HDS Negara Nigeria

SI MAN OGEN        : Matius 11:28-30

11:28 Marilah kepada-Ku, semua yang letih lesu dan berbeban berat, Aku akan memberi kelegaan kepadamu. 11:29 Pikullah kuk yang Kupasang dan belajarlah pada-Ku, karena Aku lemah lembut dan rendah hati dan jiwamu akan mendapat ketenangan. 11:30 Sebab kuk yang Kupasang itu enak dan beban-Kupun ringan."Dibata ermulia i bas TinepaNa

11:28 "Marilah dahi Aku, o kam si latih maba baban si mberat maka Kubereken pengadi-ngadinndu. 11:29 Tamakenlah pasangenKu ku kudukndu janah erlajarlah i bas Aku nari. Sabap Aku melias janah meteruk ukurKu; alu bage idatndu me kemalemen ate. 11: 30 Sabap pasangen si Kubereken man bandu ntabeh mabasa, dingen baban si Kutamaken ku babondu menahang kap."

TEMA                     : Aku Si Mereken Pengadi-ngadin Man Bandu: Marilah!

TUJUN                    : Gelah Moria:

·       Meteh kai si enggo isikapken Jesus man bana.

·       Ngaloi Pendilo Jesus alu reh ku Rumah Pertoton, PA Moria ras kebaktin

METODE PA           : Diskusi Ras Aksi

Kata Penaruh.

Kitab Matius enda salah sada kitab Injil si itulis Matius, si nuriken maka Jesus e me si Engkelini si ipadanken Dibata. Janah erkelang-kelangken Ia me Dibata nehken kerina padan si enggo ibahanNa ras bangsaNa i bas Padan Si Ndekah. Berita Si Mehuli enda, labo terjeng man kalak Jahudi, tapi pe man kerina manusia i doni enda.
Salah sada penekanen kitab Matius enda e me: Jesus me Guru si Mbelin, si erkuasa nuriken Undang-undang Dibata, janah ngajarken Kinirajan Dibata alu payo dingen la terukuri manusia.

Mpebagesi Pengangken Kerna Ogen.

Jesus selaku guru ndilo ajar-ajarNa gelah nggeluh ngikutken la dingen erpengendes man baNa. Pendilo enda lit 3 dampar, e me: Pendilo guna reh ndahi Jesus.

Pendilo enda isehken nandangi kerina kalak si latih dingen beraten. Kalimat "Marilah kepadaKu' e me pendilo gelah reh ndahi ras ngikutken Ia selaku Tuhan ras Juruselamat. I bas kiniteken la lit aru ate, tapi ketetapen ukur guna reh ras mindo penampat man baNa. Jesus la mindo gelah manusia sempurna lebe maka reh ndahi Ia, tapi itimaiNa manusia e i bas kegagalen ras perbebenna. Jesus ertenah gelah si latih ras beraten reh ndahi Ia erkiteken perkuah ateNa. Pendilo enda encidahken maka Jesus tuhu-tuhu mediate ras kepate nandangi situasi kegeluhen manusia.

Pendilo guna make pasangen si itama Jesus I bas Bahasa Junani "zygos", ertina kuk, bahasa Karo "pasangen." Pasangen e me kayu si ipake i datas kerahung rubia-rubia, biasana 2 beliganna ipersada jadi sada, umpamana kerbo si sangana nenggala i sabah ntah pe i juma. Ipersada me kerbo e duana gelan banci erdahin ras-ras. Gunana sepengodak sepengole mpenahangi baban si mberat. I bas sada dampar, pasangen enda tanda maka sekalak jelma e jadi budak ntah pe suruh-suruhen kalak. Ia arus mungguk ntah pe patuh man tuan si masangken pasangen e man bana. Bage me kerina jelma idilo erpengendes man Tuhan Jesus si mada pasangen e dingen nggeluh bagi sura-suraNa.

Pendilo guna erlajar man Jesus, njemba kita jadi ajar-ajarNa. Jesus e melias dingen meteruk ukur. Jesus mbandingken diriNa ras guru agama Jahudi si meganjang ukur. I bas kiniteruken ukur, Jesus ndalani kegeluhenNa alu ernalem man Dibata dingen sikap hubungenNa ras kalak si deban si lit isekelewetNa. Jesus kap guru si dem kepentaren si mereken erbage pengajaren i bas kegeluhen si mehuli.

Pengkenaina.

Jesus ndilo kerina manusia guna reh ndahi Ia i bas kerina keterbatasenna, bage pe kiniseranna. Pendilo enda gambaren keleng ateNa si la ersibar, si mereken keterkelinen arah pengalemi dosa, kemalemen ate bage pe ketenengen. Selaku kalak si erkiniteken, kita idilo guna mbaba kerina persoalen, kiniseran ras baban geluhta man baNa sabap i bas Ia ngenca lit keriahen ukur ras kemalemen ate si tuhu-tuhu. Alu ngaloken pendilo Jesus e, kita ndatken kemalemen ate i bas Dibata nari, ersaksi man doni kerna keleng ateNa, bage pe nggeluh i bas keselamaten ras kebebasen si iberekenNa man banta kerina. Ergiah-giah kita muat bagin i bas Kebaktin Minggu, PA Moria, PJJ ras dahin-dahin si debanna. Sabap arah dahin enda, tambah ka penandaita ras pemetehta kerna sura-sura Dibata.

Si nikapken liturgi HDS i bas tahun enda e me diberu-diberu i Nigeria nari. Diberu-diberu e ngalaken erbage tantangen kegeluhen, e me: ketidaksetaraan gender, kemiskinan, kurangnya akses Pendidikan. I bas bagin Utara Nigeria, la lit hak diberu guna ndatken pendidiken erbahansa erbaleng i bas dahin-dahin sosial. Erbage kekerasen si jadi i bas rumah tangga; kekerasen fisik, seksual, emosional ras mental. Budaya Nigeria ndukung kekerasen nandangi diberu guna kiniraturen (pendisplinan). Bentuk-bentuk kekerasen si jadi e me pemerkosan, serangen asam, текрекі diberu, hukumen fisik ras sidebanna. 

Arah kegeluhen diberu-diberu Nigeria enda erlajar kita guna tetap erpengendes man Dibata i bas kerina situasi kegeluhenta. Moria pe melala denga kel ngalaken tantangen tapi isikapken Dibata pengadi-ngadin man banta.

Diskusi dan Aksi:

1.    Uga nge sedekah enda pemahamenta kerna Jesus si mereken pengadi-ngadin man manusia? Turikenlah!

2.    Aksi: erbahan jam Doa. Tentuken wari dingen jam guna ertoto ras-ras. Topik si man totonken: Diberu-diberu Nigeria bagi siorati kita i bas bahan PA.

Pdt. Linawati Br Ginting