Ketangguhan Menghadapi tantangan

SI MAN OGEN        : Matius 7: 24-27

Dua macam dasar

7:24 "Setiap orang yang mendengar perkataan-Ku ini dan melakukannya, ia sama dengan orang yang bijaksana, yang mendirikan rumahnya di atas batu. 7:25 Kemudian turunlah hujan dan datanglah banjir, lalu angin melanda rumah itu, tetapi rumah itu tidak rubuh sebab didirikan di atas batu. 7:26 Tetapi setiap orang yang mendengar perkataan-Ku ini dan tidak melakukannya, ia sama dengan orang yang bodoh, yang mendirikan rumahnya di atas pasir. 7:27 Kemudian turunlah hujan dan datanglah banjir, lalu angin melanda rumah itu, sehingga rubuhlah rumah itu dan hebatlah kerusakannya."

7:24 "Ise megi katangKu enda dingen ngikutkenca, ia bali ras kalak pentar si majekken rumahna i babo batu. 7:25 Rumah e labo runtuh aminna gia reh banjir ras angin si meter nderpasa, sabap rumah e ipajekken i babo batu. 7:26 Ise si megi katangKu enda tapi la ikutkenna, ia bali ras kalak lenge si majekken rumahna i babo kersik. 7:27 Asum reh banjir ras angin meter, minter runtuh dingen sontar rumah e."

TEMA                     : Pentar Emaka Paguh

TUJUN                    : Gelah Moria:

·       Meteh palas si paguh si ituriken Jesus.

·       Nimbak pengajuk tantangen jaman si genduari.

METODE PA           : Sharing

Kata Penaruh

Kitab Matius enda isuratken nandangi kalak Jahudi, si terkenal i bas kepentaren ras kiniraturenna geluh. Teptep jabu ratur ngajarken Taurat Musa man anak jabuna. Kepentaren kalak Jahudi e teridah arah alur penulisenna si ertorosen mbenaken trombo Jesus, ketubuhenNa selaku kalak Jahudi, pendahinNa rikut ras kematen bage pe kekekenNa. Tole pe arah kitab enda nuriken maka Jesus e me si engkelengi doni enda bagi si ipadanken ndube i bas Padan Si Ndekah. Jesus me guru si mbelin, pengajarenNa mpelimbarui pengajaren si sedekah enda iajarken i bas kebudayan ras agama si lit. Ibenai alu kotbah i datas uruk. Enda me jadi kesimpulen kotbah si ituriken ibenaken i bas pasal 5 nari. Mari sigargari kai saja pedah si jadi pelajaren man banta.

Mpebagesi Pengangkan Kerna Ogen

Kotbah Jesus i datas uruk itutup alu anding-andingen kerna majekken rumah i babo batu ras i babo kersik. Lit dua perbandingen si ipake e me:\

Ading-andingen enda banci siantusi adi siperdiateken kerna iklim i Palestina. Teptep tahunna i Palestina lit musim perlego alu la lit sentaktak pe ndabuh udan (musim enda jadi bulan Mei seh September), Tupung perlego taneh e jadi mekeng e maka kalak lenge erpengakap minter banci ipajekken rumah ibabona. La ndauh pengukurina maka i Palestina enda pe lit musim perudan si meder rikut ras angina si meter. Tupung perudan lau udan deleng-deleng nari maler erbahanca murah reh banjir. E maka rumah si ipajekken i babo taneh (kersik) la banci ertahan ndekah. Erkiteken udan si meder rikut ras anginna si meter erbahanca sontar/runtuh me rumah e. Lain ras rumah si ibangun kalak si pentar, ibahanna palas si mbages i bas batu nari. Ikalina taneh e seh mbages. E maka aminna pe reh udan rikut ras anginna meter, rumah e tetap paguh. Arah si enda Jesus mereken pengajaren si mbaru maka kalak si nggeluh i bas pengajaren Jesus tetap paguh aminna pe reh banjir ras anginna si meter. Kalak si la ndalanken pengajaren Jesus ndabuh me i tengah-tengah udan meder, anginna meter ras banjir si jadi e.

