Nampati

BIMBINGAN PA SAITUN GBKP TAHUN 2026

TANGGAL, 24-30 Mei 2026

Ogen : Galatia 6:1-6

Sisampat-sampatenlah i bas maba baban nggeluh

Indonesia:

[1] Saudara-saudara, kalaupun seorang kedapatan melakukan suatu pelanggaran, maka kamu yang rohani, harus memimpin orang itu ke jalan yang benar dalam roh lemah lembut, sambil menjaga dirimu sendiri, supaya kamu juga jangan kena pencobaan.

[2] Bertolong-tolonganlah menanggung bebanmu! Demikianlah kamu memenuhi hukum Kristus.

[3] Sebab kalau seorang menyangka, bahwa ia berarti, padahal ia sama sekali tidak berarti, ia menipu dirinya sendiri.

[4] Baiklah tiap-tiap orang menguji pekerjaannya sendiri; maka ia boleh bermegah melihat keadaannya sendiri dan bukan melihat keadaan orang lain.

[5] Sebab tiap-tiap orang akan memikul tanggungannya sendiri.

[6] Dan baiklah dia, yang menerima pengajaran dalam Firman, membagi segala sesuatu yang ada padanya dengan orang yang memberikan pengajaran itu.

Karo:

[1] O senina-seninangku, adi lit sekalak si terdat ersalah, kam si nggeluh rikutken Kesah Si Badia arus min negu ia alu manjar-anjar gelah mulihken ia ku dalan si mehuli. Janah jagalah dirindu sekalak-sekalak sabap kam pe banci ka nge kena percuban.

[2] Sisampat-sampatenlah kam i bas maba baban geluh enda. Alu bage isehkenndu kap Undang-undang Kristus.

[3] Adi lit kalak erpengakap maka ia mehaga, tapi kai pe ia lang, itipuna me bana.

[4] Sekalak-sekalak arus nguji lagu langkahna jine. Alu bage banci megah akapna kerna dirina jine alu la mbanding-mbandingken dirina ras kalak si deban.

[5] Sabap sekalak-sekalak simaba babanna nge. [6] Kalak si ngaloken pengajaren Kristus arus iraskenna kerina si mehuli si lit i bas ia ras guruna.

Tema: Sampatilah Kalak bagi Arusna

Tujunna:

Gelah Saitun:

1. Meteh maka nampati kalak sideban eme perentah Tuhan

2. Meriah ukurna ibas nampati kalak sideban sue ras keperlunna

Metode: Diskusi ras Aksi

I. BENA KATA

Adi siperdiateken biak-biak rikut ras perbahanen bas kegeluhennta banci iumpamaken geluhta enda bagi kalak seluk/ kesurupen, bagi megati si idah i bas "Kuda Gepang". I bas penampilenna lit musik Jawa ras lit piga-piga kalak landek Jawa, si kedungenna kari ia seluken. Kenca ia seluken, teridah sikapna mirip ras sikap roh si neluki ia. Adi ia iseluki roh bengkala, maka sikapna mirip ras bengkala. Adi ia iseluki roh babi bagi babi ka me ia. Ertina adi roh dosa si dekah denga kin si negu-negu pusuh ras geluh jelma e, maka perukuren, pengerana ras perbahanenna pe perbahanen si nggesuh denga kerina. Tapi adi Kesah Si Badia e nggeluh i bas manusia, maka subuk perukuren, pengerana ras perbahanenna pe enggo ka erbuahken Buah Kesah Si Badia, e me: kekelengen, keriahen, kemalemen ate, kesabaren, erbahan si mehuli, mehuli ia, setia, meteruk rukur ras ngasup menguasai diri. (Gal.5:22-23).

II. MPEGESI OGEN

Kalak Kristen si nggeluh rikutken pimpinen Kesah Si Badia, janah teridah buah Kesah Si Badia si siwah e bas geluhna: teridah bas perukuren, pengerana ras perbahanenna si mehuli, dem kekelengen ras meteruk ukur man ise pe.

