SANGAP AKU RADUMKEN KAMI

SI MAN OGEN : Roma 12:4-8

12:4 Sebab sama seperti pada satu tubuh kita mempunyai banyak anggota, tetapi tidak semua anggota itu mempunyai tugas yang sama, 

12:5 demikian juga kita, walaupun banyak, adalah satu tubuh di dalam Kristus; tetapi kita masing-masing adalah anggota yang seorang terhadap yang lain.

12:6 Demikianlah kita mempunyai karunia yang berlain-lainan menurut kasih karunia yang dianugerahkan kepada kita: Jika karunia itu adalah untuk bernubuat baiklah kita melakukannya sesuai dengan iman kita. 

12:7 Jika karunia untuk melayani, baiklah kita melayani; jika karunia untuk mengajar, baiklah kita mengajar; 

12:8 jika karunia untuk menasihati, baiklah kita menasihati. Siapa yang membagi-bagikan sesuatu, hendaklah ia melakukannya dengan hati yang ikhlas; siapa yang memberi pimpinan, hendaklah ia melakukannya dengan rajin; siapa yang menunjukkan kemurahan, hendaklah ia melakukannya dengan sukacita.

12:4  I bas kulanta si sada enda melala ringringna, janah kerina ringring e lit gunana.

12:5 Bage pe, amin nterem gia kita, tapi sada kula kap kita i bas persadanta ras Kristus, janah kita ipersada kerina bagi ringring i bas sada kula.

12:6 Emaka sipergunakenlah kengasupenta si pelai-lain e si nggo ibereken Dibata man banta rikutken lias AteNa. Adi man banta ibereken Dibata kengasupen ernubuat, silakokenlah e sue ras ajaren kiniteken.

12:7 Adi man banta ibereken Dibata kengasupen guna nampati kalak, sisampatilah ia. Adi man banta ibereken Dibata kengasupen ngajar, ngajarlah kita.

12:8  Adi man banta ibereken Dibata kengasupen petetap ukur kalak, silakokenlah e. Kalak si ngasup mere man kalak si deban arus iberekenna e alu ukur menahang; kalak si lit kengasupenna jadi peminpin, arus ia tutus erdahin; kalak si ngasup encidahken perkuah ate man kalak si deban, arus ibahanna e alu ukur meriah.

TEMA : SANGAP AKU RADUMKEN KAMI

TUJUAN : Gelah Moria:

• Nuriken keuntungan teptep ring-ring i bas sada kula.
• Ngataken bujur i bas kinierbagen kengasupen i bas Moria alu nehken puji-pujin.

METODE PA : Aksi

Kata Penaruh.

Surat Roma enda salah sada surat pastoral si itulisken Paulus nandangi perpulungen si i Roma. Perpulungen Roma labo bekas panteken Paulus, janah ia pe langa pernah ku Roma. Perpulungen Roma enda ipanteki kalak Kristen Jahudi si naksiken bage pe nggejapken nusurna kuasa Kesah Si Badia i bas wari Pentakosta. Surat enda itulis sanga ia ringan i Korintus, i rumah Gayus. Kalak si erkiniteken paksa si e, idominasi kalak la Jahudi ras kalak Jahudi. I je me turah perjentiken i bas perpulungen enda, labo terjeng persoalen etnis, ras ntah pe tradisi, tapi seh me ku persoalen perbedan pandangen teologi. Guna njabap situasi enda me, Paulus nehken pengajaren arah surat Roma enda, isina melala kerna pengajaren teologis. Penekenan Paulus arah surat enda e me, kerna Dibata si labo mbedaken manusia alu persoalen kesusuren ise kin kita, sunat ntah la sunat, tradisi ras sidebanna, tapi arah kiniteken man Tuhan Jesus Kristus si enggo njadiken kita anak-anak Abraham.

Pebagesi Kerna Ogen.

Roma 12:4-8 nuriken kerna lagu langkah perpulungen si erkiniteken, si arus mereken dirina guna ngelai bage pe majekken kula ni Kristus arah pemere si pelain-lain. Pemere e, e me mpetangkas keleng ate Dibata nandangi kalak si enterem seh maka itandaina dingen erkiniteken ia man Dibata saja. I bas Bahasa Junani, pemere e, e me kharismata si ertina pemere-pemere (karunia) Kesah Si Badia si iberekenNa man manusia alu cuma- cuma. Pemere-pemere Kesah Si Badia e banci sada entah lebih ialoken manusia, rikutken iakap Dibata payo ia ngalokensa. Pemere-pemere Kesah Si Badia e me si mpengasup manusia ngelakoken dahin-dahin si mehuli. Lit pitu pemere si ibereken Kesah Si Badia erpalasken penggogenta Roma 12:4-8, e me:

