Bahan PJJ 08 – 14 November 2026

 

ARAH JESUS NGENCA KITA BANCI TERKELIN

 

Kisah Para Rasul 4:8-12

4:8 Maka jawab Petrus, penuh dengan Roh Kudus: ”Hai pemimpin-pemimpin umat dan tua-tua,
4:9 jika kami sekarang harus diperiksa karena suatu kebajikan kepada seorang sakit dan harus menerangkan dengan kuasa manakah orang itu disembuhkan,
4:10 maka ketahuilah oleh kamu sekalian dan oleh seluruh umat Israel, bahwa dalam nama Yesus Kristus, orang Nazaret, yang telah kamu salibkan, tetapi yang telah dibangkitkan Allah dari antara orang mati – bahwa oleh karena Yesus itulah orang ini berdiri dengan sehat sekarang di depan kamu. 4:11 Yesus Adalah batu yang dibuang oleh tukang-tukang bangunan – yaitu kamu sendiri –, namun ia telah menjadi batu penjuru.
4:12 Dan keselamatan tidak ada di dalam siapa pun juga selain di dalam Dia, sebab di bawah kolong langit ini tidak ada nama lain yang diberikan kepada manusia yang olehnya kita dapat diselamatkan.”

Perbahanen Rasul-rasul 4:8-12

4:8 Petrus si dem alu Kesah Si Badia erjabap man sidang e nina, "O kam peminpin-peminpin ras pertua-pertua.
4:9 Kami iadilindu kerna perbahanen kami si mehuli nandangi kalak si pangpangen e. Isungkunindu kami kerna kuga kami pepalem ia.
4:10 Dage arus ietehndu kerina bage pe arus ieteh kerina kalak Israel maka ia si tedis i lebe-lebendu enda nggo banci erdalan erkite-kiteken kuasa gelar Jesus Kristus kalak Nasaret. Ia me Jesus si nggo ipakukenndu ku kayu persilang dingen si nggo ipekeke Dibata i bas si mate nari.
4:11 Jesus si ikataken i bas Pustaka Si Badia, 'Batu si iambekken tukang nggo jadi batu palas.' Janah kam me tukang e.
4:12 Arah Jesus ngenca kita banci terkelin; sabap i belang-belang doni enda la lit itetapken Dibata gelar si deban si erbahanca kita terkelin."

 

MODEL PJJ: KESAKSIN

KATA PERLEBE

Kecerdasen buaten ntah pe Artificial Intelligence (AI) genduari tuhu-tuhu

enggo berkembang kel. La sitik kemudahen-kemudahen si itawarkenna

erbahanca enterem jelma tersampat. Terdekahen kari banci saja manusia

enggo ergantung kel man teknologi AI enda. Si kin ndai man Dibata me

kita ernalem tapi erkiteken teknologi AI enda enggo salih inganta ernalem

sabab siakap ia banci mereken serpang pulah i bas kerina masalah

manusia. Adi enda jadi, la kin lah enda tama ngaruh si mesangat kel pagi

ngurangi kinitekenta nandangi Jesus Tuhanta? Ija sedekah enda isaksiken

kita maka Jesus me sada-sadana dalan si erbahanca kita tersampat

dingen terkelin. I bas Minggu Advent enda mari mulihken kita erlajar arah

tema PJJ nta e me kap “Arah Jesus Ngenca Kita Terkelin”, segelahna reh

buena pe gia pagi si banci napati kegeluhenta tetap man Tuhan saja kita

ernalem dingen erpengendes.

ISI

Petrus e me kap sekalak ajar-ajar Jesus si sempat mersoken Jesus

erkiteken mbiarna kel ia mate iukum seri ras Jesus. Perbedaen si mbelin

jadi kenca Kesah Si Badia nusur man kerina ajar-ajar termasuk Petrus.

Sope e la ia pang mereken jawaben guna mpertahanken kinitekenna

genduari salih jadi ajar-ajar si lalap tampil i lebe-lebe jelma sienterem

guna meritaken berita kerna Jesus selaku Anak Dibata. I bas pasal-pasal

si sope teks enda banci si nehen kuga Petrus tuhu-tuhu lanai lit

kebiarenna aminna ancemen e situhuna tetap nge lit. Bage pe tupung ia

ras Johanes meritaken berita kerna Jesus i bas Rumah Pertoton si igelari

“Serambi Salomo” (Perb. 3:11) ije alu tangkas iturikenna maka Jesus si

enggo itulak jelma sienterem sie e me sinampati ajar-ajar guna

erbahanca tanda sengget, salah sadana e me kap mpepalem jelma si

pangpangen i bas Rumah Pertoton si igelari “Gerbang Si Mejile” (Perb.

3:1-10). Erkiteken kai si ilakoken Petrus ras Johanes enterem kalak si

termamang-mamang janah dungna ertambahna ka pe kalak si tek,

tercatat ije maka teremna lit kurang lebih lima ribu kalak sidilaki (Perb.

