(Menjaga Kesehatan Mental/Manajemen Stres)

Roma 12:1-2

Tema : Perukuren Ipelimbarudi Dihata
Gelar PERMATA GBKP
1. Nuriken kerna perukurren si ipelimbarui Dibata sue ras nas
2. Beluh rukur mehuli

Metode: Studi Kasus

I. BENA KATA

Era digitalisasi 4.0, si terus bergerak ku bas masyarakat 5.0, i ja hampir kerina alat elektronik enggo terhubung ku internet ras kalak melala waktuna online, mereken tantangen tersendiri man anak muda i bas gereja (PERMATA GBKP). Lebih mbiar kalak nandangi baterai si lemah asangken kiniteken ras kesehatan mental si lemah. Enda labo masa-masa si gampang. Para ahli gelarisa Era VUCA (Volatile, Uncertainty, Complexity, Ambiguous).

• Volatile ertina melala hal si berubah alu pedas alu tingkat persaingen/kompetisi si tinggi.
• Uncertainty entah ketidakpastian ertina melala si la pasti, khususna kerna masa depan.
• Kompleksitas ertina tingkat kompleksitas si meganjang ras membutuhken erbage-bage keterampilen.
• Ertina tuhu ambigu (maknana la sada), melala hal si erbahanca kita sengget, kuatir, ras berbahaya.

Kerina enda banci berdampak ku kesehatan mental anak singuda i bas jaman gundari (Gen Z ras Gen Alpha).

Organisasi Kesehatan Dunia (WHO) ngataken maka 1 arah 7 anak singuda lit masalah kesehatan mentalna, termasuk kuatir ras depresi. FOMO (takut ketinggalan) erbahanca anak singuda mekelek leket ku gadgetna, si erbahanca ia kecanduan digital ras terlalu berpikir. Akses si gampang ku media sosial pe memicu kecanduan pornografi (PMO = pornografi - masturbasi - orgasme), kecanduan game online ras kecanduan judi online si erbahanca turah masalah si mbelin i bas kegeluhen anak singuda, jabuna rikutpe ku masyarakat.

Kecanduan gadget ras media sosial pe erbahanca melala anak singuda merasa la aman erkiteken rusur ia membandingken kegeluhenna ras kalak si deban i internet ntah pe media sosial janah enda banci mpeturah stres ras masalah kesehatan mental erkiteken perbandingen e me jadi pinangko utama kebahagiaan (Bandiken kisah Kain ras Abel).

Kesibuken anak muda aras internet ras digital pe erbahanca terjadi fenomena si igelari Phubbing (Phone Snubbing) sikap mengabaiken kalak si deban si sangana berkomunikasi/berinteraksi erkiteken sibuk ngenehen HP-na. Jannah enda memicu sada masalah global si iguali Loneliness/Kesepian, melala anak singuda genduari ngejajpken kegeluhren si lume/kosong/kesepian emaka ipilihna needai/menyakiti dirina alu memotong/harcoole, memukul ntah pe ndabuh ku bas kecanduan alkohol, NARKOBA ras pe kecanduan digital.

II. ISI

Itekanken Paulus ibas Roma 12:1-2 maka ibadah labo terjeng ku gereja, rende ende-enden pujin, ntah pe melayani, tapi kerna kegeluhen tep-tep wari. Kita idilo guna mereken kulanta, ertina kerina dirinta - perukuren, kata, ras perbahanenta jadi persembahen si nggeluh.

Emaka man anak singuda i bas ngalaken tantangen jaman si gundari, arah nas ogenta enda lit makna si tuhu-tuhu relevan:

1. Godaan guna seri ras doni enda seh kal belinna.
   Doni enda menawarken sada taraf kegeluhen si rusur bertentangan ras Kata Dibata: popularitas iukur arah jumlah like ras pengikut, kebahagiaan iukur arah hal-hal materi, ras kebenaren rusur ipenusur ku "kade-kade". Anak singuda alu melukah ngikutken jelma si nterem alu la isedarina, menganggap hal-hal normal si la sue ras peraten Dibata.
2. Pendilo guna la seri ras doni enda.
   Paulus mereken pedah: "Ula pelepas dirindu jadi seri ras doni enda." Ertina anak singuda Kristen idilo guna pang berbeda, labo sekedar ngikuti tren si bertentangan ras Kata Dibata. Contohna: Adi doni enda ngatakenca, "Kerina kalak bebas berhubungan sex (free sex)." Tapi Kata Dibata ngatakenca kulanta eme rumah pertoton Kesah Si Badia. Adi doni enda ngatakenca, "Citra diri itentukan penampilen luar," nina Kata Dibata, maka kita meherga erkiteken kita enda tinepa Dibata alu mehuli, seri ras segambar ras tempasNa.
3. Pembaharuan ukur eme kuncina.
   Perukurenta melukah ipengaruhi kai si lit i bas media sosial, hiburen, ras lingkungenta. Tapi Kata Dibata mindo pembaharuan perukuren, pembaharuan perukuren arah pertoton, komunitas-komunitas rohani, ras gaya hidup si disiplin, sehat. I je nari, banci siangka kai si tuhu-tuhu mehuli, labo terjeng kai si "teridah mehuli."

