BIMBIANGAN PA MAMRE TANGGAL, 15 FEBRUARI – 21 FEBRUARI 2026

Jabu Sidalanken Singena Ate Dibata

Ogen : Matius 12 : 46 – 50

46 Asum Jesus ngerana denga, reh NandeNa ras senina-SeninaNa. Tedis ia i darat, sabap atena njumpai Jesus.

47 Emaka nina sekalak si i je man Jesus, "I darat NandeNdu, senina-SeninaNdu, jumpa atena ras Kam."

48 Tapi ngaloi Jesus, "Ise kin nandengKu? Ise kin seninangKu?"

49 Jenari ituduh Jesus ajar-AjarNa janah nina, "Enda kap nandengKu ras senina-seninangKu!

50 se ndalanken kai si ngena ate Dibata, BapangKu, ia kap seninangKu, turangKu, ras nandengKu."

Matius 12 : 46 – 50

46 Ketika Yesus masih berbicara dengan orang banyak itu, ibu-Nya dan saudara-saudara-Nya berdiri di luar dan berusaha menemui Dia.

47 Maka seorang berkata kepada-Nya: "Lihatlah, ibu-Mu dan saudara-saudara-Mu ada di luar dan berusaha menemui Engkau."

48 Tetapi jawab Yesus kepada orang yang menyampaikan berita itu kepada-Nya: "Siapa ibu-Ku? Dan siapa saudara-saudara-Ku?"

49 Lalu kata-Nya, sambil menunjuk ke arah murid-murid-Nya: "Ini ibu-Ku dan saudara-saudara-Ku!

50 Sebab siapapun yang melakukan kehendak Bapa-Ku di sorga, dialah saudara-Ku laki-laki, dialah saudara-Ku perempuan, dialah ibu-Ku."

Gelah Mamre :

1. Banci ngertiken keluarga rikutken teks
2. Ngasup ngkelengi kerina kade-kadena salu kekelengen Dibata.

I. KATA PENARUH

Pendilo man banta eme guna jadi pasu-pasu man jelma sinterem. Abraham ras isi jabu idilo guna jadi pasu-pasu man bangsa-bangsa. Yusuf ibas jamanna pe idilo guna banci mereken kiniulin la saja man bangsa Israel tapi pe man kerina bangsa-bangsa sekitaran timur tengah. Kita pe selaku kalak erkiniteken, jabu, sienggo idilo guna nuriken perbahanen-perbahanen Dibata si mbelin. Kita idilona ibas kegeluhen si gelap nari arah kematen Jesus i kayu persilang dingen ijadikenNa kita jadi anak-anak Dibata. Tentuna arah pendilo enda, la kepen banci kita hanya mentingken diri kita sendiri, ntah pe jabunta sada. Selaku bapa kita pe berperan aktif ibas keluarga, kesain, kuta, gereja, bangsa ras belang-belang doni ija kita ringan. Fungsinta eme uga kita jadi bapa si erdiate la saja ibas kiniteken, tapi pe banci kita ernanam ibas sima-simanta, keluarganta, arah keterlibatenta ibas kegiatan Masyarakat, singerunggui, simpersadaken ibas kerinana. Ijenda kita erlajar uga Jesus ngajarken kita, uga kin harusna kita ras jabunta ndalanken singena ate Dibata.

II. URAIAN TEKS

 Cerita kerna keluarga Jesus itulisken ibas telu injil Sinopsis Matius, Markus ras Lukas. Tentuna cerita enda mereken man banta uga Yesus sebagai manusia lit keluargana, bapana Yusuf ras nandena ibas suku Yehuda nari, enda icatat alu mehuli ibas injil Matius ras Lukas maka Yusuf ras Maria eme keturunen Daud. Bagepe ituriken maka Jesus lit senina-seninana. tubuh ibas jabu Jusuf, ernandeken Maria. Kuta Betlehem inganNa tubuh, tentuna pe ia erlajar bagi uga kalak Jahudi erlajar ibas keagamaan, budaya ras nilai kalak Jahudi. Ia patuh man hukum Taurat, reh ku sinogoge dingen pe merayaken perayan-perayan kalak Jahudi raduken bapaNa Jusuf, nandena Maria ras senina-seninana. Secara konteks sosial ras politik, Ia nggeluh ibas masa pemerintahen. Romawi. Ayat 46 ituriken maka, Jesus terus nehken pengajaren man jelma sinterem, iganggu arah kerehen keluargana eme Nande ras senina-seninaNa, senina-senina ijenda labo senina sada nande tapi senina sembuyak bapa, ibas Bahasa Jahudir ras Aram anak senina bapa e banci ikataken senina, bagi kita kalak Karo, senina sembuyak bapa. Kalak enda ersura-sura njumpai Jesus, tenah e ipeseh arah kalak sideban man Jesus. Tujun nande ras seninaNa mungkin saja gelah Jesus banci pekesahken sebab la ngadi-ngadi nehken pengajaren, ntah pe mungkin mpersingetti Jesus gelah hati-hati man kalak Farisi sibanci nidingi Jesus arah pengajarenNa (Mat. 12 : 38) Emaka isuruh sekalak jelma guna mpeseh sura-sura keluarga man Jesus alu ngataken maka nande ras senina-seninaNa idarat nimai ras jumpa atena ras Jesus. Ayat 48 teridah respon Jesus alu ngataken ise kin nande ras seninaNa. Ijenda labo berarti la keleng ate Jesus kerena nande ras seninan. Tapi Jesus nekanken maka nande ras senina eme kalak sikelengen atena Dibata asangken keluarga. Ibas Lukas 14 : 26 ikataken ije ‘ise pe reh ndahi Aku labo banci jadi ajar-ajarku, adi la kin kelengen atena man Dibata asangken man bapana ras nandena,, ndeharana rasa nak-anakna, turangna ras seninana janah bage pe man dirina. Arah penungkunen Jesus e lebih kubas penekanen hubungen spiritualitas silebih mbages ras Dibata. Ayat 49 Jesus mereken contoh guna mendukung penungkunenNa ndai alu nuduh salu tanNa kempak ajar-ajarNa siras ia pulung ije ras ngikut Jesus kuja pe, megiken kerina pengajarenNa, ngidah kerina kuasa ibas Jesus nari, pepalem kalak sakit, ngusir setan ras tanda-tanda sengget. Jesus ncidahken maka ajar-ajarNa eme nande ras senina-seninaNa. Ijenda labo hanya muridNa si 12 kalak, tapi kerina kalak singikut ras alu tulus mbegiken pengajaren Jesus baik dilaki bagepe niberu. Niberu si hadir eme Maria Magdalena, Joanna ndehara Chuza, bendehara Herodes ras Suzanna simelayani Jesus arah erta silit ibas kalak enda.

