Mengasihi Allah (duka)

SI MAN OGEN        : Jop 2:1-10

2:1 Pada suatu hari datanglah anak-anak Allah menghadap TUHAN dan di antara mereka datang juga Iblis untuk menghadap TUHAN. 2:2 Maka bertanyalah TUHAN kepada Iblis: "Dari mana engkau?" Lalu jawab Iblis kepada TUHAN: "Dari perjalanan mengelilingi dan menjelajah bumi." 2:3 Firman TUHAN kepada Iblis: "Apakah engkau memperhatikan hamba-Ku Ayub? Sebab tiada seorangpun di bumi seperti dia, yang demikian saleh dan jujur, yang takut akan Allah dan menjauhi kejahatan. Ia tetap tekun dalam kesalehannya, meskipun engkau telah membujuk Aku melawan dia untuk mencelakakannya tanpa alasan." 2:4 Lalu jawab Iblis kepada TUHAN: "Kulit ganti kulit! Orang akan memberikan segala yang dipunyainya ganti nyawanya. 2:5 Tetapi ulurkanlah tangan-Mu dan jamahlah tulang dan dagingnya, ia pasti mengutuki Engkau di hadapan-Mu." 2:6 Maka firman TUHAN kepada Iblis: "Nah, ia dalam kuasamu; hanya sayangkan nyawanya." 2:7 Kemudian Iblis pergi dari hadapan TUHAN, lalu ditimpanya Ayub dengan barah yang busuk dari telapak kakinya sampai ke batu kepalanya. 2:8 Lalu Ayub mengambil sekeping beling untuk menggaruk-garuk badannya, sambil duduk di tengah-tengah abu. 2:9 Maka berkatalah isterinya kepadanya: "Masih bertekunkah engkau dalam kesalehanmu? Kutukilah Allahmu dan matilah!" 2:10 Tetapi jawab Ayub kepadanya: "Engkau berbicara seperti perempuan gila! Apakah kita mau menerima yang baik dari Allah, tetapi tidak mau menerima yang buruk?" Dalam kesemuanya itu Ayub tidak berbuat dosa dengan bibirnya.

2:1 Kenca nggo seh warina malekat-malekat ngadap TUHAN, Iblis pe ikut ras malekat-malekat e. 2:2 Nungkun TUHAN man Iblis nina, "I ja nari kam ndai?" Ngaloi Iblis, "Erdalan-dalan ku jah ku jenda niar-niari doni." 2:3 "Iperdiatekenndu ka nge suruh-suruhenku Jop?" nina TUHAN nungkun. "La lit sekalak pe i babo doni si bagi ia patuhna ras ulina. Isembahna Aku janah la lit kai pe si jahat ilakokenna. Iendik-endikndu Aku mbarenda gelah Kubere kam meneken ia aminna gia la ersebap, tapi Jop tetap nge patuh bagi si gelgel."\ 2:4 Nina Iblis njabapsa, "Keri gia kai pe labo akap kalak dalih guna ngkelengi kesahna. 2:5 Tapi genduari, bicara IsakitiNdu badanna, ugapa pe isumpahina nge Kam i adep-AdepenNdu!" 2:6 Emaka nina TUHAN man Iblis, "Merandal! Genduari ia i bas kuasandu, tapi la banci ibunuhndu." 2:7 Kenca bage lawes Iblis i bas adep-adepen TUHAN nari. Ipeturahna ugah mekelek i bas kula Jop mulai i bas tapak-tapak nahena nari terus ku piseranna. 2:8 Emaka kundul Jop deherken ingan pembuangen sampah, janah ibuatna pecah-pecah kudin taneh nggergoi ugahna. 2:9 Nina ndehara Jop man bana, "Lalap denga kin atendu patuh man Dibata? Sumpahilah Ia, jenari mateken bandu!" 2:10 Erjabap Jop nina, "Si sea-sea kuakap cakapndu e pe! Adi ibereken Dibata si mehuli, meriah siakap. Uga banci kita jungut-jungut adi IberekenNa kiniseran banta?" I bas si e kerina, aminna gia Jop i bas kiniseran, la lit ibelaskenna cakap si la mehuli kerna Dibata.

TEMA                     : Tetap Melasken Cakap Si Mehuli

TUJUN                    : Gelah Moria:

·       Meteh biak Jop ras ndeharana I bas ngalaken perbeben.

·       Erbahan kata-kata si mpemuliaken Dibata tupung ngalaken kiniseran.

METODE PA           : Role Play

Kata Penaruh.

Kitab Jop e me salah sada kitab i bas Padan Si Ndekah nuriken kegeluhen sekalak si tergelar Jop. Sekalak dilaki si tek dingen patuh man Tuhan. Jop e sekalak si erkemalangen man Tuhan si tading i Negeri Us. Keluargana enterem dingen nggeluh dem alu kemakmuren. Tapi, Dibata mereken Jop ngenanami kiniseran si mesangat, termasuk i je kerna ndehara, teman-temanna, anak-anakna bage pe erta-ertana.

Tema-tema umum Kitab Jop:

1.     Kiniseran Jop ras keadilen Tuhan: kitab Jop enda mereken jababen kerna penungkunen "Engkai maka kalak si mehuli iderpa kiniseran? Engkai maka Dibata mpediat si e jadi i bas kegeluhen anak-anakNa?"

2.     Kiniteken ras kesabaren: Jop ncidahken kiniteken si tetap paguh i tengah tantangen janah teridah kesabarenna cukup mbelin i bas ngalaken tantangen e. Amin gia lenga bo iangkana kai nge makna i babo kiniseran e.