Tambah si e, bagi si tersurat i bas Pustaka Si Badia kitab 2 Timotius 3:1-4 ngatakenca:

"Ingetlah! I bas wari-wari pendungi pagi mbué reh kiniseran. Sanga si e pagi manusia nggeluh ngukurken dirina saja, merangap, meganjang rukur dingen nipu. Cekurak ia, la ibegikenna kata nande-bapana, la ia nggit ngataken bujur, dingen lanai diatena eragama. Lanai lit i bas ia kekelengen dingen ate mekuah. Ijurukenna kalak si deban. La ia ralang-alang meraua dingen merampus. La atena ngena si mehuli. Idayakenna temanna, njubmit ukurna dingen meganjang ukurna. Lana diatena Dibata, tapi kesenangen saja idaramina."

Mari dage PERMATA GBKP! Arus pang melawan arus doni! Labo kerina si viral arus si ikuti. Sibar-sibarna labo trending ras la trending, tapi sue ntag la sue ras Kata Dibata. Pebelinlah ukurndu: demi ukurndu alu Kata Dibata ras mbuo ertoto, ula hanya scroll media sosial tanpa filter (sik-sik lebe/megermet). Jadikenlah kegeluhemndu jadi bentuk ibadah: Carandu erlajar, carandu mehamat man orang tuandu, carandu erbahan perbahanen i kampus/ingan erdahin, bahkan carandu make gadgetndu, kerina banc i pakekendu jadi bentuk ibadah man Tuhan, adi ncidahken biak Kristus lit i je, bahanlah algoritme si positif ras membangun i bas media sosialndu. Daramilah sura-sura Dibata, labo validasi manusia: Pengikut banci berfluktuasi/mbuo, tapi nilainta i lebe-lebe Dibata tetap rasa lalap. Anak singuda Kristen idilo labo saja helah tek man Jesus, tapi pe pang berbeda erkiteken Jesus. Doni enda lalap menawarken jalan pintas guna popularitas ras penerimaan, tapi Kata Dibata mabai ku dalan si mabai ku kegeluhen si ngena ateNa ras kuh i lebe-lebeNa.

III. PENGKENAINA

Nginget fenomena ras data faktual enda, maka seh kal pentingna man anak singuda (PERMATA GBKP) guna njaga kesehatan perukurenna/mentalna bagi ia njaga kesehatan kulana. "Kula e labo sehat adina perukuren/mental pe la sehat." Nas PAnta sendah si ibuat i bas Roma 12:1-2 nari, mpersingeti kita gelah ula seri ras doni enda tapi mere min segelah perukurenta ipelimbarui Dibata, gelah reh ngasupna kita meteh kai si jadi peraten Dibata, e me kai si mehuli, kai si ngena ateNa dingen kai si sempurna.

Situhuna enggo mbuo praktek-praktek si enggo ianggap biasa i bas anak singuda, si la sue ras Kata Dibata, umpamana: hedonism (gaya kegeluhen si ndarami hal si meriah-meriah saja/la ngukurken wari pepagi), gaya hidup bebas, pornografi (ndedah gambar porno), seks sope denga perjabun, bullying (kata-kata si encedai ukur kalak/nokohi kalak), la bujur, individualism (ngukurken dirina saja), cakap melket si la erturi-turin, rsd.

Kata Dibata i bas 1 Timotius 4:12:

"Ula kal pelepas ise pe mapas man bandu erkiteken kam nguda denga. Tapi jadilah kam man usihen kalak si tek, subuk i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurndu bujur."