4:4). Ngidah si e kerina tentu imam-imam Jahudi pe merasa terganggu, e

maka ibabana me Petrus ras Johanes ku penjara jenari ibabana ka ku

Mahkamah Agama guna i sidang. Tapi si luar biasa, ajar-ajar si awalna

mbiar mereken pertanggungjawaben kerna kai si iimanina, tapi i lebe-

lebe pemimpin-pemimpin kalak Jahudi bage pe pertua-pertua lanai lit sitik

pe kebiarenna guna ngataken maka arah Jesus me ngenca kita banci

terkelin. Bahkan i bas ayatna si pesepuluhsadaken ije ikutip Petrus me

sada ayat arah Mazmur 118:22 guna mpertegas maka kai sinilakoken

enterem kalak Jahudi tupung sie man Jesus enda tuhu-tuhu tindakan si

salah besar. Kuasa Jesus labo terjeng ngasup mpepalem kula jelma tapi

Ia pe ngasup mpepalem tendi, e makana selain ituriken Petrus bage pe

Johanes man pemimpin-pemimpin Jahudi kerna kuasa Jesus me situhuna

sipepalemsa kalak si sangana pangpangen (ayat 9-10) ipertegasna ka i

bas ayat 12 maka arah Jesus ka me ngenca kita banci terkelin. Janah

enda enggo itetapken nai-nai nari arah Dibata, ndauh sope doni enda lit i

japape lalit gelar selain gelar Jesus si erkuasa guna maba keterkelinen.

PENGKENAINA

I bas masa Advent, persikapenta bengket ku Natal, kita iajuk guna

mulihken ngukuri kerna Jesus Tuhanta situhuna erkuasa mulahi kita

manusia arah kerina persoalenta nari, bahkan arah dosa si banci

naruhken kita kempak maut ntah pe kematen si rasa lalap. Ketubuhen

Jesus arusna jadi sada keriahen ukur man kerina kalak Kristen si sangana

erbebe, sabab pengarapen kalak si erkiniteken man Jesus lalit sada pe

sia-sia, aminna gia Jesus lanai ras kita secara fisik tapi kuasaNa tetap

nemani kita segedang-gedang geluhta. Sie me si ialami kerina ajar-ajar,

aminna Jesus lanai rasa ia kerina tapi kuasa Jesus empengasup ia kerina

ngelakoken hal-hal si mustahil ilakokenna sebelumna. Jaman genduari

kita tuhu-tuhu enggo ipermudah alu erbage-bage teknologi si canggih,

mulai arah aspek kesehaten, pendidiken, bage pe aspek-aspek kegeluhen

si debanna, terlebih alu berkembangkna teknologi kecerdasen buaten

ntah pe Artificial Intelligence (AI) banci saja kedungenna kita si anggap

maka lanai bo penting peranan Dibata i bas kegeluhenta enda. Harus si

inget maka sie kerina banci lit erkiteken perkuah ate Dibata nandangi

kita. IpepalemNa kalak sipangpangen erkelangken ajar-ajarNa labo

terjeng segelahna kegeluhen kalak sipangpangen ndai jadi semakin

mudah ngenca, tapi lebih asangken sie segelahna kegeluhenna ndai pe

banci ipake guna jadi saksi, mpersaksiken Jesus selaku Tuhan Dibata

sierkuasa, enda ka me si ilakoken Petrus ras Johanes selaku ajar-ajar i

lebe-lebe pemimpin-pemimpin Jahudi tupung sie, ipakena kisah kalak

sipangpangen ndai guna ersaksi kerna kuasa Jesus. E maka genduari kita

pe ertanggungjawab guna makeken pemere-pemere Dibata si enggo

mempermudah geluhta enda sabab sie kerina labo iberekenNa segelahna

 

geluhta semakin mudah kel ngenca, tapi lebih asa si ate Tuhan segelahna

reh ngasup ras reh beluhna kita mpersaksiken kuasaNa. Ula min

sebalikna, erkiteken teknologi i bas jaman enda semakin maju, semakin

tersampat bage pe semakin mudah siakap ngelakoken erbage-bage hal

justru enda erbahanca kinitekenta malah reh merosotna. Peranen Kesah

Si Badia arus tetap sipindo gelah ngasup kita erberita i bas masa Advent

menjelang Natal enda, siberitakenlah kerna Jesus si enggo erbahanca

geluhta pe semakin mudah, adi la kin erkiteken Ia tentuna kerina si

ilakoken kita terus nge jadi tama salah, sabab bujur pe sibahan ulihta pe

maut kel nge ngenca, tapi erkiteken Jesus enggo tubuh ku doni enda,

geluh janah mate ia guna kita e me sierbansa kita terkelin seh ngasa

genduari, bahkan seh rasa lalap. Selamat memasuki bulan menjelang

Natal. Arah Jesus ngenca kita terkelin.

DISKUSI :

1. Kai nge maksud Petrus ras Johanes i bas ayat 11 maka penting

iakapna guna ngataken sie man pemimpin-pemimpin Jahudi bage

pe ras pertua-pertua tupung ia duana i sidang?

2. Turiken ras saksiken kerna penampat Dibata si enggo inanamindu

kenca kam enggo ndalani kegeluhenndu ras Tuhanta Jesus Kristus

alu tutus!     

USULEN ENDE-ENDEN:

1. KEE GBKP No. 425:1,3

2. KEE GBKP No. 199:1,4

3. KEE GBKP No. 92:1,2

4. KEE GBKP No. 423:1,2