Bahan PJJ 21 – 27 Juni 2026

PERPULUNGEN SI ISELAMATKEN TUHAN

Perbahanen Rasul-Rasul 2:43-47

Kisah Para Rasul 2: 43 – 47

2:43 Maka ketakutanlah mereka semua, sedang rasul-rasul itu mengadakan banyak mujizat dan tanda.
2:44 Dan semua orang yang telah menjadi percaya tetap bersatu, dan segala kepunyaan mereka adalah kepunyaan bersama,
2:45 dan selalu ada dari mereka yang menjual harta miliknya, lalu membagi-bagikannya kepada semua orang sesuai dengan keperluan masing-masing.
2:46 Dengan bertekun dan dengan sehati mereka berkumpul tiap-tiap hari dalam Bait Allah. Mereka memecahkan roti di rumah masing-masing secara bergilir dan makan bersama-sama dengan gembira dan dengan tulus hati,
2:47 sambil memuji Allah. Dan mereka disukai semua orang. Dan tiap-tiap hari Tuhan menambah jumlah mereka dengan orang yang diselamatkan.

Kisah Para Rasul 2: 43 – 47

Kalak si tek man Jesus nggeluh sikeleng-kelengen

2:43 Melala tanda-tanda sengget ras kejadin-kejadin si mejin ibahan rasul-rasul. Perbahan si e kerina kalak e erkemalangen man Dibata. 

2:44 Kerina kalak si enggo tek man Jesus e tetap pulung ras-ras janah kai si lit i bas ia ipakena ras-ras. 
2:45 Idayakenna taneh ras erta-ertana janah duitna ibagi-bagikenna sue ras keperlun sekalak-sekalak.
2:46 Alu ersada ukur tep-tep wari ia pulung i bas Rumah Pertoton. Ras-ras ia kerina man i bas rumahna alu meriah dingen ukur meteruk.
2:47 Ipujina Dibata, janah kerina kalak erngena ate man perpulungen e. Tep-tep wari itambahi Tuhan ku perpulungen e kalak si iselamatkenNa.

(Konfesi Gereja Tidak Hanya Fokus Kepada Program Tapi Pada Pertumbuhan Iman Jemaat)

MODEL PJJ: PUJIN

KATA PERLEBE

Gereja eme panteken Dibata arah KesahNa Si Badia erpalasken kiniteken man Tuhan Jesus Kristus guna sada tujun eme jadi sira ras terang ku tengah-tengah doni enda. Gereja e biakna badia (isendiriken, ikhususken, nen 1Petrus 2:9,10), sada (kesatuan gereja i bas Kristus aminna pe melala alirenna), am (umum, iperuntukken man kerina manusia alu la erndobahen). Tujun litna gereja lit dua dampar eme sipemena ku bas guna mendidik, membina ras ngajari perpulungen seh ku tingkat kesempurnaan Kristus (Epesus 4:13). Erkiteken fungsi gereja enda maka lit istilah gereja eme nande man kalak si erkiniteken. Sipeduaken eme nehken Berita Si Meriah, sabab Dibata ersura segelah kerina manusia iselamatken (1Timotius 2:4). Arah si enda turah istilah kita enda aron Dibata guna nehken pasu-pasu Dibata nandai seisi doni enda. Jadi alu kita ngantuasi erti keberadaan ras tujun gereja iajuk kita guna ncakapken GBKP si malem enda enggo nge tuhu jadi gereja bagi sinisuraken Dibata? Melala program ras anggaren, enggo nge nehi tujunna jadi nande bage pe aron Dibata alu maba pasu-pasu man doni enda?

ISI

Kata Dibata sinitulisken Lukas i bas ogennta eme kenca nusur Kesah Si Badia, e maka curak kegeluhen perpulungen enda eme buah pendahin Kesah si Badia nge. Siidah pendahin Kesah si Badia e:

