BIMBINGAN PA MAMRE TANGGAL : 07 - 13 JUNI 2026

Lalap Patuh Man PerentahNa

Ogen : Masmur 78 : 1 - 8

1 Ende-enden Asap. O bangsangku begikenlah ajarku, begiken min cakapku.

2 Kubelasken kuan-kuanen dingen perumpaman, rusia jaman si nuria ateku kuterangken.

3 Perkara-perkara si nggo sibegi dingen sialoken, si ituriken nini-nininta.

4 La ateta e sibuniken man anak-anakta, tapi situriken man kesusurenta, kerna kuasa TUHAN ras PerbahanenNa si mejin, bage pe tanda-tanda kuasa si IlakokenNa.

5 Man bangsa Israel IberekenNa PedahNa, man kesusuren Jakup IberekenNa PerentahNa. IsuruhNa nini-nininta, ngajarken man anak-anakna.

6 Gelah sundut si arah pudi pe metehsa, janah anak-anak si langa tubuh pe nurikenca ka man anak-anakna.

7 Alu bage, ia pe kerina Dibata ka penalemenna, la ilupakenna perbahanen Dibata, tapi lalap ia patuh man perentah-PerentahNa.

8 Gelah ula ia seri ras nini-ninina, bangsa pemberontak dingen la patuh si la tetap kinitekenna man Dibata, si la patuh man BaNa.

Masmur 78 : 1 - 8

1 Nyanyian pengajaran Asaf. Pasanglah telinga untuk pengajaranku, hai bangsaku, sendengkanlah telingamu kepada ucapan mulutku.

2 Aku mau membuka mulut mengatakan amsal, aku mau mengucapkan teka-teki dari zaman purbakala.

3 Yang telah kami dengar dan kami ketahui, dan yang diceritakan kepada kami oleh nenek moyang kami,

4 kami tidak hendak sembunyikan kepada anak-anak mereka, tetapi kami akan ceritakan kepada angkatan yang kemudian puji-pujian kepada TUHAN dan kekuatan-Nya dan perbuatan-perbuatan ajaib yang telah dilakukan-Nya.

5 Telah ditetapkan-Nya peringatan di Yakub dan hukum Taurat diberi-Nya di Israel; nenek moyang kita diperintahkan-Nya untuk memperkenalkannya kepada anak-anak mereka, 

6 supaya dikenal oleh angkatan yang kemudian, supaya anak-anak, yang akan lahir kelak, bangun dan menceritakannya kepada anak-anak mereka, 

7 supaya mereka menaruh kepercayaan kepada Allah dan tidak melupakan perbuatan-perbuatan Allah, tetapi memegang perintah-perintah-Nya; 

8 dan jangan seperti nenek moyang mereka, angkatan pendurhaka dan pemberontak, angkatan yang tidak tetap hatinya dan tidak setia jiwanya kepada Allah.

Tujun : Gelah Mamre :

1. Ngelumbaken kinitekenna sitetap man Tuhan.
2. Setia nuriken perentah Tuhan man isi jabuna.

 Metode : Diskusi

I. KATA PENARUH

 Menurut KBBI, kata bapa eme orangtua dilaki ibas sada jabu, ntah pendilo man sekalak dilaki ianggap sebagai tokoh ntah sekalak dewasa. Ibas keagamaan khususna Kristen kata bapa, penyebuten man Dibata si nepa langit ras doni siangap enggo ndeher kel ras perpulungen. Pengertin kata bapa berkembang kuarah lebih meluas eme bapa i tengah jabu bagepe megati ku makna lebih meluas eme penyembuten kubas sekalak si ituaken guna ngataken kinihamaten, kata enda pe ngataken makna bapa sebagai takal ibas jabu simerujuk kubas sekalak dilaki.

II. URAIAN TEKS

Masmur 78 ikataken pe Masmur pujin pengajaren, maschil eme nden-nden pengajaren. Sinuriken kerna uga keleng ate Dibata man umat-Na Israel anum pe bangsa e tegar tengkuk, tapi Dibata tetap erkeleng ate man bana. Pemasmur nuriken uga keleng ate Dibata man bana arah nuriken sejarah keleng ate Dibata alu mbebasken ras mbabai kalak Israel seh masa pemerintahan raja Daud. Emaka Penulis kitab enda eme bani Asaf alu nuriken kai pengajaren raja Daud man kerina kalak Israel gelah banci megiken dingen ndalanken kai kata Dibata man bana.

