Ajari Dingen Persingeti Rusur

(Pentingna Peran Jabu Ibas Meningkatken Spiritualitas PERMATA GBKP)

Ulangan 6:4–9

Tema : Ajari Dingen Persingeti Rusur

Gelah PERMATA GBKP

1. Meteh cara ngajari spiritual anak ibas jabu kalak Jahudi sue ras nas

2. Nuriken pengalaman ijajari kerna kata Dibata ibas jabu

Metode: Sharing

I. BENA KATA

Jaman si berkembang cepat radu ras kemajuan teknologi mabai kegeluhen si mengayak ku kepenteran akademis, seh maka pembentukan, moralitas, ras prinsip-prinsip kiniteken kurang ndatken perhatian khusus. Peran orangtua jadi usihen, ibas ertoto, ras ngajarken kerna Kata Dibata seh kel pentingna ibas mbangun karakter ras kiniteken. Ulangan 6:4–9, si itandai alu pengakun kiniteken “Shema Israel” ibas tradisi Jahudi, nuriken pentingna pengajaran kiniteken ibas jabu si berdampak ku bas perkembangan psikologis anak. Pengangkan ras ndalanken prinsip-prinsip kiniteken ibas ogenta enda mereken kontribusi positif ibas mbangun karakter, identitas, ras kesejahteraan emosional anak.

Shema nekanken pentingna palas kiniteken man Dibata si Sada, secara psikologis kiniteken si megegeh banci mereken rasa aman, tujuan geluh si jelas ras banci megegeh karakter ras kepercayaan diri.

II. ISI

Ulangan 6:4–9 eme perentah si isehken Tuhan arah Musa selaku mediator bangsa Israel. Perentah si ulangi Musa nehkenca guna ningetken man generasi si mbaru asum mengketi taneh Kanaan. Nini-nini bangsa Israel si ndube erbahan pemberontaken man Tuhan alu nembah man berhala-berhala ras dibata bangsa si deban, nuduhken kesalahan ras kegagalen Israel si seh kel fatalna. Musa selaku pemimpin mulihi nehkenca sora pendilo kerna sepuluh perentah Dibata guna ngaku Tuhan si Sada (Esa) ras ngekelengi Tuhan Dibata si Sada e asa gegel ras asa ukur gelah kerina bangsa Tuhan mpersermbahken geluhna man Dibata.

Penandai ras Pengakun “Tuhan si sada e kap ngeenca Dibata!” (ay.4).

Pengakun kiniteken enda jadi afirmasi nandangi kedaulatan Dibata si monoteisme, bangsa Israel pe isingetken mulih ku bas perpadananna (covenant) ras Dibata, janah arah pengakun kiniteken enda jadi komitmen si arus icikep Israel guna la nembah man berhala-berhala bangsa Kanaan ras teritib matwari seh ku sundutna matwari.

Ushihen ras Kegeluhen (ay. 8–9). Orang tua (mentor) arus jadi ushihen ibas ngajari ras ndalanken Kata Dibata. Peran orangtua (kalak dewasa/mentor) penting kal ibas nentuken perilaku ras nilai-nilai moralitas anak. Alu ngajari nilai-nilai ras kiniteken ibas kegeluhen, ibas imbangken karakter diri, identitas ras kedewasaan spiritual anak. Seh maka kiniteken si integh ras penandai terhubung ras sesijabu banci mencegah masalah psikologis man anggota jabu: gangguan kecemasan, depresi ras stres. Sebab jie banci terdidah lingkungan jabu si aman ras dem keleng ate. Orang tua banci ngajarken kerna pengajaran kiniteken arah cerita, permainan, contoh perilaku, ras diskusi ibas erbagi situasi kegeluhen, labo saja ibas kegiatan kebaktin-kebaktin tapi pe ibas erbagi situasi kegeluhen.

III. PENGEKENAN

Perentah guna ngekelengi Tuhan Dibata enda jadi prioritas si meganjang ras kegelhuna manusia. Ngekelengi Tuhan Dibata jagape ketaweh pe ras ibas situasi si ngelupaken Tuhan alu kinipatuhenna ras penembahen man berhala, seh maka kegeluhenna mpeturah pernembah Dibata, ras jadi kiniseran man bangsa e.

Radu ras tema tahun pelayanan GBKP 2026 “Nandai Dibata”, si fokus guna megehi spiritualitas perpulungen arah ertoto, kebaktin, ras kerembaken ras Dibata. Pendalanen ras tema pelayanan enda, emaka perentah guna ngekelengi Tuhan Dibata labo man diri sendiri ngenca erguna, tapi man bangsa si mbleni, emaka perentah enda arus ijarken dingen rusur ipersingeti man tep-tep generasi seterusna tengah-tengah bangsa Dibata. Penandaita nandangi Tuhan labo banci idatken ibas sada waktu tertentu, tapi arus ilakoken segedang geluh. Aminna pe pelajaren e seri, tapi alu ertambahna kedewasaan tentu mereken pengangkan si berbeda ras reh payona man si rusur mpelajarisana. Adi kita nggit ajari dingen ipersingeti rusur, pagin enda banci jadi ampang-ampang man PERMATA GBKP ibas ngalaken pengajaran si papak bagepe ngalaken tentang si sendalanen perubahen ibas kemajuan jaman. Pengajaran kiniteken mereken efek tep-tep pribadi, eme paguh ibas kiniteken, megendeng ibas kiniseran, ras nggeluh ibas nilai-nilai kegeluhen si sentudu ras Kata Dibata. Adi perubahen banci jai nandangi tiap pribadi anak PERMATA GBKP, tentu jadi fondasi si mabai perubahen ku tengah-tengah jabu, gereja, masyarakat ras bangsa si mblenin.

IV. SHARING

1. Turikenlah uga carana ngajari spiritualitas (nandai Dibata) man anak ibas jabu kalak Jahudi

2. Selain arah kegiatan rutinitas (Kebaktin Minggu, PA ras PJJ), turikenlah kai-kai saja si banci ilakoken PERMATA GBKP gelah banci reh belinna penandai nandangi Tuhan?

3. Dunia digital gundari enda mereken melala informasi ras ide si rusur petembil ras kata Dibata. Turiken 5 hal si arus lit ibas PERMATA GBKP gelah banci meteh informasi ntah ide sue nge tah lang ras Perentah Dibata?

Pdt. Elly Enjelita Br Ketaren, S.Th, M.Psi