1. Melala tanda sengget ras kejadin-kejadin si mejin ibahan rasul-rasul. Erkiteken tanda sengget ras kejadin si mejin e maka nterem kalak erkemalangen man Dibata (ay. 43). Si idah i jenda karya Kristus labo ngadi kenca IA nangkih ku Surga, tapi iterusken Kesah Si Badia erkelangken ajar-ajar. Tanda sengget ras kejadin si mejin eme bukti si la terbantahken ija Dibata hadir arah pendahin rasul-rasul. Kalak Jahudi paksa e njadiken tanda sengget sebage bukti sekalak jelma ipake Dibata, janah e me dasar maka kai siturikenna tuhu i bas Dibata nari (Bnd. Matius 11:4-5, Johanes 2:18). Tanda sengget ras kejadin simejin sinilakoken sekalak jelma ncidahken otoritasna reh i bas Dibata, dingen membuktiken ia labo rasul palsu. Tanda sengget labo tujun, sabab tujun sada ngenca eme gelah kalak tek kerna Jesus Kristus Tuhan ras Juruselamat si enggo isuruh Dibata nebusi dosa-dosa doni enda. Jadi tanda sengget ras kejadin simejin e membuktiken rasul eme pilihen ras persuruhen Tuhan alu bage nterem kalak si erkemalangen man Tuhan.
2. Tetap pulung ras-ras (koinonia), kai silit i bas ia ipakena ras- ras (diakonia), ersada ukur tiap wari pulung i rumah pertoton, ras-ras pulung alu ukur meriah ras ukur meteruk dingen ipujina Dibata. Awalna kalak e pulung i rumah pertoton kalak Jahudi dingen iikutkenna denga aturen agama Lambat laun terlebih kenca jadi penganiayaan maka perpulungen e memisahken diri. Amin gia kalak enda pulung i rumah pertoton kalak Jahudi dingen ipeliharana denga aturen Taurat, tapi simpersadaken ia kerinana lanai bo Taurat tapi Kristus ras KesahNA si Badia. Erkiteken Kristus ras KesahNA maka perpulungen e ngejapken persadan si tuhu-tuhu si petembil ras persadan-persadan si lit bas doni enda. Si lit i bas ia e la iakapna sekerajangenna sekalak, e maka iraskenna ras temanna sisada kiniteken.
3. Kerina kalak erngena ate man perpulungen, janah tiap wari lit kalak siitambahi Tuhan ku bas perpulungen e (buah kesaksin arah cara ngeluh perpulungen). Kesah si erdahin membentuk cara/sikap ngeluh perpulungen sierbahanca kalak erngena ate, seh maka Kesah e erdahin njemba ia bengket jadi kalak Kristen si ngaloken Kristus jadi

PENGKENAINA

Tema PJJta eme Perpulungen si iselamatken Tuhan ngajuk kita  ercurmin  arah  kegeluhen  perpulungen  si  pemena i Jerusalem. Pengorganisasianna lenga bagi sigundari, lenga lit nyusun program, APEN-ABEL, tuhu sederhana tapi secara maksimal icidahkenna biak gereja selaku Kula ni Kristus. Sikeleng-kelengen, tetap ersada dingen teridah buah kesaksianna tiap wari lit petobat baru si bengket ku bas perpulungen. Curak kegeluhen sicidahkenna eme tanda ia enggo ndatken keselamaten i bas Dibata nari.

Uga kerna gerejanta GBKP? Piga kalak nge bengket ku gerejanta (ertobat) erkiteken ngena ate kalak kecibal kegeluhen perpulungen bas GBKP enda? Melala sibahan program rikut APEN-ABELna, tapi enggo nge nehi tujun jadi nande man anggotana ras aron Dibata maba pasu-pasu man doni enda? Reh belinna kiniteken perpulungen dingen litna kalak sirobah dingen jera arah sikap ngeluh dingen kesaksinnta e jadi ukuren keberhasilen gereja i bas ndahiken dahinNa.

Perpulungen si pemena ras kita gundari payo erbeda konteks jaman, tapi sierdahin tetap nge Kesah Si Badia e. I bas paksa e pe melala nge kalak mesera, lit nge perbeben ras kiniseran apai ka dungna kalak e iuru-uru kalak Jahudi. Tapi kecibal geluh la ngolangi ia tetap ersada, ersaksi ras ngelai seh kalak si deban erngena ate man perpulungen e.

DISKUSI :

1. Adi si oge ulihi bahan PJJnta wari enda, biak si uga ngge si perlu si kembangken gelah PJJnta banci bagi perpulungen si pemana?
2. Kai nge si erbahanca malem dingen meriah ukurndu nggeluh bas GBKP sedekah enda, dingen kai nari akapndu si perlu man benahen kerna kegeluhen perpulungen bas dampar kiniersadan, kesaksin ras i bas nehken kekelengen?

USULEN ENDE-ENDEN:

1. KEE 209: 1, 4 Perpulungen Ersadalah
2. KEE 217: 1, 2 Meriahlah Ukurta Mujikenca
3. KEE 295: 1, 3 Meriah kal ukurku
4. KEE 465: 1, 2 Kita k’rina anak-anak Tuhan