Bahan PJJ 19 – 25 April 2026

NGOGE KITAB

2 Raja-raja 22: 8 – 13

22:8 Berkatalah imam besar Hilkia, kepada Safan, panitera itu: “Telah kutemukan kitab Taurat itu di rumah TUHAN!” Lalu Hilkia memberikan kitab itu kepada Safan, dan Safan terus membacanya.
22:9 Kemudian Safan, panitera itu, masuk menghadap raja, disampaikannyalah kabar tentang itu kepada raja: “Hamba-hambamu ini telah mengambil seluruh uang yang terdapat di rumah TUHAN dan memberikannya ke tangan para pekerja yang diangkat mengawasi rumah itu.”
22:10 Safan, panitera itu, memberitahukan juga kepada raja: “Imam Hilkia telah memberikan kitab kepadaku,” lalu Safan membacakannya di depan raja.
22:11 Segera sesudah raja mendengar perkataan kitab Taurat itu, dikoyakkannyalah pakaiannya.
22:12 Kemudian raja memberi perintah kepada imam Hilkia, kepada Ahikam bin Safan, kepada Akhbor bin Mikha, kepada Safan, panitera itu, dan kepada Asaya, hamba raja, katanya:
22:13 “Pergilah, mintalah petunjuk TUHAN bagiku, bagi rakyat dan bagi seluruh Yehuda, tentang perkataan kitab yang ditemukan ini, sebab hebat kehangatan murka TUHAN yang bernyala-nyala terhadap kita, oleh karena nenek moyang kita tidak mendengarkan perkataan kitab ini dengan berbuat tepat seperti yang tertulis di dalamnya.”

2 Raja-raja 22: 8 – 13

22:8 Isehken Sapan perentah raja man Hilkia, jenari ikataken Hilkia man bana maka enggo idatna kitap Undang-undang i bas Rumah Pertoton. Ibereken Hilkia man bana kitap e, e maka ioge Sapan.
22:9 Kenca bage mulihken ia ndahi raja. Ngelapor ia man raja nina, “Duit si lit i bas Rumah Pertoton e enggo ibuat suruh-suruhenndu, janah enggo iberekenna man si ertanggung jawab pehuli Rumah Pertoton e.”
22:10 Janah kenca e nina, “Enda lit sada kitap e ibereken Hilkia man bangku.” E maka iogena alu sora megang man raja.
22:11 Kenca ibegi raja isi kitap e icaingkenna uisna perban biarna.
22:12 Minter iberekenna perentahna man imam Hilkia, man Ahikam anak Sapan, man Akbor anak Mikayah, man Sapan, sekretaris istana, ras man Asaya, ajudan raja. Nina raja man kalak enda kerina,
22:13 “To sungkuni TUHAN kai pedahNa man bangku ras man kerina kalak Juda kerna pengajaren si lit i bas kitap enda. Nembeh TUHAN man banta erkiteken nini-nininta la ngelakoken kai si arus ilakoken rikutken si tersurat i bas kitap enda.”

(Konfesi membaca Alkitab/KBA)

MODEL PJJ : KESAKSIN

KATA PERLEBE

Ngoge e melala kal manfaatna guna perukuren bage pe emosi mental bas kegeluhenta si tep tep wari. Misalna; alu ngoge reh tambahna pemetehta/wawasen kerna sejarah, sains/ilmu, budaya, rsd, bage pe nambahi pemetehta i bas Bahasa; kosa kata, tata Bahasa, bage pe komunikasinta. Arah ngoge pe sitingkatken ka empati-ta (rate mekuah) sabab ngasup kita ngangkai perukuren kalak si deban, ningkatken memori/daya ingatta. Janah nggit rusur ngoge eme sada i bas kebiasan si mehuli man dalanenken bas kegeluhenta enda.

Terlebih ka adina sioge kita eme Pustaka si Badia, la pemetehta ngenca tambah alu turi-turin si lit i bassa tapi pe kinitekenta reh paguhna. Itengah-tengah gerejanta GBKP, pengakun sipemenana (Konfesi) eme Pustaka si Badia. Engkai maka enda jadi konfesi si pemena? Sabab alu ngoge Pustaka si Badia kita nandai Dibata si isembah kita ras kerina perbahanenNa (pernyataan diriNa, sura-suraNa, penemaniNa, pengkawaliNa bage pe keselamaten siiberekenNa) janah si e kerina guna kiniulin kegeluhen kalak si tek man baNa.

Konfesi GBKP kerna Pustaka si Badia: kami percaya bahwa Alkitab adalah Firman Allah yang ditulis oleh manusia dengan ilham Roh Kudus (2 Timotius 3: 16; 2 Petrus 1: 21). 1 Ertina Kesah si Badia e me si nampati, ndorong, mbimbing bage pe si ngarahken si nuratken isi Pustaka si Badia e. Alu bage kata- katana, bahasana nuriken kerna tenah Kata Dibata gelah kalak si tek nggeluh alu mehuli. Sabab lalit pernah ngasup kalak nehken berita arah peratenna jine.