Payo, maka i bas tan anak singuda me masa depan jabu, gereja, bangsa, ras doni enda reh ulina. Njaga kesehatan mental/perukuren eme salah sada cara guna ngadapi melala stresor (jelma si stres) si lit gundari. Kata Dibata ibas 1 Petrus 4:7 ngatakenca:

"Kedungenna kerina si nasa lit enggo ndeher. Emaka kuasailah dirindu dingen petenengah ukurndu gelah ngasup kum ertoto."

Mari si pelajari piga-piga teknik manajemen stres si melukah dalanken ibas kegeluhenta tep-tep wari gelah banci kita ndatken kedamen.

a. PENGEIOLAAN STRES alu Metode 4A

AVOID / HINDARI
Ula ndeher ras kai si la perlù, si la penting, ras si berbahaya. Laba kerinana perlù. Kuasai emosindu.

ALTER / UBAH
Kurangi beban stres alu ngaturken prioritas, ngaturken waktu mereken tugas man kalak si deban, ras mindo penampat.

ADAPT / BERADAPTASI
Menyesuaiken diri ras stres, ngelakoken hobi si meriah, njaga gaya hidup si sehat, ndarami hiburen ras komunitas si mendukung.

ACCEPT / MENERIMA
Ula pebelin hal-hal si la terjukur/ras mesera si dat, si erbahanca picet ukurta. Erlajar kita ngaloken situasi e alu la merawa nandangi kinata si lit. Dibata labo saja mereken hal si mehuli, tapi hal si la mehuli/persoale pe ibereken Dibata gelah kita reh dewasana/matang. Labo banci si kuasai kerinana, tapi respon/tindaken i bas kita ngalaken kai si reh, banci si kuasai.

b. BUTTERFLY HUG / PELUKAN KUPU-KUPU

(Lakokenlah enda sanga kam stres, ceda ate, kuatir, gelisah)

Langkah-langkahna:

• Tutup matandu janah bayangkanlah ingan si nyaman.
• Silangkan tanndu bagi si ngkuit dirindu.
• Ernapas alu manjar-anjar, alu lembut, ras santai.
• Tepuk-tepuk alu lembut bara/bahundu seh maka teneng iakapndu janah belasken kata-kata si mereken motivasi/penegasen-penegasen positif: "Tenang, santai, aku berharga, kerinana pasti mehuli, kerinana banci ku dungi."

c. GROUNDING

Grounding eme manajemen stres alu fokus ku momen si genduari, i jenda ras paksa enda/genduari. Bayangkan kam sangana i datas batang kayu janah rempet reh badai, udan baho, angin si meter, ras kilap. Adi tetap kam i datas batang kayu e, banci kam ndabuh janah luka. Hal si paling aman eme nusur ras ground dirindu. Enda me si igelari pembumian.

Ibas kegeluhenta tep-tep wari, rusur si gejapken badai emosi, eme perukuren ras penggejapenta si mberat. Umpamana kenangen si mesui kerna masa si enggo lewat, kuatir kerna masa si reh, ntag pe perasan negatip si genduari bagi: merawa, ceda ate, cemas, ras gelisah.

Langkah-langkahna:

• LIHAT: nen 5 benda i sekelewetndu, fokuslah ku je, janah belasken gelarna
• RABA: jemak/kuit manjar-anjar 4 benda i sekelewetndu, fokus ku je, janah gambarken bentukna, teksturna, piher/kerasna, medate/kelembutenna, ras permukaanna
• DENGAR: begiken 3 sora i sekelewetndu, fokuslah ku je, janah belasken sora kai si ibegindu
• RASAKAN: nanami 2 nanam/rasa pangan/inemen i bas babahndu, turiken nanamna, melas entah mbergeh.
• CIUM: angeghe 1 aroma/bau, ras belasken bau kai aroma/bau si igejapkendu

Kenca si e, fokus ras mulihken ku kegiatendu tep-tep wari, perdiatekenlah kalak si lit i sekelewetndu ras kai si lit i sekelewetndu.

d. TEKNIK PERNAPASAN 4-7-8

Adi lit kalak si stres, pernapasenna jadi meter ras gendek, emaka lanai lit oksigen si masuk ku paru-paru ras otak. Enda memicu hormon stres (kortisol), si erbanca stres reh parahna. Adi sanga aturndu pernapasendu, pasti lit aliren oksigen si cukup ku bas dagingndu. Salah sada teknik eme keknik Napas 4-7-8.