Ise kini kalak pentar? E me kalak si megi dingen ngikutken kata Dibata. Megi labo terjeng mereken pingel, kenca si e ilupaken me kai sibegi ndube. Megi e seh ku bas perukuren. Kai sibegi e ikusur-kusur, itimbang-timbang ras idalanken. Ndalanken kata Dibata e me kepentaren ras kalak e nge si bengket ku bas Kinirajan Surga. Enda me singena ateNa (7:21). Si ndalanken kata Dibata labo mesunah dabuh/runtuh amin kai pe si jadi. Kalak lenge megi tapi la ngikutken kata Dibata. Si enda ikotbahken erkiteken paksa si e enterem kalak si pentar isekelewet Jesus subuk kalak Parisi, guru-guru agama si usur melasken Taurat ras peraturen-peraturen ibassa, tapi la ndalanken Taurat e. Pengajaren e terjeng i bas pingel ras babah, la seh ku bas perbahanen si teptep warina. E maka ulinna pe mesunah runtuh. Ertina kepatuhen ndalanken undang-undang Dibata erbahanca kepentaren nepet kegeluhen.

Pengkenaina

Kai dage ulihna adi rusur megiken kata Dibata? Tatap ku sekelewetta, melala tantangen/rungga sinialaken kita. Melala sinawarken konsep geluh si mesunah, la ribet, la susah. Melala sì lanai ngergaken diri, nggit dayaken diri man kalak sideban guna ndatken barang-barang sinisuraken. I bas media sosial guna ndatken duit, postingen-postingen si uga pe ibahan. Lanai ngasup engkuasai diri arah pinjol, mekar (pinjaman alu pengalaren perminggu), judi online ras sidebanna. La terjeng si e enggo reh teremna pe kalak si lanai "megatel pe kutuna" (terbeban) ngidah kalak sideban teriket ku bas kegeluhen si la payo umpamana la reh-reh ku gereja, teriket ku bas pergaulen bebas, ras sidebanna.

Kita tading bas doni si seri ras kalak sideban. Selaku kalak sierkiniteken ibabai kita segelah pentar; nggit megiken, niksiki ras ndalanken kata Dibata. Megiken kata Dibata banci arah paksa teneng, PA, PJJ bage pe kotbah minggu ras sidebanna. Kata e si jadiken palas i bas perukuren ras perbahanen. Labo cakap saja tapi tuhu-tuhu idalanken. Ceda dingen cigalah ate ngidah kegeluhen si la payo, sabab kata Dibata sibegi ndube ngeranai lalap i bas pusuhta. E maka kegeluhenta jadi kesaksin, kai gia si reh nderpa kegeluhen subuk tawaren judi online, pergaulen bebas, pinjamen online, la kita nggit ikut ku je. Beda ras kalak lenge; si megiken kata tapi la ndalankensa. Reh perbeben minter runtuh; mesunah terbaba arus, kote, labuh piah dungna nadingken Dibata. Marilah sicidahken kita Moria si paguh, amin kai gia si reh nderpa kegeluhenta, tetaplah kata Dibata e siengkuasai kita. Reh buena anginna ras udan sinderpa reh bagesna palas kata Dibata i bas kegeluhenta.

Sharing

Moria i bagi ku bas 3 kalak sada kelompok.

Teptep Moria ibagiken kertas HVS, pensil ras cat berwarna.

Sekalak-sekalak berkreasi, banci erbahan tulisen entah gambar sinuriken sada kesaksinna kerna kepaguhenna ngalaken perbeben (iberken waktu 10 menit guna sienda).

Kenca si e sekalak-sekalak i bas group enda nuriken kai si ibahanna e.

Dung si e bahan vidio ngendeken KEE KEE 204:2, ras itutup alu sada yelyel.

Pdt. Rosani br Sembiring