada tanda kalak rembak ras Jesus eme teridah ia nehken kekelengen nandangi temanna.

Kegeluhen i bas Kristus eme erbanca cara natap teman manusia ndai enggo salih. Si enda teridah arah kai si isingetken Paulus i bas ayat 28, ”Lanai bo erdobahen kalak Jahudi tah kalak Junani, budak tah kalak bebas, dilaki ntah pe diberu.” Kata kuncina eme nggeluh i bas Kristus. Ertina uga cara natap Kristus nandangi manusia, bage me caranta natap kempak teman manusia si deban. Teridah i bas kegeluhen Kristus kidekah i doni enda maka la erdobahen idahna kerina manusia. Uga IA ngkelengi anak diberu Kanaan si sakit (Mat 15:21-28), ngkelengi suruh-surehen Perwira Romawi si sakit (Mat 8:5-13), rsd. Biak Kristus si bagenda me turah i bas Paulus maka kenca ia nandai Jesus ikatakenna lanai erndobahen kalak Jahudi entah kalak Junani, budak entah kalak bebas, dilaki entah diberu.

Ndube labo banci ipeseri kerina si isingetken Paulus i jenda. Dilaki ras diberu saja erdobahen iakap i bas kegeluhen, apai nari sekalak budak ras tuanna. Enda desken langit ras doni ija sekalak tuan si medolat, janah sekalak budak si meteruk la lit ergana. Tapi kerina si enda enggo bali i bas Kristus. Ertina kerina meherga, kerina erdolat, kerina man kelengen i bas kegeluhenta i babo doni enda.

PENGKENAINA

Bahan PJJ sendah erkawiten ras Sasaran Pelayanan 2025 eme ”Dewasa Menerima Perbedaan.” Menaken tahun enda istilah Sasaran Pelayanan  enda igelari ”Fokus Pelayanan.”

Perbedaan eme pemere Dibata i bas kegeluhenta, subuk beda suku, agama, ras, warna kulit, rsd. Labo ndube si pindo kita jadi kalak Karo entah suku si deban. Janah labo ndube si eteh ija kita tubuh janah ringan itamaken Tuhan i babo doni enda. Sadar kita maka erbage i tepa Dibata curak kegeluhenta. I bas Indonesia enda saja lit 1300 suku, alu lit 718 bahasa daerah ras budaya si pelain-lain.

Kata Dibata enda ngajari kita mulihi gelah ngasup kita ngergai perbedaan si lit i bas kegeluhen, alu la erpengakap maka kita me si mehulina, kita me si mehagana janah natap kalak si deban teruhen asa kita. I bas kinata kegeluhen maka nterem denga anakta lenga erjabu erkiteken la senang orang tua erkiteken ibuatna atena kalak si la sada suku ras kita, padahal sada nge kinitekenta. Pengakap si bagenda enggo sitadingken maka suku kai pe ia, asal seri kinitekenta man Jesus lanai man olang-olangen.

Jenari kerina kalak si la sada kinitekenta pe ras kita tetap ateta keleng man bana bagi Kristus ngekelengi ia. La banci kita ncidahken biak nembeh ate erkiteken la seri kinitekenta. I bas paksa isuratken Bimbingen enda, sangana GBKP Studio Alam Klasis Jakarta Kalimantan enggo kenca dung peletaken Batu Pertama idemo masyarakat sekitar. Si enda tentu la banci jadi i bas kita kalak Kristen sabab biak Kristus ndai nggeluh i bas kita kerina.

DISKUSI :

1. Uga nge dalanna maka banci Rasul Paulus salih carana natap teman manusia kenca ia nandai Jesus Kristus?
2. Cuba turiken, dame nge pusuhndu nggeluh i tengah perbedaan suku tah agama? Tah lit perjabun beda suku tah agama i bas jabunta.

USULEN ENDE-ENDEN:

1. KEE GBKP 368: 1-2
2. KEE GBKP 177: 1-2
3. KEE GBKP 445: 1-
4. KEE GBKP 212: 1, 5