Ibas ayat 1, Penulis mindo man kalak Israel gelah makeken cupinga alu metingel gelah ngangkai alu payo kai si ikataken Dibata bagepe raja Daud kerna pengajaren, kerna hukum ntah pe maklumat raja gelah bangsa enda reh gegehna ras reh mbelangna arah kiniersadan kerina kalak Israel. Selanjutna ibas ayat 2-3, penulis sebagai sekalak pemimpin ersura-sura mereken hikmat ntah pe pemeteh arah babahna guna jadi bekal ibas ndalani kegeluhen keagaman, masyarakat bagepe ibas konteks bernegara segelah umat enda tuhu-tuhu pentar. Kata-kata e ikataken teka teki labo soal sukar ipahami tapi harus ikagumi ras iselidiki alu megermet kerna pengertinna. Hal sibagenda rupana pe ipakeken Jesus mpeseh perumpaman-perumpaman (Mat. 13:35) Arah kinigermeten ras pe nggit kita megi-megi pengajaren siituriken arah orang tuanta sinuria erbahanca ertambah-tambah pemeteh, dingen pe ertambahna kinihamaten man orang tuanta si enggo metua.

Ayat 4, nuriken uga pemasmur ngajuk gelah generasi e, banci nuriken uga keleng ate Dibata, alu kuasaNa mbebasken umat enda man generasi berikutna eme anak-anakna. Tradisi lisan enda tuhu-tuhu ngayak gundari nggeluh ibas kalak Israel arah ‘syema Israel’ ibas sada generasi ku generasi selanjutna. Pemasmur ngidah arah e tentuna anak-anakna la bene identitasna, tapi bangga ia kerna bangsana dingen pe peinget-inget maka Dibata erkeleng ate.

Selanjutna ibas ayat 5-6 uga pedah Dibata bagepe Hukum Taurat e ipesehken man kesusuren Jakub bagepe man umat Israel guna ikataken ras iajarken man anak-anakna kerina. Tentuna enda banci si idah ibas Ulangen 6 uga Musa ope bengket bangsa enda ku tanah Kanaan, mindo gelah bangsa enda ngajarken kerna keleng ate Dibata, taurat Dibata guna iajarken ras i ulang-ulang gelah banci bangsa enda ndatken keselamatan idur Dibata nari.

Siterakhir ayat 7-8, Pemasmur mereken pengharapen ibas megiken, matuhi ras mentransferken kerina pengalamen man kesusuren kalak Israel. Arah penuriken pengalamen man generasi selanjutna tentuna ngakui Dibata penalemenna, la ilupakenna perbahan-perbahanen Dibata, tapi seh man anak kempuna tetap Dibata jadi Dibatana dingen erpenalem man baNa, la ia ndabuh kubas dosa ntah pe memberontak bagi nini-ninina seh maka la ia bengket kubas tanah perjanjian.

III. PENGKENAINA

Adi siperdiateken bahanta ibas wari enda teridah maka perlu ras wajib kita bapa i tengah jabu guna makeken wari-wari kegeluhenta guna nuriken ras ngajarken uga ulina ras setiana Dibata gedang-gedang kegeluhenta man anak-anakta ras isi jabunta. Sipakeken waktu kita pulung, ibas meja man, ibas perdalanen nehken pengajaren, nuriken kiniulin ras kesetian Dibata gelah anak kesusurenta la ikataken bangsa pemberontak, la ia terkontaminasi arah pergaulen bebas, narkoba, judi ras penyakit sosial si debanna kerina.

Bapa i tengah jabu perlu mereken disiplin, ia harus jadi teladan man isi jabuna baik ibas perkatan, sikap, nilai bagepe ibas tanggungjawab. Anak kesusurenta tentuna ngidah kita sebagai bapa setia ras sijadi usihen si pemena si jadi usihenna. Adi bas kita la datna sibage rupana tentuna idaramina idarat nari, tentuna e banci mereken dampak negatif man anak kesusurenta. Emaka mari kita sebagai bapa i tengah jabu banci jadi bapa si setia guna jadi usihen segelah anak kesusurenta pe ndatken pengajaren seh maka kegeluhenna pe genduari bagepe pagin tuhu-tuhu erbuahken kinimalemen dingen pe setia ka ia man Dibata guna pagin ka pe isusurkenna ka man anak kempuna.

IV. DISKUSI

1. Tiap kita Mamre nuriken 5 kiniulin Dibata ibas kegeluhenta. Kai komitmenta kenca situriken kiniulin Dibata e ibas kegeluhenta?
2. Ibas konteks kita genduari enda uga ngenda carana kita nehken pengajaren man isi jabunta ras uga sibahan proyek ketaaten guna banci ilakoken tep-tep wari?

USULEN ENDE-ENDEN :

1. KEE GBKP No 276 : 1-2
2. KEE GBKP No 185 : 1-2
3. KEE GBKP No 200 : 1-2
4. KEE GBKP No 204 : 1-2 (Persembahen)

Pdt. Tenangukur Barus, S.Pd.