Nandai Kesah

BIMBINGAN PA SAITUN GBKP TAHUN 2026

TANGGAL, 10-16 Mei 2026

Ogen : Johanes 14:26

Ipadanken Jesus kerehen Kesah Si Badia

Indonesia:

[26] tetapi Penghibur, yaitu Roh Kudus, yang akan diutus oleh Bapa dalam nama-Ku, Dialah yang akan mengajarkan segala sesuatu kepadamu dan akan mengingatkan kamu akan semua yang telah Kukatakan kepadamu.

Karo:

[26] Si nampati, e me Kesah Si Badia, si isuruh Bapa pagi i bas gelarKu, iajariNa kam kerna kai pe; dingen ipersingetiNa kam pagi kerna kerina si enggo Kukataken man bandu.

Tema: Kesah Badia Si Nampati Kita

Tujunna:

Gelah Saitun:

1. Meteh engkai maka Dibata nuruh Kesah Sibadia nempati kita

2. Ngejapken maka I bas kekotenna pe lit Kesah Si badia sinampati

Metode : Studi kasus

I. BENA KATA

Manusia sebage tinepa Dibata labo ngasup ndalani kegeluhenna sendiri aminna gia itepa sentudu ras tempas Dibata. Sebage makhluk si itepa arah abu taneh nari, sadar maka lit nge kuasa/gegeh iluar dirina si banci akapna nampati ia i bas erbage-bage perbeben geluhna sini igelari e me "dibata" (bd. agama pemena nininta). Tapi i bas kenyatanna maka labo kepe terarapken penampat i bas dibata-dibata e nari. Erdadanken si e me maka perlu kal kita si banci nampati kita si la lit ersibar i bas Ia, si la ibatasi ruang ras waktu eme Kesah Si Badia si isuruh Dibata lako namapati kita.

II. MPEGESI OGEN

Arah bahan PA nta wari enda tangkas si idah maka Jesus enggo erpadan lako nuruh Kesah Si Badia si jadi penampat bage pe guna ngajari kalak si tek gelah meteh ras nggeluh sentudu ras kai si enggo iajarken Tuhan Jesus. Ijenda banci si idah piga-piga peran Kesah Si Badia man banta e me :

- Sebage penampat: kenca Tuhan Jesus nangkih ku surga, maka reh me Kesah Si Badia si jadi penampat/penghibur ( parakletos) si tetap nemani kalak si tek.

- Sebage pengajar: Kesah Si Badia e me singajari kerinana guna keselamaten, persadan ras Tuhan bage pe ndahiken dahin pelayanen.

- Mpersingeti kerna Kata Dibata: arah penampat Kesah Si Badia e maka kita ipersingeti mulihi kerna kai si enggo iajarken Tuhan Jesus.

- Mereken dame sejahtra: i bas ayat 27, tanmgkas si idah maka Jesus mereken dame sejahtra si berbeda ras sini bereken doni enda.

Jadi penampat si isuruh Dibata nampati kita ngelebihi asangken kai si iukuri ras ipindo kita. Selaku Bapa, Dibata ngidah kai si iperluken anak-anakNa. Janah kerina si ilakoken Dibata arah pendahin Kesah Si Badia eme guna kiniulin ras keselamaten anak-anakNa.

Jadi penampat si isuruh Dibata nampati kita ngelebihi asangken kai si iukuri ras ipindo kita. Selaku Bapa, Dibata ngidah kai si iperluken anak-anakNa. Janah kerina si ilakoken Dibata arah pendahin Kesah Si Badia eme guna kiniulin ras keselamaten anak-anakNa.

III. PENGKEΝΑΙΝΑ

1. Dibata selaku Bapanta labo sinik nandangi anak-anakNa si sangana i bas perbeben ras kiniseran. Tanda keleng ateNa isuruhNa Kesah Si Badia reh guna nampati kita. Kesah Sibadia si nampati kita enggo leben ietehNa kecibalnta ope denga kita mindo pe man baNa. Tapi iberekenNa kesempaten man banta mindo nuriken isi pusuhnta gelah kita tuhu-tuhu tek dingen ernalem man baNa si ngasup nampati kita.

2. Kalak si man sampaten maka tanna arah teruh ertina ipeterukna bana, maka tuhu-tuhu perlu kala ia isampati maka jore sikerajangenna. Alu bage asa ndigan pe kita adi mindo penampat man Kesah Si Badia ula sipaksaken bagi sura -suranta Sicidahkenlah alu ukur simeteuk, bersih ras tujunna pe mehuli maka sipindo.

IV. PERTOTON

Bujur Tuhan la kepe ipelepasndu kami si sada ndalani kegeluhen kami i babo doni enda. I bas kekoten kami sampatindulah, janah ipermuliaken kami Kam arah kerina perbahanenNdu simbelin si enggo icidahkenNdu man kami arah kerina dampar kegeluhen kami. Erkiteken Tuhan Jesus kami ngataken bujur man baNdu Amin.

V. STUDI KASUS

Nande ate sangana gulut ukurna erkiteken anakna si sidilaki si tergelar Keng itahan polisi kasus narkoba. Alu segala cara I upayakenna al. Nogok ras ndarami "Kalak siberpengaruh" guna mulahi anakna ibas tahanen polisi maka ula she ibaba ku pesrsidangen. Alu percaya diri idahina pendeta guna mindo itotoken anakna gelah banci pulah. Ope ertoto iturikenna me man Pendeta kai kai saja siilakokenna gelah anakna banci bebas eme alu nogok ras ndarami "kalak berpengaruh". Tapi ope ertoto Pendeta sempat ngerana maka erkiteken perbahahen anakna si "Keng "e entah perlu nge ndatken pembelajaren, gelah sadar ras jera ia, ula mis ipulahi. Tapi teridah ayo nande Ate bagi kurang senang e. Apalagi sanga I bas Pdt ibas toto tetap nge I sengetken Pdt gelah si "Keng "banci robah bagepe galeh peraten Tuhan saja si jadi. Mulih rumah Pdt nari Nd Ate berjut ayona sebab labo bage min ndai atena siarapkenna.

VI. POKOK DISKUSI:

1. Menurut kam penampat si kuga nge si perlu sibereken man Nd Ate i bas kasus anakna e?

2. I bas kasus sibagenda rupana uga siakap sipayona penampat Kesah Si Badia si iarapken kita ?

VII. ENDE-ENDEN

1. ΚΕΕ 197:1,3

2. KEE 118:1,2

3. KEE 151:1,2

4. KEE187:1,3

Pdt.Rehpelita Ginting