BIMBINGEN PA MAMRE TANGGAL 14 JUNI - 20 JUNI 2026

Mamre Si Mejingkat ras pentar

Ogen : Kuan - Kuanen 10:1-5

1 Enda kap pertenget Salomo: Anak si pentar eme kap keriahen bapana, anak si lenge e kap erbahanca ceda ate nandena.

2 Kebayaken ulih kejahaten la kap lit untungna, tapi kebujuren mulahi kalak i bas kematen nari.

3 Kalak bujur kutera pe la ipelepas TUHAN kelihen, tapi sura-sura kalak jahat la IpebentasNa.

4 Kalak malas jadi musil kap, tapi kalak mejingkat, kebayaken jadi ulihna.

5 Kalak pentar rani kap i bas paksana, tapi man kemelanken adi lit si tunduh tupung paksa peranin.

Amsal 10 : 1-5

1 Amsal-amsal Salomo. Anak yang bijak mendatangkan sukacita kepada ayahnya, tetapi anak yang bebal adalah kedukaan bagi ibunya.

2 Harta benda yang diperoleh dengan kefasikan tidak berguna, tetapi kebenaran menyelamatkan orang dari maut.

3 TUHAN tidak membiarkan orang benar menderita kelaparan, tetapi keinginan orang fasik ditolak-Nya.

4 Tangan yang lamban membuat miskin, tetapi tangan orang rajin menjadikan kaya.

5 Siapa mengumpulkan pada musim panas, ia berakal budi; siapa tidur pada waktu panen membuat malu.

Tujun : Gelah Mamre:

1. Meteh biak mamre Si ngasup ncukupi Keperlun Jabu Sue Ogen
2. Encidahken biak Mamre Si Mandiri

I. KATA PENARUH

Sekalak perbapan eme tiang utama bagepe imam i bas jabu. Ia labo hanya sekalak bapa si encari ras ncukupken keperlun, tapi pe jadi panuten, guru bas kegeluhen, nilai-nilai kiniteken itengah-tengah jabu. I bas kegeluhen si modern enda, kerina erdalan alu meter, melala Mamre terjebak ibas kesibuken pendahin, tapi bene makna bas kegeluhen. Sibuk ndarami duit, tapi lupa mereken usihen. Rajin bas pendahin, tapi lupa ngajarken nilai rohani. Kinata bas kegeluhen Mamre, melala mungkin kita nggejapken maka enggo cukup sibereken kerina keperlun ibas kegeluhen man ndehara bagepe anak i tengah jabu, tapi lupa lit kebutuhan kehadiren sosok sekalak bapa. Ibas kitab Kuan-kuanen enda Mamre iajarken jadi perbapan si la saja mejingkat secara jasmani, tapi pe secara spiritualitas jadi kalak pentar. Penulis kitab Kuan-kuanen, ngajarken pentingna nggeluh alu kepentaren seh maka kerina pendahinta enda maba keriahen. Bapa si mejingkat ras pentar pasti jadi ulu kemalemen ate man isi jabuna.

II. URAIAN TEKS

Ibas ayat sipemena, Penulis kitab Kuan-kuanen mbenaken alu erbahan dua perbandingen, eme anak si pentar ras anak si lenge. Nina “Anak si pentar emekap keriahen Bapana, tapi anak si lenge e kap erbahanca ceda ate Nandena”. Je nari sipelajari maka kepentaren eme ulu keriahen ibas jabu. Kepentaren eme erta si mehergana man ibas jabu. Ibas ayat enda itegasken maka kemalemen ate orang tua, khususna perbapan tuhu-tuhu tergantung uga anak-anakna nggeluh ibas kepentaren. Bapa simejingkat labo saja kerna ndarami duit, tapi pe negu-negu anak-anakna gelah nggeluh ibas kepentaren ras kebenaren, Bapa ras Nande dem alu keriahen ukur. Tapi gelah anak e jadi pentar, perlu orang tua, secara khusus bapa sebagai takal jabu pe leben jadi teladan ras pentar. Adi si nin genduari enda, lanai banci sikataken man anakta, ikuti simehuli arah aku, si la mehuli lo padah ikutken. Tapi kerina kegeluhenta endam jadi contoh ras panutan man anak-anakta. Secara hak ras peran seri nge ndehara bage pe perbulangen, tapi perbapaan emekap takal jabu sebagai hak otoritatif siibereken Tuhan man sekalak Bapa. Labo gelah otoritatif bas si la mehuli, tapi otoritatif guna ngajarken simehuli rikutken kata Dibata.

Kepentaren la reh alu menukah, tapi butuh proses. Emaka nina bas sekalak pepatah ngataken “Menjadi tua itu pasti, tapi menjadi dewasa itu butuh proses”, emaka kerina labo instan. Sekalak Bapa si mejingkat labo ngenca ngajarken alu cakap, tapi ngajarken pe alu kegeluhen sibanci i idah anak-anak, uga maka nggeluh alu erkemalangan man Tuhan em jadi ulu kepentaren.

