Bahan PJJ 10 – 16 Mei 2026

NGGELUH RIKUTKEN SI NGENA ATE DIBATA

Ibrani 12: 3 – 11

12:3 Ingatlah selalu akan Dia, yang tekun menanggung bantahan yang sehebat itu terhadap diri-Nya dari pihak orang-orang berdosa, supaya jangan kamu menjadi lemah dan putus asa.
12:4 Dalam pergumulan kamu melawan dosa kamu belum sampai mencucurkan darah.
12:5 Dan sudah lupakah kamu akan nasihat yang berbicara kepada kamu seperti kepada anak-anak: “Hai anakku, janganlah anggap enteng didikan Tuhan, dan janganlah putus asa apabila engkau diperingatkan-Nya;
12:6 karena Tuhan menghajar orang yang dikasihi-Nya, dan Ia menyesah orang yang diakui-Nya sebagai anak.”
12:7 Jika kamu harus menanggung ganjaran; Allah memperlakukan kamu seperti anak. Di manakah terdapat anak yang tidak dihajar oleh ayahnya?
12:8 Tetapi, jikalau kamu bebas dari ganjaran, yang harus diderita setiap orang, maka kamu bukanlah anak, tetapi anak-anak gampang.
12:9 Selanjutnya: dari ayah kita yang sebenarnya kita beroleh ganjaran, dan mereka kita hormati; kalau demikian bukankah kita harus lebih taat kepada Bapa segala roh, supaya kita boleh hidup?
12:10 Sebab mereka mendidik kita dalam waktu yang pendek sesuai dengan apa yang mereka anggap baik, tetapi Dia menghajar kita untuk kebaikan kita, supaya kita beroleh bagian dalam kekudusan-Nya.
12:11 Memang tiap-tiap ganjaran pada waktu ia diberikan tidak mendatangkan sukacita, tetapi dukacita. Tetapi kemudian ia menghasilkan buah kebenaran yang memberikan damai kepada mereka yang dilatih olehnya.

Heber 12: 3-11

12:3 Ukurilah kuga belinna kiniseran Jesus ngalaken perlawanen si rehna i bas kalak perdosa nari. E maka ola kitik ukurndu, dingen ola kam putus asa.
12:4 Sabap i bas kam erbebe ngelawan dosa langa kam seh ngamburken dareh.
12:5 Lanai kin ingetndu pengajaren si ikataken Dibata man bandu selaku anak-anakNa? “O anakKu, perdiatekenlah adi iajarken Tuhan kam, janah ola kitik ukurndu adi irawaiNa kam. 

12:6 Sabap iajarken Tuhan kalak si ikelengiNa, janah iligasNa tep-tep kalak si ialokenNa jadi anakNa.”

12:7 Gengkenlah kiniseran si reh man bandu. Alokenlah e bagi ajar i bas sekalak bapa nari, sabap kiniseranndu e ncidahken maka ibahan Dibata kam bagi anak-anakNa. Lit kin sekalak anak si la ididik bapana?
12:8 Adi la kam iajarken bagi anak-anakNa si deban, labo kam anak si sah, tapi anak haram.
12:9 I doni enda lit bapanta. Bapanta e ndidik kita, janah mehamat kita man bana. Adi bage tentu arus pe lebihen sibahan nandangi Bapanta si i Surga, gelah kita nggeluh.
12:10 Bapanta si i doni enda kentisik ngenca kita iajarkenna, bagi mehuli iakapna. Tapi kita iajarken Dibata guna kiniulinta, gelah banci kita dat bagin i bas kebadianNa.
12:11 Asum kita iajarken, ceda ateta, la siakap meriah. Tapi dungna, kita si enggo terdidik, pengajaren e erbahanca kita nggeluh rikutken si ngena ate Dibata, seh maka malem ateta.

