BIMBINGEN PA MAMRE TANGGA 08 Maret - 14 Maret 2026

Ikutken Undang-Undang Dibata

Ogen : Jakub 2:8 - 13

8 Adi iikutkenndu Undang-undang kinirajan Dibata, bagi lit tersurat i bas Pustaka Si Badia, "Kelengilah temanndu manusia bagi kam ngkelengi dirindu," mehuli kap perbahanenndu e.

9 Tapi adi rayo-ayo kam, erdosa kam, janah Undang-undang ngukum kam selaku kalak si ngelanggar Undang-undang.

10 Sada la idalanken kalak Undang-undang e, kerina nggo ilanggarna.

11 Sabap Ia si ngataken, "Ula erlua-lua," Ia pe si ngataken, "Ula munuh." Jadi aminna la pe kam erlua-lua, tapi adi munuh kam, kam nggo ngelanggar Undang-undang.

12 Ngerana dingen erdahinlah bagi kalak si nandangi iadili alu Undang-undang si erbahanca manusia bebas.

13 Kalak si la rate mekuah man kalak si deban, iukum alu la lit perkuah ate. Tapi perkuah ate gegehen asa ukumen.

Yakobus 2:8 - 13

8 Akan tetapi, jikalau kamu menjalankan hukum utama yang tertulis dalam Kitab Suci: "Kasihilah sesamamu manusia seperti dirimu sendiri", kamu berbuat baik. 

9 Tetapi, jikalau kamu memandang muka,kamu berbuat dosa, dan oleh hukum itu menjadi nyata, bahwa kamu melakukan pelanggaran.

10 Sebab barangsiapa menuruti seluruh hukum itu, tetapi mengabaikan  satu bagian dari padanya, ia bersalah terhadap seluruhnya. 

11 Sebab Ia yang mengatakan: "Jangan berzinah", Ia mengatakan juga: "Jangan membunuh  ". Jadi jika kamu tidak berzinah tetapi membunuh, maka kamu menjadi pelanggar hukum juga.

12 Berkatalah dan berlakulah seperti orang-orang yang akan dihakimi oleh hukum yang memerdekakan orang.

13 Sebab penghakiman yang tak berbelas kasihan akan berlaku atas orang yang tidak berbelas kasihan.Tetapi belas kasihan akan menang atas penghakiman.

Tujun : Gelah Mamre :

1. Meteh aturen persidangen rikutken teks.
2. Banci erlajar kerna aturen persidangen gereja

I. KATA PENARUH

Undang-undang ilitken eme guna kiniraturen ras kiniulinnta ras -ras. Kerina undang-undang harus berlaku seri man kerinana la banci diskriminatif. Undamg-undang ilitken guna kiniraturen gelah ula lit kalak nggeluh erbana-bana ras bertindak bagi surasurana saja . Alu litna undang-undang maka kerina tindaken manusia arus sue ras aturen si enggo ilitken.

I bas kinatana enggo pe ilitken aturen-aturen tapi pelangaren tetap terjadi. Si enda jadi erkiteken undang-undang e lenga denga menyatu ras kegeluhenta . Adi undang-undang enggo menyatu ras kegeluhenta maka undang-undang e teridah arah perukuren, pengerana, perbahanen bagepe pengkebet kegeluhenta. Tapi adi undang-undang adi sipakekan tupung kita perlu saja maka undang-undang e banci jadi iberlakukan tupung lit keperlunta/ kepentingenta ngenca. Adi menguntungken siberlakuken tapi la menguntungken maka undang-undang e siabaiken bahkan si tabrak pe labo dalih. Bagi nina kuan-kuan si lit bererdar itengahtengah masyarakat singataken “Peraturan ada ( dibuat) untuk dilanggar”. Arah bahan PA Mamrenta sekali enda ibabai kita guna ngidah kerna pentingna undang-undang e ras arus sipatuhi , janah kerina undang-undang e seri nilaina labo banci sipilih pilihi adi bagi ukur sidalanken tapi adi la bagi ukur banci la sidalanken.

II. URAIAN TEKS

Surat Jakub enda isuratken man kalak Kristen siberlatar belakang Jahudi si sepuluh dua suku si merap marpar i daerah Judea. Kalak enda ngenanami kiniseran erkiteken penganiayaan. Jakobus erban surat man kalak Kristen sisangana ngenanami kiniseran gelah tetap paguh kinitekenna janah tetap nggeluh ngikutken undang-undang Dibata sebab arah cara nggeluh sibagenda me dalanna kalak enda banci ersaksi kerna Berita Si Meriah ku sekelewetna.