ISI

Raja Josia eme raja si nguda denga usiana merentah Juda

eme usia 8 tahun. Janah lit 31 tahun ia merentah kerajan Juda i Jerusalem. Josia ngelakoken kai si ngena ate Dibata; iikutkenna usihen si ibahan ninina Raja Daud, dingen sitik pe la ia nimpang i bas kerina undang-undang nari. Lit empat penanda umur raja Josia i bas ngelakoken pembaharuan, eme:

1. I bas umur 8 tahun ije me ia “ndarami” Dibata (erlajar nandai Dibata).
2. I bas umur 12 tahun iperperkenna batar-batar ingan penembahen, patung-patung sesembahen i Juda bage pe i
3. I bas umur 18 tahun ilakokenna pembersihen Rumah Tuhan, mpekena-kena si enggo ceda gelah reh sikapna ngelakoken kebaktin i bas ingan ersembah man Tuhan.
4. I bas umur 26 tahun (oratenta PJJ sekalenda) i bas tahun pesepuluhwaluhken. Raja Josia nuruh sekretaris istana, eme Sapan anak Asalia, kempu Mesullam, ku Rumah Pertoton gelahna ndahi Imam Hilkia mindo laporen kerna duit siipepulung imam si ertugas i bas pintun Rumah Pertoton gelah iberekenna man kalak si ertanggung jabab mpekena- kena rumah pertoton. Kenca isehken Sapan perentah enda man Hilkia, jenari nina Hilkia idatna Kitab Undang- undang/Torat i bas Rumah Pertoton. E maka iogena alu megang man raja. Kitab enda igelari pe Kitab Deuteronomium entah pe bagin arah Kitab Taurat Musa.

Julian Morgenstern nurikenca: maka Rumah Pertoton (Sinagoge) e lit menaken pembaharuan siibahan Josia, asum mesbah-mesbah bage pe uruk-uruk pengorbanen irontaskenna. Kerna pendapat si enda idukung J. Weingreen maka Josia erban ingan si deban guna nehken pertoton ras nehken persembahen/korban bage pe ingan-ingan guna ngoge Kitab. 2
Bage iogeken Sapan isi kitab e, icaingken Raja Josia uisna. Tradisi ncaingken uis asum si e nandakenca kecedan ate ras pertobaten. Bage me ilakokenna perban mbiarna. Kenca si e siilakoken Josia e me mindo gelah Nabi Hulda, imam-imam, sekretaris istana bage pe ajudan raja gelah nungkun ia kerina man Tuhan kai pedahNa kempak Josia ras man kerina kalak Juda kerna pengajaren si lit i bas kitab ndai. Tole nina Josia maka enggo nembeh ate Tuhan ban nini-nininta la ngelakoken rikutken si tersurat i bas kitab enda. Adina siterusken ngogesa tole kai dage nina Dibata erkelangken Nabi Hulda? Nandangi reh me ukumen kempak Juda sabab mbelin me dosa-dosa Bangsa Israel e. Tapi, ban kiniteruken ukur Josia maka ukumen e lenga isehken Dibata asum Josia nggeluh (ay. 19-20).

PENGKENAINA

Selaku kalak si erkiniteken iarapken si litken min waktunta guna ngoge isi Pustaka si Badia. Alu bage tole reh mbagesna penandainta kempak Dibata siisembah kita, hubungenta ras Dibata pe reh deherna, kinitekenta pe reh paguhna janah ngasup pe kita mereken jababen si tepat nandangi pengajaren- pengajaren si la payo. Mehuli ka pe adi sibabai jabunta ngelitken waktu guna ngoge Pustaka si Badia “Bergema bacaan Alkitab di rumah kita.”

Labo jadi hal si mesera situhuna guna ngoge Pustaka si Badia enda, sabab arah HP enggo banci kita ngoge Pustaka si Badia, katawari ras ija pa pe. Masalahna genduari enda labo mesera ndarami Pustaka si Badia tapi si meserana eme ukur si ersuruh guna ngogesa, madin siakap mbuka Media Sosial, jenari la sigejap sibegiken me pengajaren-pengajaren si papak arah Media Sosial si mabai kita ndauh arah kata Dibata sikedungenna mabai kita murtad nadingken Jesus bahkan lanai kedungenna erkiniteken ntah la nai er-agama pe.

Kelas Baca Alkitab (KBA) sada unit i bas gerejanta GBKP simabai perpulungen (anak ras dewasa) guna ngoge Pustaka si Badia alu mbuka kelas/perjumpan baik secara langsung/tatap muka entah pe online/zoom. Pustaka si Badianta (Kejadin seh Ketangkasen) si risiken 1.189 pasal ras 30.786 ayat, enggo enterem kalak si ndungi ngoge Pustaka si Badia, deba tole-tolen ia, seh maka adina enggo dung ogena seh kitab Ketangkasen, iulihina ka arah kitab Kejadin.

DISKUSI :

1. Turiken manfaat ngoge Pustaka si Badia man banta pribadi lepas pribadi (kesaksin).

AKSI :

Bentuklah Kelas Baca Alkitab (KBA) bas PJJnta gelahna lit dalanta jumpa guna ngoge Pustaka si Badia alu ratur dingen meriah janah si dat maknana man banta.

USULEN ENDE-ENDEN:

1. KEE GBKP 432 : 1-2 KataNdu Tuhan
2. KEE GBKP 204 Kata Ni Dibata
3. Kubuka Alkitab Lalu Kubaca
4. FirmanMu Pelita Bagi Kakiku

DAFTAR BACAAN :

1. Pustaka si Badia
2. Buku Saku Konfesi GBKP
3. H. Rowley, Ibadat Israel Kuno
4. Christopher H. Wright and J. Lamb, Understanding and using the bible