BIMBINGAN PA MAMRE TANGGAL, 10 MEI - 16 MEI 2026

Enggo Ndatken Rahasia Nggeluh

Ogen : Pilipi 4:10-13

10 Mbelin kal keriahen si kugejapken i bas geluhku erkiteken persadanku ras Tuhan. Kenca bage dekahna, lit ka kesempatenndu sekali nari ncidahken maka iperdiatekenndu kap aku.

11 Labo maksudku maka lanai aku iperdiatekenndu, saja lanai kin lit kesempatenndu ncidahkenca. Janah si enda kukataken labo erdandanken kugejap maka aku lanai iperdiatekenndu; sabap aku nggo erlajar encukupken alu kai si lit i bas aku.

12 Kueteh nge kai ertina nggeluh i bas kekurangen, janah kai ertina nggeluh i bas kelebihen. Nggo kudat rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen.

13 Ngasup aku ngalaken kerina keadan erdandanken kuasa si ibereken Kristus man bangku.

Filipi 4:10-13

10 Aku sangat bersukacita dalam Tuhan, bahwa akhirnya pikiranmu dan perasaanmu bertumbuh kembali untuk aku. Memang selalu ada perhatianmu, tetapi tidak ada kesempatan bagimu.11 Kukatakan ini bukanlah karena kekurangan, sebab aku telah belajar mencukupkan diri dalam segala keadaan.

12 Aku tahu apa itu kekurangan dan aku tahu apa itu kelimpahan. Dalam segala hal dan dalam segala perkara tidak ada sesuatu yang merupakan rahasia bagiku; baik dalam hal kenyang, maupun dalam hal kelaparan, baik dalam hal kelimpahan maupun dalam hal kekurangan.

13 Segala perkara dapat kutanggung di dalam Dia yang memberi kekuatan kepadaku.

Tujun : Gelah Mamre :

1. Ngangkai rahasia nggeluh Paulus seh maka ngasup ia tetap ngataken bujur
2. Ngidah kekurangenta sedekah enda ibandingken Paulus dingen tekad guna pekenasa ibas paksa si pas dingen nuriken ketahanen keluarga siarapken kita. Metode : Sharing kelompok

I. KATA PENARUH

Ibas jaman gundari enda, salah sada si jadi tantangen kal man Masyarakat bagepe perpulungenta eme kerna “ketahanen keluarga”. Hampir kerina permasalahen si lit subuk ibas jabu bagepe pinakit sosial mbelin kal kawitenna ras ketahanen keluarga. Mbue kal keluarganta rapuh, la siangkan, la mehuli perdalinenna erkiteken kurangna komunikasi ibas jabu. Nggeluh erbana-bana, la lit diskusi entahpe siajar-ajaren, merangap, la ngasup ngelola kai si lit, enda kerina erbahanca maka jabunta ikenai masalah. Malahen masalah jabu e pe salah sada latar belakang engkai maka sitik ngenca persentasina perpulungenta reh ku gereja. Labo kita ngasup ngenanami keleng ate Tuhan, kurang tempa siakap rusur pemere Dibata e man banta, enda me penggejapenta adi kita nggeluh ndauh sirang ras Dibata. Sanga mbue e meriah ukurta dingen tupung kekuarngen e minter kite berjut, merawa la erturi-turin. Enda biak si labo dewasa, la nggit erlajar arah situasi geluh si lit. Masalah si bagenda tentu arus siujungi, gelah anggota jabunta megegeh ngalaken kerina tantangen, seh maka jabunta menang ibas kerina perbeben nari.

II. URAIAN TEKS

Perpulungen Pilipi megati kal mereken penampat man Paulus khususna tupung ia ibas penjara. Tapi erkiteken piga-piga hal, lanai bagi sindube penampat kalak Pilipi, sempat terhambat piga-piga waktu. Kedungenna ibereken perpulungen enda ka mulihi. Ibas situasi sibagenda me Paulus nuriken ukurna man perpulungen kerna kai siialamina sedekah perpulungen la mereken penampat man bana. Ikataken Paulus maka mbelin kal keriahenna erkiteken persadanna ras Kristus; ija tupung la lit reh penampat perpulungen Pilipi, Paulus erlajar encukupken alu kai si lit ibas ia. Ertina, erkiteken kurangna persediaan erbahanca Paulus erlajar makeken kai si lit ibas ia. Waktu si kekurangen ndai ipake Paulus jadi dalanna erlajar encukupken (managemen) kai si lit.