Langkah-langkahna:

• Hirup/tarik napas arah igung nari ibas hitungen 4 detik
• Tahan napasndu i bas hitungen 7 detik
• Kenca bage pedarat napas alu ngembusken arah babahndu nari i bas hitungen 8 detik
• Lakoken 5-10 kali

e. MENGATASI OVERTHINKING

Pikiren Negatip Otomatis
Sipat: Spontan, otomatis, negatip, menakutken, la lit bukti si konkret/nyata

Contohna:

• Aku pasti gagal mulihi
• Pasti labo kalak e senang man bangku
• Geluhku enggo ceda

Dampakna:

• Perasan negatip, kuatir, sedih
• Hubungen/relasi terganggu
• Kinerja ras fungsina enggo kurang

Pikiren Positif Rasional
Sipat: ipikirken lebe, masuk akal, positip, erpalasken fakta.

Contohna:

• Banci kueubaken mulihi kenca si e
• Labo kerina kalak cocok i bas pertemanen, maka banci aku ngaloken temanku
• Lit sada pelajaren si banci kupelajari/rukur positip

Dampakna:

• Lebih tenang, lebih santai, ras nyaman
• Hubungen la terganggu
• Fungsi kehidupan stabil

Ubah Pemikiren Negatip Otomatis jadi Pemikiran Positif Rasional alu ngelakoken 3R:

• RECOGNIZE (tandai/kenali)
• REFRAME (ubah)
• REPLACE (ganti)

Adi kerina cara i datas enggo icubai janah lenga berhasil, ula ragu-ragu guna konsultasi ras profesional kesehaten mental bagi psikiater, psikolog perawat kesehaten mental, ntag pe konselor guna ndatken penampat s pedas ras tepat.

Labo lalap mehuli wari-warindu, tapi banci ihadapindu alu sikap si mehuli. Meteh maka 10% kegeluhenta itentuken arah kai si terjadi man banta (peristiwa, perbeben, situasi si la terkendaliken) ras sisa 90% itentuken arah uga kita meresponsa (perukuren, sikap, keputusen).

Jeda kentisik, matawari pe iangkana kuga pentingna ngadi sanga nandangi ben. Atendu kin tetap erdahin seh maka enggo meseng? Pekesahkenlah/istirahatlah kam gelah banci kam ersinar mulihi pagi. Jeda labo ngadi, tapi strategi bagi matawari pultak karaben, gelah pagi banci erbahan mulihi si lebih mehuli. Labo kerina perdalanen arus merudu, piga-piga langkah perlu jeda gelah ula bene arah. Yakinken diri maka pagi reh ulina, labo masalah ngadi sekali-sekali. Labo menyerah, tapi enda me cara guna njaga pengarapen tetap gara ras meteguh.

Ingetlah uga Kata Dibata ibas Matius 11:28 nina:

"Marilah kam si latih dingen beraten maka Kubereken pengadi-ngadinndu."

Adi la banci kam tawa rusur-rusur nandangi cerita lucu si seri, engkai maka tangis ras ceda atendu rusur erkiteken masalah kegeluhen si seri? Marilah kita jadi sekalak PERMATA GBKP si njadiken kesehaten mental jadi prioritas i bas kegeluhen enda. See u on top gaizzz!

IV. METODE: Studi Kasus

Brian sekalak mahasiswa bas sada universitas i Bogor. Erkiteken mberat beban pelajarenna ras gaya hidup hedonis (mewah) si iidahna arah teman-temanna, Brian mulai ngenanami stres, mulai ia la bani tunduh (insomnia), jantung berdebar, terganggu asam lambungna/pencernaan si usur igelari GERD, ras rusur merasa sedih ate si mbages.

Piga-piga teman-temanna mperdiatekensa maka semangat akademik Brian enggo berkurang, enggo mulai ia bolos kelas, janah terlambat mereken tugas. Enggo piga-piga kali ituriken Brian man teman-temanna si ndeher maka ia putus asa janah enggo iusahakenna nyayat/motong ntah pe needai dirina sendiri, atena gelah bani pindah perbeben si lit ibas ukurna ku perbeben/pinakit bas kula/fisik.

Selaku anggota PERMATA GBKP, uga carandu nampati Brian ngalaken stres ras masalah kesehaten mental? (Latih en role play ngelakoken teknik-teknik si enggo ipeseh i datas.)

V. USULAN LAGU
Jangan Pernah Menyerah


dr. Lahargo Kembaren, SpKJ (GBKP Runggun Bogor)