Ertoto

BIMBINGAN PA SAITUN GBKP TAHUN 2026

TANGGAL, 31 Mei-6 Juni 2026

Ogen : Matius 26:36-39

Jesus ertoto i Peken Getsemane

Indonesia:

[36] Maka sampailah Yesus bersama-sama murid-murid-Nya ke suatu tempat yang bernama Getsemani. Lalu Ia berkata kepada murid-murid-Nya: ”Duduklah di sini, sementara Aku pergi ke sana untuk berdoa.”

[37] Dan Ia membawa Petrus dan kedua anak Zebedeus serta-Nya. Maka mulailah Ia merasa sedih dan gentar,

[38] lalu kata-Nya kepada mereka: ”Hati-Ku sangat sedih, seperti mau mati rasanya. Tinggallah di sini dan berjaga-jagalah dengan Aku.”

[39] Maka Ia maju sedikit, lalu sujud dan berdoa, kata-Nya: ”Ya Bapa-Ku, jikalau sekiranya mungkin, biarlah cawan ini lalu dari pada-Ku, tetapi janganlah seperti yang Kukehendaki, melainkan seperti yang Engkau kehendaki.”  

Karo:

[36] Jenari seh Jesus ras ajar-ajarNa ku sada ingan si igelari Getsemane. Nina Jesus man ajar-ajarNa, “Kundul kam i jenda, Aku ertoto lebe ku jah.”

[37] Petrus ras duana anak Sebedeus ibabaNa. Paksa e ceda ate Jesus dingen getem kal pusuhNa.

[38] E maka nina man ajar-ajarNa si telu kalak e, “Ceda kal ateKu perbahan Kugejap maka Aku nandangi mate. Timai i jenda janah erjaga-jagalah ras Aku.”

[39] Lawes Jesus terdauhen sitik nari, i je erjimpuh IA jenari ertoto man Dibata nina, “O Bapa, adi banci buat min calung kiniseran enda i bas Aku nari. Tapi labo peratenKu, peratenNdulah jadi.”

Tema: Labo Peratenku Bapa, Peratenndu Jadilah

Tujunna:

Gelah Saitun:

1. Banci nuriken kai sababna maka Jesus ertoto i Peken Getsemani

2. Setia ertoto kerna kecibal geluhna subuk ibas keriahen perbeben

Metode: Diskusi ras Aksi

I. BENA KATA

Pernah kin jadi si la bagi ukur ibas geluhndu? Tentu apai pe kita enda pernah ngenanami situasi la bagi ukur. Lit sekalak pernanden si minem racun perban tubuh anakna la sempurna/tuna netra, lit ka sekalak perbapan ndelis atena perban usahana bangkrut, lit sekalak anak perana mabuk-mabuken ia lalap perban kecewana putus cinta, janah lit ka sekalak lansia, erndele ate perban anak-anakna sibuk kerina seh maka lanai lit si mperdiatekensa ras mbue denga kal situasi-situasi sidebanna. Kerina manusia, ise pe ia, nguda entah pe metua, entah kai pe jabatenna tentu pernah nggejapken kecewa, sedih, merawa ras pe er-aru ate tapi cara guna ngalakenca tentu tergantung kedewasaan kinitekennta masing-masing. Arah ogennta sekali enda kita iajuk guna ercurmin man Jesus, uga Tuhan Jesus ngalaken perbebenNa.

II. MPEGESI OGEN

Bas ogenta enda ituriken kerna Jesus ertoto i Peken Getsemani, isuruh Jesus me ajar-ajarNa kundul nimai IA ertoto. Paksa si e ajar-ajar si ibaba Jesus eme Petrus ras duana anak Sebedeus, jenari niNa Jesus "ceda kal ateku..." (ay.38) nuduhken isi pusuh Jesus. Biasana sigejap ceda ateta, erkiteken kematen kalak sinikelengi, tapi ijenda Tuhan Jesus labo erceda ate erkiteken lit kalak sinikelengiNa mate, tapi si erbanca Tuhan Jesus erceda ate eme erkiteken kematenNa jine. Enggo ietehNa IA nandangi mate, sisi kemanusian Jesus nggejapken rasa mbiar janah adi banci ipedauh Dibata min kiniseran e, tapi amin bage gia Jesus la lupa nandangi misi-Na ku doni enda dingen la IA nggit nundalken tanggungjawabNa. Emaka IA ertoto man Dibata, guna mpeteneng pusuhNa, seh maka la sekali dua kali saja ngenca IA ertoto tapi seh telu kali janah ibelaskenNa "adi banci Tuhan, buat min calung kiniseran enda bas Aku nari, tapi labo peratenku jadi, peratenNdu jadilah" teridah ije maka ibas paksa mbiar pe ngasup denga Jesus erpengendes man Dibata. Jesus ngalaken situasi e alu tetap ngutamaken peraten Dibata, amin pe secara manusiawi situhuna getem kel nge pusuhNa, seh maka panasNa naktaken ku taneh bagi taktak dareh. Tupung Jesus erbebe ibas pertotonNa kai sinilakoken ajar-ajarNa? Ajar-ajar e tertunduh padahal sada jam ngenca ia isuruh erjaga. Adi lit kalak banci tunduh la pe bas rumah e tandana la lit beban ukurna, memang tuhu ajar-ajar e la ngangka situasi Jesus, amin gia enggo ituriken Jesus kerna kecedan ateNa janah enggo ka pe rulih-ulih ibelaskenNa kerna kematenNa nandangi seh, tapi la iangkai ajar-ajar e. Keadaan e nuriken maka ibas situasi Jesus, la lit sada pe ajar-ajar e si ngapuli IA, dingen la lit si ngangkai perbebenNa.