3.     Kedolatan Dibata: Kitab Jop enda nuriken kerna kuasa ras kedolatan Dibata i bas kegeluhen manusia.

Mpebagesi Pengangkan Kerna Ogen.

Oratenta sendah nuriken kerna iulihi Iblis ka nguji Jop. Ipake kata iulihi, ertina enggo kap pernah iuji si Jop enda. Ipetangkas i bas Jop 1:15; ibunuh kalak Seba kerina suruh-suruhhen Jop. Ayat 17 iserang kalak Kaldea kerina asuh-asuhen Jop e maka irampasna kerina asuh-asuhen Jop. Ayat 19: mate kerina anak-anak Jop itindih runtuhen rumah ibahan angin meter i gurun pasir nari ngeruntuhken rumah anak Jop sintua. Tangtangna nari kitab Jop enda enggo nuriken mesangatna kiniseran. Tapi i babo si jadi e kerina ranan Jop la lit sitik pe nalahken Dibata. E maka kiniseran e pe iterusken denga (i jenda me ipake kata iulihi ndai), isuratken lit cakap-cakap Tuhan ras Iblis guna nguji kiniteken Jop. I bas bindu 2 tantangen e arah pinakit si lit i bas dagingna bage pe pengerana ndeharana.

Ayat 1-3: Dibata mereken ijin man Iblis guna nguji Jop.

I bas penungkunen Tuhan kempak Iblis i ja nari nge Iblis e, ialoi Iblis alu ngataken erdalan-dalan ku jah ku jenda niar-niari doni enda. Iblis mperdiateken kegeluhen manusia guna banci icubaina.

1 Petrus 5: 8 isuratken: "Tenanglah kam tapi metengetlah! Sabap Iblis imbangndu e gawah-gawah ku jah ku je bagi sada singa si ergaung ndarami si man jerngemenna." Iblis e musuh si aktif ras rusur ndarami kesempaten guna nerang dingen encedai kalak si tek man Tuhan. Ipuji Tuhan kal kiniteken Jop si patuh man baNa. Alu kalimat "La lit sekalak pe i babo doni enda bagi ia patuhna ras ulina." Jop tetap setia kempak Tuhan amin gia melala percuban nggeluh dingen la lit ilakokenna si jahat.

Ayat 4-7: Iblis nerang Jop alu pinakit si engkenai dagingna.

Nina Iblis man Tuhan: bicara isakitindu bandanna, uga pe isumpahina Kam. I je me ikataken Tuhan man Iblis "gundari ia i bas kuasandu, tapi la banci ibunuhndu." Pinakit kai si ngkenai Jop? E me ugah mekelek mulai i bas tapak nahe terus ku piseranna. Iblis meteh maka manusia keleng atena kulana, e maka adi tantangen pinakit reh, i je me manusia rusur kote dingen banci ka lanai setia man Tuhan.

Ayat 8-10: Jop tetap saber dingen erkemalangen man Tuhan.

Kundul deherken ingan pembuangen sampah i bas jaman si e maknana e me: tanda erceda ate (kesedihan mendalam dalam budaya Timur Tengah Kuno), tanda kiniteruken ukur i lebe-lebe Dibata bage pe sedar kondisi dagingna si labo nyaman man kalak. Guna si e me iserapkenna bana ku ingan si bage.

E maka ngidah situasi si bagenda rupa, ngerana me ndehara Jop nina: sumpahilah Dibatandu dingen mateken bandu. Situasi si bagenda e me situasi kelungunen, lanai lit teman. Tapi luar biasa jawaben Jop man ndeharana "adi ibereken Dibata si mehuli, meriah siakap. Uga banci kita jungut-jungut adi iberekenNa kiniseran banta?" Bage me amin gia mesangat kal perbeben e tapi Jop la lit melasken ranan si la mehuli man Dibata. Jop ngejapken maka tuhu-tuhu si sada ia i bas ngalaken perbeben e; kemusilen, kematen anak ras la lit si mbela perkarana. Amin bage gia ngasup engkuasai perukuren ras pengeranana guna la nalahken Dibata.

Pengkenaina

1.    Kitab Jop enda mereken pengajaren maka kiniseran geluh banci jadi labo uli dosa saja, tapi banci saja Dibata nguji kinitekenta bage pe mereken rancangen si mbelin asa si ipahami kita selaku manusia.

2.    Kiniteken ras kesabaren e me kunci guna ngalaken tantangen dingen ngasup mpertahanken kiniteken tetap man Dibata.

3.    Dibata nge teman si tuhu-tuhu, amin gia teman geluhta la ndukung kita, maun mahanca ukurta kitik. Tapi Dibata la pernah nadingken kita. Jadi situasi geluh enda si pegancih-gancih meriah entah susah, Dibata tetap ras kita. Erpengendes tetap man Dibata, ula sempat perbeben e mabai kita ku perukuren Dibata la erkuasa. Tetaplah akui Dibata e, ngataken bujur i bas kerina perbahanenNa, alu tetap melasken si mehuli. La gia mehuli si jadi tapi ranan kalak si erkiniteken tetap mehuli.

Role Play alu melasken kata-kata motivasi (irekam janah iupload ku media sosial)

Teptep Moria si hadir ibereken waktu guna ngerenungken kerna situasi kegeluhenna kususna si kurang riahna, si la bagi ukur, umpamana (ekonomi, pinakit, la siangkan). Tapi kata-kata si ndarat arah babahna labo kelsehen, tapi kata-kata motivasi guna mpegegehi dirina bage pe teman si megi-megi.

Umpamana "Setiap tantangan adalah kesempatan untuk tumbuh. Takkan kubiarkan tantangan memadamkan semangatku!"

Pdt. Kristiani F. Br. Tarigan