JAM ERTOTO PERMATA GBKP

(HUT Saitun 15 April 2015: 11 Tahun)

Amsal 17:6

Tema : Aku Kap Kemegehan Nini ras Bulang

Gelah PERMATA GBKP

1. Meteh dingen nggejapken maka ia eme kemegehan nini ras bulang

2. Jadi kemegehan nini ras bulang

Metode: Jam Ertoto dan Aksi Perayaan HUT Saitun

I. PERSIKAPEN

1. Nikapken ingan kebaktin si teneng, nyaman guna ngelakoken jam doa enda.

2. Lilin isikapken, ibentuk salib i tengah-tengah PERMATA GBKP

3. Sikapken Pustaka Sibadia, Buku Bimbingan PA PERMATA GBKP, Buku Ende-enden GBKP, kantong persembahen.

4. Nikapken si muat bagin ibas Pertoton Syafaat

5. Lagu-lagu pemena ipelajari alu mehuli, reh sikapna adi lit musik si mengiringi selama jam ertoto enda ilakoken.

II. KEBAKTIN

P: PERMATA GBKP ----Paksa Teneng---- (iringi musik)
P: PERMATA GBKP sinikelengi Tuhan, sikataken bujur man Tuhan Dibata, si mereken kesempatan si meherga, atan kita pulung radu ras guna ersembah man baNa ibas paksa enda. Tuhan tetap erkeleng ate man banta, perkuah ateNa tetap ngarak-ngarak kerina perdalinen geluhta. Labo pernah ipediatna kita ndalani kegeluhen enda sisada tapi tetap jaga dingen ikawalina kita ibas tep-tep musim kegeluhenta. Alu bage, mari sipeksikap pusuh ta, ateta nembah mungkuk i adep-adepenNa, muji gelarNa ibas pusuh ta si mbagesna nari. Nembahlah man Tuhan alu ukur meriah, dahilah kuadep-adepenna alu rende meriah.
J: Tuhan kap Dibata, la si nepa kita, emaka sikejarangenNa nge kita, kita kap bangsana, kita kap parasenna.

Rende: KEE 479:1 Sembah Man baNdu Yesus Kristus (iendeken 2 kali)

P: PERMATA GBKP sinikelengi Tuhan, perjumpanta ibas PA wari enda istimewa, erkiteken bertepatan ras perayan ulang tahun orang tuanta Saitun. Sikataken bujur man Tuhan, sebab keberadaan orang tua enda i tengah-tengah keluarga bagepe gereja jadi pasu-pasu si meherga kel. Orang tuanta Saitun eme tanda keleng ate Tuhan, si ehen ibas erkintiken dingen jadi penungkunen ras penggurun man banta singuda denga. Kegeluhen Saitun enda ningetken kita maka kesetian man Tuhan si ibenaken ibas kitik-kitik nari seh ku umur metua eme perdalinen kegeluhen si dem alu kemalemen ate. Kegeluhen Saitun jadi bukti maka keleng ate Tuhan la pernah mobah seh metua dingen ubanen, Tuhan tetap singkelini dingen mereken gegeh. Andiko seh kel ulina adi perdalinen kegeluhen enda tetap sialani ras Tuhan. Mari si muliaken Tuhan sagedang-gedang geluh ta.

Rende: KEE 358:1 Muliaken O Tendingku (iendeken 3 kali)

P: PERMATA GBKP sinikelengi Tuhan, kata Dibata ersinget man banta ibas Imamat 19:32 “Mehamatlah man kalak si enggo metua, janah pehagalahlah aku. Aku kap Tuhan”. Tapi kinatana, megati la kita mehamat, la kita megiken pedah ras ajar kalak si enggo metua bagepe nini ras bulangta.

J: Tuhan, ngaku kami maka megati kel kami lanai ngergai, lanai mehamat man kalak si enggo metua i sekelewet kami, bagepe man nini ras bulang kami.

P: Lanai sitalangi pinggelta nandangi ajar si mehuli, siakap maka kai si ajarkenna lanai sue ras jamanta genduari, la sisedari maka pengalamanna e eme erta si meherga si enggo ibereken Tuhan segelah iwariskkenna man banta.

J: Alemi kami ibas kiniganjangen ukur kami, lanai italangi kami pinggel kami guna pedah ras ajar si mehuli.

P: Megati lupa kita notoken dingen mpegegehi ia ibas daging kulana si kitikta nari, padahal ia nge ndube si tetap setia notoken kita mulai kitik-kitikta nari.

J: Alemi kami Tuhan, ajari kami guna ngergai, ngkelengi dingen notoken nini ras bulang kami, Saitun i tengah-tengah gereja kami, bagepe kalak si enggo metua si sekelewet kami.

P & J: O Dibata mekuah min ateNdu kempak aku, erkiteken iasNdu, sasapkenlah dosangku erkiteken perkuah ateNdu.

Rende: KEE 362:1-2 Alemi Dosangku

P: Tapi bari ras ganjangna langit i babo doni nari, bage kel me belinna keleng ateNa man kalak si erkemalangen man baNa. Bagi dauhna Timur ras Barat nari, bage me ipedauhna dosa-dosanta ibas kita nari (Masmur 103:11-12)

Rende: KEE 423:1-2 Kam Nebusi Aku Tuhan

P: Mari ersikap kita guna megiken kata Dibata, Rende KEE 468:2 Tuhan Demi aku Salu KataNdu

Renungan (Ibenai Ras Indungi Alu Pertoton)

Nas : Amsal 17:6
Tema : Aku Kap Kemegehan Nini ras Bulang

I bas sada karaben si teneng, sekalak bulang kundul i kursi i teras rumahna. Tanna si enggo mulai keriput nagangi sada album foto, sada persada italangina lembar album foto si lit ije gambar anak-anak ras kempuna, cirem kel ia. Kenca sie erdalan ia masuk kurumna, itatapna ka dereten foto kempu-kempuna si ipajang rapi i dinding rumahna, mube erbage foto e, lit tupung kempuana kitik denga, tupung sekolah bagepe lit ka piga-piga foto wisuda kempuana, cirem siang ayona dingen megah kel akapna.