I bas kegeluhen enda mekatep terjadi pengelakona man temanna alu ngenen status sosialna. Adi kalak bayak entahpe erjabaten iperlakuken alu istimewah janah guna si e mekatep kalak musil ikorbanken. Jakbobus ngidah maka praktek rayo-ayo terjadi ketidakadilen ras perlakun semena-mena nandangi kalak simusil ras silemah. Kalak iergaken ras iperlakuken alu ngenen status sosialna; jabaten, kekayaan, bagepe hubungen perkade-kaden. Adi lanai kita memperlakuken temannta manusia alu nilai-nilai kemanusiaan maka aturen-aturen silit lanai berlaku. Manusia bertindak rate-ate menurut kepentingan ras keuntungenna saja. Sada sisi lit kalak si sangat isanjung ras i ergaken tapi sisi sideban lit kalak si itindas ras mengalami ketidakadilen.

Jakobus ningetken kalak sitek gelah ngikutken kerina undang-undang Tuhan e la erdobahen ( ayat 8 ) . Undang - undang e berlaku seri man kerinana subuk man kalak sideban bagepe man banta tanpa terkecuali. Kerina Undang-undang Dibata ilitken la lit si ganjang teruken kerina seri nilaina. Emaka adi lit kalak si la ndalanken sada bagin Undang-undang Dibata tetap salah la banci ibenarken alu ngataken sada kap ngenca si la idalankenna (ayat 10). Mengabaiken sada undang-undang Dibata seri nilaina ras la ndalanken piga piga aturen Dibata. Kesalahen ibas la ndalanken Undang-undang Dibata la inen alu buena si ilanggarna bagepe beratna perbahanen si ilanggarna. Ngasup kin kita ndalanken kerina Undang-undang Dibata e ? Tentu arus siakui alu jujur labo kita ngasup . Pesan si ate ipeseh arah bahan PA enda eme gelah ula kita membenarken diri ibas kesalahen adi kune si langgar Undang-undang Dibata alu menganggap e soal kitik kap ngenca. Jenari adi sedar kita pe labo ngasup ndalanken kerina undang-undang Tuhan maka ula ka kita menghakimi temanta sebab kita pe silanggar ka nge undang-undang Dibata, emaka perlu kita berlaku adil gelah ula bertindak rayo ayo ( ayat 9). Sipaling penting tetap isingetken maka perkuah ate Tuhan ndauh gegehen asangken hukumen erkiteken la kita ngasup ndalanken undang undang Dibata alu serta ( ayat 13).

III. PENGKENAINA

Keputusen gerejawi bas gerejanta ibuat i bas persidangen gereja. Kerina keputusen gerejanta melalui proses i rungguken emakaitetapken jadi sada keputusen. Ibas proses enda me kita berdiskusi nehken pendapatta ras mbegiken pendapat temanta guna ndarami apai sijadi pilihen keputusennta. Keputusen si ibuat kita labo persoalen menang kalak tapi apai siakap simehulina guna kemajun ras kebutuhan gerejanta si ipalasi alu sura-sura Tuhan. Ibas keputusen gerejanta enda melala aturen-aturen si enggo itetapken mis terkait ku sistim organisasi, sistim keuangan, penggembalaan, konfesi (Pokok-poko pengakun). Tentu i bas erban keputusen bagepe aturen enda tetap nge i palasi alu pustaka si Badia. Saja gelarna aturen-aturen si iban manusia tentu tetap nge lit kekurangenna ras tetap mengikuti kebutuhan ras perkembangan zaman. Aturen-aturen gereja ilitken gelah lit gelementa ras-ras guna kiniraturen ras kiniulinta ras ras gelah ula kita rate-ate . Aturen-aturen e jadi ‘alat kontrol’ i bas mengevaluasi perdalinen gerejanta ras kiniraturenna tetap teridah.

I bas persidangen gereja enggo lit aturen si itetapken miasalna : sidang sah adi ihadir ½ n ibas peserta sidang. Persidangen ipimpin oleh ketua janah kerina percakapen irekam iban notulen sidang oleh sekretaris. Kerina peserta sidang ibereken kesempatan guna ngerana bagepe kerina perserta sidang arus mperdiateken tata tertib persidangen. Kerina keputusen iupayaken alu musyawarah ras mufakat. Kerina keputusen si engo itetapken mengikat ras berlaku man kerina peserta guna idalanken. La banci sipilih -pilihi kai si cocok man banta. Adi kerina kita matuhi aturen persidangen tentu tek kita ulihna pe mabai kiniulin ras kemajun man gerejanta.

IV. DISKUSI

1. Arah bahan oratenta, Kai tujun Jakub ningetken kalak si tek gelah ula rayo ayo i bas ndalanken perentah Dibata ?
2. Menurut pengidahta, kai penyebab maka aturen-aturen keputusen gerejanta emkatep ilanggar ? Janah bereken solusi guna mpesikapsa.

USULAN ENDE-ENDEN :

1. KEE GBKP No 249:1,3
2. KEE GBKP No 286:1,2
3. KEE GBKP No 110:1,4
4. KEE GBKP No 385:1 (Persembahen)

Pdt. Rehpelita Ginting, S.Th., M.Min