IV. PENGKENAINA

Arah ogenta enda isingetken kerna pentingna ertoto. Tuhan Jesus saja pe Anak Dibata si erkuasa, bas ngalaken situasiNa ertoto nge IA, uga kita? Enggo nge kita ertoto ngataken bujur man Tuhan tep-tep medak kenca erpagi-pagi? Entah minter keke saja sidadap dahinnta? Ula siakap sia-sia waktunta ertoto, sebab adi la kita ertoto pusuhnta enda ikuasai iblis, erban kita merawa-rawa ras lanai beluh rukur mehuli apai ka adi lit situasi la bagi ukurta, reh ndauhna kita ras Tuhan reh gelapna me pusuhta. Inget kata persinget rasul Paulus man perpulungen Tesalonika gelah perpulungen e ertoto katawari pe janah katakenna bujur man Dibata bas sikugapana pe (1 Tes. 5:17-18) sabab guna mpertahanken kiniteken mbue kal tantangen ras godaan si reh ngambati. Memang, labo asal nggo ertoto kerina perbebennta minter beres, sebab labo seri peraten Tuhan ras peratennta manusia tapi alu ertoto Kesah Tuhan erdahin bas pusuhnta guna mpetetap ukurta. Teklah maka teptep perbeben lit Tuhan si nemani ras nikapken rancangen si terulin. Bagi pernanden si anakna tubuh la sempurna ndai, labo ietehna maka kepeken enggo irancang Dibata rancangen si mehuli man bana ras anakna, ija kenca mbelin anakna ndai lit talentana rende, jadi penyanyi terkenal. Perbapan si atena ndelis ndai, ise metehsa maka kepeken nggo isikapken Tuhan rejeki arah usahana sideban, anak perana si mabuk-mabuken ndai ise metehsa kepeken lit sekalak teman geluh mejile ras mehuli isikapken Tuhan man bana. Bagepe sekalak lansia ndai, ise metehsa maka kesibuken anak-anakna ndai kepeken bekas totona nge, totokenna anak-anakna gelah sukses kerina, ndatken pendahin, lancar usahana, emaka enggo sibuk kerina. Dage, mari Saitun tetap erpengendes man Tuhan. Sabab Tuhan meteh kai si mehuli guna isehkenNa man banta, janah labo banci beluhen kita asangken Tuhan, dingen labo banci ganjangen kita asangken Tuhan. Ibas paksa si la bagi ukur gia getem pusuhta, ingetlah maka rancangen Dibata eme kap rancangen dame sejahtera. Umur si gedang eme kesangapen si ibereken Tuhan dingen buk si mentar eme mahkota, dage mari terus ngataken bujur man Tuhan. Jadikenlah Tuhan ingan penalemennta ibas ngalaken kerina situasi, gelah perukurennta pe iterangi Dibata. Adi lit anggota jabunta si la bagi ukurta, si erbanca kita la si periahen subuk ras anak, teman geluh, cimbang, senina, turang ras sidebanna, mari sibaba bas pertoton, turiken kecedan ateta man Tuhan sebab bas IA lit kap serpang pulah, si penting kita nggit ngalemi salah kalak man banta gelah pusuhta salang sai. Janah paksana bas geluhta lit hal-hal si la bagi ukurta jadi mari kataken bas pusuhta "labo peratenku jadi tapi peraten Tuhar sabab tek kita maka Tuhan kap Si Mada Kuasa si mereken wari pepagin ndauh ulin asangken wari si sendah. Terpujilah Tuhan! Amin.

V. PERTOTON

O Tuhan Si Empuna geluh kami, ikataken kami bujur ibas penemaniNdu kidekah geluh kami si mpengasup kami mentasi wari ku wari. Ertoto kami paksa enda gelah kerina Saitun GBKP tetap tek nandangi kuasaNdu seh maka ibas erbage-bage perbeben ras situasi si la bagi ukur pe tetap ernalem man baNdu saja. Kam Bapa si jadi Permakan ibas geluh kami, si meteh kai si mehuli guna kegeluhen kami, emaka ku kam kami erpengendes. Terpujilah gelarNdu o Tuhan. Amin      

VI. DISKUSI

1. Kai si ilakoken Tuhan Jesus tupung ceda ateNa?

2. Turiken pengalamenndu tupung ngalaken kecedan ate ras situasi-situasi si la bagi ukur!

VII. USULEN LAGU

1. ΚΕΕ ΝΟ. 185:1,2

2. ΚΕΕ ΝΟ. 249:1,3

3. ΚΕΕ ΝΟ. 176:1,2,3

4. KEE NO. 299:1-

Pdt. Elisabeth Rehulina Br Ginting, M.Th