1. Kengasupen guna ernubuat, ilakokenlah e sentudu ras kiniteken e me sentudu ras pengajaren Kata Dibata. Nubuat e, labo kerna kai si langa seh (bd. Nabi i bas Padan Si Ndekah si ernubuat kerna kerehen Mesias), tapi kerna kebenaren Kata Dibata si erpalasken Pustaka Si Badia.
2. Kengasupen guna nampati, ilakokenna alu dem meteruk ukur. Guna kemulian gelar Dibata. Dibata erkeleng ate nandangi kalak si nggit mereken dirina guna nampati kalak si deban dingen ialokenna pasu-pasu si simpar i bas Dibata nari.
3. Kengasupen guna ngajar, nehken pengajaren-pengajaren kerna Berita Si Meriah, bage pe ndalankeneca i bas kegeluhenna si teptep wari. Dahin e arus iteruskenna alu mehuli dingen tutus, seh maka ia pe jadi kalak si setia.
4. Kengasupen petetap ukur kalak, arus tetap ukurna kerna pengajaren si isehkenna. Bage pe arus ipetetapna ukur kalak si deban alu nggejapken situasi si lit i bassa.
5. Kengasupen mere man kalak si deban, mere alu dem kebujuren ras keriahen ukur.
6. Kengasupen jadi pemimpin. Dahin enda guna nampati kalak si erdahin i bas perpulungen (gembala), ngaturken dahin-dahin perpulungen e gelah reh sikapna. Mabai kalak si papak ras ngajari ia segelah jera. Pemimpin e tentu arus banci jadi usihen nandangi kalak si deban.
7. Kengasupen encidahken perkuah ate. Dahin-dahin si ilakokenna tuhu-tuhu njadiken baban si mberat jadi menahang. Pengangkan kalak Kristen kerna pemere e arus payo dingen arus erpalasken kiniteken, si njemba perpulungen e gelah ola meganjang ukur bage pe megah akapna bana erkiteken kai sialokenna i bas Dibata nari. Kerina si ialoken e erkiteken mbelin perkuah ate Dibata si enggo mereken pemereNa. Pemere e senjata

pertendin si ibereken Dibata guna majekken kula ni Kristus bage pe guna ngelai perpulungen. Pemere e ibereken labo terjeng man sekalak jelma ngenca, tapi man enterem jelma. Kerina kalak si erkiniteken idilo guna majekken kula ni Kristus, janah Kristus me si jadi takalna. Ratur kerina, la lit si ganjang teruken, pentingen asa sideban, kerina rikutken gunana, sikawiten radu ras ndahiken basinna alu mehuli.

Pengkenaina.

Erlajar kita arah ringring si lit i bas kulanta. Kerina ndahiken dahinna rikutken gunana, la si panjang punjuten, si erpengakap pentingen ia asa si debanna. Bage me i bas kegeluhen enda, erbage dahin rikut jenisna, ebage si ndahikenca tapi kerina si erbage e erbahansa jadi kuh. Kune kerina manusia enda jadi perjuma, ise si erbinaga? Kune kerina manusia jadi dokter, ise nge jadi guru si ngajarisa? Kune kerina manusia enda jadi perbinaga, kai nge si man binagan? Tentu lanai sikap perdalanen kegeluhenta. Kerina enggo ibahan Dibata sentudu ras pendiloNa nandangi kita sekalak-sekalak. Subuk ntah kai gia pendahinta, uga status sosialta, entah kai gia pangkatta, kerina enda enggo iaturken Dibata bagi arusna guna si tatang-tatangen ras si sampat-sampaten. 'Sangap aku radumken kam', ertina ngasup kita ngidah kecibal kalak sideban i bas kelebihen ras kekurangenta bage pe sebalikna. Manusia tinepa Dibata dem alu keterbatasen, alu bage kita la banci nggeluh sisada, kita perlu kalak si deban i bas kegeluhenta. Kita itepa alu kinierbagen, labo gelah turah perubaten ntah perpecahen. Sangap aku radumken kam mbabai kita gelah ngaloken temanta si beda ras kita alu palas keriahen ukur. Dibata si nepa kita, e me Dibata si mbisa, si dem alu kuasa. Ngasup ia ngelitken bage pe ngaturken kerina si erbage-bage enda ndai alu sikap.

Aksi: Mpersembahken puji-pujin i Gereja Kenca dung PA, Moria erlajar lagu pujin "Jadikan Kami Satu" Jadikan Kami Satu - JHCC Worship (youtube.com). Janah Pujin enda iendeken i bas kebaktin Minggu si jadi Aksi PA Moria.

Pdt. Linawati br Ginting