Ibas ayat 50, Jesus mereken kai palasna maka murid-muridNa jadi nande ras seniana eme kalak sindalanken kata Dibata. Adi sipergermetken, maka labo ise pe ngasup ndalanken kerina pedah Dibata alu sempurna, tapi man kalak singgit ngaloken Jesus jadi Tuhan ras Juruselamatna tapi singgit ras erdalin ras Jesus, bagi siisuratken Ibas Johanes 6 : 40 ikataken sura-sura Dibata eme gelah kita sienggo ngidah Anak e dingen tek man baNa, ndatken kegeluhen sirasa lalap sienggo isikapken man banta dingen sialoken pagi ibas wari pendungi. Jesus megati kel menekanken maka kita jadi seninan adi kita ngit dalalanken kai sikatakenNa man banta (Joh. 15 : 14) Jesus menekanken maka hubungenNa ras nande ras seninana lebih kubas hubungen spiritualitas simenyelamatken asangken hubungen dareh simegati erbahanca sinanggel, tapi adi ibenai hubungen kekrabeten arah penandai Dibata erbahanca hubungen kekrabaten e banci mehuli.

III. PENGKENAINA

Adi siperdiateken ibas kita kalak Karo, baik kita sebagai kalimbubu, senina bagepe anak anak beru, megati kel lit ije perjentiken ibas perkade-kaden arah dareh, bagepe arah pertuturen. Tapi arah bahanta sendah iajuk kita gelah banci makeken kerina kiniulin arah uga kita ngidah sima-simanta eme senina dingen turangta. Kekelengen sienggo ibereken Jesus man banta, mpengasung kita ngaloken kalak si deban jadi bapanta, nandenta, senina dingen pe turangta. Kekelengen sienggo icidahken Jesus arah kematenNa i kayu persilang lebih mperembakken hubungenta ras teman-temanta si sada kiniteken. Hubungen secara dareh teridah la ngasup mpersadaken kita alu mehuli,seh maka megati erbahanca kesirangen, la siangkan, siadun, bagepe lanai lit tembena. Situasi enda megati kel ihadapi gereja, dingen harus irunggui ndamekennca. Man banta Mamre bapa i tengah jabu, iajuk kita kata Dibata sipelajari kita tiap wari, enda pe banci sicidahken salu ngerunggui masalah silit i tengah jabu, Masyarakat, gereja bagepe peranta ibas bernegara. Arah kai silakoken Mamre tentuna cidahken terang Kristus man doni enda. Selamat nehken keleng ate man sangkep geluh ras jelma sinterem

VI. DISKUSI :

1. Uga maka Jesus tempa lebih ngkelengi murid-muridNa asangken nandena ras senina-seninana?
2. Kai ngenda tekadta kenca kita mpelajari kata Dibata enda? Daftarken rencana Mamre secara organsisasi guna jadi pasu-pasu man jelma sinterem bagepe secara pribadi kai sibanci sibahan guna jadi pasu-pasu man sima-simanta (tentuken waktuna, banci ilakoken, terukur)

USULAN ENDE-ENDEN :

1. KEE GBKP No 334 : 1 - 2
2. KEE GBKP No 223 : 1 - 2
3. KEE GBKP No 432 : 1 - 2
4. KEE GBKP No 420 : 1 (Persemahen)

Pdt. Tenangukur Barus, S.Pd.