Bage pe selaku kalak si enggo leben ikelini Dibata, tentu meriah ukurna guna nampati kalak. Mbue damparna bas kegeluhen enda banci kita sisampat-sampaten i je. Contohna:

1. Adi lit temanta si ersalah, maka banci ia si sampati alu mabai ia ku dalan si payo, janah adi kita ka pagi ndabuh, temanta e ka si negu kita.

2. Bage pe adi lit temanta si lepak perbahanenna, sialemi ia janah sialoken ia uga litna, e pe enggo termasuk nampati.

3. E maka bas nggeluh si sampat-sampaten enda, mbue carana e maka si sehken rikutken perluna bas temanta; umpamana: nampati materi, ngelayasi pusuh ras ukur, nehken pengapul, mereken pergegeh ras sidebanna.

Adi geluh si bage si dalanken, enggo kita sisampat-sampaten, sikeleng-kelengen alu bage enggo kap si dalanken Undang-undang Kristus. I bas kita sisampat-sampaten perlu kal kita meteruk rukur, mediate ras kepate alu la ngarapken simulih. Perlu ka nge kita nguji bana ras nandai dirinta jine, gelah ula si nilai man banta lebih asa patutna. Janah ajar-ajar Kristus arus min lit biak Gurunta e i bas kita, e me la egois, tapi biak berbagi ras teman bage pe ras gurunta si ngajari kita.

IV. PENGKENAINA

Payo, adi Kesah si Badia si negu geluhta, pasti nge kita sikap Siakap nehken penampat ku situasi sekelewetta. Saja dekahen denga maun-maun kita itegu kesah doni enda, seh maka kumat egonta, piah lanai nampati. Bagi megati Ikataken, di mana ada gula disitu ada semut, tempa gula e erjodoh ras perkis. Bage me pe kerna Kata Dibata ras Kesah si Badia. Ija alu tutus iorati Kata Dibata, i je hadir Kesah Si Badia. Pengarapen sibagenda me sipebelin ibas Saitun, nggeluh rikutken pendahin Kesah Si Badia e, mediate kita nandangi situasi kegeluhen temanta, bas kai ia perlu isampati, ersikap kita guna si e. Bagi pernah jadi sada diskusi bas Gerejanta GBKP, maka kerina nge kepe manusia enda lit kemusilenna. Lit deba melala senna, tapi la ka ia jumpa tuah, e ka kemusilenna. Lit ka si melala ia dat tuah bas jabu, tapi mesera ka baban geluhna. Lit deba meganjang sekolahna, lit senna, tapi pelit ka kal biakna, rsd. Jadi kita banci nampati rikutken kecibal temanta masing-masing.

Bage pe bas tengah-tengah jabunta anak, kela, permen ras kempu terus ku ententa, banci kita muat bagin nehken penampat rikutken kemusilenna masing-masing. Bage me kari sikembangken ku sangkep geluhta, gereja ras masyarakat.

V. PERTOTON

Bujur Tuhan enggo reh tangkasna pengidah kami kerna erbage-bage kemusilen manusia guna banci kami muat bagin nehken penampat rikutken perluna. E maka Kesah si Badia e min tetap si negu-negu kegeluhen kami, gelah ngasup kami mereken penampat man sekelewet kami rikutken perluna. Pake kami amin gia bas keterbatasen kami. Amin.     

VI. DISKUSI

1. Kai nge rusur rongketna maka la ringan ras erdahin Kesah si Badia e i bas geluhta ?

2. Rikutken pengalamen bas geluhta, apai nge malemen ate bas kita muat bagin bas nampati asangken ngelak kita bas nampati e ? Turiken!

VII. USULEN LAGU

1. KEE No. 282:1-2.

2. KEE No. 175:1-2.

3. KEE No. 257:1-2.

4. KEE No. 302:1-3.

Pdt. Kongsi Kaban