Terdauhen ibas ayat 2 ikataken, “Kebayaken ulih kejahaten la kap lit untungna, tapi kebujuren mulahi kalak ibas kematen nari”. Keberhasilen situhu-tuhu labo i ukur arah buena erta, tapi cara kita ndatkenca. Melala kalak latih erdahin, tapi ada carana la pas, tentu labo kang jadi pasu-pasu, ras menyesal pudi wari. Dibata la erngena ate nandangi kinibayaken si rehna ibas kinilabujuren nari. Mamre si mejingkat pe arus njaga integritasna ibas tep-tep langkah. Ibas dunia pendahin ntah pe usaha, banci saja rusur kita berhadapen ras godaan guna muat ras makeken dalan pintas si la mehuli. Tapi Mamre si pentar arusna nulak hal-hal sibagena. La gia melala, tapi teneng pusuhta, ras jadi berkat bagepe kemalemen ate. Asangken melala gia sidat, la tenang nggeluh enda, hasilna pe labo jadi pasu pasu. Teklah adi erkemalangan man Tuhan,, Dibata pagi ngarak-ngaraksa.

Ayat 3 nina “Kalak bujur kutera pe la ipelepas Tuhan kelihen, tapi sura-sura kalak jahat la ipebentasaNa.” Bas ayat enda jelas maka Dibata erpihak ras kalak sibujur, labo ras kalak jahat. Emaka labo lit rugina adi sidalankenlah sibujur. Kalak sibujur la ipelepas Tuhan kelihen. Emaka ula nai indikatorna sibahan mbue si dat, tapi uga Dibata erdahin ncukupken keperlunta. Melala gia dat hasilna adi jadi kutuk, man kai. Kai kin sidarami nggeluh kita bas doni enda ? Endam erbahan ukurta teneng ras tetap ngikutken Tuhan, gelah dame pusuhta. Bagi nina Paulus, kita nuan ngenca, Dibata mpeturahsa.

Ibas ayat 4 nina, “Kalak malas jadi musil kap, tapi kalak mejingkat kebayaken jadi ulihna”. Enda me sada prinsip kegeluhen si praktis ras relevan man Mamre. Malas labo saja erbahanca sekalak jelma kebenen pasu-pasu, tapi pe erbahan dirina sendiri lanai banci jadi pasu-pasu man kalak sideban. Mejingkat e labo berarti erdahin la ngadi-ngadi, tapi lit semangat ras la gampang meneyerah. Labo saja erdahin guna bertahan, tapi erbahan nilai-nilai kesempaten simbaru man keluarga. Ibas terang kiniteken Kristen, maka erdahin e jadi salah sada karakter kalak situtus erkiniteken man Tuhan. Berarti tutus ras mejingkat bas pendahin, epe carata ngergaken Tuhan si mada kegeluhen, sebab ertanggungjawab kita bas kegeluhenta.

Ayat 5, nina “Kalak pentar rani kap i bas paksana, tapi man kemelanken adi lit si tunduh tupung paksa rani”. Ayat si terakhir enda, nekanken pentingna disiplin ras manajemen waktuta. Kalak sipentar ietehna ndigan erdahin, ndigan nyusun jadi tabungen, ras ndigan jadi pasu-pasu man kalak sideban. Waktu eme hadiah si meherga, janah tep-tep musim lit maknana. Kalak si pentar labo menunda peluang, sabab ietehna maka kesuksesen reh man kalak si enggo siap ras tetap ergiah-giah. Ibas konteks Mamre, enda ertina lit rencana kegeluhen si menyeluruh, labo hanya erdahin alu tutus ibas paksa gundari, tapi pe ersikap guna masa depan man keluarga alu tanggungjawab. Bapa si merdeka labo kalak si lit i bas keuangan, menahan diri i bas gaya hidup si kurang penting, ras ngaturken sumber daya alu bijaksana.

III. PENGKENAINA

Ketutusen sekalak perbapan labo terjeng erdahin alu tutus, tapi sada bentuk kepatuhen nandangi pendilo Dibata guna ngusahai ras mperdiateken tinepaNa (Kejadin 2:15). Bapa si mejingkat e situhuna ersembah man Dibata arah tanna si erdahinNa.” Erdahin alu tutus eme sada bentuk ibadah, sebab arah erdahin manusia ikut muat bagin ibas pendahin Dibata tinepa. E maka jadilah bapa si mejingkat ras ola pedas-pedas kam surut. Jadilah Mamre si pentar, si nimbangkan kerina keputusen alu toto ras penegu-negu kata Dibata. Jadilah Mamre si mandiri, si pang erbahan peluang ras la jadi beban man keluarga ntah pe masyarakatndu. Jadilah sekalak Mamre si lit integritasna, si nulak cara si jahat ras tetap bujur i bas doni si dem alu kompromi. Janah jadilah Mamre si lit visi, si nikapken masa depan keluarga labo saja alu duit, tapi alu nilai-nilai kiniteken ras tanggungjawab.

“Seorang bapa adalah rekan kerja Allah di bumi. Ia mencerminkan kasih Allah melalui kerja kerasnya, Ia mencerminkan hikmat Allah melalui keputusannya, Dan ia mencerminkan kemandirian Allah melalui tanggung jawabnya. Ketika seorang bapa hidup rajin, bijaksana, dan mandiri, dunia akan melihat gambaran Allah yang hidup dalam dirinya.”

IV. DISKUSI-AKSI

1. Rikutken bahan oratenta, kai tantangen terbesar man Mamre guna tetap mejingkat ras bujur i tengah-tengah tekanen ekonomi?
2. Bahanlah aksi ibas Mamre tep-tep jabu “Erbahan Saat Teduh Ras Keluarga”.

USULEN ENDE-ENDEN :

1. KEE GBKP No. 424:1,2
2. KEE GBKP No. 209:1,2
3. KEE GBKP No. 320:1,2
4. KEE GBKP No. 316:1- (Persembahen)

Pdt. Berandes Ginting, S.Th., M.Psi.