Erlajar encukupken kai si lit nuduhkenca maka nggeluh labo erpalasken kondisi si teridah, tapi ije lit “pengendalian diri” dingen pengarapen si enteguh man Tuhan. Erlajar encukupken ertina lit ije “ketahanen iman” bagepe “kedewasaan Rohani”. Kata “cukup” ertina bias, la kurang la lebih tapi pas. Cukup biasana labo erkawiten ras jumlah entahpe beligan, sabab cukup labo lit bilangenna. Tapi kata enda lebih menggambarken perasaan entahpe penggejapen. Emaka sigejapken bias adi beluh ngaturken kerina si lit alu payo dingen benar.

Ikataken Paulus maka arah erlajar encukupken si lit ndai, datken Paulus pengajaren si tuhu-tuhu kal meherga eme:

1. Meteh kai ertina nggeluh ibas kekurangen dingen kai ertina nggeluh ibas kelebihen. Pembelajaran arah situasi si lit erbahanca Paulus mengerti erti kekurangen, ija paksa sie ia arus tetap mengandalken Tuhan guna encukupuni keperlun geluhna. Alu bage kekurangen e erbahanca nggeluh reh rembakna ras Dibata. Adi paksa kelebihen, ietehna ka ertina eme gelah ngasup ia ngataken bujur man Tuhan. Janah memang adi pernah inanami kekurangen nge maka ieteh ka lit paksana kelebihen.
2. Ndatken rahasiana kekurangen ras kelebihen seh maka malem atena ibas kerina situasi subuk kekurangen entahpe kelebihen. Adi enggo idatken rahasiana kelebihen entah kekurangen tentu enggo banci inanami kiniulin ibas kerina situasi. Rahasiana kal eme ija Dibata pasti mereken kecukupen man kerina anak-anakna.
3. Ngasup ngalaken kerina keadaan erkiteken kuasa siibereken Kristus. Erkiteken pengajaren nggeluh si lit erbahanca Paulus tetap semakin dewasa secara Rohani, ngasup ngaturken kerina situasi, janah enda erbahanca ia ngasup ngalaken kerina keadaan sebab Dibata jine mereken kuasa man bana.

Pelajaren siilakoken Paulus enda erbahanca ia reh dewasa ibas kiniteken, ngasup ia menata pusuhna kerna keperlun ras sura-surana, beluh ia encukupken diri arah kai si lit. Lebih asa sie, idatkenna rahasiana nggeluh ibas kekurangen dingen nggeluh ibas kelebihen, erkiteken sie katawari paksa pe malem atena. Janah man kalak si enggo dewasa ibereken Kristus ka kuasa guna ngalaken kerina keadaan, kalak si bagenda me siikataken “memiliki ketahanen”. Ertina tahan ia nandangi kerina keadaan, la ia terpengaruh lingkungen aminna pe melala tawaren entahpe godaan ibas situasi sulit.

III. PENGKENAINA

“Sitik pe bias, mbue pe kurang” eme salah sada filosofi kalak Karo si nuduhken maka kiniliten e labo erbias-bias adi la kin ikelola alu payo ras mehuli. Adi lit lalap penggejapen kurang tentu mesera kal kita ngataken bujur man Tuhan. Janah perasaan sibagenda rupana banci mabai anggota jabunta salah Langkah; umpamana terjadi perselingkuhen ras kalak sibanci mereken erta. Anak-anakta erteman ras dilaki si enggo erjabu gelah datken barang-barang si meherga. Erkiteken sie, perlu kal kita erlajar arah Paulus, erlajar ia arah kai si lit ibas ia. Tupung sitik reh penampat, eme ipebias-biasna janah tetap ia mengandalken Tuhan ibas nehi keperlunna. Emaka lanai bo ia menuntut nandangi perpulungen sideban gelah tersehi keperlunna. Ia rusaha mbangun dirina, siugapa pe tahan ia nggengkenca. Enda me si perlu kal siumban, si ajuklah keluarganta gelah erlajar mengelola (ngaturken) kai si lit dingen erlajarlah encukupken arah kai si lit e. Alu bage reh dewasana kerina anggota jabunta ibas ngalaken kerina keadaan, la murah rapuh, goyah tah pe terpengaruh nandangi perkembangen jaman enda. Mbuelah erlajar gelah si datken rahasiana, ija Dibata pasti nemani ras mpekena-kena geluhta ibas kerina situasi.

IV. DISKUSI

1. Menurutta kai nge maksudna “enggo ku datken rahasiana nggeluh ibas kekurangen ras ibas kelebihen?”
2. Uga nge caranta gelah banci ndatken rahasia nggeluh ibas kekurangen ras nggeluh ibas kelebihen gelah ibas katawari paksa pe dat kita kemalemen ate?

USULEN ENDE-ENDEN :

1. KEE GBKP No 320: 1, 2
2. KEE GBKP No 273: 1, 3
3. KEE GBKP No 424: 1
4. KEE GBKP No 15 : 1 (Persembahen)

Pdt. Liza Selvina Br. Tarigan, S.Th.