(Tata Nilai Kejujuran)

MODEL PJJ: KESAKSIN

 KATA PERLEBE

Ngerana kerna kiniseran, berarti kita ngerana kerna kinata kegeluhen manusia, subuk nguda ntah pe metua, si langa erjabu bage pe si enggo erjabu, si enggo erdahin ntah pe si langa erdahin rikut si sekolah denga. Sabab banci ikataken maka tep- tep jelma baik secara pribadi ntah pe persadan (komunitas) la sada pe pulah i bas ngenanami kiniseran ntah pe perbeben. Saja tentu si mbedakenca e me cara ntah pe sikapta i bas ncibalken kegeluhen enda tupung reh kiniseran e, alu kiniseran/perbeben si seri tapi banci jadi beda cara manusia ‘menyikapi’sa. Enda me si jadi perenungenta sendah i bas er-PJJ.

ISI

Adi si perdiatken turi-turin perdalanen kalak Kristen i bas Pustaka Si Badia, maka kiniseran enggo me jadi ayam-ayam kegeluhen erkiniteken man Tuhan Jesus, bahkan Tuhan Jesus pe nggo mpesikap ajar-ajarNa ndube maka kalak si erkiniteken man baNa e bali bagi biri-biri itengah-tengah serigala (Mat. 10:16). Erbage-bage kiniseran ialoken kalak Kristen: penolakan, penyiksaan, bahkan seh ku ngamburken dareh bage engkorbanken kesah (Kisah Istepanus: Perb. 7:54-60).

Bage pe si jadi oratenta sendah, maka si nulisken surat Heber sangana mereken pengapul, pergegeh rikut pengelayasi kerna kecibal geluh si sangana idalani kalak Kristen, erkiteken kalak Kristen si sangana ngenanami kiniseran si mesangat. Gelahna banci kalak Kristen si sangana ngaloken kiniseran si mesangat e tetap paguh, nteguh, semangat ras tetap erlayas ukurna. Penulis kitab Heber enda, ngelakoken pendekaten sue ras konteks kegeluhen Tuhan Jesus. Segelah kalak Kristen si sangana ngenanami kiniseran si mesangat la “terlarut/ terhanyut” ntah pe gedap i bas kiniseran si sangana inanamina, maka penulis kitab Heber enda mabai perpulungen e gelah banci mulih ngenen kegeluhen si enggo idalani Kristus. Isingetken maka Kristus si jadi teladan kiniteken (iman) kalak Kristen saja pe mbelin ras mesangat kal ngaloken perlawanen i bas kalak perdosa nari, la terjeng perlawanen bahkan si arus idalani Kristus e me ngamburken dareh (kesahNa pe berekenNa).

Alu mulihi ningetkenca man kalak Kristen kerna uga kecibal kegeluhen Kristus ndube tupung Kristus nggeluh idoni enda, iarapken lanai erbahan kitik ukurna (kiniseran e banci mpeturah ukur si negatif seh maka banci ncedai kiniteken), tapi iarapken banci mpeturah ntah pe mereken pengertin si mbaru kerna kiniseran si sangana ialoken kalak Kristen e. Kalak Kristen ibabai guna nginget kerna kai si nggo pernah ikataken Tuhan maka kalak si ikelengi Tuhan e pasti iajarkenNa, iligasNa (Jop. 5:17, Kua. 3:11-12), ntah pe bagi si isingetken Kristus i bas Markus 8:34, nina : “…., Ise atena ikut ras Aku, arus maka ipersilahangna bana, ipersanna kayu persilangna jenari iikutken Aku”. Bali bagi sekalak bapa si ngajarken man anak-anakna. Tentu cara bapa ngajarken man anak-anakna banci alu erbage cara ras dalan (Misal: la kerina pemindon anak e ibereken, mereken tantangen ras usihen), bage ka kepe Bapata si i Surga tentu i bas ngajarken man anak-anakna pe alu erbage cara. Alu bage maka banci si kataken maka penting kal mpelimbarui perukuren rikut ras penggejapen kerna kiniseran e, e me Dibata nuduhken tanda keleng ateNa alu cara si berbeda. Arah renungenta enda pe ituriken maka proses pengajaren si ibereken Dibata man manusia la erbatas, la bali bagi bapa si i bas doni enda, maka lit nge masana, lit ngen waktuna. Tentu si e kerina erkiteken kalak Kristen arus tuhu-tuhu ipersiapken jadi kalak Kristen si tangguh, paguh ras tentu saja ‘setia sampai akhir’, sabab man kalak si bertahan i bas kiniseran si atan ndatken bagin kebadianNa (ay. 10). Memang tentu la menukah ndalanken si e kerina, turah aru ate, latih, tentu la siakap meriah sabab la bagi ukurta. Tapi sada kepastian “kapal laut yang tangguh bukanlah waktu sandar di pelabuhan, tapi ketika berlayar menerjang ombak dan badai dan akhirnya tiba di pelabuhan tempatnya bersandar dengan selamat”. Alu bage maka kalak si enggo terdidik saja me si ngasup ngaloken pengajaren kegeluhen amin gia situasina la bagi ukur, mpeturah keguluten bage pe aru ate. Adi kalak Kristen si tangguh, paguh ras la ‘cenggeng’ me si ngena ate Dibata. mari si inget mulihi pesan Rasul Paulus i bas 1 Korinti 10:13, nina: “Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah”.