Kuan-kuanen 17:6 enda ibas bahasa Indonesia isuratken “Mahkota orang-orang tua adalah anak cucu dan kehormatan anak-anak ialah nenek moyang mereka”. Ibas Pustaka Sibadia mahkota eme lambang kemulian sekalak raja. Mahkota ipake i takal segelah banci idah jelma si nterem dingen jadi tanda status kalak si makesa. Mahkota nciidahken dolat ras kuasa (Mas.89:20; Est 2:17), lambang kehamaten ras kemenangan (Kuan 4:9;16:31; Jes.62:3; Pil.4:1) kesempurnaan ras kinibayaken pasu-pasu Tuhan nandangi bangsa-Na (Mas. 65:12;103:4), mahkota pe jadi penghargaan erkiteken kemenangan ibas pertandingan. Bagepe identitas sekaligus tanggung jawab anak-anak, terus ke kempu nandangi orang tua. Ibas bahasa Karo ayat enda isuratken “Orang tua gedang atena ngenen kempuana” ertina jadi atena, malem atena dingen melala arapen kerna erbage-bage simehuli si ilakoken dingen icapai kesusurena.

Alu bage rikuten tema renungenta sendah, selaku PERMATA GBKP lit tanggung jawab si mbelin guna nciidahken kualitas kegeluhen si jadi kemegehan nandangi nini ras bulang. Sipemena, nggeluhlah ibas dalan Dibata. Kemegehan e teridah arah kualitas kegeluhen, jadi pribadi si berintegritas, erkemalangen man Tuhan dingen nggeluh ibas kebenaren. Sebalikna adi nggeluh kita bagi ate-ateta, terjebak ibas pergaulan si la mehuli dingen ncurnaken gelar Dibata, enda justru mpeteruh mela dingen aru atena. Peduaken, tetap si upgrade dirinta alu pemeteh ras keterampilan, alu bage banci tetap sidahiken dahin si mehuli dingen ndatken prestasi si mehuli ibas geluhta, jadi kemalemen ate pe nandangi nterem jelma. Adi kune paksana kita sekolah ntah kuliah pe teridah ketutusen ateta memperlengkapi dirinta. Sipeteluken, sibereken waktuta bagepe perhatian nandangi nini ras bulangta. Hal si sederhana tapi banci mereken keriahen ukur man bana.

Erkiteken menurut psikologi, usia nini ras bulangta rentan kesepian. Kehadiran ras kekelengenta banci nambahi keriahen ukurna. Peempatken, mehamat dingen ngergai ia. Nggit megiken pengalaman, pedah ras ajar si mehamat dingen ngergai ia. Situasi ras jamanta enggo berbeda, tapi turi-turin perdalinen iberekenna. Anem gia situasi ajar si mehuli nandangi kita. Arah kerina enda, pengarapenta kegeluhenta banci jadi kemegehan man nini ras bulangta.

Ibas jam pertotonta wari enda, ijak ke kita guna notoken orang tuanta Saitun i tengah-tengah gerejanta, nini ras bulang tengah-tengah keluarga. Anem gia enggo metua janah rentan ibas erbage kekoten daging kula, tapi tetap reh paguhna ibas erkintiken man Tuhan. Tetap min nggejapken keriahen ukur ras kemalemen ate. Amin.

P: Mari ersikap kita guna nehken persembahen pengataken bujurta man Tuhan. Kata Dibata si jadi palas ibas nehken persembahen tersurat ibas 1 Tesalonika 5:17-18: Ertotolah katawari pe, janah katakenlah bujur man Dibata ibas sikugapanta, enda me singena ate Dibata ibahandu ibas geluhndu selaku kam kalak si enggo ersada ras Kristus Jesus.

Rende KEE 471 Ermengkah Ukurku

Pertoton Khusus

PERMATA GBKP I:
Notoken gelah PERMATA GBKP mete dingen nggejapken maka ia eme kemegehan nini ras bulang

PERMATA GBKP II:
Notoken gelah PERMATA GBKP ngasup jadi kemegehan nini ras bulang

PERMATA GBKP III:
Notoken kerina Saitun GBKP si mperingeti HUT pe 11 tahun, nini ras bulang i tengah-tengah keluarga ras kerina kalak si enggo metua idoni enda

PERMATA GBKP IV:
Notoken segelah PERMATA ngasup tetap nciidahken keleng ate man Saitun GBKP, nini ras bulang i tengah-tengah keluarga ras kerina kalak si enggo metua

PERMATA GBKP V:
Notoken Persembahen ras siturah ibas perpulungen iumpati pertoton Tuhan

Rende KEE 466 Bujur o Tuhanku (iendeken 3 kali)

AKSI

1. Erbahan Perayaan HUT Saitun ibas Runggun ntah Sektor, si iaturken PERMATA GBKP

2. Erbahan Perkunjungen nandangi Saitun si lanai ngasup ikut muat bagin ibas dahin-dahin gereja (ibas perkunjungen banci ibahan acara kebaktian, bagepe maba luah ibas PERMATA GBKP nari)

Pdt. Junita Br Surbakti S.Th