PENGKENAINA

Tema PJJta ngataken “Nggeluh Rikutken Si Ngena Ate Dibata”, ngajuk kita segelah tetap ngasup berfokus ndalanken misi Dibata arah geluhta, amin gia sekali jadi melala kiniseran si man alanken. Sabab alu kiniseran si ialoken kita me maka banci si ukur kualitas kinitekenta, bagi ndatken emas si murni arus maka isepuh alu api, maka kiniteken pe gelah banci murni arus isepuh (bdk. 1 Pet. 1:7). Salah sada perjuangen kalak Kristen eme uga maka kegeluhenna idemi alu kejujuren janah adi si hubungken ku renungenta enda maka nilai kejujuren si arus ituduhken e me la kita mela / la kita mbiar ncidahken identitas maka kita kalak Kristen, kalak si tek man Kristus. Adi si idah gundari enda banci jadi nterem kalak si nutup-nutupi identitasna selaku kalak Kristen bahkan la terjeng si e saja, nadingken Kristus pe nterem (mersoken Tuhan Jesus gelah ndatken pendahin, nadingken Tuhan Jesus erkiteken teman geluh, rsd).

Banci jadi memang tupung kita nuduhken ras mpertahanken kinitekenta i bas ngikutken Kristus melala sialoken kiniseran, perbeben ras penolakan, maka situhuna kita sangana mbengket ku proses si idalani Tuhan Jesus (bagi nina Paulus i bas Pilipi 3:10-11, “Sada ngenca sura-surangku e me gelah kutandai Kristus dingen kugejap kuasa KekekenNa janah ikut aku ngenanami kiniseranNa, dingen bali ras Ia i bas kematenNa, alu pengarapen maka aku ipekeke Dibata i bas si mate nari ku kegeluhen) ras labo si tuhuna man kebiarenken tapi arus maka tetap kita berdisiplin diri alu mpersadaken dirita ras Dibata segelah si aloken gegeh ras kuasa i bas Dibata nari, sabab alu gegeh ras kuasa i bas Kristus nari nge maka kai pe kiniseran, perbeben ras kesusahen e ngasup kita ngalakenca (Pil. 4:13).

Tugu Jaung I Tiga binanga
Meluk-Eluk Dalan Ku berastagi
Melala Jumpa Gia Perbeben Bas Geluhta
Tuhan Jesus Tetap Singkelini

Buluh Awar Benana Berita Si Meriah
Berita Si Meriah Seh Ku Kerina Kuta
Gia Melala Si Erbahan Si Kita Susah
Man Tuhan Jesus Ola Pernah Lupa

DISKUSI :

1. Menurut penggejapenndu, uga nge pengertinna ayat 11?
2. Turiken komitmenndu ndalanken si ngena ate Tuhan subuk si man pekenan bage pe si man tingkatenken, alu sada kalimat. Asa bancina kerina ngerana.

USULEN ENDE-ENDEN:

1. KEE GBKP 75: 1, 3 Tetapkenlah Ukurta
2. KEE GBKP 275: 1 – 3 Kam Tuhan sekawalku
3. KEE GBKP 320: 1 – 2 Susah entah senang gia